ՓՈՐՁՈՒՄ ԵՆ ՀԵՌՈՒ ՄՆԱԼ ԼԱՐՎԱԾՈՒԹՅՈՒՆԻՑ

«Ժողովուրդ» օրաթերթի զրուցակիցն է Երեւանի ավագանու ընտրություններում «Երեւանի հանրություն» դաշինքի քաղաքապետի թեկնածու Անահիտ Թարխանյանը:

-Տիկի՛ն Թարխանյան, Երեւանի ավագանու ընտրություններին քիչ ժամանակ է մնացել, եւ քարոզարշավային վերջին օրերը լարված են ընթանում: Սպասո՞ւմ էիք, որ նման սրացումներ կլինեն:
-Իհարկե, ոչ: Մենք պատկերացնում էինք, որ դա կլինի ընտրություն Երեւան քաղաքի ապագա կառավարման մարմնի ձեւավորման համար, քաղաքապետի ընտրություն: Իսկ ի՞նչ է նշանակում քաղաքապետ եւ ավագանի, մի քանի անգամ արտահայտվել եմ, դրանք ադմինիստրատիվ պաշտոններ են եւ պարտավորություններ են, որոնք պետք է իրականացնեն: Մենք ի սկզբանե քաղաքական ուժերի մասնակցությունը չէինք ողջունում որպես Երեւանի հանրության ներկայացուցիչ, բայց ստիպված էինք ընդունել ու համակերպվել: Մենք ենթադրում էինք, որ թավշյա հեղափոխությունից հետո քաղաքական ուժերն այլ վերաբերմունք կցուցաբերեն Երեւանի քաղաքապետի ընտրություններին եւ կմասնակցեն ոչ թե որպես քաղաքական ուժեր, այլ ուժեր, որոնք ներկայացնում են մասնագետներին: Բայց դրա փոխարեն մենք ստացանք լարված քաղաքական պայքար. մի կողմը վստահության հանրաքվեի հարց է դնում, մյուս կողմից տարբեր մեղադրանքներ են հնչում: Ես, ճիշտն ասած, պարզապես հիասթափված եմ այն իրավիճակից, որ տեղի է ունենում վերջին օրերին, երբ մոռացվել են քաղաքի խնդիրները եւ քննարկվում են այնպիսի հարցեր, որոնք պետք է քննարկվեր խորհրդարանում:
-Ստացվում է դուք՝ որպես «Երեւանի հանրություն» դաշինքի քաղաքապետի թեկնածու, ձեռնպա՞հ եք մնում այս իրավիճակում: Թեժ պայքարին չե՞ք մասնակցում:
-Միանշանակ մենք փորձում ենք հեռու մնալ այս բոլոր խնդիրներից, դա մեր լիազորությունը չէ, դա մեր նպատակը չէ: Մեր նպատակը երեւանցիներին մեր մասնագիտական փորձն ու տեսլականը ներկայացնելն է եւ մեր փորձից ելնելով՝ ներկայացնելը, թե ինչպես հնարավոր կլինի դրանք լուծել:
-Բայց, ամեն դեպքում, նաեւ որպես ընտրություններին մասնակցող ուժ, չեք կարող ամբողջովին անմասն մնալ տեղի ունեցող գործընթացներից, բաժանումներից: Եվ վերջին օրերին շատ է խոսվում սեւ-սպիտակների բաժանման, դեմ-կողմ ուժերի մասին: Հիմա այս բաժանման մեջ «Երեւանի հանրություն» դաշինքը որտե՞ղ է. կո՞ղմ եք Նիկոլ Փաշինյանին եւ իր թիմին, թե՞ ոչ:
-Ձեր հարցը կոռեկտ չէ, եւ այսպիսի հարցերը նպաստում են այն բաժանարար գծին, որ դրված է այսօր: Եթե վարչապետի կողմից հարց է բարձրացվել, որ իրեն եւ ժամանակավոր կառավարությանը սատարողների խնդիր ունի, եւ խոսեց հանրաքվեի մասին, ապա ես կարծում եմ, որ դա պետք է առանձին կազմակերպվեր, եւ այդ դեպքում բոլորը նրան կսատարեին, քանի որ, իմ կարծիքով, մենք բոլորս կանգնել ենք եւ այն մասն ենք, որն իրականացրեց թավշյա հեղափոխությունը: Չմոռանանք իմ ամուսնուն, ով երկու տարի բանտարկված է եղել հենց հանրային, քաղաքացիական պայքարող որպես, եւ այսօր Ձեր հարցը խանգարում է այն պրոցեսին, որ տեղի է ունենում Երեւան քաղաքում: Երեւան քաղաքում բազմակարծիք հանրություն է, եւ որքան բազմաթիվ լինեն կարծիքներ, այնքան արժանի է եւ կարեւոր Երեւան քաղաքի ներկան եւ ապագան, քանի որ միայն առողջ բանավեճերի միջոցով հնարավոր է ձեւավորել առողջ ծրագրեր, այլ ոչ թե քաղաքականացնել:
-Այսինքն` դուք ինքներդ կողմ եք քաղաքապետի թեկնածուների միջեւ բանավեճ անցկացնելուն:
-Միանշանակ: Ես ինքս բազմաթիվ անգամ կոչ եմ արել, որ պետք է բանավեճեր լինեն, եւ կարծիքների բանավեճերի մեջ հնարավորություն տալ երեւանցուն եւ հանրությունը կազմող քաղաքացիներին իր ընտրությունը կատարել:
-Այս ընտրություններին մասնակից բոլոր ուժերն են գեղեցիկ ծրագրեր ներկայացնում, բայց անձամբ Ձեր ուժն ինչպե՞ս է իրականացնելու դրանք եւ որտեղի՞ց եք գտնելու անհրաժեշտ ֆինանսավորում:
-Խելացի ղեկավարումը չի ենթադրում միայն ֆինանսական միջոցներ: Մենք մեկ տարվա կառավարման խնդիրներն ենք բարձրաձայնում, եւ կառավարման համար շատ կարեւոր է առաջին շաբաթը: Մենք ներկայացրել ենք առաջնային 18 կետ, որի համար այդքան մեծ միջոցներ կամ ներդրումներ անհրաժեշտ չեն: Մեր ուժի հետեւում ոչ ոք կանգնած չէ՝ ո՛չ քաղաքական, ո՛չ ֆինանսական առումով: Եվ այս քարոզչությունը եւս իրականացվում է միայն միջոցներով:
-Հաշվի առնելով քարոզարշավի ընթացքը` ինչպե՞ս եք գնահատում Ձեր շանսերը եւ ովքե՞ր են Ձեզ աջակցողները: Արդյոք, օրինակ, «Սասնա Ծռեր» խմբավորման անդամները սատարում են Ձեզ՝ հաշվի առնելով Ձեր ամուսնու գործոնը:
-Ես մեր դաշինքի շանսերը շատ բարձր եմ գնահատում: Մեզ սատարողները հենց գրագետ, պատրաստված երեւանցին է, որը փորձ ունի, պարզ հասկանում է մեր ծրագրերը: Մենք մեծ հույսեր ենք կապում, որ այդ շերտը հիմնական ձայները կտա մեզ: Իսկ մնացածը ես գտնում եմ` ամեն մեկի անձնական վերաբերմունքն է: Մենք ուրախ կլինենք ամեն ձայնի համար, որ կտրվի մեզ, եւ շնորհակալ կլինենք այդ ձայների համար:
-Իսկ, ամեն դեպքում, քննարկե՞լ եք, եթե մուտք գործեք ավագանի, բայց ոչ առաջին տեղով, ինչպիսի՞ քաղաքականություն կվարեք, կօգնե՞ք հաղթող թեկնածուին:
-Մենք ոչ թե օգնելու ենք այդ քաղաքական ուժին, այլ մենք օգնելու ենք մեր հարազատ քաղաքին: Տարբերությունը դա է, եւ անելու ենք ամեն ինչ, որպեսզի մեր գիտելիքները, փորձը ծառայեցվի մեր քաղաքին. մեր նպատակը դա է:

Զրուցեց ՆԱԻՐԱ ՀՈՎՀԱՆՆԻՍՅԱՆԸ

ՀԱՄԱՅՆՔԱՊԵՏԱՐԱՆԸ` ՈՒՐԻՇԻ ՎԹԱՐԱՅԻՆ ՇԵՆՔՈՒՄ
Աճարկուտը Իջեւանի տարածաշրջանի փոքր համայնքներից է: Բնակավայրը հիմնադրվել է 1924թ. Կունեն կոչվող տարածքում: Այն հիմվել է փայտի սղոցման գործարանի շնորհիվ, շրջակա գյուղերից մարդիկ եկել են այդտեղ, աշխատանքի անցել, բնակություն հաստատել: 1932 թվականից արտադրության ընդլայնման արդյունքում այդտեղ սկսել են կառուցել բնակելի տներ, դպրոց, հիվանդանոց, խանութ, ճաշարան եւ այլն: 1964թ. Սեւքարի սղոց-գործարանը վերանվանվել է Աճարկուտ բանավանի: 2017թ. հունվարի 1-ի դրությամբ Աճարկուտն ունեցել է 177 բնակիչ, 50 տնտեսություն: Աճարկուտի համայնքապետարանը մշտապես տեղակայված է եղել Աճարկուտ գյուղում գտնվող Սեւքարի անտառտնտեսության վարչական շենքում: Սեւքարի անտառտնտեսության վարչական աշխատողները 7-8 տարի առաջ տեղափոխվել են Սեւքար գյուղի մուտքին գտնվող նորակառույց շենք: Աճարկուտ համայնքը 2016թ. սեպտեմբերի 18-ից ղեկավարում է 30-ամյա Մանվել Ավետիքյանը: Նա ասաց, որ Հայանտառը փորձել է Սեւքարի անտառտնտեսությանը պատկանող վարչական շենքը աճուրդով վաճառել, սակայն գործը չի ստացվել, որովհետեւ շենքը վթարային է: Վնասված է նաեւ կառույցի տանիքը: Աճարկուտում ազատ այլ շինություններ չկան, որպեսզի համայնքապետարանը, թեկուզ ժամանակավորապես, այնտեղ տեղակայվի:

ՀԱՆԳԱՆԱԿՈՒԹՅՈՒՆ ՄԱՆԿԱՊԱՐՏԵԶ ՊԱՀԵԼՈՒ ՀԱՄԱՐ
Իջեւանի տարածաշրջանի սահմանամերձ Բերքաբեր համայնքի ղեկավար Արթուր Մադաթյանն իր առողջական վիճակի պատճառաբանությամբ հրաժարական տալու վերաբերյալ դիմում է գրել, hամայնքի ավագանու 2018թ. հուլիսի 17-ի որոշմամբ` նրա լիազորությունները դադարեցվել են: Տավուշի մարզպետ Վահե Ղալումյանի հուլիսի 20-ի որոշմամբ` Բերքաբեր համայնքի ղեկավարի պաշտոնակատար է նշանակվել 35-ամյա Արգամ Արզումանյանը: 2018թ. հոկտեմբերի 21-ին կկայանան Բերքաբեր համայնքի ղեկավարի արտահերթ ընտրություններ: Արգամ Արզումանյանն առաջադրելու է իր թեկնածությունը: Նա ասաց, որ իրեն մտահոգում է գյուղում մանկապարտեզ չլինելու խնդիրը: 522 բնակիչ ունեցող Բերքաբերում նախադպրոցական տարիքի 21 երեխա կա, որոնք մանկապարտեզ գործելու դեպքում այնտեղ կհաճախեն: Ա. Արզումանյանը հայտնեց, որ մանկապարտեզ պահելու համար համայնքի բյուջեում ֆինանսական միջոցներ չկան: Նրա հաշվարկներով` մանկապարտեզի գործունեության համար ամսական շուրջ 600 հազար դրամ է հարկավոր: Ա. Արզումանյանն ասաց, որ ինքը մտադիր է այդ նպատակով դրամական հանգանակություն կատարել` դրամահավաքը սկսելով իր ծանոթներից եւ մտերիմներից, հետո կդիմի դոնորներին, բարեգործական կազմակերպություններին:

ՈՍԿԱՆ ՍԱՐԳՍՅԱՆ
Տավուշ

ԽՍՏԱԳՈՒՅՆՍ ԿՊԱՏԺՎԵՆ
Արարատի մարզպետ Գարիկ Սարգսյանը սոցցանցի իր էջում մարզի դպրոցների տնօրեններին կոչ է արել չաշխատել նախկինի պես եւ աշխատանքի համար հայտարարված մրցույթներին դիմած քաղաքացիներին չմերժել անհիմն: Նա նշել է. «Արարատի մարզի հարգելի եւ ոչ այնքան հարգելի դպրոցների տնօրեններ, կոչով դիմում եմ հատկապես Ձեզ: Եթե Ձեզ թվում է, որ դուք շարունակելու եք աշխատել նախկինի պես եւ թափուր տեղերի համար հայտարարված բաց մրցույթին դիմած քաղաքացիներին կարող եք մերժել` ասելով, որ իզուր եք դիմում, այդ տեղի համար արդեն ասված է, ապա չարաչար սխալվում եք: Այդ ճանապարհը Ձեզ լավ տեղ չի տանում: Բոլոր նման դեպքերը խստագույնս կպատժվեն, էլ չեմ ասում, թե ինչ կլինի կաշառք վերցնողների հետ: Սթափվե՛ք եւ զբաղվե՛ք մանկավարժությամբ, ծառայե՛ք այն վեհ գաղափարին, ինչի համար դուք կոչված եք»,-ասել է նա:

ԴԱՍԱԴՈՒԼ ԹԱՏՐՈՆԻ ԵՎ ԿԻՆՈՅԻ ԻՆՍՏԻՏՈՒՏՈՒՄ
«Երեւանի թատրոնի եւ կինոյի պետական ինստիտուտ»-ի մի խումբ ուսանողներ դասադուլ են հայտարարել: Նրանք պահանջում են ռեկտոր Դավիթ Մուրադյանի եւ բուհի վարչական կազմի հրաժարականը: «Նախորդ ուսումնական տարվա վերջից մենք արդեն շատ բողոքներ ունեինք: Մի քանի հանդիպում ունեցել ենք ռեկտորի եւ վարչական կազմի հետ: Մեր ամենագլխավոր պահանջը դա վարչական կազմի հրաժարականն է, քանի որ մենք ունենք հստակ փաստեր. ինստիտուտի ռեկտոր Դավիթ Մուրադյանը նույնիսկ իր անտեղյակության համար, որ իր կողքի կաբինետում նստած մարդը կարող է գումար լվանալ ինստիտուտի շնորհիվ, միայն իր անտեղյակության պատճառով պետք է հրաժարվի իր պաշտոնից»,-ասել է ուսանողներից մեկը:
Նշենք, որ օրերս ՀՀ ոստիկանությունը կոռուպցիայի եւ տնտեսական ապօրինությունների դեմ պայքարի շրջանակներում բացահայտումներ է կատարել ինստիտուտում: Պարզվել է, որ ինստիտուտի պաշտոնատար անձինք, 2012թ. օգտագործելով պաշտոնեական դիրքը, շահադիտական դրդումներով պաշտոնական փաստաթղթեր են կեղծել եւ վատնել առանձնապես խոշոր չափերի գումար: Դեպքի առթիվ հարուցվել է քրեական գործ:
Ինստիտուտի ռեկտոր Դ. Մուրադյանի խոսքով` դեռ քննություն է ընթանում, ինքն իրավապահ մարմիններին պարզաբանումներ տվել է եւ խորհուրդ տվեց սպասել քննության ավարտին: Մուրադյանը նաեւ նշել է, որ պրոռեկտորն արդեն հրաժարական է ներկայացրել: