ԼՈՒՐ ԿԱԴՐ

Լուսանկարն արվել է Աբովյան-Սայաթ-Նովա խաչմերուկում

Այս ճանապարհային նշանը տեւական ժամանակ է` գտնվում է այս վիճակում: Ճանապարհային նշանները տեղադրվում են անվտանգ երթեւեկություն ապահովելու նպատակով, բայց այս պարագայում այն չի ծառայում իր նպատակին:

ՀԱՐՑ. Ունեմ 22 տարվա աշխատանքային ստաժ, ստանում եմ հիվանդության թոշակ: Սեպտեմբերի 3-ին լրացել է 63 տարեկանս: Ուզում եմ իմանալ` բացի հիվանդության թոշակի գումարից, ես ինչպե՞ս կարող եմ անցնել կենսաթոշակի, ինչպե՞ս է հաշվարկվելու իմ կենսաթոշակի եւ հիվանդության թոշակի գումարը: Խնդրում եմ մանրամասն եւ ստույգ պատասխանել, թե կոնկրետ ինչքան է կազմելու իմ թոշակը: Ներկայացրեք, թե ինչ փաստաթղթեր պետք է ներկայացնեմ կենսաթոշակի անցնելու համար: Հունվարի 1-ից թոշակի 60 տոկոս բարձրացումը կազդի՞ իմ կենսաթոշակի գումարի վրա:

Գոհար Թովմասյան (63 տարեկան)

ՊԱՏԱՍԽԱՆ. «Պետական կենսաթոշակների մասին» ՀՀ օրենքի (այսուհետ` Օրենք) 7-րդ հոդվածի 3-րդ մասի համաձայն` պետական բյուջեից ֆինանսավորվող տարբեր կենսաթոշակների իրավունք ունեցող անձն ունի մեկ կենսաթոշակ ստանալու իրավունք` իր ընտրությամբ: Օրենքի 15-րդ հոդվածի համաձայն` աշխատանքային կենսաթոշակի չափը հիմնական կենսաթոշակի չափի եւ կենսաթոշակի աշխատանքային մասի գումարն է: Օրենքի 16-րդ հոդվածի համաձայն` հիմնական կենuաթոշակի չափը եւ աշխատանքային uտաժի մեկ տարվա արժեքը uահմանում է ՀՀ կառավարությունը: Աշխատանքային ստաժի մեկ տարվա արժեքն առաջին տասը տարվա համար սահմանվել է 800 դրամ, տասը տարին գերազանցող յուրաքանչյուր տարվա համար` 500 դրամ: Հաշմանդամության կենսաթոշակը եւս հաշվարկվում է վերը նշված կարգով եւ, Օրենքի 55-րդ հոդվածի 4-րդ մասի համաձայն, հաշմանդամության աշխատանքային կենսաթոշակին տրվում է հավելում`
1) առաջին խմբի համար` հիմնական կենսաթոշակի 40 տոկոսի չափով.
2) երկրորդ խմբի համար` հիմնական կենսաթոշակի 20 տոկոսի չափով:
Ելնելով վերոգրյալից` Գ. Թովմասյանին միաժամանակ չի կարող վճարվել ե՛ւ տարիքային աշխատանքային կենսաթոշակ, ե՛ւ հաշմանդամության աշխատանքային կենսաթոշակ: Կենսաթոշակառուն իրավունք ունի ստանալու միայն մեկ կենսաթոշակ իր ընտրությամբ:
Գ. Թովմասյանը 20 տարի, 8 ամիս, 17 օրվա (21 տարվա) ստաժով ստանում է 2-րդ խմբի հաշմանդամության աշխատանքային կենսաթոշակ, որի չափը կազմում է 34.185 դրամ: Կենսաթոշակի տեսակը տարիքային աշխատանքային կենսաթոշակի փոխելու դեպքում նրա կենսաթոշակի չափը կկազմի 30985 դրամ: Միաժամանակ հայտնում եմ, որ կենսաթոշակառուների շրջանում ծայրահեղ աղքատությունը հաղթահարելու նպատակով նախատեսվում է 2019թ. հունվարի 1-ից բարձրացնել այն կենսաթոշակների չափերը, որոնք ցածր են 25 500 դրամից:
Ըստ այդմ, եթե Ձեր հաշմանդամության աշխատանքային կենսաթոշակի չափը ցածր է 25.500 դրամից, 2019թ. հունվարի 1-ից այն կդառնա 25.500 դրամ:

ՀՀ աշխատանքի եւ սոցիալական հարցերի նախարարության կենսաթոշակային ապահովության վարչության պետ Անահիտ Գալստյան

«ԺՈՂՈՎՈՒՐԴ». ՀՀ կառավարության 2014թ. դեկտեմբերի 25-ի թիվ 1491-Ն որոշմամբ` 2015թ. հունվարի 1-ից հիմնական կենսաթոշակի չափը սահմանվել է 16.000 դրամ:

ՀԱՐՑ. Եթե ֆիզիկական անձը վաճառել է բազմաբնակարան շենքի մի քանի բնակարաններ, ապա դա համարվո՞ւմ է ապրանքի մատակարարում: Խնդրում եմ ասեք` ի՞նչ է ենթադրում դա:

Մելիք Հայրապետյան (42 տարեկան)

ՊԱՏԱՍԽԱՆ. «ԱԱՀ-ի մասին» Հայաստանի Հանրապետության օրենքի 3-րդ հոդվածի դրույթներով` որպես բազմաբնակարան (այդ թվում՝ բազմաֆունկցիոնալ) շենքի, ստորաբաժանված շենքի, բնակելի թաղամասերում կամ համալիրներում անհատական բնակելի տներ կառուցապատող եւ սեփականատեր հանդիսացող (այսուհետ հոդվածում` կառուցապատող), անհատ ձեռնարկատեր չհանդիսացող ֆիզիկական անձի կողմից շենքի, դրա բնակարանների կամ այլ տարածքների, անհատական բնակելի տների օտարումը (առանց ընդհանուր բաժնային սեփականություն հանդիսացող ոչ բնակելի տարածքների) համարվում է ապրանքի մատակարարում` բացառությամբ բազմաբնակարան (այդ թվում՝ բազմաֆունկցիոնալ) շենքի, ստորաբաժանված շենքի, դրա բնակարանների կամ այլ տարածքների ընդհանուր մակերեսի մինչեւ տասը տոկոսի, սակայն ոչ ավելի, քան 500 քառակուսի մետր մակերեսի օտարումը:

ՀՀ պետական եկամուտների կոմիտե

«ԺՈՂՈՎՈՒՐԴ». ԱԱՀ-ով հարկվող օբյեկտ է համարվում ՀՀ-ի տարածքում ԱԱՀ վճարողների կողմից իրականացվող սույն օրենքի 6 հոդվածով սահմանված բոլոր գործարքների ամբողջ արժեքը: