ԱՌԱՎՈՏԻՑ ԵՐԵԿՈ ԳՏՆՎՈՒՄ ԵՆՔ ՏԵՍԱԽՑԻԿՆԵՐԻ ԱՌԱՋ

Արտահերթ ընտրությունների եւ քաղաքական այլ հարցերի շուրջ «Ժողովուրդ» օրաթերթը զրուցել է «Քաղաքացիական պայմանագիր» կուսակցության հիմնադիր-անդամ, ԱԺ «Ելք» խմբակցության պատգամավոր Հովիկ Աղազարյանի հետ:

-Պարո՛ն Աղազարյան, այս տարվա ընթացքում կհասցնե՞ք ավարտել կազմակերպչական աշխատանքները, որպեսզի տեղի ունենան արտահերթ ընտրությունները, թե՞ դա կմնա արդեն հաջորդ տարի:
-Բոլոր դեպքերում աշխատանքները գնում են լայն թափով, որպեսզի Ընտրական օրենսգրքում տեղի ունենան փոփոխություններ, որը նախատեսում ենք, ցանկանում ենք անցկացնել սեպտեմբերի առաջին կեսին, եւ եթե հաջողվի այդ փոփոխություններն անցկացնել այդ ժամանակ, ապա հնարավորություն կունենանք նոյեմբեր-դեկտեմբերին անցկացնել ընտրություններ:
-«Ելք» դաշինքի երեք կուսակցությունները քննարկում են ընտրություններին մասնակցության ձեւաչափը: Ավելի շատ հակված եք առանձի՞ն, թե՞ դաշինքով մասնակցելու:
-Բոլորս հակված ենք, որ մասնակցենք միասին: Ուղղակի այստեղ ձեւաչափի հարցն ենք ճշտում: Բանակցություններ են գնում, թե յուրաքանչյուր կուսակցություն ինչ ձեւաչափով պետք է մասնակցի: Բայց տրամադրությունը, որ մասնակցենք միասին, գերիշխող է:
-Մեկ անգամ արդեն «Լուսավոր Հայաստան» եւ «Հանրապետություն» կուսակցությունները չմիացան պայքարին, երբ Ն. Փաշինյանը որոշեց դուրս գալ եւ փողոցում պայքարել: Հիմա ի՞նչ վստահություն ունեք այդ երկու կուսակցությունների հանդեպ:
-Այն ժամանակ, երբ քննարկվում էր այդ հարցը, իրենք էլ ունեին իրենց տեսակետը պայքարի ձեւի, եւ ակնհայտորեն որեւէ մեկը չէր կարող ասել, թե որն է առավել ճշգրիտ ճանապարհը: Մենք, իհարկե, քննարկել էինք մեր կուսակցության մեջ եւ գտանք, որ դա այս պահին առավել ընդունելի ճանապարհն է, եւ որդեգրեցինք դա: Մեր գործընկերները չմիացան մեզ, բայց դա չի նշանակում, որ մենք իրենց հետ չենք կարող ճանապարհ անցնել, եւ մեր հետագա քաղաքական կյանքը շարունակել միասին:
-Բայց այդ փաստից ի՞նչ դասեր է ՔՊ-ն քաղել:
-Սա արդեն ձեւաչափի խնդիր է, եւ մենք տրամադրված ենք, որ միասին գնալու դեպքում «Քաղաքացիական պայմանագիր» կուսակցությունը պետք է գերիշխող դիրք ունենա ընտրացուցակների մեջ:
-Այսինքն, առաջնային համարներում ՔՊ ներկայացուցիչնե՞ր լինեն:
-Ոչ այնքան այդ հարցը, այլ այն, որ ընդհանուր ցուցակում «Քաղաքացիական պայմանագիրը» պետք է շատ ներգրավվածություն ունենա, քան մյուս կուսակցությունները:
-Ըստ Ձեզ` ո՞ր սխալներն էին, որ ՀՀԿ-ին բերեցին ներկայիս իրավիճակին:
-Սխալները շատ-շատ էին: Դրանք առաջին հերթին բոլշեւիզմի մեջ էին: Բոլշեւիզմն ինչ էր ասում, մենք 501 հոգի ենք, դուք 500 հոգի եք, մենք ձեզնից մեկով ավել ենք, մենք կանք, դուք` չկաք, ամեն ինչ մեզ, ձեզ` ոչինչ: Դա առաջին կարեւորագույն սխալն էր, երկրորդը` ՀՀԿ-ի կողմից շարունակվող ընտրությունների մասսայաբար, տոտալ կեղծումներ, ընդհուպ մինչեւ ձայներ գնելու հանգամանքը 10.000, 15.000 դրամով: Դա կոպտագույն սխալ էր, եւ ՀՀԿ այդ շաղախը չէր կարող երկար տեւել, անպայման պետք է մի օր կործանվեր, որովհետեւ հենված էր ոչ ճիշտ արժեհամակարգի վրա: Հաջորդ սխալը իշխանական վերին օղակների կոռումպացված լինելն էր:
