ՖՈՏՈ. Թուրքիայի խորհրդարանում ծեծկռտուքին ներկա է եղել նաև Կարո Փայլանը. մի քանի պատգամավոր տեղափոխվել է հիվանդանոց

Թուրքիայի խորհրդարանի նիստերից մեկի ընթացքում, երբ քննարկվել է Թուրքիայի բանակի ստորաբաժանումների կողմից Աֆրինում տեղի քրդական ուժերի դեմ իրականացվող «Ձիթենու ճյուղ » ռազմական օպերացիան, ծեծկռտուք է տեղի ունեցել իշխող «Արդարություն և զարգացում» և քրդամետ «Ժողովուրդների դեմոկրատական» կուսակցությունների պատգամավորների միջև։ո

Ermenihaber-ի փոխանցմամբ, տեղի ունեցած ծեծկռտուքի ժամանակ թեթև վնասվածքներ են ստացել 1 ԱԶԿ-ի և 2 ԺԴԿ-ի պատգամավոր, ովքեր և տեղափոխվել են հիվանդանոց:

Ծեծկռտուքը սկսվել է այն բանից հետո, երբ ԱԶԿ-ի Քոնիայի պատգամավոր Լեյլա Շահինը դիմելով քրդամետ կուսակցությանը, ասել է․ «Խաղաղ բնակչությանը սպանում են ոչ թե թուրք զինվորները, այլ ձեր «Քուրդիստանի բանվորական կուսակցության» զինյալները»:

Թուրքական լրատվամիջոցի հրապարակած լուսանկարներում երևում է, որ տեղի ունեցած միջադեպին ներկա է եղել նաև հայ պատգամավոր Կարո Փայլանը: