ԵՐԲԵՔ ՉԵՄ ԳՆԱՑԵԼ, ՈՐԵՎԷ ԴՈՒՌ ԾԵԾԵԼ

Քաղաքաշինության պետական կոմիտեն ամփոփել է նախորդ տարի կատարած աշխատանքները: Հաշվետվության համաձայն` 90 տոկոսով լուծված է աղետի գոտում բնակարանային ապահովման խնդիրը, իսկ մնացած 10 տոկոսը կամ գյուղական բնակավայրերի 542 ընտանիքի խնդիրը նախատեսված է լուծել մինչեւ 2020 թվականը: Քաղաքաշինության ոլորտում առկա խնդիրների եւ հետագա պաշտոնավարման թեմայով «Ժողովուրդ» օրաթերթը զրուցել է քաղաքաշինության պետական կոմիտեի նախագահ Նարեկ Սարգսյանի հետ:

-Պարո՛ն Սարգսյան, վերջին տարիներին մի քանի շենքեր քանդվեցին, որոնք վթարային չէին, արժեք էին ներկայացնում: Հիմա կա՞ որեւէ շենք, հին կառույց մայրաքաղաքում, որը վթարայնություն չունի, բայց նախատեսվում է քանդել:
-Եթե քանդվել են շենքեր, որոնք արժեք չեն ունեցել, ուրեմն խնդիր չկա: Եթե քանդվել են նրանք, որոնք արժեք են, ուրեմն ինչ-որ պատճառով են քանդվել: Հավանաբար, դա վերաբերել է փողոցների ցանցի զարգացմանը, նոր փողոցներ կառուցելուն կամ ընդլայնելուն: Միշտ որեւէ հստակ հիմնավորում եղել է: Բայց այս պահին ես չեմ կարող ասել որեւէ արժեք ներկայացնող շենք, որը վտանգի մեջ է: Մենք խնդիր ունենք օդանավակայանի հին շենքի հետ, որը հույս ունեմ` ի վերջո, կլուծվի:
-Արժեք ներկայացնող վերջին շենքերից մեկն Արամի փողոցում գտնվողն էր, որը, հիշում եք` Լեւոն Իգիթյանը սառայ էր անվանում, բավական աղմուկ բարձրացավ: Այնտեղ այժմ ոչ մի շարժ չկա: Ի՞նչ նպատակով, ի վերջո, քանդվեց այդ շինությունը:
-Այդ հատվածում նախագծային խնդիրներ կային, որոնք իմ տվյալներով` լուծվել են արդեն, եւ շատ շուտով այդ հատվածը եւս կկառուցվի: Դա Հյուսիսային պողոտայի ծրագրի մի մասն է:
-Իսկ Արամ Մանուկյանի տան տարածքում ի՞նչ է կառուցվելու:
-Ներդրող կա, որն իրականացնում է «Հին Երեւան» ներդրումային ծրագիրը: Դրանք հիմնականում առեւտրային, մշակութային օբյեկտներ են լինելու: Խնդիրն այն է, որ Արամ Մանուկյանի շենքի մի զգալի հատված տրամադրվի որպես նրա թանգարան:
-Պարո՛ն Սարգսյան, Դուք եղել եք Երեւանի գլխավոր ճարտարապետը, քաղաքաշինության նախարարը, այժմ էլ քաղաքաշինության կոմիտեն եք ղեկավարում: Ճարտարապետների որոշ մասը Ձեզ մեղադրում է, որ Դուք Երեւանի դեմքն աղճատեցիք: Դուք պատասխան ունե՞ք այդ մարդկանց:
