«ՈՍԿԵ ՁԿՆԻԿ ԷԼ ԲՌՆԵԻՆՔ՝ ԽՆԴԻՐՆԵՐԸ ՄԻԱՆԳԱՄԻՑ ՉԷԻՆ ԼՈՒԾՎԵԼՈՒ»

«Ժողովուրդ» օրաթերթը դերասանուհի Զառա Սահակյանի հետ զրուցել է հեղափոխությանը մասնակցելու, դրան հաջորդած տրամադրությունների, իր սպասումների մասին։ Նա նշել է, որ որոշել էր աննկատ մնալ շարժման ժամանակ, սակայն ամուսինը խորհուրդ է տվել օգտագործել հայտնի լինելու հանագամանքն ու ավելի մեծ թվով մարդկանց ներգրավել շարժմանը։ Զառան նկատել է, որ հիմա երկրում բոլորը սկսել են զբաղվել քաղաքականությամբ եւ խորհրդատուի դեր են ստանձնել, այնինչ պետք է գիտակցել, որ փոփոխությունների հնարավոր է հասնել աստիճանաբար։

-Զառա, հեղափոխությունից հետո շրջանառության մեջ մտավ «նոր Հայաստան» ձեւակերպումը։ Ուզում եմ այդ տրամաբանությամբ հարցս ձեւակերպել՝ նոր Հայաստանից ի՞նչ սպասելիքներ ունեք։
-Շատ մեծ սպասումներ ունեմ, կարեւորը՝ ժողովուրդը պետք է գիտակցի, որ այն, ինչ իրենից սկզբնական շրջանում կախված էր, արել է, հիմա քաղաքակիրթ ձեւով հարկավոր է սպասել փոփոխությունների։ Այս ընթացքում մենք պետք է մեզ ադեկվատ պահենք եւ հասկանանք, որ եթե ոսկե ձկնիկ էլ բռնեինք՝ մեր խնդիրները միանգամից չէին լուծվելու։ Պետք է գիտակցենք, թե նախկին իշխանությունները ինչ հսկա բեռ են թողել ներկայիս իշխանությունների ուսերին։ Դրանք կթոթափվեն միայն տարիների ընթացքում։ Իսկ այն փոփոխությունները, որոնք արդեն իսկ իրականացվել են, էլի քիչ չեն։ Հիմա բոլորը սկսել են քաղաքականությամբ զբաղվել. դա ինձ շատ է նյարդայնացնում։ Իմ՝ շարժմանը միանալը զուտ քաղաքացիական դիրքորոշման արտահայտում էր։ Ես ուղղակի մտածում էի, որ եթե նույնիսկ երկու հոգի, ինձ այնտեղ տեսնելով, կարող է ոգեշնչվել եւ միանալ շարժմանը, արդեն իսկ ինչ-որ չափով օգնած կլինեմ պրոցեսին։
-Եղա՞ն մարդիկ, ովքեր հեղափոխության ժամանակ կամ դրանից հետո վերանայեցին իրենց եւ Ձեր հարաբերությունները։
-Գիտե՞ք՝ ոչ ոքի կարծիքը ոչ այդ պահին, ոչ հիմա ինձ հետաքրքիր չի եղել եւ հետաքրքիր չէ։ Ոմանք ասում էին, թե հայտնիները շարժմանը միացան իրենց փիարի համար։ Իմ պարագայում, բնականաբար, այդպես չէր։ Ես լավ գիտակցում էի, որ եթե շարժումը չհաջողեր, ես, իրոք, վտանգի տակ կլինեի այն առումով, որ հեռուստաընկերություններն ինձ այլեւս աշխատանքի չէին ընդունի (Դե գիտեք՝ ովքեր են հեռուստաընկերությունների տերերը-Զ.Ս.)։ Պարզից էլ պարզ էր՝ ես ինչ էի բերելու իմ գլխին, բայց այդ քայլին ես գիտակցելով գնացի, որովհետեւ դա ճիշտ համարեցի։ Ինձ համար կարեւորն այն է, որ արտահայտեցի մեր ամբողջ ընտանիքի կարծիքը։
-Հիմա թատրոններից, հեռուստաընկերություններից հրավերներ ունե՞ք։
-Վստահ եմ, որ առաջիկայում դրանք կառավարության ուշադրության ներքո կլինեն, եւ մի շարք դրական փոփոխություններ կարձանագրվեն։ Փոփոխության դեպքում կուզենամ` անպայման որեւէ նախագծում ընդգրկված լինեմ։
-Նոր նշանակումների մասին ի՞նչ կասեք։ Ծանո՞թ եք կառավարության նոր կազմին։
-Ես փոքր մարդ եմ նոր կադրերի մասին դատողություններ անելու համար։ Եվ հետո մենք միայն մեդալի մի երեսն ենք տեսնում, մյուս երեսը մեզ համար պարզ չէ։ Չգիտենք՝ որ նշանակումն ինչի համար է արվում։ Բայց ես մի բան գիտեմ՝ Նիկոլ Փաշինյանին հաջողվեց առանց արյուն թափելու հեղափոխություն անել, ուստի վստահում եմ նրան եւ չեմ ուզում թերահավատությամբ նայել նրա քայլերին։ Թեպետ մեր ժողովրդի մի հատված շատ կասկածամիտ է, ով էլ որ գա իշխանության։
-Ձեր խոսքից հասկացա, որ Ձեր ընտանիքը սատարել է Ձեզ։ Այդպե՞ս է։ Նրանք համակարծի՞ք էին Ձեզ հետ։
-Այո՛, բոլորը միաձայն կողմ էին իմ դիրքորոշմանը։ Անկեղծ ասած՝ ուզում էի ավելի զուսպ լինել, անգամ գլխարկ դրած միանալ շարժմանը, որպեսզի ինձ չճանաչեն, բայց ամուսինս խորհուրդ տվեց օգտագործել իմ հայտնի լինելու հանագամանքն ու ավելի մեծ թվով մարդկանց ներգրավել շարժմանը։ Չեք պատկերացնի, թե որքան եմ արտասվել, երբ վերջում հասանք մեր ուզածին։ Հիմա արդեն անհամբերությամբ սպասում եմ դրական տեղաշարժերի, որոնց, իհարկե, կարելի է հասնել աստիճանաբար։

Զրուցեց ԱՆՆԱ ԲԱԲԱՋԱՆՅԱՆԸ

«ԹԱՏՐՈՆՈՒՄ ԻՆՁ ՈՐԵՎԷ ԲԱՆ ՉԻ ԿԱՐՈՂ ԿԱՇԿԱՆԴԵԼ»

«Ես միշտ եղել եմ ժողովրդի կողքին եւ նույնիսկ վիրավորական էր, երբ մարդիկ Նիկոլ Փաշինյանի առաջնորդած ժողովրդական շարժման ժամանակ մոտենում էին ինձ եւ ասում. «Վա՜յ, ինչ լավ է, որ մեզ հետ եք»։ Չհասկացա՝ բա ո՞ւմ հետ պետք է լինեի։ Այստեղից հետեւություն՝ արվեստագետներն այնքան սխալ են պահել իրենց, որ հանրությունն այլ կարծիք է կազմել նրանց մասին»,-«Ժողովուրդ» օրաթերթի հետ զրույցում նման տեսակետ հայտնեց Երեւանի Գ. Սունդուկյանի անվան ազգային ակադեմիական թատրոնի դերասանուհի Արաքսյա Մելիքյանը։

Նա տպավորված է ժողովրդի հաղթանակով եւ եթե նախկինում մտածում էր իր որդուն ամեն գնով բացառապես արտերկրում ուսման տալու մասին, այժմ արդեն վերանայել է իր տեսակետը, քանի որ հույս ունի, որ նա Հայաստանում էլ կարող է լավ կրթություն ստանալ։
Հարցին, թե Մայր թատրոնում նրան չեն կաշկանդել արդյոք քաղաքական պրոցեսների մասնակիցը լինելու համար, դերասանուհին պատասխանեց. «Թատրոնում ինձ որեւէ բան չի կարող կաշկանդել, իմ մասին ասում են՝ «Այ մարդ, էս աղջիկն էսա էլի կխոսի», բայց ես չեմ փոխվի, միշտ ասում եմ՝ աշխարհից գնալու եմ անարդարության պակասից (ծիծաղում է)։ Ես իմ ամբողջ կյանքում իմ ընկերների համար եմ գնացել ղեկավարության դռները բարեխոսելու։ Միշտ անհաշտ եմ եղել անարդարության դրսեւորումների հետ»։
Նա նաեւ խոսեց թատրոնում առկա գլխավոր խնդրի մասին, որն, ըստ իրեն, նախարարությունը պետք է առաջնահերթ լուծի. «Հարկավոր է առաջինը բարձրացնել թատրոնի դերասանի աշխատավարձը, որպեսզի որեւէ հեռուստանախագծում նկարահանվելիս նրան չասեն. «Էդ քոսոտ աշխատավարձի խաթե՞ր ես ժամանակ կորցնում թատրոնում»։ Այսօր թատրոնի դերասաններն այնքան ցածր աշխատավարձ են ստանում, որ ձգտում են որեւէ նախագծում նկարահանվել կողմնակի եկամուտ ապահովելու համար։ Դրանից նրանք «մաշվում են», աշխատանքն էլ դառնում է անորակ։ Այս ողորմելի աշխատավարձ ստացող դերասանը կարող է նման պայմաններում պարզապես դուրս գալ թատրոնից»,-եզրափակեց Արաքսյան։

Ա. ԲԱԲԱՋԱՆՅԱՆ