Հյուսիս-հարավ ծրագրի շուրջ կատարվող քննության եւ այլ խնդիրների շուրջ «Ժողովուրդ» օրաթերթը զրուցել է Տրանսպորտի, կապի եւ տեղեկատվական տեխնոլոգիաների նախարար Աշոտ Հակոբյանի հետ:
-Պարո՛ն Հակոբյան, Դուք նշել եք, որ Հյուսիս-հարավ ծրագրի շրջանակում հնարավոր հափշտակությունների խնդրով զբաղվում են իրավապահ մարմինները: Նախորդ տարի Դուք զբաղեցնում էիք ՀՔԾ կոռուպցիոն, կազմակերպված եւ պաշտոնեական հանցագործությունների քննության վարչության պետի պաշտոնը: Ինչո՞ւ այդ ժամանակ այս խնդրով չէիք զբաղվում:
-Այն ժամանակ եւս բազմաթիվ հնչեղ գործեր են եղել: Մենք մի ամսվա մեջ երեք դատավորների քրեական գործ ենք ուղարկել դատարան: Ներկա պահին էլ ունենք բազմաթիվ քրեական գործեր, որոնցով դատախազներ, դատավորներ քրեական պատասխանատվության են ենթարկվել: Քննչական մարմինն ինքնանպատակ գործեր չի հարուցում եւ այդ գործերը հարուցվում են ստացված նյութերի հիման վրա: Բոլոր այն նյութերը, որ մեր վարչությունում ստացվել են, եթե դրանցում եղել են քրեաիրավական հատկանիշներ, մենք հարուցել ենք քրեական գործեր, եւ որոնցով բավարար ապացույցներ եղել են, ուղարկել ենք դատարաններ: Խնդիրը նաեւ 2-րդ կողմն ունի, որը կապված է մեր ժողովրդի ինքնագիտակցության հետ: Եվ կարծում եմ, որ վերջին ժողովրդական շարժումը, որ տեղի ունեցավ մեր երկրում, կփոխի նաեւ մեր ժողովրդի գիտակցությունը, պատրաստակամությունն օժանդակելու քննչական մարմիններին: Մեր ազգի մեջ կա այդ բնավորությունը` վատամարդ չլինելու, ամեն կերպ վկայություն տալուց խուսափելու:
-Այսինքն` խնդիրն այն է եղել, որ Հյուսիս-հարավ ծրագրի մասով բավարար փաստեր չե՞ն եղել:
-Հյուսիս-հարավի վերաբերյալ մենք այն ժամանակ որեւէ նյութ չենք ստացել:
-Այս գործով նախկին նախարարները նույնպես ներգրավվա՞ծ են լինելու:
-Ինչ վերաբերում է նախորդ նախարարների կողմից կոռուպցիոն մասնակցությանը, համարեք, որ ես Ձեզնից մեկն եմ, եւ ես շատ կուզեի, որ նման բան լիներ, ու ես կբարձրաձայնեի անպայման: Ուղղակի եթե մենք ուզում ենք անուններ տալ, այդ անունների հետեւում պետք է լինեն փաստական տվյալներ: Միայն ասելով, որ այսինչ մարդն այսպիսի հանցանք է կատարել, դա շատ քիչ է: Մենք պիտի ունենանք կոնկրետ փաստական տվյալներ, թե երբ կոնկրետ ինչ է արել, որքան է հափշտակել, ում միջոցով: Նման բաներ ես այսօր չունեմ: Փառք բախտի` հիմա իրավապահները դրանով զբաղվում են: Ցանկացած փաստաթղթի, ցանկացած տեղեկության անմիջապես արձագանքել եմ, որ փաստաթղթերից մի բան էլ ավելի տամ: Եվ տեսնենք, թե քննությունն ինչի կբերի:
-Եթե պարզվի, որ նախկին նախարարները` Վահան Մարտիրոսյանը կամ Գագիկ Բեգլարյանը, ով ավելի երկար է պաշտոնավարել, ունեցել են մասնակցություն չարաշահման հարցում, Դուք ներելո՞ւ եք Ձեր, այսպես ասած, նախկին գործընկերներին:
-Ներողը ես չեմ, ներողը հանրությունն է եւ ներկա իշխանություններն են: Ամեն հանցանք չի, որ ներվում է: Եթե դա կվերաբերի մարդուն մի անգամ ապտակելուն, դա կարող է ներվել, բայց չարաշահումներ հատկապես խոշոր ծրագրում, ենթադրում եմ, որ դրանք խոշոր մասշտաբի պիտի լինեն, իհարկե, ոչ թե կներենք, այլ մենք անպայման կբարձրաձայնենք: Ասեմ, որ ես մինչեւ նշանակումս ոչ մի անձնական հարաբերություններ ո՛չ Վահան Մարտիրոսյանի, ո՛չ Գագիկ Բեգլարյանի, ո՛չ էլ նախորդների հետ չեմ ունեցել: Եվ որեւէ բանով կաշկանդված չեմ բարձրաձայնելու:
-Դուք ԲՀԿ քվոտայով դարձաք նախարար: Ե՞րբ եք այդ կուսակցության համակիրը դարձել:
-Նախորդ տարվա սեպտեմբեր ամսից:
-Ի՞նչը պատճառ դարձավ, որ որոշեցիք ԲՀԿ-ին անդամակցել:
-Ես աշխատանքից ազատվելուց հետո սկսեցի աշխատել հայ-բելառուսական առեւտրի տան գլխավոր տնօրեն, որը «Մուլտի գրուպ»-ի կազմում է: Եվ այդ ընթացքում շփվելով կուսակցության մի շարք գործիչների հետ` որոշում կայացրի անդամակցել:
-Արտահերթ ընտրություններին որքանո՞վ եք Ձեր վարչական ռեսուրսներն օգտագործելու ԲՀԿ-ի օգտին:
-Վարչական ռեսուրսները, բնականաբար, ես չեմ օգտագործելու ԲՀԿ-ի օգտին:
-Իսկ ինչ-որ կերպ աջակցություն լինելո՞ւ է Ձեր կողմից:
-Կարծում եմ` այդ աջակցությունը կարող է լինել միայն մեր աշխատանքի արդյունքով, միայն մեր ձեռքբերումներով, որպեսզի դա ժողովուրդը գնահատի: Այլ լծակներ չեն կարող օգտագործվել:
-Երբ ՀՔԾ-ում էիք աշխատում, նախորդ իշխանության կողմից ունեցե՞լ եք կաշկանդվածություն, որ գուցե որոշ գործերի վրա աչք եք փակել:
-Նման բան չի եղել: Եվ դա չէր կարող պայմանավորված լինել միայն ինձնով, որ ես կարողանայի աչք փակել: Ցանկացած գործ, ինչպես գիտեք, բացի քննիչից, ծառայության տնօրենից, քննարկվում է նաեւ դատախազությունում: Ճնշումներ որեւէ գործի վերաբերյալ չեն եղել:
-Բայց վարչապետը նշում էր, որ դատարանները, իրավապահ մարմինները նախորդ իշխանության կողմից ուղղորդվել են: Գուցե Դուք Ձեր մաշկի վրա չեք զգացել, բայց ղեկավար անձանց դեպքում չե՞ք նկատել այդ ուղղորդումը:
-Ես այդպիսի կաշկանդվածություն ՀՔԾ-ում չեմ զգացել:
-Հյուսիս-հարավ ծրագրի մասով քննությունը սկսվեց Ձե՞ր, թե՞ վարչապետի նախաձեռնությամբ:
-Իմ նախաձեռնությունը չի եղել, որովհետեւ ես կոնկրետ փաստ չեմ ունեցել: Ես ընդամենը նախաձեռնել եմ, թե ինչ միջոցներ կարող են կիրառվել, որ ընթացքն արագանա: Ոչնչի առաջ չենք կանգնել, նույնիսկ նախկին աշխատակիցների ենք հրավիրել, ում աշխատանքի օրոք ճանապարհահատվածն ավելի արագ է կառուցվել: Զուտ կարծիքների փոխանակման համար էր, թե իրենք ինչ առաջարկներ ունեն: Ինչ վերաբերում է քննությանը, ես չգիտեմ, թե նյութերը որտեղից են ստացվել: Գիտեմ, որ հետաքրքրվում են ե՛ւ դատախազությունից, ե՛ւ ՊԵԿ քննչական ծառայությունից. թղթեր են պահանջում: Մենք չենք ուզում միջամտել, մասնավորապես` ես: Եվ ներկա պահին ԾԻԳ-ի տնօրենն էլ է փոխված, նախկին փոխնախարարները չկան: Կարծում եմ` անկաշկանդ ենք այս հարցում:
-Դուք նախաձեռնե՞լ եք նախարարության ներսում աուդիտ կամ ստուգում պարզելու համար, թե ինչ է կատարվել նախկինում:
-Պլանային ստուգումներից հետո վերջին 1 ամսվա ընթացքում ինձ 3 հաշվետվություն է ներկայացվել: Թե ինչ է կատարվել, դրան չեմ կարող անդրադառնալ: Ես չեմ բացառում, երբեք նման կարծիք չեմ հայտնի, որ չարաշահումներ չեն եղել: Հնարավոր է, որ եղել են, բայց դրա համար փաստական տվյալներ են պետք: Ես այսօր բաց եմ: Իմ եւ մեր անձնակազմի հիմնական նպատակը թափանցիկ աշխատելն է:
-Որոշ քաղաքացիներ կարծում են, որ Հյուսիս-հարավ ճանապարհը վերջնական տեսքով իրենց երեխաները կամ թոռները կտեսնեն: Որպես նախարար` Դուք ի՞նչ կասեք:
-Չեմ կարծում, որ այդքան հեռու ապագայում է լինելու: 1, 2, 3 տարվա խնդիր չի, բայց կապված ֆինանսավորման, հանգամանքների զարգացման հետ` հնարավոր է` մենք 4, 5 տարվա ընթացքում ունենանք ճանապարհը:
-Վարչապետը Ձեր առջեւ ի՞նչ խնդիր է դրել, եւ ի՞նչ եք անում դա կատարելու համար:
-Առաջին խնդիրը, որ բոլորի առջեւ է դրել, կոռուպցիոն դրսեւորումների բացառումն է, ինչին աշխատանքի, ստուգումների ընթացքում հետեւում ենք: Ճանապարհների որակի վերաբերյալ էլ վարչապետը բացահայտ ասել է, որ չպետք է ունենանք անորակ ճանապարհներ, եւ իմ վերջին գործողությունները դրան են ուղղված եղել:
ԿԳՆԱՄ, ԿՆՍՏԵՄ, ԲԱՅՑ ԿՊԱՅՔԱՐԵՄ ՄԻՆՉԵՎ ՎԵՐՋ. Ռ. ՔՈՉԱՐՅԱՆ
Երեկվա գլխավոր լուրը ՀՔԾ որոշումն էր, երբ պաշտոնաթող նախագահ Ռոբերտ Քոչարյանին Մարտի 1-ի գործով որպես վկա հարցաքննելուց հետո մեղադրանք առաջադրվեց ու դատարան կալանավորման միջնորդություն ներկայացվեց:
Մեղադրանքն առաջադրվել է ՀՀ քրեական օրենսգրքի 300.1 հոդվածի հատկանիշներով` սահմանադրական կարգը տապալելու համար: Ու մինչ դատարանը կքններ Քոչարյանին կալանավորելու միջնորդությունը, նա «Երկիր մեդիա» հեռուստաընկերությանը հարցազրույց է տվել:
Քոչարյանը նշել է, թե քրեական գործը շինծու է, այն քաղաքական հետապնդում է, վենդետա: Նա ասել է, որ տեղեկություն չունի, որ բանակ է հանվել ժողովրդի դեմ: «Բանակը դուրս է բերվել, այո՛, բայց բանակը չի հանվել ժողովրդի դեմ: Չկա մի զինվոր, որը գոնե աննշան վնասվածք ստացած լինի»,-ասել է նա:
Անդրադառնալով ներկայիս իշխանության գործելակերպին` Քոչարյանը նշել է. «Ես մտածում եմ` Նիկոլը մտածում է առաջիկա ընտրություններին իմ հնարավոր մասնակցության մասին եւ ուզում է կանխել»: Ինչ վերաբերում է առաջադրված մեղադրանքին, Ռ. Քոչարյանը նշել է. «Ես ապշել եմ իմ մեղադրանքի բովանդակությունից. 0-ական մակարդակի մեղադրանք, 37 թիվն է դառնում: Աբսալյուտնո շինծու մեղադրանք: Չգիտեմ, կարող է վաղը ես հայտնվեմ բանտում, կմտածեն` փախնելու եմ: Բայց, չէ, կգնամ, կնստեմ, բայց կպայքարեմ մինչեւ վերջ»:
Նյութերը` ՄԵՐԻ ՄԱՐՏԻՐՈՍՅԱՆԻ
ԹԱՔՑՆՈ՞ՒՄ ԵՆ
«Ժողովուրդ» օրաթերթը երեկ պարզեց, որ կառավարության e-gov.am կայքի՝ «մեկ անձից կատարվող գնումներ» բաժնից անհետացել են պետական մարմինների կատարած գնումների պայմանագրերի պատճեները: Մինչդեռ այդ պայմանագրերի ուսումնասիրությունը հիանալի հնարավորություն էր տալիս մանրամասն պատկերացում կազմելու կատարվողի մասին: Հիշեցնենք, որ այդպես եղել էր նաեւ Տիգրան Սարգսյանի վարչապետության օրոք՝ 2013թ., երբ տեսնելով, որ մամուլը մեծ ուշադրություն է դարձնում իրենց ահռելի ճոխ գնումներին` վերահսկելով նրանց քայլերը` որոշում էր կայացվել պայմանագրերը կայքից հեռացնելու մասին: Իհարկե, մամուլում բարձրացված աղմուկից հետո Տիգրան Սարգսյանի կառավարությունը վերանայեց իր աշխատաոճն ու շտկեց սխալը՝ կրկին կայքում տեղադրելով պայմանագրերը: Հետաքրքիր է՝ ինչո՞ւ նման իրավիճակ է նաեւ հիմա, երբ Փաշինյանի կառավարությունը թափանցիկության հետ խնդիրներ չունի: Համենայնդեպս, իրենք են հայտարարել, որ թափանցիկ են աշխատելու: Մեկ փաստ էլ՝ կայքում տեղադրված են ոչ միայն կառավարության, այլեւ պետական մյուս բոլոր գերատեսչությունների մեկ անձից արված գնումները:
ԳՈՐԾԸ ՎԵՐԱԲԱՑԵԼ ԵՆ
Ինչպես հայտնի է, հուլիսի 5-ին ՀՀ վարչապետ Նիկոլ Փաշինյանի՝ Սյունիքի մարզ աշխատանքային այցի ժամանակ բնակիչներից մեկը պատմել էր մի սպանության մասին, որի արդյունքում որբ են մնացել երկու անչափահաս աղջիկներ: Երկու որբացած աղջիկները լացակումած մոտեցել էին վարչապետ Փաշինյանին: Տեսարանը եւ երեխաների պատմածն այնքան հուզիչ էր, որ ՀՀ վարչապետը եւս չէր կարողացել զսպել արցունքները: Ավելի ուշ «Ժողովուրդ» օրաթերթը զրուցել էր նաեւ Մերի Հարությունյանի հետ, որը խնդրել է վարչապետին արդարություն վերականգնել եւ բացահայտել երեք երիտասարդների մահվան պատճառները: Եվ ահա երեկ մեզ հայտնի դարձավ, որ մահացած տղաների հարազատներին այսօր կանչել են Ստեփանակերտ` հայտնելով, որ գործին նոր ընթացք են տալիս, նոր քննիչ է նեգրավվել գործում, նոր դատախազ, որպեսզի օբյեկտիվ քննի տղաների մահվան հանգամանքը:
Հիշեցնենք` Մերի Հարությունյանը պատմել էր, թե իր որդին մի քանի հոգու հետ 2016 թվականի մայիսի 20-ին Արցախում գտնվող Տաք ջուր կոչվող ավազանում գնացել են լողանալու. «5 հոգով են եղել` իմ որդին` Կարեն Ալավերդյանը, Գրիշա Առուշանյանը եւ Արտյոմ Բլբուլյանը, եւ եւս երկու հոգի: Այդ մյուս երկու հոգին` Ղարաբաղի շրջանի Լաչինի մարզպետ Սուրեն Խաչատրյանի հովիվները: Ավելի ուշ հայտնի է դառնում, որ իբր տղաները լողացել են, եւ այդ տաք ջրի ավազանի գազից Կարեն Ալավերդյանը, Գրիշա Առուշանյանը եւ Արտյոմ Բլբուլյանը խեղդվել են»: Մահացած տղաների հարազատները պնդում են, որ նրանք չեն խեղդվել, այլ նրանց սպանել են:
.gif)