-Կարծիք կա, որ ներկայիս իշխանությունը նպատակաուղղված քայլեր է անում, որպեսզի մարդկանց տանեն բանտեր:
-Ոչ ոք նման մտայնություն չունի: Որեւէ կայացած բիզնեսմեն, որը մեծահարուստ է եւ լուրջ բիզնեսներ ունի, բայց խուսափել է իր հարկային պարտավորություններից, եթե բարեհաջող կատարի այդ պարտավորությունները, կարող է շարունակել իր բիզնեսը ծաղկեցնել նոր իրողությունների պայմաններում: Եթե հրաժարվի, մենք պետք է դիմենք օրենքով նախատեսված մեթոդներին: Հիմա ինչ է, մենք պետք է քայլեր չանե՞նք, որ ասեն, թե ինչքան բարի ենք մենք: Դա էլ ճիշտ չի:
-Հայտնի տեսանյութից հետո, որ Ձեզ էր առնչվում, արդյոք քննարկե՞լ եք Նիկոլ Փաշինյանի հետ այն, որ Դուք շարժման հետ կապված ոչ միանշանակ էիք արտահայտվել: Եվ արդյոք բացատրե՞լ եք, թե ինչն է եղել խնդիրը:
-Այդ տեսանյութը մոտ 20 րոպե հայտնվեց համացանցում, որից մոտ 1 ժամ հետո մենք այդ հարցին անդրադարձանք վարչությունում: Իմ ընկերներն ընդամենը բավարարվեցին բանավոր դիտողությամբ, որ պետք է ավելի զգույշ լինել նման դեպքերում նման մարդկանց հետ շփվելիս, որպեսզի առիթ չտանք նման բացասական դրսեւորումների: Ես շնորհակալ եմ իմ ընկերներին. իրենք ըմբռնումով մոտեցան: Դե, բնականաբար, ես չէի կարող այդպիսի տեսակետ ունենալ, ես այդ ամենն ասում էի հեգնանքով: Մանավանդ որ ձայնագրությունն ամբողջությամբ չի հրապարակվել:
-Ն. Փաշինյանի հետ անձամբ խոսե՞լ եք այս թեմայով:
-Նիկոլ Փաշինյանն ինձ բառացի ասաց հետեւյալը վարչության նիստի ժամանակ. պարո՛ն Աղազարյան, մենք պետք է հաշվի առնենք, որ առավոտից երեկո գտնվում ենք տեսախցիկների առաջ, ու ես ընդունեցի` որպես ճիշտ դիտողություն:
-Այդ անձը, որ Ձեզ ձայնագրել էր, Ձեզ մտերի՞մ էր, եւ արդյոք հիմա նրա հետ շփումը շարունակո՞ւմ եք:
-Ո՛չ: Ես այդ անձին չեմ ճանաչել: Ինքն իմ ֆեյսբուքյան ընկերներից էր, որովհետեւ երբ ինձ ասացին, որ ինձ կանչում են, ես շրջվեցի, իր դեմքն ինձ ծանոթ թվաց, բայց չհիշեցի, թե որտեղից է ինձ ծանոթ: Ինքը ներկայացավ, ասաց` Հովիկ ջա՛ն, Ռոբերտն եմ: Դա հավաքի ժամանակ էր, նա ասաց` ուզում եմ ելույթ ունենալ: Ես ասացի` դե գիտես, այսօր հնարավոր չի, որովհետեւ ամեն ինչ ծրագրված է, միգուցե վաղը հանդիպենք, տեսնենք` ինչ թեմայով ես ուզում խոսել: Մենք պայմանավորվեցինք հաջորդ օրը հանդիպել, ու տեղի ունեցավ այդ ամենը: Ես ընդամենը մյուս օրը զանգեցի իրեն ու ասեցի` Ռոբերտ ջա՛ն, շնորհակալություն տղամարդկային կեցվածքի համար: Այդքան բան: Այլեւս իր հետ չեմ շփվել: Ամիսներ հետո ինքը դա շրջանառության մեջ դրեց. ինչ նպատակով` կարելի է կռահել: Ես հրավիրեցի մամուլի ասուլիս, ոչ ոք չեկավ, ինքն էլ չեկավ, որպեսզի առարկայական զրույց լիներ:
-Ժամանակին ՀՅԴ-ից հեռացվել եք: Հիմա ՔՊ-ից հեռացվելու խնդիր, այսինքն, չկա՞ այս կամ այլ հարցով:
-Ոչ, ինչո՞ւ պիտի հեռացվեմ: Չկա նման հարց: Դաշնակցությունից ես հեռացվել եմ 1999 թ.: Երկար տարիներ տարբեր ճանապարհներով փորձել եմ վերականգնվել կուսակցության մեջ, չի հաջողվել: Եվ քանի որ գտել եմ, որ կարող եմ ասելիք ունենալ քաղաքականության մեջ, եւ պահը եկավ, ես պետք է կողմնորոշվեի` որ քաղաքական ուժի հետ շարունակեի իմ ճանապարհը: Իմ հայացքներին առավելագույնը մոտ էր ՔՊ ծրագիրը, եւ ես դարձա հիմնադիր-անդամներից մեկը:

