«Ժամանակ» թերթը գրում է. «Հանրապետական կուսակցությունը երեկ հայտարարել է իր նախընտրական կարգախոսի մասին՝ «Եթե մտահոգ ես, ընտրի՛ր Հանրապետականին»: ՀՀԿ-ն թերեւս մոռացել է ավելացնել, թե ինչի համար կամ ինչի մասին մտահոգության վերաբերյալ է կարգախոսը: Որովհետեւ, ի վերջո, կա շատ պարզ իրավիճակ եւ իրողություն՝ այդ կուսակցության քսան տարիների կառավարումը, քայլ առ քայլ բացարձակացած իշխանությամբ: Եվ այդ քսան տարիների կառավարման ընթացքում ՀՀԿ-ն քայլ առ քայլ ավելի ու ավելի է, այսպես ասած, գեղեցկացրել իր ճառերը, խոստովանել սխալներ ու թերություններ, անգամ կոռուպցիա, հայտարարել, թե իբր պայքարում է դրա դեմ, սակայն իրականում հանրությանը մատուցել ավելի ու ավելի վատ արդյունք:
Դա հիմք է տալիս եզրակացնել, որ, եթե ՀՀԿ-ն սխալվում էր, ապա, համենայնդեպս, ընդամենն իր բացարձակ իշխանության առաջին տարիներին, որովհետեւ հնարավոր չէ տասը տարի չգիտակցել սխալը եւ վերջապես չանցնել այն ուղղելուն: Որովհետեւ այդ սխալը չափազանց ակնառու էր, չափազանց թանկ էր արժենում պետության համար, եւ միաժամանակ ՀՀԿ-ն էլ չափազանց մեծ իշխանությամբ էր օժտված այդ սխալը ուղղելու քաղաքական որոշումներ կայացնելու համար, եթե լիներ կամքը:
Ըստ այդմ, եթե այդ ամենից հետո ՀՀԿ-ն չի կատարել անհրաժեշտ հետեւություն, ապա իշխանությունը թողնելուց հետո հետեւության մասին խոսելը ավելորդ է՝ կարելի է խոսել միայն, այսպես ասած, քինախնդրության մասին:
Անգամ այժմ ՀՀԿ-ն չի գտնում կամք ու համարձակություն անել ամենակարեւորը, որը թույլ կտա հանրությանը գոնե մտածել այն մասին, որ իսկապես արվում են հետեւություններ եւ գիտակցվում են սխալները՝ տալ սեփական քաղաքական կառավարման հանգամանալից գնահատականը: Դրա փոխարեն, ՀՀԿ-ն տարածեց մի հայտարարություն, որտեղ իբրեւ խնդիրների պատճառ բերվում էին բացատրություններ, որոնք եթե զայրույթ չեն առաջացնում ընթերցողի մոտ՝ կառավարման պատկերի ֆոնին, որ ոչ ոք չի մոռացել, ապա առաջացնում են զավեշտ:
Ահա այդ ամենը, նաեւ ՀՀԿ կառավարման երկու տասնամյակի ընթացքում խորացած «որակները» հիմք են տալիս եզրակացնելու, որ ՀՀԿ-ն «եթե մտահոգ ես» արտահայտությունից հետո թերեւս բաց է թողել հետեւյալ բովանդակությունը. եթե մտահոգ ես, որ նոր իրավիճակը թույլ չի տա գործել անօրինականություններ, թույլ չի տա զբաղվել կոռուպցիայով, թույլ չի տա ընտրություն կեղծել, թույլ չի տա հարստանալ հանրության ու պետության ռեսուրսները յուրացնելով, թույլ չի տա տնտեսությունը բաժանել օլիգոպոլիաների եւ մոնոպոլիաների միջեւ, թույլ չի տա սահմանափակել մրցակցությունը, թույլ չի տա արտաքին քաղաքականությունը ծառայեցնել այդ ամենը երկրի ներսում պաշտպանելու գործին՝ երկրի արտաքին հեղինակության ու անվտանգունակության հաշվին, ապա ընտրիր ՀՀԿ-ին»:
Ավելի մանրամասն՝ թերթի այսօրվա համարում:
.gif)
