«Ծառուկյան» եւ «Ելք» խմբակցության պատգամավորների հրավիրած ԱԺ արտահերթ նիստում քվեարկության դրված ընտրական օրենսգրքի նախագիծը նորից տապալվեց: Այս անգամ չբավարարեց ընդամենը 1 ձայն: Ու 62 կողմ, 2 դեմ ձայների հարաբերակցությամբ Ընտրական օրենսգրքի նախագիծը չընդունվեց: «Ծառուկյան» եւ «ԵԼՔ» դաշինքների բոլոր պատգամավորները կողմ քվեարկեցին նախագծին: Հիշեցնենք` «Դաշնակցությունը» չէր միացել օրեր առաջ կայացած ստորագրահավաքին, սակայն հայտարարել էր, որ ողջ խմբակցությունը կողմ է քվեարկելու օրենքի նախագծին, անուամենայնիվ, ՀՅԴ-ական պատգամավորներ Անդրանիկ Կարապետյանը եւ Ռոմիկ Մանուկյանը չմասնակցեցին քվեարկությանը: Այսինքն` ստացվում է, որ ընտրական օրենսգրքի փոփոխությունների նախագծի տապալման գործում ինչ-որ չափով կա նաեւ «Դաշնակցության» մեղավորությունը: «Ժողովուրդ» օրաթերթը այս հարցերի եւ հետագա զարգացումների մասին խոսել է ՀՅԴ խմբակցության պատգամավոր Արմենուհի Կյուրեղյանի եւ «Ելք» խմբակցության ղեկավար Լենա Նազարյանի հետ:
ՀՅԴ խմբակցության քարտուղար Արմենուհի Կյուրեղյան
-Տիկի՛ն Կյուրեղյան, ընտրական օրենսգրքի լրացումների եւ փոփոխությունների մասին նախագիծը ընդամենը մեկ ձայնի պատճառով կրկին տապալվեց: «Դաշնակցությունից» երկու պատգամավոր ներկա չէին քվեարկությանը: Ո՞րն էր խնդիրը:
-Մարդիկ են, որոնք կարող են ունենալ անձնական խնդիրներ: Մի բացական Ռոմիկ Մանուկյանն էր, ով անցած անգամ մասնակցել է եւ կողմ է քվեարկել այդ օրինագծին: Մենք կողմ քվեարկել ենք, որոշում ունեինք կողմ քվեարկել, էնպես որ..: Խնդիրը այն էր, որ պետք չէր այսպես ափալ-թափալ բերել, հստակ ներկայացնել օրենսգիրքը, հստակ գնալ քննարկումների եւ շատ պատգամավորների համոզել, որ այդ օրենսգիրքը ավելի լավն է, քան մյուսը, ամենալավն է, եւ ըստ այդմ` դնել քվեարկության:
-Այսինքն` կային մարդիկ, որոնց չէի՞ն համոզել:
-Դե եթե մարդիկ չեն եկել, քաղաքական որոշում են արտահայտել եւ բացակայել են, դա նշանակում է, որ նրանք համոզված չեն եղել սրա` ավելի լավը լինելու մեջ: Ե՞րբ ես կողմ լինում նախաձեռնությանը, երբ համոզված ես, որ համեմատության մեջ դա ավելի դրական կողմեր ունի:
-Ասացիք` որոշել եք, որ ամբողջ խմբակցությամբ կողմ եք քվեարկելու նախագծին: «Դաշնակցության» ներսում չկա՞ր պայմանավորվածություն, որ պետք է բոլորը ներկա լինեն:
-Նման պայմանավորվածություն չի եղել: Նման պայմանավորվածություն չի էլ կարող լինել: Ինչպե՞ս կարող ենք պայմանավորվածություն ձեռք բերել ինչ-որ իքս օր հետո 100 տոկոս մասնակցության վերաբերյալ. դա, ըստ էության, աբսուրդ է: Մենք կողմ ենք եղել այս նախագծին, որովհետեւ թեկուզ իր թերություններով` սա ավելի լավն է, քան գործողը: Բայց նախապես` տասը օր առաջ, ասել, որ մենք տասը օր հետո 100 տոկոս մասնակցություն կապահովենք, ապա դա կլինի, որ մենք չենք մտածել` ինչի մասին ենք խոսում:
-Ստացվեց այնպես, որ արտահերթ խորհրդարանական ընտրությունների գնում ենք գործող ընտրական օրենսգրքով: Սրա հետ կապված «Դաշնակցությունը» որեւէ խնդիր ունի՞:
-Երկու օրենսգրքերն էլ իդեալական չէին: Երկուսն էլ իր մեջ թերություններ ունեին, բայց հիմա ունենք այն, ինչ ունենք: Հինը փորձությունների միջով անցած օրենսգիրք է, մենք ծանոթ ենք դրա նրբություններին, բայց նորի մեջ էլ լավ առաջարկներ կային, եւ արժեր, որ դա լիներ` կուսակցական բազմակարծություն արտահայտելու տեսանկյունից, բայց…:
-«Ծառուկյան» դաշինքի պատգամավոր Միքայել Մելքումյանն ասաց, որ իրենք գուցե ավելի շահեկան վիճակում կլինեն ռեյտինգայինի դեպքում: Նույն բանը կասե՞ք «Դաշնակցության» մասին:
-Չեմ ուզում նախորդ տարվա ընտրական քարոզարշավի ժամանակահատվածը նույնացնել այսօրվա հետ: Ինձ չի թվում, որ որեւէ մեկը կարող է հստակ ասել, թե որն է ավելի ձեռնտու այս պահին: Ի վերջո, ընտրողը էապես փոխել է իր մոտեցումն ընտրական գործընթացին: Եվ դա իր արդյունքը ցույց կտա ընտրություններով:
ԵԼՔ խմբակցության ղեկավար Լենա Նազարյան
-Տիկի՛ն Նազարյան, ընտրական օրենսգիրքը տապալվեց: Պատգամավորների հետ նախնական պայմանավորվածություն չե՞ք ունեցել նրանց մասնակցության հետ կապված:
-Ում հետ մենք խոսել ու պայմանավորվել ենք, նրանք բոլորը ներկա էին: Բացակա էին «Դաշնակցություն» խմբակցության երկու պատգամավորներ: Եթե «Դաշնակցությունը» ամբողջ կազմով լիներ, ընտրական օրենսգրքի փոփոխությունները կընդունվեին:
-Տիկին Կյուրեղյանը նշեց, որ եթե չեն եկել, ուրեմն լավ չեն համոզել, որ այդ ընտրական օրենսգիրքը լավն է:
-Իսկ իրենք խմբակցության միաձայն որոշում չունե՞ն: Ինչ-որ մեկը իր քաղաքական գործունեության ընթացքում կարեւորագույն օրենք ընդունելու ժամանակ ասո՞ւմ է` ես հիվանդ եմ, չեմ կարող գալ, ինչ-որ խնդիրներ ունեմ: Եթե ուղիղ ասեին, որ դեմ էին, ավելի հասկանալի կլիներ, բացատրությունը ավելի քաղաքական կլիներ: Բայց որ ասում են` քաղաքում չեմ, զբաղված եմ, ծնունդի եմ հրավիրված կամ չգիտեմ ինչ, էդ ամենը ինձ համար անհասկանալի է: Արդեն երկար ժամանակ այս փոփոխությունը քննարկվում է: Ամառվանից սկսած մենք ե՛ւ հանրային հարցազրույցների միջոցով, ե՛ւ խմբակցությունների հետ հանդիպումների ժամանակ խոսել ենք այդ մասին: Իրենց խմբակցության հետ հանդիպում եղել է: Կառավարության անդամը գնացել, ներկայացրել է ամեն բան: Իմաստ չկար գնալ, բոլորին առանձին ասել: Չեմ կարծում, որ դա է իրական պատճառը չգալու:
-Իսկ ըստ Ձեզ` ո՞րն է իրական պատճառը:
-Ես չգիտեմ: Չեմ կարող ասել, թե ինչու երկուսը չեկան քվեարկելու այն դեպքում, երբ խմբակցության մյուս անդամները ներկա էին: Իրենք թող ասեն:
-Իշխող կուսակցությունը որեւէ խնդիր ունի՞ կապված նրա հետ, որ ընտրությունների պետք է գնալ գործող օրենսգրքով:
-Գոնե մեզ համար ամենաքիչը խնդիր կա կամ առհասարակ խնդիր չկա: Մենք ասել ենք, որ պատրաստ ենք ընտրությունների երկու օրենսգրքերի դեպքում էլ:
ԸՕ ՏԱՊԱԼՈՒՄԸ ԽՆԴԻՐ Է ՍՏԵՂԾՈՒՄ ՆՈՐ ԿՈՒՍԱԿՑՈՒԹՅՈՒՆՆԵՐԻ ՀԱՄԱՐ
«Ժողովուրդ» օրաթերթը զրուցել է նորաստեղծ «Այլընտրանք» կուսակցության նախագահ Էդգար Առաքելյանի հետ:
-Պարո՛ն Առաքելյան, ազգի փրկության ի՞նչ ծրագիր եք առաջարկում:
-Ազգը փրկել եւ նման վերամբարձ արտահայտությունները գալիս են նախկին քաղաքական մշակույթից: Դա գալիս է նախկին կուսակցական համակարգի չկայացվածությունից, կուսակցությունների ոչ ճիշտ աշխատանքից: Իրականության մեջ նոր ուժերի ձեւավորումը, առաջ գալը բնական եւ անհրաժեշտ գործընթաց է: Նոր իրավիճակում քաղաքական դաշտում էլ պետք է նոր բան ստեղծվի: Որպեսզի կուսակցությունները հաջողեն, կարեւոր է ներքաղաքական ժողովրդավարությունը: Մեր իրականության մեջ տեսել ենք քաղաքական էլիտաներ, որտեղ տարիներ շարունակ փոփոխություններ տեղի չեն ունեցել: Սա խոսում է նաեւ կուսակցության որակների մասին: Եթե չկան նոր սերունդ, նոր գաղափարներ, խոսել կուսակցական համակարգի զարգացումից անիմաստ է: Հենց նույն սկզբունքը տեղափոխվելու է համապետական մակարդակ: Ես չեմ խոսում մեկ ընտրության մասնակցելու ցանկություն ունեցող կուսակցությունների մասին: Խոսքը քաղաքական դաշտում երկարաժամկետ լինելու մասին է: Ինչպես տեսանք, ընտրական օրենսգրքի փոփոխությունների նախագիծը չընդունվեց: Իսկ դա նորաստեղծ կուսակցությունների համար խնդիրներ է ստեղծում,բայց պետք չէ դրանից հիասթափվել:
-Ինչի՞ հույսով եք գալիս քաղաքական դաշտ:
-Մասնակցել ընտրություններին եւ պայքարել խորհրդարան անցնելու համար: Մեր նպատակն է երկար ժամանակ լինել քաղաքական դաշտում, առաջ քաշել փաստարկված գաղափարներ, համագործակցել գաղափարապես մոտ ուժերի հետ, հասնել էն խնդիրների լուծմանը, որոնք մենք դնում ենք մեր առաջ:
-Այս իրավիճակում ինչպե՞ս եք գնահատում Ձեր շանսերը:
-Երեւան քաղաքում եւ մարզերում մենք թիմեր ենք ձեւավորում: Մենք ակնկալում էինք, որ ընտրությունները կլինեն մյուս տարի, բայց ինչպես տեսանք, ամեն ինչ փոխվեց, եւ փաստորեն երկու ամիս հետո է լինելու իր բոլոր հետեւանքներով: Նորաստեղծ ուժերի համար գերծանրաբեռնվածություն կլինի մոբիլիզացնել ուժերը: Նորմալ եմ գնահատում մեր շանսերը: Նոր ընտրական օրենսգիրքը ավելի մեծ հնարավորություններ էր տալիս խորհրդարան անցնելու, բայց, ցավոք, այն տապալվեց: Դա ցույց տվեց, որ միայն ՀՀԿ-ն չէր, որ շահագրգռված էր դրանով:
Նյութերը՝ ԼՈՒՍԻՆԵ ՄԻՆԱՍՅԱՆԻ
ՓՈՓՈԽԱԿԱՆ
Ընտրական օրենսգրքի փոփոխությունների մասին օրենքի նախագիծը առաջին անգամ Ազգային ժողով բերելու օրը «Ծառուկյան» դաշինքի պատգամավոր Վարդան Ղուկասյանը չմասնակցեց քվեարկությանը: Վերջինս չմասնակցելը մեկնաբանեց, թե քվեարկության ժամանակ գործով դուրս էր եկել դահլիճից: Հարցին` եթե ներկա լիներ, ինչպե՞ս կքվեարկեր, պարոն Ղուկասյանը պատասխանեց, որ միանշանակ դեմ պիտի քվեարկեր եւ հայտարարեց, որ այս հարցի հետ կապված ինքը իր կուսակցության հետ չի քայլում, որովհետեւ ինքը դեմ է ռեյտինգային համակարգի վերանալուն: «Ժողովուրդ» օրաթերթը հետաքրքրվեց` հնարավո՞ր է, որ այս տարաձայնության պատճառով պատգամավորը դուրս գա ԲՀԿ-ից. «Այս ի՞նչ տարօրինակ հարց եք տալիս»,-վրդովվեց նա: Ինչպես հայտնի է, երեկ ԱԺ արտահերթ նիստում կրկին քվեարկության էր դրված ընտրական օրենսգրքի փոփոխության մասին օրենքի նախագիծը, որը տապալվեց: Ուշագրավն այն է, որ նման հայտարարություններով հանդես գալուց հետո պատգամավորը կողմ քվեարկեց ընտրական օրենսգրքի փոփոխությունների մասին նախագծին: Թե ինչու է Վարդան Ղուկասյանը համարյա ամեն օր փոխում իր տեսակետը այդ հարցի շուրջ, դժվար չէ կռահել: Նրա դիրքորոշումը կարծես կախված է Գագիկ Ծառուկյանի` ԱԺ-ում լինել-չլինելու հետ: Մինչ այդ, նկատենք, որ հետաքրքիր էր ՀՀԿ խմբակցության անդամների քվեարկությունը: Նախորդ երկուշաբթի նախագծին կողմ էր քվեարկել 56 պատգամավոր, երեկ` 62: Մասնավորապես այս անգամ նիստին ներկա էին եւ կողմ քվեարկեցին Ռոբերտ Սարգսյանը, Արսեն Միխայլովը եւ Արտակ Սարգսյանը, ովքեր նախորդ նիստում բացակայում էին: Նախորդ նիստում չէր քվեարկել Ռաֆիկ Գրիգորյանը, ով այս անգամ եւս կողմ քվեարկեց նախագծին:
ՃԻՇՏԸ ՊԱՏՄԵԼ ԵՆ
Ոստիկանության Գորիսի բաժնի աշխատակիցները փնտրում են ավագանու անդամ Լյովա Արզանյանին: Վերջինս այդպես էլ չի ներկայանում իրավապահներին, որպեսզի տեսնեն` նա վնասվածք ունի, թե ոչ: «Ժողովուրդ» օրաթերթի տեղեկություններով` ՀՀ կառավարությունից ներքին կարգով կապ են հաստատել Գորիսի քաղաքապետարանից կոնկրետ անձանց հետ, հետաքրքրվել, թե արդյոք նման բան կա, թե ոչ: Ըստ մեզ հասած լուրերի` ՀՀ կառավարության ներկայացուցչին պատմել են, որ նման միջադեպ եղել է: Ինչպես հայտնի է armlur.am-ը գրել էր, որ հոկտեմբերի 18-ին արտառոց դեպք է տեղի ունեցել Գորիսի քաղաքապետարանի շենքում. քաղաքապետ Առուշ Առուշանյանը ծեծի է ենթարկել ավագանու անդամ Լյովա Արզանյանին, որի ուշքը գնացել է: Ըստ մեզ հասած տեղեկությունների` միջադեպին ականատես են եղել ավագանու մոտ 13 անդամները: Ավագանու անդամները իրարամերժ գնահատականներ են տալիս կատարվածի մասով: Մի մասն ասում է, թե նման բան չի եղել, իսկ ավագանու անդամ Սամվել Մաքունցը լրատվամիջոցներին ասել է, որ միջադեպ եղել է:
.gif)