ԿՐԿՆԱՔՎԵԱՐԿՈՒԹՅՈՒՆՆ ԱՆՀՆԱՐ Է ԼԻՆԵԼՈՒ

Առաջիկայում անցկացվելիք արտահերթ խորհրդարանական ընտրություններին մատնահետքով նույնականացման, մատների թանաքոտման եւ ընտրողների նախագրանցման մեխանիզմներ ԸՕ-ում չեն ամրագրվի: Այս մասին երեկ հայտնել է վարչապետին առընթեր ԸՕ բարեփոխումների հանձնաժողովի քարտուղար Դանիել Իոաննիսյանը:

Հիշեցնենք, որ ժամանակին ընդդիմությունն ու քաղաքացիական հասարակության ներկայացուցիչները, այդ թվում Իոննիսյանն էր իշխող ՀՀԿ-ից պահանջում ընտրական կարգավորումների մեջ պարտադիր ներառել թանաքոտման եւ այլ մեխանիզմներ: Թեմայի շուրջ «Ժողովուրդ» օրաթերթը պարզաբանում է ստացել Դանիել Իոաննիսյանից:
-Պարո՛ն Իոաննիսյան, այս պարագայում, երբ մատների թանաքոտման եւ այլ մեթոդներ չեն գործելու, չե՞ք կարծում, որ ՀՀԿ-ի մոտ կարող է անվստահություն առաջանալ ընտրությունների հանդեպ:
-Մենք բազմաթիվ այլ մեխանիզմներ ենք առաջարկելու, որոնք քննարկվում են: Դեռ որոշումներ չկան: Ես չեմ կարող կանխատեսել` ՀՀԿ-ի մոտ ինչը կարող է վստահություն կամ անվստահություն առաջացնել: Բայց լինելու են կարգավորումներ, որոնցով հանրությանը երաշխիքներ են տրվելու, որ կրկնաքվեարկությունն անհնար է լինելու:
Հ. Գ. Ամեն դեպքում պետք է նշել, որ գլխավորը քաղաքական կամքի առկայությունն է: Եթե դա եղավ, ապա ընտրությունները չեն կեղծվի` անկախ այս կամ կարգավորումից:

Նյութերը` ՄԵՐԻ ՄԱՐՏԻՐՈՍՅԱՆԻ

ԸՆԴԴԵՄ ԽՈՍՐՈՎԻ
ԱԺ պատգամավոր Խոսրով Հարությունյանի կողմից ստեղծված Հայաստանի քրիստոնեա-դեմոկրատական միություն (ՀՔԴՄ) կուսակցությունը հայտնվել է դատարանում: «Ժողովուրդ» օրաթերթին հայտնի դարձավ, որ հուլիսի 19-ին ՀՀ տնտեսական զարգացման եւ ներդրումների նախարարության պետական գույքի կառավարման կոմիտեն դիմել է դատարան՝ պահանջելով այդ կուսակցությունից գումար բռնագանձել: «Ժողովուրդ» օրաթերթը պարզեց, որ գանձվող գումարի չափը կազմում է 3 միլիոն 625 հազար 500 դրամ: Փորձեցինք ԱԺ պատգամավորից հասկանալ, թե ինչ պարտք ու պահանջի մասին է, որ կոմիտեն դիմել է դատարան, սակայն մեր փորձերը անցան ապարդյուն: Նա չէր պատասխանում մեր հեռախոսազանգերին:

ՍԱՀՄԱՆՆԵՐԸ ԿՃՇՏԵՆ
Անշարժ գույքի կադաստրի պետական կոմիտեի կողմից շրջանառության մեջ է դրվել «Հայաստանի Հանրապետության վարչատարածքային բաժանման մասին» օրենքում փոփոխություններ կատարելու մասին նախագիծը: Ըստ այդմ` գերատեսչությունը նպատակ ունի հստակեցնել մարզերի վարչական սահմանները: Մասնավորապես, վերացնելու են սահմանների անճշտությունը (Բալահովիտ-Գետարգել) եւ հարեւան համայնքների փոխադարձ համաձայնությամբ վարչական սահմանների փոփոխում կլինի (ՀՀ Գեղարքունիքի մարզի Մարտունի-Վաղաշեն): Իսկ ՀՀ Գեղարքունիքի մարզի Մարտունի համայնքի նախկին երկրորդ հատվածի հողերը, որոնք սեփականաշնորհվել են այդ համայնքի բնակիչների կողմից, ընդգրկվել են այդ հողերին սահմանակից Վաղաշեն համայնքի վարչական սահմաններում, ինչը Մարտունի համայնքի եւ հողի սեփականատերերի մոտ դժգոհություն է առաջացրել, եւ չեն բացառվում բողոքի ակցիաները:

ՄԻԼԻՈՆՆԵՐԻ ՀԱՍՆՈՂ ՈՒՂԵԳՈՐԳԵՐ
«Ժողովուրդ» օրաթերթին հայտնի դարձավ, որ ԱԺ-ն դեռ մայիս ամսին ուղեգորգ գնելու համար ՀՀ պետական բյուջեից 5.1 մլն դրամ է ծախսել: Պաշտոնական փաստաթղթերի համաձայն՝ ԱԺ-ն «Արմկարպետ» ՍՊԸ-ից գնել է ընդհանուր 600 հատ ուղեգորգ՝ յուրաքանչյուրը 8500 դրամ արժողությամբ: Ուղեգորգերի տեխնիկական նկարագրում էլ նշված է, որ դրանք պետք է պատրաստված լինեն որսի թելից ու պոլիպրոպիլենից, լինեն հակաալերգիկ ու հրակայուն: Իսկ արդեն վերջնական նախշերը պետք է համաձայնեցվեն պատվիրատուի հետ: Մինչ այդ, հետաքրքիր է՝ ի՞նչ են եղել ԱԺ-ի հին ուղեգորգերը, որ հիմա նորերը ձեռք բերելու կարիք է առաջացել:
Հատկանշական է փաստը, որ այս փաստաթղթերը ստորագրել է ոչ թե ԱԺ աշխատակազմի ղեկավար Արա Սաղաթելյանը, այլ ֆինանսական փաստաթղթերի պատասխանատվությունը դրվել է նրա առաջին տեղակալ Գագիկ Մխեյանի վրա: