«Ո՞ՒՄ Է ՊԵՏՔ ՃՇՄԱՐՏՈՒԹՅՈՒՆԸ, ՈՐԸ ՉԻ ԵՐՋԱՆԿԱՑՆՈՒՄ»

«Ժողովուրդ» օրաթերթի բլից հարցերին պատասխանել է դերասանուհի Ռոզի Ավետիսովան: Մենք փորձել ենք բացահայտել նրա էությանը բնորոշ գծերը: Ռոզին խոսել է անձնական եւ գործնական թեմաներից, պատասխանել է այն հարցերին, թե ովքեր են իրեն մշտապես հիացրել, ինչն է կնոջը դարձնում գրավիչ, եւ ինչի մասին է այժմ դերասանուհին երազում: Մեր զրուցակիցը տվել է հակիրճ, բայց բավական անկեղծ պատասխաններ:

-Երբ ասում են մանկություն, պատկերացնում եք…
-Քաղցր բամբակ. շատ եմ սիրել (ծիծաղում է):
-Երբ դպրոցական էիք, ապագայի հետ կապված մի կարեւոր պլան ունեիք…
-Դառնալ դերասանուհի:
-Կյանքը հարկավոր է ապրել այնպես, որ…
-Ամեն վայրկյանին հաճույք զգաս:
-Կնոջը առաջնահերթ զարդարում է…
-Երեւի հենց կանացիությունը:
-Շարունակեք միտքը. «Ո՞ւմ է պետք այն ճշմարտությունը, որը…»
-Մարդուն չի երջանկացնում:
-Կնախընտրեք ունենալ աշխատանքային մեծ փորձ, թե գիտելիքների հսկայական պաշար:
-Աշխատանքային մեծ փորձ: Մեր մասնագիտության պարագայում փորձն է պրոֆեսիոնալիզմի բերում, միայն տեսական գիտելիքները ոչինչ են:
-Սիրելի սպորտաձեւը:
-Որեւէ սպորտաձեւով չեմ զբաղվում, բայց ֆուտբոլ եմ սիրում, աշխարհի խաղերին էլ հետեւել եմ:
-Քամի, անձրեւ, թե՞ ձյուն, ո՞րն է Ձերը:
-Անձրեւ, որովհետեւ սիրում եմ ջուրը` իր բոլոր դրսեւորումներով:
-Մեծերից լսած մի անգին խորհուրդ:
-Երեւի այս հայտնի ասացվածքը` «Ինչ որ ցանես, այն էլ կհնձես»:
-Թավշյա հեղափոխությունից հետո հասկացաք, որ…
-Ժողովրդի համար անհնարին ոչինչ չկա: Հայի տեսակն անվերջ պայքարող տեսակ է: Մենք կարողացել ենք մեր տեսակը պահպանել անգամ ամենածայրահեղ պայմաններում, երբ թվում էր` դա անհնար է, երբ շատ ժողովուրդներ պարզապես ջնջվեցին աշխարհի երեսից:
-Որքան մեծանում եք, այնքան գիտակցում եք, որ…
-Ես շատ երիտասարդ եմ (ծիծաղում է):
-Երբեք գումար չեք տա այն մուրացկանին, որը…
-Բոլորին էլ տալիս եմ. գումար տալուց առաջ չեմ մտածում ուրիշ բաների մասին, դա տեղի է ունենում ըստ իրավիճակի:
-Շարունակեք միտքը. «Եթե ուզում ես ապրել օրենքի երկրում…»
-Պետք է առաջինն ինքդ օրենքը չխախտես: Բայց մենք` հայերս, շատ ենք սիրում օրենք խախտել, էքստրեմալ հաճույք ենք ստանում դրանից:
-Ամեն ձեռքբերում ենթադրում է…
-Նոր նպատակներ, նոր ցանկություններ, երազանքներ եւ էլի ձեռքբերումներ:
-Միշտ հիացել եք այն մարդկանցով, որոնք…
-Կյանքի ցանկացած իրավիճակում ժպտում են: Ես այդպիսին չեմ, բայց իմ դեպքում մասնագիտությունս գալիս է օգնության, արդյունքում կարողանում եմ կառավարել էմոցիաներս եւ խաղում եմ այնպես, որ ոչ ոք նույնիսկ չի էլ կռահում իմ վատ տրամադրության մասին:
-Տնային գործերից ամենաշատը Ձեզ դուր է գալիս…
-Ժամանակին սիրում էի պատուհանները մաքրել, բայց հիմա ոչ մի գործ էլ չեմ սիրում (ծիծաղում է): Սիրում եմ համեղ ուտել, բայց խոհանոցում հազվադեպ եմ լինում, իսկ երբ լինում եմ, անպայման մի իմպրովիզացիա անում եմ:
-Բոլոր ժամանակների լավագույն գրողը:
-Ինձ համար մի քանիսն են` Մարկես, Դոստոեւսկի, Մուրակամի:
-Շարունակեք միտքը. «Անփոխարինելի մարդիկ չկան, բայց…»
-Յուրաքանչյուրի հետ մենք ապրում ենք առանձնահատուկ զգացողություններ, աշխարհում ոչինչ չի կրկնվում, ուրեմն ցանկացած մարդ անփոխարինելի է:
-Հիմա երազում եք…
-Տասը օր ծովում հայտնվելու մասին: Ցավոք, այս պահին աշխատում եմ, եւ դա անիրագործելի է:

Զրուցեց ԱՆՆԱ ԲԱԲԱՋԱՆՅԱՆԸ

«ԱՄԵՆԱՆՇԱՆԱԿԱԼԻՆ` ՀՈԿՏԵՄԲԵՐԻ 27-Ի ԲԱՑԱՀԱՅՏՈՒՄԸ»
«Մենք կարողացանք ազատվել կոռուպացված եւ ճահճացած համակարգից: Անօրեններն այնպես էին արմատավորվել, որ նույնիսկ մտածում էինք, թե դա անհնար է: Ամեն դեպքում, ռեալ տեղաշարժեր գրանցելու համար դեռ վաղ է, ժամանակ է պետք»,-«Ժողովուրդ» օրաթերթի հետ զրույցում նման տեսակետ հայտնեց երգիչ, երաժիշտ, գործիքավորող Վահագ Ռաշը` անդրադառնալով հայաստանյան ներքին քաղաքական կյանքին:
Միաժամանակ մեր զրուցակիցը տեսնում է նաեւ նոր կառավարության բացերը. «Կադրային նշանակումներից ոչ բոլորի հետ եմ համաձայն. շատերը պարզապես իրենց տեղում չեն: Ինձ թվում է` Փաշինյանն էլ այդ մասին գիտի, բայց այդ հարցը կլուծի գալիք ընտրություններից հետո»,-մեկնաբանեց նա:
Երաժիշտն անդրադարձավ նաեւ ՀՀ երկրորդ նախագահ Ռոբերտ Քոչարյանի կալանավորմանը` խոստովանելով, որ նրա անձի հետ կապված նման շրջադարձ սպասում էր, բայց ոչ այս փուլում. «Կարծում եմ` Քոչարյանի գործած հանցագործություններից Մարտի 1-ը ամենամեծը չէ: Տարիների ընթացքում նա թալանել է երկիրն ու ահռելի հարստություն կուտակել: Իհարկե, Մարտի 1-ը պետք է լինի բացահայտումների սկիզբը: Բայց այդ գործում միայն Քոչարյանը չի ընդգրկված, շատ այլ լուրջ մարդիկ էլ պետք է պատասխանատվություն կրեն: Ամեն դեպքում, ինձ համար ամենանշանակալին կլինի հոկտեմբերի 27-ի բացահայտումը»,-ասաց նա:
Վահագի համոզմամբ` օրենքի երկիր ունենալը մեզ օդ ու ջրի պես անհրաժեշտ է: Նրա խոսքով` վերջին տարիների ընթացքում մեր երկիրը գլորվում էր դեպի անդունդ, որից դուրս գալու համար անհրաժեշտ էր յուրաքանչյուրիս աջակցությունը, պետականամետ մտածելակերպը:
Հարցին, թե հանրության շրջանում ինչ տրամադրություններ է նկատում, Վահագը պատասխանեց. «Հեղափոխությունից առաջ կային իսկական պայքարողներ, որոնք ստացան իրենց պայքարի պտուղները եւ գոհացան, բայց կային նաեւ այնպիսիք, որոնք մասնակցում էին հեղափոխությունից հետո ինչ-որ բան, օրինակ` պաշտոն, ստանալու ակնկալիքով, եւ երբ դա չեղավ, սկսեցին դեմ խոսել: Ակնհայտ են նաեւ մարդիկ, որոնք օգտվում էին նախկին իշխանության տաշտակից եւ այսօր ձեռնունայն են մնացել, ամեն քայլափոխի բացթողումներ են փնտրում, ամեն ինչի մեջ վատն են տեսնում: Բայց ես վստահ եմ, որ ամեն բան դեպի լավն է գնալու»:

Ա. ԲԱԲԱՋԱՆՅԱՆ