Հունիսի 5-ին ճանապարհային ոստիկանության պետ Եգոր Կարապետյանն ընդունեց մոտոցիկլետներ վարողների: Հանդիպման նպատակը Հայաստանում մոտոցիկլավարների խնդիրներն ու նրանց հետ կապված ճանապարհային ոստիկանության մտահոգությունները քննարկելն էր:
Հանդիպմանը մասնակցում էին նաև ճանապարհային ոստիկանության պետի տեղակալներն ու իրավաբանական բաժնի պետը:
Ճանապարհային ոստիկանության ղեկավարությունը ներկայացրեց մտահոգություններ առանց հաշվառման համարանիշի, գիշերային ժամերին աղմուկով երթևեկող և ճանապարհատրանսպորտային կանոնները միտումնավոր խախտող մոտոցիկլետների վարորդների կապակցությամբ:
Եվ մոտոցիկլասերները, և ճանապարհային ոստիկանության ներկայացուցիչները համակարծիք էին, որ առանց հաշվառման համարանիշի ու գերհզոր ձայնով մոտոցիկլ վարելն անթույլատրելի է:
Կարևորվեց համարանիշը տեսանելի վայրում փակցնելը, միայն սաղավարտներով մոտոցիկլետ վարելը և երթևեկության կանոնները պահպանելը:
Ճանապարհային ոստիկանության պետը պատրաստակամություն հայտնեց անձամբ նստել մոտոցիկլետի ղեկին, մոտոցիկլավարների հետ շրջել քաղաքում և առավել լավ ծանոթանալ նրանց խնդիրներին:
Հանդիպմանը քննարկվեցին մոտոցիկլետների հաշվառման, շահագործման և այլ խնդիրների հետ կապված հարցեր:
Կողմերը համոզմունք հայտնեցին, որ հանդիպումները կլինեն շարունակական՝ մոտոցիկլետների սիրահարների բոլոր խնդիրներին լուծում տալու համար:
.gif)
