ԿՐԱԿԵԼՈՎ ԻՐԵՆՑ ՎԱՏԹԱՐ ՎԻՃԱԿՈՒՄ ԿԴՆԵՆ

«Իմ քայլը» նախաձեռնության պայքարի ընթացքի եւ Ս. Սարգսյանի` վարչապետ նշանակվելու փաստի շուրջ «Ժողովուրդ» օրաթերթը զրուցել է «Նոր ժամանակներ» կուսակցության նախագահ Արամ Կարապետյանի հետ:

-Պարո՛ն Կարապետյան, ինչպես տեսանք, իշխանություններն արդեն սադրիչների միջոցով են փորձում այս օրերին ծավալվող շարժման դեմն առնել՝ ստեղծելով իրավական հիմքեր ցույցը ցրելու համար: Ի՞նչ զարգացումներ կարող են լինել:
-Իմ տպավորությամբ` իշխանությունն, ինչպես միշտ, մի նպատակ է դրել` սադրել եւ ցրել ուժային գործողություններով: Իրենք հասկանում են, որ ուղղակի թողնելով այդպես` որպես գործընթաց, դա չի հանգչելու: Ընդհակառակը, գեներացվելու է, որովհետեւ երիտասարդություն է փողոցում, զզվանքը շատ մեծ է: Այսինքն` սա այն դեպքը չի, որ մինչեւ հիմա եղել է. Րաֆֆի Հովհաննիսյանի ժամանակ եւ այլն, երբ շարժումն աճում, գնում է, հետո սկսում է հոգնել, մաշվել եւ դուրս գալ: Ո՛չ, իրենք շատ լավ հասկացել են, որ սա ավելի հետաքրքիր իրավիճակ է: Իսկ այս սադրելը, ուժային ցրելը, բերման ենթարկելը կարող է բերել միջազգային արձագանքի: Դրա համար ես կարծում եմ, որ հիմա դեռ շատ ճիշտ տակտիկա է գնում. սադրանքներից ամեն գնով խուսափել, միայն խաղաղ պայքար, միայն խաղաղ..: Երբեւէ պատասխան չտալ, եւ եթե ձերբակալվում են, հանգիստ գնան, որովհետեւ ցուցարարների նկատմամբ որեւէ քրեական լուրջ գործ չեն կարող հարուցել: Եվ իզուր չէ, որ ԱՄՆ պետդեպն արձագանքել էր, եւ հստակ գրված էր, որ խաղաղ ցուցարարների նկատմամբ բռնությունը չի ընկալվում, եւ, ամենակարեւորը, որ ԱՄՆ-ն շարունակում է ուշի-ուշով հետեւել Հայաստանում ընթացող գործընթացներին: Եթե ամեն ինչ խաղաղ է, իսկ ամեն ինչ խաղաղ է, մեծ մասը երիտասարդներ են, ես կարծում եմ` այսպես պետք է շարունակել քաղաքացիական խաղաղ անհնազանդությունը: Այս փուլում այսքանով դեռ սահմանափակվենք: Իսկ քաղաքական մյուս հարցերի շուրջ կարծում եմ` շուտով հայտարարություն կլինի, եւ պարզ կդառնա, թե շարժման հենքը որն է:
-Իսկ միջազգային արձագանքն արդյո՞ք կստիպի, որպեսզի իշխանությունն ավելի կոշտ մեթոդների չդիմի: Հիմա, ամեն դեպքում, տեսնում ենք, որ իրենք փորձում են հակազդել:
-Ճիշտ եք: Իրենք հիմա դեռ հակազդում են, բայց ինչ միջոցներով. լոկալ ինչ-որ խնդիրներով, օրինակ` Մաշտոց-Թումանյանում սադրել, ոստիկանությանը դուրս բերել ցուցարարների դեմ եւ սադրել: Իրենց նպատակը բախումներ սադրելն է: Դա չի արվում նրա համար, որ շարժման մասնակիցը վախենա, եւ շարժումը մարի: Դա արվում է, որպեսզի աճ չտա, իրենք փորձում են ցույց տալ, որ իշխանություն կա, անիշխանություն չի երկրում: Է, թող հակազդեն այն իրավասությունների սահմաններում, որ իրենց տալիս է օրենքը: Եթե անգամ խաղաղ ցուցարարների նկատմամբ հատուկ միջոցների օգտագործում, Աստված ոչ անի, ինչ-որ կրակոցներ լինեն եւ այլն, շատ վատթարագույն իրավիճակի մեջ է դնելու արդեն ոչ թե Հայաստանին, այլ հենց իշխանությունն իրեն: Միանգամից իշխանությունը պատժամիջոցների տակ է մտնելու, միանշանակ: Ինձ համար կասկած չկա: Շատ լուրջ պատժամիջոցների տակ են մտնելու:
-Ստացվում է` իշխանությունը դրսից թույլտվություն չունի՞, որպեսզի միանգամից ցրի հավաքը:
-Ես սա ասում եմ` որպես վերլուծության արդյունք: Չնայած Միացյալ Նահանգների հայտարարությանը վերլուծություն էլ պետք չի: Նրանք ասում են այն, ինչ ասել են միշտ: Ինչ վերաբերում է Ռուսաստանին, շատ հետաքրքիր է, որ Սերժ Սարգսյանին վարչապետի պաշտոնում շնորհավորելուց հետո նրա հետ հեռախոսազրույց էլ է ունեցել, եւ դեռ ռուսական աբստրակտ, չերեւացող հակազդեցություն ես դեռ չեմ տեսել: Ես տեսնում եմ, որ բոլորն ուշի-ուշով հետեւում են գործընթացին:
-Հիմա Ձեր կարծիքով` պետք է շարունակե՞լ պայքարը նույն տրամաբանությամբ:
-Իսկ ալտերնատիվը ո՞րն է: Եթե որեւէ բան չի փոխվում երկրում, շարժման իմաստը ո՞րն է: Այս շարժման իմաստը հո Սերժ Սարգսյանի երրորդ ժամկետը չէ՞ միայն: Դա անցավ արդեն: Ն. Փաշինյանը համաժողովրդական հեղափոխության գաղափարը մեջտեղ բերեց: Ամբողջ հանրապետությունը հիմա բավական լուրջ բարձրացել է ոտքի` փոփոխությունների համար: Այսինքն` կա՛մ պետք է հասնել նրան, որ այդ փոփոխությունները տեղի ունենան, կա՛մ Ս. Սարգսյանը եւս մեկ անգամ ամբողջ աշխարհին ցույց տա, որ Հայաստանում միայն իրենք պետք է լինեն իշխանության: Թող անի, ինչ ասեմ, թող մեկ անգամ էլ անի, տեսնի հետեւանքները:
-Դուք նշում էիք, որ Ս. Սարգսյանի` վարչապետ դառնալուց հետո նրա համար դժոխք է սկսվելու: Պայքա՞րը նկատի ունեիք, թե՞ նաեւ այլ գործընթացներ:
-Իհարկե, սա էլ նկատի ունեի, որովհետեւ ես իմ ժողովրդի մեջ շատ եմ լինում եւ գիտեմ իրենց տրամադրությունները: Հիմա դեռ հանգիստ իրավիճակ ստեղծվեց. մինչեւ Պուտինի երդմնակալությունը ԱՄՆ-ն էլ պատժամիջոցներ չմտցրեց, իսկ եթե շարունակվեն պատժամիջոցները, իսկ Հայաստանի տնտեսությունը որքան զգայուն է Ռուսաստանի տնտեսության նկատմամբ, Սիրիայում եւ այլ գործընթացների նկատմամբ, էլ չեմ ասում ապագայում նաեւ Իրանի եւ քրդերի հետ կապված խնդիրները կարող են սկսվել: Եվ ամենակարեւոր հարցը. Ղարաբաղյան խնդրի լուծումը, էլ ժամկետների հարց չես կարող դու հետաձգել: Ինչպես եք պատկերացնում, որ Հայաստանն այս վիճակով եւ այս իշխանությամբ կարողանա դիմագրավել: Դե, դա դժոխք է, էլի:
-Ի՞նչ եք կարծում` իշխանությունը կգնա բարեփոխումների ճանապարհով:
-Ես ինքս հավատ չունեմ: Ես երկար ժամանակ եմ քաղաքականության մեջ, բավական մոտ եմ կանգնած այդ աղբյուրներին, ես հավատ չունեմ: Իմ տպավորությամբ` այդ մարդը բարեփոխում բառից վախենում է: Այդ մարդը միայն իշխանությունն է պահում: Եվ չի կարող ոչինչ ասել, հիմա նա ոչ ոքի չի կարող ոչինչ ապացուցել: Չէ որ ասաց` ես չեմ գա, վարչապետ չեմ դառնա, բայց աչքներիս առաջ ի՞նչ տեսանք: Այդ մարդը միակ խնդիրն է լուծում. ինքն ուզում է մնալ իշխանության: Ճիշտն ասեմ` մարդկային առումով չեմ էլ հասկանում, թե ինչո՞ւ: Իմանալով շատ բաներ` այդպես էլ չհասկացա` ինչո՞ւ:
-Եթե Ս. Սարգսյանը չլիներ վարչապետի պաշտոնում, չէ՞ր կարող, այսպես ասած, կողքից ղեկավարել, ուղղորդել:
-Իմ կարծիքով` ոչ:
-Ինչո՞ւ , այն թիմը չկա՞, որ կարող է իրեն աջակցել:
-Ոչինչ չկա: Ամեն ինչ պատրանք է: Ժողովուրդը որ դուրս է եկել, քանակը որ ասում են. քանակը չի, որակն է: Այն, որ ասում էին` 10.000 դրամները բաժանել են, մարդկանց գնել են, հիմա թող գան, տեսնեն, պատրանք է: Հանրապետական կուսակցությունը` որպես քաղաքական կառույց, դա էլ է պատրանք: Որ ինքը կկարողանա որպես Բրեժնեւ կառավարել` դա էլ է պատրանք: Այնպես արագ կդավաճանեին, կփախչեին բոլորը, ինքը կմնար սենյակում մենակ նստած` իր նկարի հետ:

