Հակահեղափոխություն, իհարկե, չի լինելու, հետդարձի ճանապարհ չկա. Լիլիթ Մակունց

«Ժողովուրդ» օրաթերթի հարցերին պատասխանել է ՀՀ մշակույթի նախարար Լիլիթ Մակունցը: Մենք զրուցել ենք հակահեղափոխության շանսերի, նախարարությունում աշխատելու բարդությունների, Երեւանի ավագանու արտահերթ ընտրություններին ընդգրկված ուժերում մշակույթի գործիչների առկայության եւ այլ թեմաների շուրջ: 

-Տիկի՛ն Մակունց, ի՞նչ եք կարծում, հակահեղափոխությունն այսօր ի՞նչ շանսեր ունի: 

-Գիտե՞ք,  հիմա գտնվում ենք մի կետում, որտեղից հետդարձի ճանապարհ չկա: Մենք արդեն իսկ թավշյա հեղափոխության օրերին թելադրել ենք մի մշակույթ, որից հետադարձ ճանապարհ մենք՝ որպես միասնական ուժ,  չենք թողնելու, որ լինի: Երբ որեւէ բան նվաճում ես, եւ դա հաջողվում է քեզ անել ամենախաղաղ կերպով` ցնցելով աշխարհը, ինքնավստահություն ձեռք բերելով եւ հավատալով սեփական ուժերին, դրանից հետ կանգնելու հավանականությունն ուղղակի իրատեսական չեմ համարում: Հակահեղափոխություն, իհարկե, չի լինելու: Սա իմ  անձնական կարծիքն է: Մենք շարունակելու ենք գործել նույն ոգով, նույն տրամադրվածությամբ եւ իրավական դաշտի շրջանակներում՝ խստորեն հետեւելով օրենքներին:

-Հետաքրքիր է՝ անդամագրվելով «Քաղաքացիական պայմանագիր» կուսակցությանը՝ ի՞նչ ստացաք, դա Ձեզ ի՞նչ տվեց, կուսակցական լինելը կարո՞ղ է ի նպաստ մշակույթի լինել: 

-Գուցե շատերին հայտնի չէ, ասեմ, որ ես «Քաղաքացիական պայմանագիր» կուսակցության հիմնադիրներից եմ, եղել եմ դրա ստեղծման հիմքերում: Այդ ժամանակ կուսակցությանը չեմ անդամագրվել մի շարք պատճառներով. առաջին հերթին, որովհետեւ  աշխատանքս թույլ չէր տալիս ինձ ակտիվ քաղաքական գործունեություն վարել, իսկ նախարարի պաշտոնն արդեն քաղաքական է: Բացի այդ՝ հիմա կա թիմային աշխատանքի գործոնը: Կարճ ասած՝ անդամագրվելով կուսակցությանը՝ ֆորմալ առումով ամրագրել եմ իմ պատկանելությունը թիմին:

-Ի դեպ, մշակույթի նախկին նախարար Արմեն Ամիրյանին բավական քննադատեցին «Հանրապետական» կուսակցությանն անդամագրվելու համար: Հիմա, կարծես, Դուք եք նույն ճանապարհով գնում:

-Համեմատությունն այս պարագայում մի փոքր տեղին չէ, քանի որ, ինչպես նշեցի, ես ի սկզբանե եղել եմ «Քաղաքացիական պայմանագիր» կուսակցության հիմքերում: 

-Արդեն ադապտացվե՞լ եք նախարարությունում Ձեր աշխատանքին, Ձեր կարգավիճակին: Նախորդ իշխանության կադրերի հետ աշխատելը դժվար չէ՞, ստացվո՞ւմ  է երկխոսության մեջ մտնել նրանց հետ: 

-Հատկապես պաշտոնավարմանս սկզբի օրերին ինձ համար բարդ էր, որովհետեւ գիտեք՝ փոխնախարարները նախորդ իշխանության օրոք էին աշխատել, եւ կար քաղաքական շեշտադրումների տարբերության հարց:  Տեղակալներիս փոփոխությունից հետո խնդիրն այդ առումով լուծվեց. շեշտադրումները դրվում են այնպես, ինչպես մենք եւ մեր թիմն է ճիշտ համարում: Ինչ վերաբերում է նախորդ կադրերին, շատ դեպքերում նրանք  ասում են. «Եթե մենք գործեինք այլ պայմաններում, եթե մեզ չթելադրեին, կկարողանայինք մեր պրոֆեսիոնալ դիրքորոշումը հայտնել, իրավիճակն այլ կերպ կլիներ»: Վստահ եմ՝ դուք էլ եք լսել նման պնդումներ: Հիմա նախարարությունում այն մարդիկ, որոնք իսկապես պրոֆեսիոնալ աշխատանք են կատարում, ունեն բոլոր հնարավորությունները: 

-Տիկի՛ն Մակունց, Երեւանի ավագանու արտահերթ ընտրություններին ընդգրկված ուժերի ներկայացուցիչների շրջանում  քիչ չեն մշակույթի գործիչները: Դուք երբեւէ միջնորդե՞լ եք, որպեսզի այս կամ այն գործիչը ներգրավվի ցուցակներում:

-Ոչ, բայց ուրախ եմ, որ թեկնածուների ցանկում մշակույթի մարդիկ կան: Ավագանին վճարովի հաստիք չէ, այն պահանջում է նվիրում, գաղափարների, ինչու ոչ, նաեւ երազանքների իրականացում: Ես ուրախ եմ, որ մտավորականները նույնպես հայտ են ներկայացնում քաղաքի բարելավմանն ու շենացմանը ուղղված գործընթացների իրականացմանը: 

Աննա Բաբաջանյան