ԼՈՒՐ ԿԱԴՐ

Լուսանկարն արվել է երեւանյան խանութներից մեկում

Գրենական պիտույքների այս խանութում գունավոր գրիչների, մատիտների փորձարկումների համար թուղթ է դրված: Փորձ անողներից մեկը գրել է «Վարդան», իսկ մյուսն էլ ավելացրել «իկ»-ը: Թե ինչով է պայմանավորված մտքի այսպիսի թռիչքը, դժվար է ասել:

ՀԱՐՑ. Ովքե՞ր են պարտավոր վճարել ծխախոտի արտադրանքի համար հաստատագրված վճարը:

Համլետ Հարությունյան (42 տարեկան)

ՊԱՏԱՍԽԱՆ. Հ. Հարությունյանի հարցին ի պատասխան` տեղեկացնում ենք, որ ծխախոտի արտադրանքի համար հաստատագրված վճար վճարողներ են համարվում Հայաստանի Հանրապետություն ծխախոտի արտադրանք ներմուծող եւ հանրապետությունում ծխախոտի արտադրանք արտադրող ֆիզիկական եւ իրավաբանական անձինք: Ծխախոտի արտադրանք ներմուծող քաղաքացիները հաստատագրված վճար վճարող են համարվում 400 հատ սիգարետը կամ սիգարելան եւ 10 հատ սիգարը գերազանցող մասի համար:

ՀՀ պետական եկամուտների կոմիտե

«ԺՈՂՈՎՈՒՐԴ». Վճարողները ՀՀ ներմուծված եւ հանրապետությունում արտադրված ծխախոտի արտադրանքի իրացման գծով դուրս գրվող հաշվարկային փաստաթղթերում ավելացված արժեքի հարկի դրույքաչափի եւ գումարի նշում չեն կատարում: Հարկի գումարի առանձնացման դեպքում պետական բյուջե վճարման ենթակա ավելացված արժեքի հարկը հաշվարկվում եւ վճարվում է սահմանված ընդհանուր կարգով` անկախ հաստատագրված վճարների վճարումից:

ՀԱՐՑ. Ես ավանդ ունեմ իմ անունով, ե՞րբ կարող եմ ստանալ իմ գումարը: Խնդրում եմ պատասխանել կոնկրետ` ե՞րբ կհասնի ավանդը ստանալու իմ հերթը:

Խաչատուր Ավետիսյան (ք. Երեւան)

ՊԱՏԱՍԽԱՆ. Տեղեկացնում ենք, որ նախ եւ առաջ հարկավոր է, որ դուք հաշվառվեք ավանդի փոխհատուցման համար: Գրանցվելու իրավունք ունեն հետեւյալ կարգավիճակներից որեւէ մեկն ունեցող անձինք`
1) մինչեւ 1932 թվականի դեկտեմբերի 31-ը ներառյալ ծնված անձինք, այդ թվում` եթե ավանդը ներդրվել է մահացած ամուսնու կողմից համատեղ ամուսնական կյանքի ընթացքում,
2) ՀՀ պաշտպանության մարտական գործողությունների մասնակից անձինք, այդ թվում՝ եթե ավանդը ներդրվել է մահացած ամուսնու կողմից համատեղ ամուսնական կյանքի ընթացքում,
3) Հայաստանի Հանրապետության կառավարության 2014 թվականի դեկտեմբերի 18-ի N 1444-Ն որոշման N 1 հավելվածի ցանկում ընդգրկված համայնքներում` բնակչության պետական ռեգիստրում 2014 թվականի օգոստոսի 1-ի դրությամբ հաշվառված անձինք, այդ թվում՝ եթե ավանդը ներդրվել է մահացած ամուսնու կողմից համատեղ ամուսնական կյանքի ընթացքում:
4) Հայաստանի Հանրապետության պաշտպանության մարտական գործողություններին մասնակցելու կամ մարտական հերթապահություն կամ հատուկ առաջադրանք կատարելու ժամանակ զոհված (մահացած) զինծառայողների, կամավորականների կամ անհայտ կորածների անունով ներդրված ավանդը ժառանգած անձինք:
Նշված սոցիալական կարգավիճակներից որեւէ մեկին բավարարող անձինք կարող են դիմել իրենց փաստացի բնակության վայրի սոցիալական աջակցության տարածքային գործակալություն:

ՀՀ աշխատանքի եւ սոցիալական նախարարության հասարակայնության հետ կապերի վարչություն

«ԺՈՂՈՎՈՒՐԴ». Մնում է քաղաքացուն խորհուրդ տալ դիմել սոցիալական աջակցության տարածքային գործակալություն որպես ավանդատու հաշվառվելու եւ իր գումարը ստանալու համար: