«Ժողովուրդ» օրաթերթը նոր տեսահոլովակի, անձնական կյանքի, անցյալից քաղած դասերի, դստեր համար ե՛ւ մայր, ե՛ւ հայր լինելու մասին զրուցել է դերասանուհի, երգչուհի Իվետա Եդիգարյանի հետ:
-Իվետա՛, «Անուղղելիները» նախագծից բացի` այլ նախագծերում ընդգրկվելու հրավերներ ունե՞ք:
-Ժամանակի սղության պատճառով հազիվ եմ հասցնում այլ գործերով զբաղվել, բայց նկարահանել ենք նոր տեսահոլովակ, որի պրեմիերան կլինի փետրվարին: Հոլովակը նկարահանվել է Էդգար Գեւորգյանի հետ դուետի հիման վրա: Դա մեր առաջին համագործակցությունն է: Կարծում եմ` հետաքրքիր է ստացվել: Ինչ վերաբերում է նոր ֆիլմերին կամ սերիալներին, առաջարկներ ստանում եմ, պարզապես անհնար է համատեղել աշխատանքը մի քանի նմանատիպ նախագծերում:
-Մի փոքր անձնականից խոսենք: Կցանկանայի՞ք, որ Ձեր կողքի տղամարդը դերասան լիներ: Որքանով տեղյակ եմ` Ձեր նախկին ամուսինը Ձեր ոլորտի հետ կապ չուներ:
-Այո՛, նա ոչ մի առնչություն չուներ մեր ասպարեզի հետ: Առհասարակ, շատ հետաքրքիր է շփվել, կյանք կապել արվեստի մարդկանց հետ: Նրանք տարբերվում են իրենց էմոցիաներով: Բայց ես ինքս էլ շատ էմոցիոնալ եմ, ու դա մեզ մի քիչ շատ կլինի (ծիծաղում է): Ուստի կցանկանայի, որ իմ կողքի տղամարդն այլ ասպարեզից լիներ, բայց, ինչպես ասում են, սրտին չես թելադրի, եթե ստացվի հակառակը, ոչինչ չեմ կարող անել: Միայն մի պատճառով կցանկանայի, որ ամուսինս դերասան լիներ. որպեսզի քիչ խանդեր: Այս ասպարեզի մարդիկ քաջատեղյակ են բոլոր խնդիրներին եւ միմյանց լավ են հասկանում:
-Կա՞ն որակներ, որոնցով ցանկալի է` օժտված լինի Ձեր կողքի տղամարդը, եւ որակներ, որոնք պարզապես չեք հանդուրժի:
-Առհասարակ, չեմ հանդուրժում կեղծավոր, ստախոս եւ երկերեսանի մարդկանց: Ինձ ճանաչողներն ասում են, որ մաքուր եւ ազնիվ մարդ եմ: Կցանկանամ` իմ տեսակի մարդ լինի կողքիս: Ես նվիրվող տեսակ եմ ցանկացած հարաբերություններում:
-Իսկ այլազգի տղամարդու հետ կամուսնանայի՞ք:
-Ես մեր հայերին սիրում եմ, կարծում եմ` ավելի հեշտ լեզու կգտնեմ հայ, քան այլազգի տղամարդու հետ:
-Իվետա՛, անցյալից ի՞նչ դասեր եք քաղել` կապված գործնականի եւ անձնականի հետ:
-Դրանք բազմաթիվ են: Եթե նախկինում շատ էի վստահում մարդկանց, հիմա այլ կերպ եմ ապրում, փորձում եմ որոշակի հեռավորություն պահել: Նախկինում շատ ընկերներ ունեի, որոնք, սակայն, «մաղվեցին»: Հիմա մտերիմ մարդիկ քչացել են, ունեմ մի քանի հավատարիմ ընկեր եւ վերջ: Կարող եմ խոստովանել, որ մարդկանց լավ չեմ ճանաչում, ամեն անգամ չեմ կարողանում նրանց չհավատալ եւ չվստահել, եթե նույնիսկ դրա համար ունեմ հիմքեր: Ինչ վերաբերում է կոնկրետ կին-տղամարդ հարաբերություններին, ապա եկել եմ այն եզրակացության, որ միայն սրտի ձայնին լսելը սխալ է: Երբեմն, երբ սիրում ես, միտքդ մթագնում է. դա սխալ է: Այդ դեպքում դու դիմացինի մեջ շատ որակներ չես նկատում, սկսում ես ինքդ քեզ խաբել: Բայց չեմ կարող նաեւ առանց սիրելու, հաշվարկով սիրել: Ես էմոցիոնալ մարդ եմ եւ երբեք չեմ փոխվի. տարիքը կապ չունի: Պարզապես, պետք է դրանով հանդերձ սթափ լինել, տեսնել մարդու արժանիքները, նոր միայն նրան մոտ թողնել:
-Ձեր դստեր համար, ինչպես Դուք եք ասում, ե՛ւ մայր եք, ե՛ւ հայր: Դժվար չէ՞ կրել անընդհատ ուժեղ լինելու բեռը:
