ԼՈՒՐ ԿԱԴՐ

Լուսանկարը` համացանցից

Համացանցում արդեն հայտնվել են 1500 դրամով վաճառվող դեղատոմսեր առաջարկող անձինք: Քաղաքացիներն առիթը բաց չեն թողնում` ՀՀ առողջապահության նախարարության այս որոշումը ծաղրելու համար: Հետաքրքիր է` կգտնվե՞ն մարդիկ, որոնք կօգտվեն այս ծառայությունից:

ՀԱՐՑ. Ես ուզում եմ իմանալ` բարձրագույն ուսումնական հաստատությունների դիմորդները ընդունելության դիմում-հայտում անվճար եւ վճարովի քանի՞ մասնագիտություններ կարող են նշել:

Նարինե Հակոբյան (28 տարեկան)

ՊԱՏԱՍԽԱՆ. Ն. Հակոբյանի հարցին ի պատասխան` տեղեկացնում ենք, որ դիմորդներն ընդունելության դիմում-հայտում իրենց ընտրությամբ եւ ցանկացած հաջորդականությամբ հայտագրում են մասնագիտությունները` ըստ ուսուցման անվճար եւ վճարովի համակարգերի:
Համաձայն ընդունելության դիմում-հայտի` դիմորդը կարող է մասնակցել մեկ կամ մի քանի բուհերի` մինչեւ երկու անվճար եւ մինչեւ ութ վճարովի մասնագիտությունների մրցույթին` հանձնելով այդ մասնագիտությունների համար սահմանված բոլոր քննությունները:

ՀՀ կրթության եւ գիտության նախարարություն

«ԺՈՂՈՎՈՒՐԴ». Դիմորդների փաստաթղթերն ընդունվում են տվյալ տարվա մայիսի 5-ից մինչեւ հունիսի 1-ը ընկած ժամանակահատվածում` մինչեւ ժամը 18:00-ն: ՀՀ երկքաղաքացիների եւ օտարերկրացիների, օտարերկրյա պետությունների ուսհաստատությունները տվյալ ուսումնական տարում ավարտած ՀՀ քաղաքացիների, նույն տարվա գարնանային զորակոչից զորացրված կամ մինչեւ հուլիսի 31-ը զորացրվող դիմորդների, նախնական մասնագիտական եւ միջին մասնագիտական ուսհաստատությունների տվյալ տարվա շրջանավարտների փաստաթղթերն ընդունվում են հունիսի 25-ից մինչեւ հուլիսի 2-ը` մինչեւ ժամը 18:00-ն:

ՀԱՐՑ. Խնդրում եմ ասեք` ի՞նչ նպատակով է իրականացվում բժշկասոցիալական փորձաքննություն. ի՞նչ է իրենից ենթադրում վերջինս: Եվ ուզում եմ իմանալ` եթե անձի առողջական վիճակը ծանր է եւ ի վիճակի չէ ներկայանալ բժշկասոցիալական փորձաքննության մարմին, ապա ինչպե՞ս պետք է տեղի ունենա նրա բժշկասոցիալական փորձաքննությունը:

Երանուհի Նալբանդյան (42 տարեկան, տնային տնտեսուհի)

ՊԱՏԱՍԽԱՆ. Տեղեկացնում ենք, որ անձին հաշմանդամ ճանաչելու` «հաշմանդամ երեխա» կարգավիճակ եւ հաշմանդամության խումբ սահմանելու, հաշմանդամ չճանաչելու, հաշմանդամության ժամկետ, պատճառական կապ, մահվան պատճառական կապ, մասնագիտական աշխատունակության կորստի աստիճան որոշելու, հաշմանդամի անհատական վերականգնողական ծրագիր մշակելու եւ հաստատելու, ժամանակավոր անաշխատունակության թերթիկի ժամկետի երկարացման թույլտվություն տալու: (Հիմք` ՀՀ կառավարության 02.03.06թ. թիվ 276-Ն որոշմամբ հաստատված կարգի 3-րդ կետ):
Հայտնում ենք նաեւ, որ հանձնաժողովը անձի բժշկասոցիալական փորձաքննությունը կարող է իրականացնել անձի գտնվելու վայրում, եթե անձը կամ նրա օրինական ներկայացուցիչը դրա մասին նշել է դիմումում` ներկայացնելով հեռակա կամ հիվանդանոցային փորձաքննություն իրականացնելու հիմքեր: (Հիմք` ՀՀ կառավարության 02.03.06թ. թիվ 276-Ն որոշմամբ հաստատված կարգի 11-րդ կետ):

Կենսաթոշակային համակարգի իրազեկման կենտրոն

«ԺՈՂՈՎՈՒՐԴ». Նշենք, որ բժշկասոցիալական փորձաքննության հանձնաժողովն իրավասություն ունի անձին լրացուցիչ հետազոտման ուղեգրելու` ախտորոշման ճշտման; հետազոտման հատուկ մեթոդների կիրառում պահանջող դեպքերում; ներկայացված բժշկական հիմքերի հավաստիությունը ճշտելու; ինչպես նաեւ անհրաժեշտ կամ լրացուցիչ տեղեկություններ ստանալու համար: