Ես ՊԵԿ-ի հետ ի՞նչ կապ ունեմ. ոչ բիզնեսմեն եմ, ոչ սահմանից բանան եմ ներմուծում. Սեյրան Օհանյան

Պետական եկամուտների կոմիտեն այսօր պաշտոնապես հրապարակեց, որ ՊԵԿ քննչական վարչությունում ՊՆ գնումների եւ բանակաշինության ոլորտներում առկա չարաշահումների վերաբերյալ հարուցվել է քրեական գործ: Նախաքննության ընթացքում խուզարկություն է կատարվել նաեւ ՊՆ բարձրաստիճան անձանց աշխատասենյակներում, հարցաքննվել են մի քանի տասնյակ անձինք: Հարցաքննության են կանչվել ինչպես նախկին, այնպես էլ ներկայիս ՊՆ բարձրաստիճան պաշտոնատար անձինք, այդ թվում նաեւ` ՊՆ նախկին նախարար Սեյրան Օհանյանը: Հարցաքննության մանրամասները պարզելու համար ArmLur.am-ը զրուցել է Պաշտպանության նախկին նախարար Սեյրան Օհանյանի հետ:

-Պարոն Օհանյան, ՊԵԿ-ը հրապարակել է, որ Ձեզ կանչել են հարցաքննության: Իրենց կասկածները փարատվե՞լ են, թե՞ ոչ:

-Ի՞նչ հարցաքննություն:

-Հայտարարության մեջ նշված է, որ ՊՆ գնումների եւ բանակաշինության ոլորտներում առկա չարաշահումների վերաբերյալ հարուցվել է քրեական գործ, հարցաքննության են կանչվել ՊՆ նախկին ու ներկա մի շարք բարձրաստիճան պաշտոնյաներ, այդ թվում` Պաշտպանության նախկին նախարար Սեյրան Օհանյանը:

-Պետական եկամուտների կոմիտե: Բայց ես ՊԵԿ-ի հետ ի՞նչ կապ ունեմ: Ես ոչ բիզնեսմեն եմ, ոչ հարկերի հետ կապված խնդիր ունեմ, ոչ սահմանից բանան եմ ներմուծում կամ խնձոր: Ես ի՞նչ կապ ունեմ ՊԵԿ-ի հետ:

-Ա՞յլ մարմնի կողմից են կանչել հարցաքննության:

-Ոչ, ոչ: Այդպիսի բան չի եղել: Ես հիմա կանգնած եմ Գրիգոր Լուսավորիչ հիվանդանոցի դիմաց, մեր մարտական ընկերոջ մոտ եմ եկել: Այդպիսի բան չկա:

–Նշված է Ձեր անունը, որ Դուք էլ եք այդ ցանկում:

-Դե նախկին նախարարը ես եմ: Բայց այդպիսի բան չկա: Ես կապ չունեմ այդպիսի բաների հետ: Որեւէ մի անգամ լսած կա՞ք, որ Սեյրան Օհանյանի բարեկամները կամ եղբայրը, տղան, այս մեկն, այն մեկն ինչ-որ մի տեղ աշխատում են: Որեւէ տեղ լսած կա՞ք, որ Սեյրան Օհանյանն այս է բերում, այն է բերում: Չգիտեմ, գուցե ուզում են կանչել: Ինձ համար զարմանալի է: Ես ՀՀ քաղաքացի եմ: Այսքան ժամանակ տեսած կաք` Օհանյան Սեյրանն ինչ-որ խախտում կատարի, չենթարկվի կամ այլ բան: Ինչպես ես, այնպես էլ մյուսները վերին արտի ցորեն չեն. եթե իմ մարտական ընկերը` շարքային, գնում, ներկայանում է, բոլորս էլ պարտավոր ենք գնալ եւ ներկայանալ` եթե այս կամ այն խնդիրները կան: Բայց էլի կրկնում եմ` ես գործարար չեմ, նախկինում իմ աշխատանքն իրականացրել եմ օրենքի շրջանակում:

Զրուցեց Մերի Մարտիրոսյանը