-Եթե որեւէ մեկին են մեղադրում, անկախ նրանից` իրավացի են, թե ոչ, որովհետեւ այդ մեղադրանքները մեծ մասամբ, շատ մեծ մասամբ կապ չունեն կոնկրետ իմ գործունեության հետ: Բայց, միեւնույն է, փաստը դրական է: Դա նշանակում է` ընդունում են ինչ-որ մեկին եւ պահանջում են այդ մեկից: Լավ կլիներ, որ ինձ ընդհանրապես չհիշեին:
-Այսինքն` մեղադրանքներին դրակա՞ն եք վերաբերվում:
-Իհարկե, քաղաքում եղել են եւ շատ լավ բաներ, որ ակնհայտ են, եւ բազմաթիվ մարդիկ դա տեսնում են, եւ եղել են խեղաթյուրումներ, կապ չունի, թե որ ինստանցիայում, ում մեղքով: Բայց նաեւ ուրիշ բան ասեմ. երիտասարդներին այնքան են պատմել, որ այս վայրենիները եկան, քանդեցին քաղաքի կենտրոնը, հիմա մարդիկ, որ չեն տեսել, օրինակ, Հյուսիսային պողոտան նախկինում, տեսնում են այդ լուսանկարները եւ զարմացած են: Նրանց գլուխը մտցրել են, որ այստեղ եղել է մի հրաշք տարածք: Այդպիսի բան չի եղել:
-Կոնդ թաղամասում արդեն կառուցվում է շենք, որտեղ պետք է ապրի այնտեղի բնակիչների մի մասը` տների օտարումից հետո: Իսկ մյուս մասի համար որեւէ ծրագիր նախատեսվո՞ւմ է: Մյուս կողմից բավական անբարեկարգ վիճակ է թաղամասում եւ մայրաքաղաքի կենտրոնի համար ամոթալի:
-Կոնդը մշտապես մեր ուշադրության ներքո է. անպայման կունենա մեծ վերակառուցման ծրագիր: Հյուսիսային պողոտա, Ֆիրդուս, գլխավոր պողոտա եւ Կոնդ, սրանք մեր առաջնահերթություններն են: Կոնդի լուծման խթաններից մեկը տեսնում եմ նաեւ Ամիրյան փողոցը Պռոշյան փողոցին ուղիղ կապելը` Դվին հյուրանոցի կողքով:
-Երբ անձը որեւէ տարածք է գնում, կարող է իր ցանկացած գույնով, ոճով շենք կառուցել ու կարող է, օրինակ, կարմիր, կապույտ, կանաչ երանգավորում տալ: Լինելո՞ւ է վերահսկողություն, որպեսզի գնորդին ասվի` այս տարածքում այս գույնի ու ոճի շենք չի կարելի կառուցել, քանի որ ընդհանուր տարածքին համահունչ չէ:
-Դա լուրջ խնդիր է մեր ժողովրդի մոտ, առհասարակ, քաղաքաշինական մշակույթի պրոբլեմ կա, որը հույս ունեմ` նոր օրենքներով կկարողանանք լուծել:
-Ըստ Ձեզ` գո՞հ են Ձեր աշխատանքից, պարո՛ն Սարգսյան: Դուք կլինե՞ք նոր կառավարությունում:
-Ես երբեք չեմ գնացել, որեւէ դուռ ծեծել, ամբողջ կյանքում ասել` գիտեք, ինձ բերեք, նշանակեք: Այդպիսի բան երբեք չի եղել: Եթե կա կարիքը` որպես ինչ-որ մի բան կարող մարդ, այդպես կգնահատվի, մենք կորոշենք: Եթե այդպես չի գնահատվի, ես ճարտարապետ եմ, եւ մշտապես աշխատում եմ որպես ճարտարապետ եւ կշարունակեմ աշխատել:

Զրուցեց ՄԵՐԻ ՄԱՐՏԻՐՈՍՅԱՆԸ

«ՊԱՆՏԵՐԱՆ» ԴԻԼԻՋԱՆԻՑ ՀԵՌԱՑԱՎ
Տավուշի մարզի առաջին ատյանի դատարանի Բերդ քաղաքի նստավայրում ներկայումս շարունակվում է Դիլիջանի ազգային պարկի տարածքի պահպանությունն իրականացրած «Պանտերա Սեքյուրիթի» ՍՊԸ պահնորդական տնակի հրկիզման քրգործով դատավարությունը: Հիշեցնենք` Դիլիջան քաղաքի բնակիչներ Մհեր Ալիխանյանին, Ժորա Մնացականյանին, Վոլոդյա Հակոբյանին, Գուրգեն Մնացականյանին, Արամ Ղուկասյանին մեղադրանք է առաջադրվել այն բանի համար, որ նրանք 2017թ. հոկտեմբերի 13-ին «Դիլիջան ազգային պարկ» ՊՈԱԿ «Շամախյան» տեղամասի «Պանտերա Սեքյուրիթի» ՍՊԸ-ի ուղեփակոցում, միմյանց հետ նախնական համաձայնությամբ, հասարակական կարգը կոպիտ կերպով խախտելու դիտավորությամբ, ինքնահաստատման եւ հասարակության հանդեպ երեւակայական գերազանցությունն արտահայտելու հանդուգն ձգտումով իրենց դժգոհություն են արտահայտել ուղեփակոցի տեղադրման առթիվ: Նրանց մեղադրանք է առաջադրվել ՀՀ քր. օր. 258 հոդվածի 3-րդ մասի 1-ին կետով («Խուլիգանությունը, որը զուգորդվել է անձի նկատմամբ բռնություն գործադրելով կամ դա գործադրելու սպառնալիքով, ինչպես նաեւ ուրիշի գույքը ոչնչացնելով կամ վնասելով, որը կատարվել է մի խումբ անձանց կամ կազմակերպված խմբի կողմից»): Մհեր Ալիխանյանի խափանման միջոցը ընտրվել է չհեռանալու մասին ստորագրությունը, մնացածներինը` գրավը: 2018թ. հունվարի 1-ին Դիլիջանի ազգային պարկի տարածքի հսկողությունը իրականացնող «Պանտերա Սեքյուրիթի» ընկերության պայմանագրի ժամկետը լրացել է, եւ այդ ընկերությունը հեռացել է Դիլիջանից: Ներկայումս ազգային պարկի պահպանությունն իրականացվում է այդ պարկի աշխատակիցների կողմից: Նրանց մեծ մասի աշխատավարձը բարձր չէ, ինչը կոռուպցիոն ռիսկեր է ծնում: Ազգային պարկի անտառապահներից, տեսուչներից շատերի աշխատանքային ժամը սահմանափակ է, ինչը նշանակում է, որ նրանք պատասխանատու չեն ազգային պարկում գիշերային ժամերին կատարվող ապօրինի ծառահատումների համար: Դիլիջանի ազգային պարկում ապօրինի հատումները շարունակվում են:

ՈՍԿԱՆ ՍԱՐԳՍՅԱՆ
Տավուշ

ՊԵՏՔ Է ՔԱՆԴՎԵՐ
Երեկ գիշեր Գյումրիում փլուզվել է Գ. Նժդեհի փողոցի թիվ 7 շենքի 4-րդ հարկը: Փրկարարները տարահանել են 11 բնակիչ, այդ թվում` 2 երեխա: Նկատենք, որ այդ շենքը վթարվել էր 88-ի ավերիչ երկրաշարժի հետեւանքով, եւ այս 30 տարիների ընթացքում այդպես էլ այնտեղ ամրացման աշխատանքներ չեն տարվել, չնայած բնակեցված է եղել: Գյումրու քաղաքապետարանի բնակտնտեսության եւ համատիրությունների համակարգման բաժնի պետ Վարդգես Սամսոնյանի խոսքով` շենքը սեփականատեր է ունեցել, եւ քաղաքապետարանի թույլտվությունն էլ կա, որ շենքը պետք է քանդվեր, բայց մինչեւ հիմա չէին քանդել: Թե ինչու, մեղմ ասած, անհասկանալի է: Այժմ քննարկում է տեղի ունենում, որպեսզի կազմակերպվեն քանդման աշխատանքները: Վ. Սամսոնյանի խոսքով` ներկայումս քննարկվում է նաեւ այն հարցը, թե ինչպես լուծեն տարհանված բնակիչների բնակարանների հարցը:

ՊՏՂԱՏՈՒ ՃԱՆՃԵՐ ԿԵՐԵՔ, ՎՆԱՍ ՉԷ

Օրեր առաջ «Ժողովուրդ» օրաթերթը գրել էր, որ «Մինի Բասկոնիա» ընկերության կողմից ՀՀ ներկրվող «Lutik» ապրանքատեսակի թթու վարունգի մեջ լիքը որդեր կան: ՀՀ քաղաքացի Էլեն Գրիգորյանը դա փաստող լուսանկար էր անգամ հրապարակել: Ըստ քաղաքացու` թթու վարունգը ժամկետի մեջ է եղել, որն էլ նա գնել էր «Կայզեր» սուպերմարկետից:

Եւ ահա, երեկ հնդկական արտադրող «Բնազրում Ագրո էքսպորտս» ընկերությունը «Lutik» ապրանքանիշի մարինացված վարունգի մեջ որդեր լինելու վերաբերյալ պարզաբանում է ներկայացրել: Բայց արտադրողի հայտարարությունից պարզվում է, որ այդքան էլ վնասակար չեն այդ որդերը: Ըստ այդմ, Հնդկաստանի Կարանտակ եւ Տամիլ-Նադու շրջաններում տարվա սեպտեմբեր-նոյեմբեր ամիսներին հայտնվում են պտղային ճանճեր, որոնց դեմ ինտենսիվ պայքար է տարվում. ինսեկդիցիդով (միջատների դեմ պայքարի դեղամիջոց) սրսկվում են դաշտերը, վարունգները վերամշակվում են թաց եւ չոր եղանակով: Քանի որ արտաքին դիտարկմամբ դրանք տեսանելի չեն, մեկ-երկու դեպք արձանագրվել է, երբ տարաների մեջ են հայտնվել թրթուրկիր վարունգներ: Բացի այս` արտադրողը պարտավորվել է պահածոյացման շրջանում լինել առավել զգոն: Մյուս կողմից, սակայն, նրանք շտապել են արդարանալ, որ պտղային ճանճը կամ դրա թրթուրները թեեւ փչացնում են պտղի որակը, սակայն մարդու առողջության համար վտանգավոր չեն:
Լավ է, որ այսքանից հետո հնդկական ընկերությունը մարդու օրգանիզմի վրա ճանճերի եւ թրթուրների օգտակար հատկությունների մասին դասախոսություն չի ներկայացրել` հավելելով, որ դրանք լայն կիրառում ունեն արեւելյան խոհանոցում: Չնայած, հիշեցնենք` «Մինի Բասկոնիա» ընկերության հիմնադիրը Եղիազար Գաբուզյանն է, ով դեռեւս 2014 թվականին լրատվամիջոցների հետ զրույցում հայտարարել էր, որ «նորմալ է ոլոռի մեջ մեկ հատիկ որդ գտնել, չէ՞ որ այն աճում է կանաչ դաշտերում»: Ապա արդարացել էր` նշելով. «Տարիներ առաջ էլ պահածո արտադրող մեկ այլ ընկերության արտադրանքում գորտ էր հայտնաբերվել, հետո ի՞նչ»:
Այս ամենից հետո եթե «Lutik» ապրանքատեսակի մեջ գորտ էլ հայտնաբերվի, ապա ընկերությունը դարձյալ կհայտարարի, որ այն մարդու առողջության համար վնասակար չէ, մանավանդ գորտը շատ է օգտագործվում ֆրանսիական խոհանոցում, ընդ որում, թանկարժեք ուտեստներից է:

ՍՅՈՒՆԷ ՀԱՄԲԱՐՁՈՒՄՅԱՆ