-Երբեմն լինում է, որ հոգնում եմ, չնայած, փառք Աստծո, ունեմ ծնողներ, որոնք մեջքիս կանգնած են: Անչափ ուրախ եմ, որ երբ ես աշխատանքի եմ, դստերս պահում եւ դաստիարակում է մայրս եւ այնքան ճիշտ դաստիարակություն է տալիս նրան, որ մտածում եմ` գուցե այդ հարցում ես թերանայի, քանի որ տանը շատ քիչ եմ լինում: Բայց ուրախ լինելով հանդերձ` շատ կարոտում եմ դստերս, ափսոսում եմ, որ քիչ ժամանակ եմ կարողանում հատկացնել նրան: Երբեմն հոգնում եմ «տղամարդ» լինելուց, ուժեղ լինելուց, բայց դա մի պահ է տեւում: Կյանքն ինձ սովորեցրել է չվհատվել եւ առաջ գնալ:
Զրուցեց ԱՆԻ ԱՆՏՈՆՅԱՆԸ
«ԵՎՐԱՏԵՍԻԼՅԱՆ ԵՐԳԸ ԳՐԵԼ ԵՄ ԵՐԿՈՒ ԳԻՇԵՐՈՒՄ»
«Դեպի Եվրատեսիլ» մրցույթն Առաջին ալիքի եթերում կհեռարձակվի փետրվարին: Նախագծի հաղթողին կորոշեն հեռուստադիտողները եւ միջազգային փորձագետներից կազմված ժյուրին` ձայների 50/50 հարաբերակցությամբ: Հաղթողը կհայտնվի եվրատեսիլյան բեմում: Մրցույթի մասնակիցների թվում են Թամար Կապրելյանը, Սուրեն Պողոսյանը, Ամալյա Մարգարյանը, Հայկ Կասպարովը, Nemra խումբը, Սեւակ Խանաղյանը, Angel-ը, Տյոմը, Մհերը, Alternative-ը, «Գաթա» բենդը եւ այլք:
Այս անգամ «Ժողովուրդ» օրաթերթը զրուցել է հայ ազգային, ժողովրդական երաժշտություն ներկայացնող «Գաթա» բենդի հետ հանդես եկող վոկալիստ Անդրանիկ սարկավագ Մանուկյանի հետ: Նա խոստովանեց, որ ինչպես շատերի, հենց իր համար եւս մասնակցությունը «Դեպի Եվրատեսիլին» անսպասելի է ստացվել. «Ես ամենեւին պատրաստ չէի դրան, բայց Հանրային հեռուստաընկերության աշխատակիցների կողմից ստացա առաջարկ: Սկզբում բացատրում էի, որ մենք այլ ֆորմատի աշխատանքներ ենք ներկայացնում, անգլերեն չենք երգում, բայց մեզ պատասխանեցին, որ միջազգային մրցույթի ձեւաչափը փոխվել է, եւ հեղինակային, ազգային երգերին մրցույթի շրջանակում մեծ տեղ են տալիս: Այդպիսով` տվեցի իմ համաձայնությունը: Հետո այդ մասին ասացի խմբի պրոդյուսեր Գարիկ Առաքելյանին: Նա եւս նշում էր, որ պատրաստ չենք, որ ժամանակ էր հարկավոր: Եվ այնպես ստացվեց, որ ընդամենը երկու գիշերում գրեցի «Շողա» երգը: Հետո արդեն կատարվեց նաեւ գործիքավորումը»,-պատմեց մեր զրուցակիցը:
Հարցին, թե պատկերացնում է արդյո՞ք «Գաթա» բենդին եւ իրեն եվրոպական բեմում, Անդրանիկ Մանուկյանը պատասխանեց, թե բազմիցս առիթ են ունեցել ներկայացնելու հայ երաժշտությունը եվրոպական բեմերում` տարբեր միջազգային փառատոների շրջանակներում. «Սա էլ մի հարթակ է` դա եւս մեկ անգամ իրականացնելու համար: Ընդ որում, պետք է ասեմ, որ մշտապես հետաքրքրել ենք եվրոպացի հանդիսատեսին, մասնավորապես լուրջ մասնագետների, որոնք հետաքրքրված են ազգային երաժշտությամբ եւ գնահատում են հայ երգի առանձնահատկությունները»,-ասաց նա:
Մենք հետաքրքրվեցինք` «Դեպի Եվրատեսիլի» մասնակիցներից ո՞ւմ է հավանում վոկալիստը. «Բոլորին հավանում եմ, բոլորն էլ հայ աշխարհն են ներկայացնում: Եթե մերոնք կարողանան գրագետ մատուցել երգը, աշխատեցնել բանալին եւ դեպի Եվրոպա դուռը բացել, ես ուրախ կլինեմ, բայց եթե բեմական արվեստը պետք է ծառայի անառակությանը, դա ինձ համար արվեստ չէ: Եթե «Գաթա» բենդը հայտնվի եվրոպական բեմում, մեր շոուն կլինի մեր էմոցիան եւ ներսից եկող կատարումը»,-եզրափակեց Անդրանիկ Մանուկյանը:
ԱՆՆԱ ԲԱԲԱՋԱՆՅԱՆ
.gif)