ՈՐ ԸՆԴԴԻՄՈՒԹՅՈՒՆ Է, ՊԻՏԻ ԴԵ՞Մ ՔՎԵԱՐԿԻ

Վարչապետի ընտրության օրը Սերժ Սարգսյանի օգտին «Ծառուկյան» խմբակցությունից եւս 12 հոգի կողմ քվեարկեց, իսկ մի քանիսն էլ բացակա էին կամ դուրս եկան նիստերի դահլիճից: Այս խմբակցության անդամներից փորձեցինք պարզել պատճառները:

ԱԺ «Ծառուկյան» խմբակցության պատգամավոր Նապոլեոն Ազիզյան
-Պարո՛ն Ազիզյան, Դուք Սերժ Սարգսյանի թեկնածությանը կողմ քվեարկողներից մեկն եք: Ինչո՞ւ այդպես վարվեցիք, չէ՞ որ ընդդիմություն եք համարվում:
-Իյա, ուրեմն ընդդիմությունը բոլոր բաներին պիտի դեմ քվեարկի, հա՞: Այդ ինչ տրամաբանություն է:
-Դուք ինչո՞ւ որոշեցիք կողմ քվեարկել:
-Հետո, հետո…

ԱԺ «Ծառուկյան» խմբակցության պատգամավոր Վարդան Ղուկասյան
-Պարո՛ն Ղուկասյան, ինչո՞ւ ներկա չէիք ԱԺ հատուկ նիստին, երբ վարչապետ էին ընտրում:
-Ձեզ ինչ:
-Հետաքրքիր չէ՞ր նիստը:
-Ձեզ ինչ, Ձեզ ինչ…
-Ցանկություն չունեի՞ք քվեարկելու:
-Հաջողություն ու լավ եղեք:
-Իսկ եթե տուգանեն` նիստից բացակայելու համար:
-Լավ եղի՛ր, աղջիկ ջա՛ն: Հաջողությո՛ւն:

Նյութերը՝ ՄԵՐԻ ՄԱՐՏԻՐՈՍՅԱՆԻ

ԴԵՄ ԵՆ
ՀՀԿ խոսնակ, Ազգային ժողովի փոխնախագահ Էդուարդ Շարմազանովն այս օրերին Սերժ Սարգսյանի վարչապետ դառնալու դեմ բողոքի ցույցեր անցկացնող «Քաղաքացիական պայմանագիր» կուսակցությանը, մասնավորապես Նիկոլ Փաշինյանին, երկխոսության եւ համերաշխության կոչ է արել: Նա շեշտել է, որ Փաշինյանը կորցնում է վերահսկողությունը, ինչի ապացույցը Մաշտոցի պողոտայում տեղի ունեցած իրադարձություններն են: «Ժողովուրդ» օրաթերթը ՔՊ անդամներից ԱԺ պատգամավոր Լենա Նազարյանին հարցրեց՝ պատրա՞ստ են գնալ երկխոսության: «Չեմ պատկերացնում` ինչ երկխոսություն կարող է լինել իրենց հետ: Մեր խոսակցությունը միայն քաղաքացիների հետ է հրապարակում: Ուրիշ ոչ ոքի հետ մենք խոսակցություն չունենք, քանի որ իրենք պետք է հեռանան: Այդքան բան»,-արձագանքեց Նազարյանը:

ԳԾԻՑ ՀԱՆԵԼ ԷԻՆ
Երեկ մի քանի միկրոավտոբուս դուրս էր բերվել երթուղուց, որպեսզի հանրահավաքի վայր տեղափոխի ոստիկանների: Մասնավորապես երեկ Սերժ Սարգսյանի վարչապետության դեմ հանրահավաքի ժամանակ լրատվամիջոցները արձանագրեցին, թե ինչպես են 31 եւ 58 համարների երթուղայինները ոստիկաններին տեղափոխում Ֆրանիայի հրապարակ: Ավելին` Դեմիրճյան փողոցում կայանված ոստիկանները դարձյալ 31 եւ 58 համարների երթուղին սպասարկող միկրովատոբուսներում են եղել: «ժողովուրդ» օրաթերթը պարզեց, որ թիվ 31 միկրովատոբուսը շահագործում է «Ուղեւոր տար» ընկերությունը, որը պատկանում է ոմն Սերգեյ Ավագյանի եւ Աշոտ Հարությունյանի, իսկ թիվ 58 երթուղին` «Տիգրան» ՍՊԸ-ինն է, որն էլ պատկանում է ոմն Մյասնիկ Մանուկյանի. համենայն դեպս, այդ անուններն են նշված այս կազմակերպությունների փաստաթղթերում:

ԱՐՏԱԳՐԵԼ ԷՐ
ՀՀ ԱԺ հատուկ նիստին ՀՀ վարչապետի ընտրության հարցի քննարկմանը ՀՀԿ խմբակցության պատգամավոր Գագիկ Մինասյանը ներկայացրեց Հայաստանի տնտեսական ցուցանիշները` իր մոտ եղած թղթից կարդալով թվեր, բայց բավական դժվարությամբ, կմկմոցներով: «Ժողովուրդ» օրաթերթը Գագիկ Մինասյանից հետաքրքրվեց, թե արդյո՞ք այդ ելույթը, ներկայացրած թվերն ինքն էր գրել:
-Պարո՛ն Մինասյան, Դո՞ւք էինք գրել:
-Ո՛չ:
-Բա որտեղի՞ց:
-Արտագրել էի:
-Որտեղի՞ց:
-Մեր ազգային գրասենյակի դիմեք, կասեն Ձեզ:
-Այսինքն` այնտեղի՞ց եք արտագրել, նկատեցինք` դժվարությամբ էիք կարդում, կմկմոցներով:
-Ես հանձնարարություն էի տվել, ինքն էլ կատարել էր:
-Ձեր ներկացրած թվերը թվում է, որ իրականության հետ չէր համընկնում:
-Եթե Ձեզ թվում է, ուրեմն աղոթեք:
-Ձեր ներկայացրած թվերը… Դուք Ձեր ներկայացրած թվերին հավատո՞ւմ եք:
-Իհարկե: