ԼՈՒՐ ԿԱԴՐ

Լուսանկարն արվել Վազգեն Սարգսյանի տանը

ՀՀ 4-րդ նախագահ Արմեն Սարգսյանը սպարապետ Վազգեն Սարգսյանի ծննդյան օրը այցելել է նրանց տուն: Արմեն Սարգսյանը դեռ ինչքան պետք է այցելի Վազգեն Սարգսյանի տուն, որպեսզի կարողանա հաղթահարել վերջինիս կողմից ծեծի ենթարկվելու եւ ՀՀ-ից «աքսորվելու» բարդույթը:

ՀԱՐՑ. Խնդրում եմ ասեք` աշխատանքային պայմանագիր կնքելու համար ի՞նչ է անհրաժեշտ: Ի՞նչ սկզբունքով է կնքվում աշխատանքային պայմանագիրը:

Ռուզաննա Ղուկասյան (29 տարեկան)

ՊԱՏԱՍԽԱՆ. Տեղեկացնում ենք, որ աշխատանքային պայմանագիրը կնքվում է գրավոր ձեւով` կողմերի ստորագրությամբ մեկ փաստաթուղթ կազմելու միջոցով:
Աշխատանքի անցնելուց առաջ գործատուն կամ նրա լիազորած անձը պարտավոր է աշխատանքի ընդունվող անձին պատշաճ ծանոթացնել աշխատանքի պայմաններին, կոլեկտիվ պայմանագրին (դրա առկայության դեպքում), ներքին կարգապահական կանոններին, աշխատավայրում նրա աշխատանքը կանոնակարգող գործատուի այլ իրավական ակտերին:
Աշխատողը պարտավոր է աշխատանքային պայմանագրում նշված oրն անցնել աշխատանքի: Աշխատանքային պայմանագրում նշված oրն անհարգելի պատճառով աշխատանքի չներկայանալը հիմք է աշխատանքային պայմանագրի լուծման համար:

Կենսաթոշակային համակարգի իրազեկման կենտրոն

«ԺՈՂՈՎՈՒՐԴ». Նշենք, որ աշխատաժամանակի նորմալ տեւողությունը չի կարող անցնել շաբաթական 40 ժամից: Ամենoրյա աշխատաժամանակի տեւողությունը չի կարող անցնել ութ աշխատանքային ժամից` բացառությամբ ՀՀ աշխատանքային օրենսգրքով, oրենքով, այլ իրավական ակտերով եւ կոլեկտիվ պայմանագրով նախատեսված դեպքերի:

ՀԱՐՑ. Ես ուզում եմ իմանալ` եթե անձը մտադիր է այլ պետության քաղաքացիություն ընդունել, ապա ի՞նչ փաստաթղթեր է անհրաժեշտ ներկայացնել:

Հրայր Խաչատրյան (48 տարեկան)

ՊԱՏԱՍԽԱՆ. Այլ պետության քաղաքացիություն ընդունելու կամ ստանալու մասին անձամբ հայտնելիս հայտարարություն տվողը ներկայացնում է`
դիմում; Հայաստանի Հանրապետության քաղաքացու անձնագիրը եւ դրա պատճենը; այլ պետության քաղաքացու անձնագիրը եւ դրա պատճենը (անձնագրերի եւ անձնագրերի պատճենների համապատասխանությունը ճշտելուց անմիջապես հետո անձնագրերը վերադարձվում են հայտարարություն տվողին):
Հայտնում ենք նաեւ, որ այլ պետության քաղաքացիություն ընդունելու կամ ստանալու մասին փոստով հայտնելիս հայտարարություն տվողը ներկայացնում է`
դիմում, ինչպես նաեւ ՀՀ քաղաքացու եւ այլ պետության քաղաքացու անձնագրերի նոտարական կարգով վավերացված պատճենները:

Հայաստանի Հանրապետության միգրացիոն պետական ծառայություն

«ԺՈՂՈՎՈՒՐԴ». Տեղեկացնում ենք, որ դիմումում նշվում է այն մարմնի անվանումը, ում ներկայացվում է դիմումը, հայտարարություն տվողի անունը, ազգանունը, ծննդյան օրը, ամիսը, տարեթիվը, վայրը, այն պետության անվանումը, որի քաղաքացիությունը ստացել կամ ընդունել է, քաղաքացիությունն ստանալու կամ ընդունելու օրը, ամիսը, տարեթիվը: Դիմումը ստորագրում է հայտարարություն տվողը` նշելով դիմումը ներկայացնելու օրը, ամիսը, տարեթիվը:
Նշենք, որ Հայաստանի Հանրապետության քաղաքացիությունը հաստատող փաստաթղթերն են ՀՀ քաղաքացու անձնագիրը, իսկ մինչեւ 16 տարին լրանալը` ծննդյան վկայականը կամ Հայաստանի Հանրապետության քաղաքացիությունը հաստատող վկայականը: Ի դեպ, Հայաստանի Հանրապետության քաղաքացուն այլ պետությանը հանձնելն արգելվում է: ՀՀ քաղաքացու ամուսնությունն օտարերկրյա քաղաքացու հետ ինքնին քաղաքացիության փոփոխման չի հանգեցնում: