Մի քանի օրից կլրանա Ազգային անվտանգության ծառայության տնօրեն Արթուր Վանեցյանի եւ Հատուկ քննչական ծառայության պետ Սասուն Խաչատրյանի հեռախոսային խուսակցության գաղտնալսման փաստի առթիվ հարուցված քրեական գործի քննության 2-րդ ամիսը: Նկատենք, որ մինչ օրս հայտնի չէ, թե ում հրահանգով եւ ովքեր գաղտնալսեցին նախաքննական մարմնի ղեկավարներին: Սակայն գաղտնալսման մեջ կա մի ուշագրավ խոսակցություն, որը ուշադրությունից դուրս մնաց: Այն, ըստ ամենայնի, վերաբերում է ներկայիս ՀՀ Զինված ուժերի ԳՇ պետ Արտակ Դավթյանին:
Ինչպես հայտնի է, 2018 թվականի սեպտեմբերի 11-ին հրապարակվել էր ՀՀ ազգային անվտանգության ծառայության տնօրեն Արթուր Վանեցյանի եւ ՀՀ հատուկ քննչական ծառայության պետ Սասուն Խաչատրյանի հեռախոսային խոսակցությունը, որտեղ կոնկրետ թիրախում էին եղել Մարտի 1-ի գործով անցնող ՀՀ երկրորդ նախագահ Ռոբերտ Քոչարյանը եւ ՀԱՊԿ քարտուղար Յուրի Խաչատուրովը: Արդյունքում դեպքի առթիվ նույն օրը հարուցվեց քրեական գործ ՀՀ Քրեական օրենսգրքի 146-րդ հոդվածի 1-ին մասի (Անձի նամակագրության, հեռախոսային խոսակցությունների, փոստային, հեռագրական կամ այլ հաղորդումների գաղտնիությունը խախտելը պատժվում է տուգանքով` նվազագույն աշխատավարձի հիսնապատիկից հարյուրապատիկի չափով) հատկանիշներով եւ 254-րդ հոդվածի 3-րդ մասի 4-րդ կետի (համակարգչային համակարգում, ցանցում կամ մեքենայական կրիչների վրա պահվող տեղեկատվությունն առանց թույլտվության պատճենահանելը կամ այլ կերպ դրան ապօրինի տիրանալը կամ համակարգչային կապի միջոցների օգտագործմամբ հաղորդվող տեղեկատվությունը որսալը պատժվում է ազատազրկմամբ` չորսից տասը տարի ժամկետով) հատկանիշներով:
Նկատենք, որ աղմկահարույց այս գաղտնալսման մեջ մի ուշագրավ հանգամանք էլ կար, որն այդպես էլ շատերի համար մնաց անհասկանալի:
Մասնավորապես, ԱԱԾ տնօրեն Արթուր Վանեցյանը հեռախոսային խոսակցության ամենավերջում կոնկրետ հարց է ուղղում ՀՔԾ պետ Սասուն Խաչատրյանին:
ԱՐԹՈՒՐ ՎԱՆԵՑՅԱՆ – Իսկ էն բանին էլ մի բան արեք, էլի… էն Խաչատուրովի տեղակալին:
ՍԱՍՈՒՆ ԽԱՉԱՏՐՅԱՆ – Հա, էն որ ասի՞ր:
ԱՐԹՈՒՐ ՎԱՆԵՑՅԱՆ – Հա…
ՍԱՍՈՒՆ ԽԱՉԱՏՐՅԱՆ – Ցավդ տանեմ, մի հատ հասկանամ, էլի…
ԱՐԹՈՒՐ ՎԱՆԵՑՅԱՆ – Հա, տեղակալն ա օպերատիվ գծով:
ՍԱՍՈՒՆ ԽԱՉԱՏՐՅԱՆ – Լավ, մի հատ հասկանամ, կխոսանք, ընգեր:
Այդպես էլ նախաքննական մարմնի ղեկավարները մինչ օրս չեն մանրամասնել, թե ով էր մարտյան իրադարձությունների ժամանակ ԳՇ օպերատիվ գծով տեղակալը եւ, առհասարակ, ինչ էին ցանկանում անել վերոնշյալ անձի հետ:
Վարկած առաջին
«Ժողովուրդ» օրաթերթին հասած տեղեկությունների համաձայն` այս խոսակցության շուրջ հայտնի նախկին պաշտոնյաների, ինչպես նաեւ պաշտպանության նախարարությունում ներքին խոսակցություններ են սկսվել, թե ում են նկատի ունեցել նախաքննական մարմնի ղեկավարները: ՊՆ-ում ենթադրել են, որ միգուցե ԱԱԾ տնօրենը ու ՀՔԾ պետը նկատի են ունեցել ներկայումս Գլխավոր ռազմական տեսուչի առաջին տեղակալի պաշտոնը զբաղեցնող Կամո Քոչունցին: Յուրի Խաչատուրովի մտերիմ շրջապատում եւս եզրակացրել են, որ Արթուր Վանեցյանը եւ Սասուն Խաչատրյանը նկատի են ունեցել Կամո Քոչունցին:
Սակայն ուսումնասիրելով Կամո Քոչունցի կենսագրությունը` նկատեցինք, որ 2007 թվականին ՀՀ Նախագահի հրամանագրով նա նշանակվել է ՀՀ զինվորական կոմիսար եւ այդ պաշտոնը զբաղեցրել է մինչեւ 2009 թվականը:
Այս առիթով «Ժողովուրդ» օրաթերթը զրուցեց Գլխավոր ռազմական տեսուչի առաջին տեղակալ Կամո Քոչունցի հետ հասկանալու համար, թե արդյոք նա մարտյան իրադարձությունների ժամանակ իրականացրե՞լ է ԳՇ օպերատիվ գծով տեղակալի գործառույթները:
-Պարո՛ն Քոչունց, Դուք մարտյան իրադարձությունների ժամանակ եղել եք ԳՇ օպերատիվ գծով տեղակալը:
-Ես չեմ եղել:
-Իսկ ո՞վ է եղել:
-Ես կարող եմ ասել, որ ես եղել եմ հանրապետության գլխավոր կոմիսարը:
-Դուք այդ ժամանակ բավականին լուրջ պաշտոն եք զբաղեցրել, եւ հիմա բանակի ներգրավվածության մասով ՀՔԾ-ում լուրջ քննություն է ընթանում: Ձեզ կանչե՞լ են հարցաքննության:
-Ինչո՞ւ է դա Ձեզ հետաքրքրում: Ես եղել եմ հանրապետության գլխավոր կոմիսարը, այսքանը: Մնացածն ինձ չի վերաբերում:
Վարկած երկրորդ
«Ժողովուրդ» օրաթերթը, ուսումնասիրելով Յուրի Խաչատուրովի տեղակալների կենսագրությունները, նկատեց, որ 2008 թվականին ԳՇ օպերատիվ գծով տեղեկալ չի եղել, այլ եղել է ՀՀ ԶՈՒ ԳՇ օպերատիվ վարչություն: Եւ օպերատիվ գծով վարչության պետը եղել է ՀՀ ԶՈՒ գլխավոր շտաբի ներկայիս պետ Արտակ Դավթյանը: Ու դատելով իրավիճակից` Արտակ Դավթյանին նկատի ունեն գաղտնալսված պաշտոնյաները, եւ գուցե հենց նա է եղել մարտյան իրադարձությունների կիզակետում:
Ի՞նչ է արել ՀՔԾ-ն
«Ժողովուրդ» օրաթերթը ՀՔԾ պետ Սասուն Խաչատրյանից փորձեց հետաքրքրվել եւ հստակեցնել, թե, ի վերջո, ով է եղել 2008 թվականին Գլխավոր Շտաբի պետի օպերատիվ գծով տեղակալը, արդյոք Հավաքական անվտանգության պայմանագրի կազմակերպության միացյալ շտաբի պետի տեղակալ Հայկազ Բաղմանյա՞նը, որը նշանակվել է 2009-ին միայն, Գլխավոր ռազմական տեսուչի առաջին տեղակալ Կամո Քոչո՞ւնցը, թե՞ ՀՀ ԶՈՒ գլխավոր շտաբի պետ Արտակ Դավթյանը: Ու եթե պարզել եք, թե ով է նա, ի՞նչ է արվել այդ ուղղությամբ: Կանչե՞լ եք հարցաքննության, մեղադրանք առաջադրե՞լ եք, թե՞ ոչ: Եթե այո, ապա ի՞նչ հիմքով:
Ի պատասխան մեր գրավոր հարցման` ՀՔԾ լրատվականից հայտնեցին, որ «Ձեր կողմից պահանջվող տեղեկատվությունը չենք կարող տրամադրել` ՀՀ քրեական դատավարության օրենսգրքի 201-րդ հոդվածով նախատեսված նախնական քննության տվյալների հրապարակման անթույլատրելիությունից ելնելով»:
Այսպիսով, այդպես էլ անհասկանալի մնաց, թե ում մասին էին խոսում եւ ինչ ճակատագիր է սպասվում ԳՇ օպերատիվ գծով նախկին տեղակալին:
ՔՆԱՐ ՄԱՆՈՒԿՅԱՆ
ՀԱՄԱՆԵՐՎԱԾ ԷՊՈՍԱԳԵՏԸ
Օրերս ԱԺ-ի կողմից ընդունված համաներումը տարածվել է նաեւ ԱԻՄ առաջնորդ Պարույր Հայրիկյանի դեմ մահափորձի գործով 14 տարվա ազատազրկման դատապարտված ՀՀ նախագահի նախկին թեկնածու Վարդան Սեդրակյանի՝ էպոսագետի վրա: Հիշեցնենք, որ 2013թ. «Ազգային ինքնորոշում միավորման» նախագահ Պարույր Հայրիկյանի վրա կրակեցին, հետագայում պարզվեց՝ այդ մահափորձը կատարել են Հայրիկյանի տան «կաֆելչիկները»` Խաչիկ Պողոսյանն ու Սամվել Հարությունյանը, որոնց պատվիրել է Վարդան Սեդրակյանը: «Ժողովուրդ» օրաթերթը վերջինիս հարազատներից տեղեկացավ, որ 14 տարվա ազատազրկման դատապարտված էպոսագետի վրա եւս տարածվել է համաներումը, եւ նրա պատժից 3,5 տարի կրճատվել է: Ու քանի որ նա արդեն 5 տարի 8 ամիս է, ինչ կրում է իր պատիժը Արթիկի քրեակատարողական հիմնարկում, ստացվում է, որ 4 տարի 7 ամիս անց ազատ կարձակվի քրեակատարողական հիմնարկից: Թերեւս նա նաեւ կդիմի պայմանական վաղաժամկետ ազատ արձակման խնդրանքով: Իսկ թե ինչ կլինի, սպասենք արդյունքներին: Իսկ ինչ վերաբերում է գործով անցնող մյուս ամբաստանյալներին, որոնցից մեկը դատապարտվել էր 14, մյուսը՝ 12 տարվա ազատազրկման, նրանց վրա եւս համաներումը տարածվել է, նրանց պատիժները երեք տարով կրճատվել են:
ԸՆԴԴԵՄ ՊԱՏԳԱՄԱՎՈՐԻ ՍՊԸ-Ի
ԱԺ պատգամավոր Արկադի Համբարձումյանին` Դերժավայի Արկադիին պատկանող «Սլավմեդ» բժշկական կենտրոնի դեմ կրկին դատական հայց է ներկայացվել: «Ժողովուրդ» օրաթերթին հայտնի դարձավ, որ Երեւան քաղաքի ընդհանուր իրավասության դատարան են դիմել քաղաքացիներ Դավիթ Քոչարյանը, Հովհաննես Կարապետյանը, Էդուարդ Սուքոյանը եւ Անուշիկ Աղաջանյանը՝ պահանջելով, որ դատարանը «Սլավմեդ բժշկական կենտրոն» ՍՊԸ-ին ստիպի ինքնակամ շինությունը քանդել: Ամենայն հավանականությամբ, ՀՀԿ-ական պատգամավոր Համբարձումյանը, օգտվելով նախկին իշխանության բարեհաճությունից, իր ընտանիքին պատկանող «Սլավմեդ» բկ-ի հարակից տարածքում շինարարություն է արել, որի դեմ բողոքում են քաղաքացիները: Թե ինչով կավարտվի այս վեճը, դժվար է ասել՝ հաշվի առնելով նոր Հայաստանի իրողությունները:
ԱԶԱՏ Է
Հյուսիսային պողոտայում գործող ակումբներից մեկում տեղի ունեցած խուլիգանության գործով կալանավորված, հանցագործ աշխարհում Նորատուսցի Արա անունով հայտնի Արա Բանդուրյանն ազատ է արձակվել «Նուբարաշեն» ՔԿՀ-ից: Ա. Բանդուրյանի պաշտպան Կարեն Բատիկյանը հայտնել է, որ Վերաքննիչ քրեական դատարանը բավարարել է պաշտպանական կողմի միջնորդությունն ու իր պաշտպանյալի նկատմամբ թույլատրելի ճանաչել գրավը: Բանդուրյանը 2 մլն դրամ գրավի կիրառմամբ ազատ է արձակվել կալանքից:
ԿԳՈՐԾՈՒՂՎԻ
ՀՀ կառավարության որոշմամբ` 2019թ. հունվարի 1-ից Վահե Դեմիրճյանը մեկ տարի ժամկետով կգործուղվի Եվրոպայի խորհրդի մարդու իրավունքների եվրոպական դատարանի վճիռների կատարման վարչություն: Ըստ հիմնավորման` 2019թ. ընթացքում սպասվող եւ քաղաքական շարժառիթներով պայմանավորված` բարդություն ներկայացնող վճիռների կատարման գործընթացի առավել ակտիվ շրջան թեւակոխելու, ինչպես նաեւ ՀՀ-ի դեմ կայացված բոլոր վճիռների արդյունավետ կատարումն ապահովելու համատեքստում մեծապես կարեւորվում է ՀՀ կառավարությունից գործուղված իրավաբանի ներկայությունը ԵԽ համակարգում եւ հատկապես ԵԽ քարտուղարության վճիռների կատարման վարչությունում:
ԴԵՄ ՉԵՆ ԵՂԵԼ
ԼՂՀ նախագահի մամուլի խոսնակ Դավիթ Բաբայանը, մեկնաբանելով Ադրբեջանի «Ռազմագերիների, պատանդների եւ անհետ կորածների հարցերով պետական հանձնաժողովի» հայտարարությունը, նշել է, որ ԼՂՀ իշխանությունները երբեք դեմ չեն եղել սխալմամբ օտար հողում հայտնված քաղաքացիների փոխանակմանը եւ վերադարձին: «Ոչ մի նորմալ մարդ չի կարող դեմ լինել գերեվարված քաղաքացիների փոխանակմանը: Եվ մենք երբեք չենք ասել, որ դեմ ենք արտահայտվում նման գործընթացներին: Սակայն պետք է հստակ տարբերակել սխալմամբ օտար հողում հայտնված քաղաքացիներին եւ ահաբեկիչներին»,-ասել է նա: Վերջինս ընդգծել է, որ Բաքվի նպատակները հստակ են` փորձել վերադարձնել Ասկերովին եւ Գուլիեւին եւ հետո հերոսացնել նրանց, ինչպես դա տեղի ունեցավ Սաֆարովի հետ: Նրա խոսքով` Բաքուն միաժամանակ եւս մեկ խնդիր է լուծում` փորձում է պառակտել հայ հասարակությունը. «Հավանաբար, գերեվարված հայերի հարազատները եւ բարեկամները ինչ-որ պահի կարող են ասել` թող փոխանակեն, ազատեն մեր հարազատներին: Թեեւ մի կողմից` խոսքը սովորական մարդկանց մասին է, ընդ որում, որոնք խնդիրներ ունեն, եւ մյուս կողմից` ահաբեկիչների»:
.gif)
