«ԵԹԵ ՍԵՐԺ ՍԱՐԳՍՅԱՆԸ ՀԵՏ ԳԱ, ՀԱՃՈՒՅՔՈՎ ԿԱՇԽԱՏԵՄ ԻՐ ՀԵՏ»

«Ժողովուրդ» օրաթերթի զրուցակիցը Մհեր Մկրտչյան թատրոնի արտիստ, «Կյանք ու կռիվ 2», «Լյուդվիգ անունով ոզնին», «Հոսանքին հակառակ» ֆիլմերից հայտնի դերասան Արծրուն Չոբանյանն է: Մենք նրա հետ խոսել ենք իր բնավորության գծերի, նախասիրությունների մասին, անդրադարձել ենք նաեւ քաղաքական թեմաների: Արծրունը նշել է, որ ներկայիս քաղաքական ուժերը որեւէ բանով առավել չեն Սերժ Սարգսյանից կամ նախկին այլ իշխանավորներից: Ու թեեւ Արծրունը պարոն Փաշինյանին հարգում է, կարծում է, որ նրա շրջապատում կան մարդիկ, որոնք խաչ են քաշում նրա ամբողջ արածի վրա:

-Արծրո՛ւն, Ձեզ մոտիվացնում է, յուրահատուկ տրամադրություն է հաղորդում արեւո՞տ, թե՞ անձրեւային եղանակը:
-Տաք եղանակը: Երբ անձրեւ է գալիս, չեմ ուզում տեղիցս վեր կենալ:
-Տնից դուրս գալիս միշտ մոռանում եք Ձեզ հետ վերցնել…
-Չկա նման բան: Միշտ ստուգում եմ գրպաններս, հետո եմ դուրս գալիս:
-Երբեք չեք հասկացել այն մարդկանց, որոնք…
-Բոլորին էլ հասկանում եմ, բայց ամեն մեկին չէ, որ ընդունում եմ: Հոգեբանական նյուանսներ կան, որոնք միշտ էլ կարելի է հասկանալ, բայց դատավճիռներ տալու հարցում կտրուկ չեմ:
-Ո՞ր լեզվին կցանկանայիք փայլուն տիրապետել:
-Պորտուգալերենին: Ինչ խոսք, քանի լեզու գիտես, այնքան մարդ ես: Անգլերեն քիչ թե շատ խոսում եմ, ռուսերեն նույնպես, ֆրանսերեն էլ կցանկանայի սովորել, բայց պորտուգալերենն եմ նախընտրում:
-Ունե՞ք մի վատ սովորություն, որից կցանկանաք օր առաջ ձերբազատվել:
-Ճշտապահ եմ, եւ դա շատ վատ է, երբ շրջապատումդ շատերն այդպիսին չեն: Բայց ես փոխվողը չեմ:
-Խնայողությունն ավելի շատ արժե ծախսել շոփինգի՞, թե՞ ճամփորդության նպատակով:
-Ճամփորդության:
-Ձեր տան անդամները միշտ դժգոհում են, երբ…
-Երբ ֆուտբոլ եմ դիտում: Այդ պահին ամեն ինչ անջատում եմ եւ բոլոր հնարավոր ձեւերով կենտրոնանում եմ խաղի վրա:
-Երբեք չեք կարող անտարբեր անցնել…
-Գեղեցիկի կողքով:
-Ավելի շատ սիրում եք նվեր տա՞լ, թե՞ ստանալ:
-Երկուսն էլ հաճելի է:
-Դուք մուտք կգործեք քաղաքականություն, եթե…
-Եթե Սերժ Սարգսյանը հետ գա եւ ինձ կանչի, մեծ հաճույքով կաշխատեմ իր հետ: Անկեղծ եմ ասում: Եթե դուք կարծում եք, որ ներկայիս քաղաքական ուժերն ինչ-որ բանով առավել են Սերժ Սարգսյանից կամ նախկինում եղածներից, ապա ես դրան չեմ հավատում: Նոր իշխանության կազմում մի քանիսը լավն են, ներառյալ վարչապետը, որին ես հարգում եմ, բայց նրա շուրջը կան «կենդանիներ», որոնք խաչ են քաշում իր ամբողջ արածի վրա: Այնպես չէ, որ ես նախկին իշխանությունից գոհ եմ եղել, նախկիններն այնպիսի մի աբսուրդի մեջ էին, որ նրանց լինելն ուղղակի աբսուրդ էր, բայց հիմա գրագետ, ազնիվ քաղաքական գործիչների կողքին նկատում եմ մի քանի զզվելի աբիժնիկների, որոնք իրենց վատ են պահում:
-Մենակությունից վախենու՞մ եք:
-Չէ, մենակ լավ է, կարող ես մի կենդանի պահել, եւ արդեն մենակ չես լինի: Եվ հետո` մենք երբեք մենակ չենք, Աստված մեզ հետ է (ծիծաղում է):
-Ձեզ ապշեցնում են մարդիկ, որոնք անպատասխանատո՞ւ են, թափթփվա՞ծ, թե՞ անտարբեր:
-Անտարբեր: Եթե մարդն այդպիսին է, իմաստ չկա նրա հետ շփվելու:
-Չեք հասցնում մարզվե՞լ, առողջ սնվե՞լ, թե՞ այցելել բարեկամներին:
-Այցելել բարեկամներին: Հազարից մեկ է ստացվում. նեղանում են:
-Կինը կարող է պահպանել սերը, եթե…
-Հավատում է այդ սիրուն:
-Տղամարդիկ բաժանվում են մի քանի խմբի…
-Տղամարդիկ եւ ոչ տղամարդիկ:
-Այժմ երազում եք…
-Շատ փող ունենալու մասին:

Զրուցեց ԱՆՆԱ ԲԱԲԱՋԱՆՅԱՆԸ

ՄԱՀԱՑԵԼ Է ՅՈՒՐԻ ՎԱՐԴԱՆՅԱՆԸ
ԱՄՆ-ում 62 տարեկան հասակում մահացել է Օլիմպիական խաղերի, աշխարհի 7-ակի ու Եվրոպայի 5-ակի չեմպիոն, ծանրորդ Յուրի Վարդանյանը: Այժմ քննարկվում է նրա մարմինը Հայաստան տեղափոխելու հարցը: Յ. Վարդանյանը ծնվել է 1956 թվականի հունիսի 13-ին: 1977թ. ստացել է ԽՍՀՄ սպորտի վաստակավոր վարպետի կոչում, 1980թ. ավարտել է Լենինականի մանկավարժական ինստիտուտը, 1977-1979, 1980-1981, 1983, 1985 թվականներին նա դարձել է աշխարհի չեմպիոն եւ գավաթակիր: 1980թ. Վարդանյանը դարձել է օլիմպիական չեմպիոն: 1980 թվականին իր առաջին խոշոր նվաճմանը Յուրի Վարդանյանը հասել է Մոսկվայի օլիմպիական խաղերի ժամանակ` հանդես գալով 82,5 կգ քաշային կարգում: Այդ ժամանակ նվաճել է ոսկե մեդալ եւ սահմանել ռեկորդ` միջին քաշային կարգում բարձրացնելով 400 կգ: Նշենք, որ 2013-2014 թվականներին եղել է սպորտի եւ երիտասարդության հարցերի նախարար, ապա Վրաստանում Հայաստանի դեսպան:

ՆԻՍԻԿՈՐԻՆ ՀԱՂԹԵԼ Է
Ճապոնացի թենիսիստ Քեյ Նիսիկորին հաղթել է ՀԱՀ-ի ներկայացուցիչ Քեւին Անդերսոնին Փարիզի Masters մրցաշարի երրորդ շրջանում: Նիսիկորին երկու սեթում հաղթանակ է տարել 6:4, 6:4 հաշիվներով: Խաղը տեւել է 1 ժամ 21 րոպե: Նշենք, որ մրցաշարի քառորդ եզրափակչում Նիսիկորին կմրցի Ռոջեր Ֆեդերերի հետ, որը երրորդ շրջանում հաղթել է իտալացի Ֆաբիո Ֆոնյիին: Փարիզի` ավելի քան 4 մլն դոլար մրցանակային ֆոնդ ունեցող մրցաշարը կավարտվի նոյեմբերի 4-ին: Նախորդ տարվա եզրափակչում ամերիկացի Ջեք Սոկը հաղթել է Սերբիայի ներկայացուցիչ Ֆիլիպ Կրրայնովիչին 5:7, 6:4, 6:1 հաշիվներով: