ԼՈՒՐ ԿԱԴՐ

Լուսանկարն արվել է մայրաքաղաքում

Ամբոխի մեջ երեխային չկորցնելու լավագույն տարբերակը` վերնաշապիկին գրել հայրիկի հեռախոսահամարը:

ՀԱՐՑ. Խնդրում եմ ասեք` հողամասի մի հատվածը հարեւանին օտարելու համար պարտադի՞ր է օտարվող մասի համար առանձին անշարժ գույքի նկատմամբ իրավունքների պետական վկայական ստանալ, թե՞ կարող է օտարվել նաեւ առանց նախօրոք առանձնացվելու:

Սահակ Մարկոսյան (42 տարեկան)

ՊԱՏԱՍԽԱՆ. Ս. Մարկոսյանի հարցին ի պատասխան` տեղեկացնում ենք, որ հողամասի մասը կարող է օտարվել առանց նախօրոք առանձնացվելու: Դրա համար օտարման պայմանագրին, որպես դրա անբաժանելի մաս, պետք է կցված լինի հողամասի օտարող մասի հատակագիծը:

ՀՀ կառավարությանն առընթեր անշարժ գույքի կադաստրի պետական կոմիտե

«ԺՈՂՈՎՈՒՐԴ». Տեղեկացնենք, որ անշարժ գույքի օտարման (ձեռքբերման) պայմանագիրը կնքվում է գրավոր եւ ենթակա է վավերացման նոտարական կարգով, եթե կողմերից մեկը քաղաքացի է: Պայմանագիրը գրանցման պետք է ներկայացվի դրա կնքման կամ նոտարական վավերացման օրվանից մեկ ամսվա ընթացքում: Անշարժ գույքի օտարման պայմանագրում նշվում են անշարժ գույքի չափերն ու սահմանները, վաճառքի գինը, կողմերի իրավունքներն ու պարտականությունները, սահմանափակումները, անշարժ գույքի օգտագործման վերաբերյալ կողմերի համաձայնությամբ սահմանված պայմանները եւ այլ անձանց իրավունքները:

ՀԱՐՑ. Իմ 55 տարեկանը լրացել է: 1996թ. աշխատում եմ մանկավարժ, ունեմ 22 տարվա մանկավարժական ստաժ: Խնդրում եմ ասեք` ես կարո՞ղ եմ օգտվել մանկավարժական թոշակից, թե՞ ոչ:

Քաղցրիկ Միրզոյան (մանկավարժ)

ՊԱՏԱՍԽԱՆ. «Պետական կենսաթոշակների մասին» ՀՀ օրենքի 14-րդ հոդվածի 1-ին մասի համաձայն` մասնակի կենսաթոշակ նշանակվում է կրթության, մշակույթի որոշ կատեգորիաների աշխատողներին, եթե լրացել է նրանց 55 տարին եւ ունեն առնվազն 25 օրացուցային տարվա աշխատանքային ստաժ, որից առնվազն 12 օրացուցային տարին մասնագիտական ստաժ է:
Մասնակի կենսաթոշակի իրավունք տվող մասնագիտական աշխատանքային ստաժում հաշվառվում են Հայաստանի Հանրապետության կառավարության սահմանված ցանկում նշված մասնագիտություններով եւ պաշտոններում մինչեւ 2003 թվականի օգոստոսի 1-ն աշխատած ժամանակահատվածները:
Համատեղությամբ աշխատած ժամանակահատվածը մասնագիտական աշխատանքային ստաժում չի հաշվառվում:
«Կրթության, մշակույթի որոշ կատեգորիաների աշխատողներին մասնակի կենսաթոշակի իրավունք տվող մասնագիտությունների եւ պաշտոնների ցանկը» հաստատվել է ՀՀ կառավարության 2011թ. մայիսի 5-ի թիվ 665-Ն որոշմամբ:
Քանի որ Ք. Միրզոյանի մասնագիտական ստաժը հաշվարկվում է 1996 թվականից, ապա նա չի կարող մինչեւ 2003 թվականի օգոստոսի 1-ն ունենալ պահանջվող 12 տարվա մասնագիտական ստաժը, ուստի նրան չի կարող նշանակվել մասնակի կենսաթոշակ:

ՀՀ աշխատանքի եւ սոցիալական հարցերի նախարարության հասարակայնության հետ կապերի բաժին

«ԺՈՂՈՎՈՒՐԴ». Ստացվում է, որ շատ քչերին է «բախտ վիճակվում» ստանալ մանկավարժական մասնակի կենսաթոշակ: Պարզ է, որ ընդունված օրենքներն այնքան էլ չեն բխում քաղաքացիների շահերից: