Ինչպես արդեն հայտնի է, նորաստեղծ Հայաստանի Քրիստոնեա-ժողովրդավարական կուսակցությունը մասնակցելու է առաջիկա խորհրդարանական ընտրություններին: «Ժողովուրդ» օրաթերթը կուսակցության մասնակցության, շանսերի եւ այլ հարցերի մասին խոսել է ՀՔԺ կուսակցության նախագահ, քաղաքագետ Լեւոն Շիրինյանի հետ:
-Պարո՛ն Շիրինյան, ի՞նչ դրդապատճառով որոշեցիք մասնակցել խորհրդարանական արտահերթ ընտրություններին:
-Եթե դեմագոգիա չհաշվենք, կարող եմ ասել, որ ժողովրդի պահանջը դրդեց: Բայց սփյուռքից ավելի շատ էր պահանջը: Քաղաքագետները պետք է լինեն պետական կառույցներում: Ես, ընդհանրապես, երբեք մտադրություն չեմ ունեցել մտնել քաղաքականություն, բայց դե ընկերներով, համախոհներով որոշեցինք, որ պետք է մասնակցենք: Սկզբից Սփյուռքն էր պահանջում, որ մասնակցեմ, հետո արդեն դա նկատեցի մեզ մոտ: Մի օր էլ ասացի` դե լավ, դնեմ, էլի: Բայց մի բան ասեմ. ես միշտ ասել եմ, որ հեղափոխությունը պետք է ավարտին հասցնել, եւ եթե հիշում եք, որ ես միշտ ակտիվորեն պաշտպանել եմ ստեղծված շարժմանը: Իմ հետազոտություններով, վերլուծություններով շատ ակտիվ եմ եղել: Այս բոլորը իրար հետ գումարվեց: Մարդիկ գալիս, բառացի ասում էին` ինչո՞ւ դուք քաղաքականության մեջ չեք, չէ՞ որ քաղաքագետ եք: Եթե քաղաքագետը չլինի այնտեղ, ո՞վ պետք է լինի: Դե այդ մտավախությունն էլ գալիս է ԱԺ կազմից:
-Շատ քաղաքական ուժեր բողոքում են, որ ընտրությունների գնում ենք հին օրենսգրքով: Շատերը նաեւ ասում են, որ հենց դա ստիպեց իրենց չմասնակցելու որոշում կայացնել: Դուք ի՞նչ կասեք այս մասին:
-Հենց ես եմ առաջինը խոսել այդ մասին: Ռեյտինգայինը ահավոր բան է: Մարդիկ նկատի ունեն դրամի բաժանումը, բայց դա չի գլխավոր վտանգը: Տեսեք, հիմա խլուրդի նման հարազատներին իրարից բաժանում են իրենց կողմը թեքելու համար: Ամբողջ Հայաստանը այսօր խլվրտոցի մեջ է: Մեկը գալիս, ասում է` ես իմ գերդաստանի ձայներն եմ բերում, այդ ձայներն էլ կարծես իրենց գրպանում դրված է, էլի: Ես մտածում եմ` ռեյտինգայինը Հայաստանի համար անթույլատրելի շռայլություն է: Սերժ Սարգսյանը սա ժամանակին արել է պառակտված հասարակություն ունենալու համար: Սա հակամշակույթ է, բայց դե դա չի նշանակում, որ հնարավոր չէ դրա շրջանակներում պայքարել հեղափոխության արդյունքները ռեալիզացնելու համար:
-Այս պարագայում ինչպե՞ս եք գնահատում Ձեր կուսակցության շանսերը:
-Լավագույն ձեւով: Այդ ռեյտինգը, այդ օրենքը, այդ հին ու նորը այլ բան են, բայց հասարակությունը ինձ լայնորեն ճանաչում է: Պետք է լինենք ԱԺ-ում, որ նման բաները վերացնենք:
-Քանի՞ տոկոսի ակնկալիք ունեք:
-120: Բա իհարկե: Դե թող դա էլ մնա մեր ինտրիգը: Ես լավագույն կանխատեսում անողն եմ: Եթե իմանայի, որ դա չի աշխատելու, պարզ չէ՞, որ չէի առաջադրվի:
-Ճիշտ է, ՀՀԿ-ն ընդհանուր առմամբ բարձր վարկանիշ չունի, բայց կան առանձին մարդիկ, ովքեր վայելում են ինչ-որ մի շրջանի վստահությունը: Այս պարագայում, ըստ Ձեզ, ինչպիսի՞ն կլինի այդ կուսակցության ճակատագիրը:
-Նման բան չկա: Երկիրը ճգնաժամի մեջ գցած կուսակցությունը ի՞նչ ակնկալիք կարող է ունենալ այդ ընտրություններից: Երեւի իրենց ախպերական միջավայրն է վստահում իրենց, բայց ընդհանուր ոչինչ էլ չկա: Էդ ո՞վ է հարգում իրենց, Սերժ Սարգսյա՞նը: Շատ ՀՀԿ-ականներ կան, որոնց հարազատները չեն ուզում իրենց տեսնել, ինչի՞ մասին է խոսքը: ՀՀԿ-ն չի հայտնվելու Աժ-ում: Մի լավ բանաձեւ ունեմ. հիշե՛ք անուն առ անուն, գույն առ գույն, կուսակցություն առ կուսակցություն: Եթե հիշողություններդ կորցրիք, կանգնելու եք նույն աղետի առաջ:
-Ներկայիս կառավարության գործելաոճը Ձեզ ամբողջությամբ գոհացնո՞ւմ է:
-ՉԷ: Շատ եմ ասել այդ մասին, որ ոչ: Բայց դե սա ժամանակավոր կառավարություն է: Հիմա կտեսնենք: Տոկոսները ցույց կտան վստահության չափը:
-Ո՞ր ուժը ո՞ր տեղում կլինի ԱԺ-ում:
-Առաջինը «Իմ քայլը», երկրորդը մենք ենք լինելու, մյուսները ինձ չեն հետաքրքրում:
-Մենք հիմա ընդդիմություն ունե՞նք:
-Դե հիմա խորհրդարանը էլ չի աշխատում, էլ ի՞նչ ընդդիմություն: Ընտրությունների ենք գնում: Մի հետաքրքիր բան ասեմ. որպեսզի Հայաստանը դուրս բերվի դիմություն-ընդդիմություն ճահիճից եւ այս հակասությունների սիստեմից, մենք մեր կարգախոսն ընտրել ենք` Այլընտանք` այո, ընդդիմություն` ոչ: Մենք ունենք մշակված հայեցակարգեր եւ մոտեցումներ, որոնք միշտ ցույց են տալու երկրորդ լավագույն ճանապարհը: Մենք աշխատելու ենք ժամանակակից քաղաքագիտության շրջանակներում: Մարդիկ պիտի տեսնեն, որ միշտ այլընտանք կա:
-Դուք բավարար թվով ռեյտինգային թեկնածուներ ունե՞ք:
-Ես հերիք չե՞մ: Կատակ եմ անում: Այո, իհարկե ունենք: Ամեն ինչ էլ ունենք: Դժվար հարց եք տալիս, մյուսները կնեղանան:
Զրուցեց ԼՈՒՍԻՆԵ ՄԻՆԱՍՅԱՆԸ
ԱՇՆԱՆԱՑԱՆ` ՁՄԵՌՆԱՄՈՒՏԻՆ
Տավուշի մարզպետարանի աշխատակազմի գյուղատնտեսության եւ բնապահպանության վարչության պետ Վաղարշակ Սուքոյանից «Ժողովուրդ» օրաթերթը տեղեկացավ, որ նոյեմբերի 15-ի դրությամբ մարզի համայնքներում կատարվել է 2550 հեկտար աշնանացան, աշնանացանի համար ընդհանուր առմամբ կատարվել է 3600 հեկտար վար: Տավուշում անձրեւային եղանակ է, հողը`թաց, սակայն մարզպետարանի վարչության պետը վստահ է, որ հետո մի քանի օր արեւային եղանակ կլինի, վարած հողերի թմբերը կհարթվեն, եւ այդ հողերում աշնանացան կկատարվի: Գյուղատնտեսների կարծիքով` աշնանացանի համար լավագույն ժամանակաշրջանը սեպտեմբերի 10-ից հոկտեմբերի 15-ն է, երբ արտերից ծիլը բարձրանում է, բույսը կարողանում է աճել ձյան շերտի տակ, ցածր ջերմաստիճանի պայմաններում: Թե ձմեռնամուտից առաջ Տավուշում ցանված արտերը հաջորդ տարի ինչքան բերք կտան, հայտնի կլինի 2019 թվականին: Անցյալ տարի Տավուշում ցանվել է 2560 հա աշնանացան, միջին բերքատվությունը կազմել է 25 ցենտներ: Բերքատվության միջին ցուցանիշի վրա բացասաբար է անդրադարձել այն, որ սահմանամերձ Կոթի գյուղի հացահատիկի արտերը կարկտահարվեցին: Կոթիի կարկտահարված արտերի տերերին պետական բյուջեից փոխհատուցում կամ այլ օգնություն չի ցուցաբերվել: Վ. Սուքոյանը հայտնեց, որ Տավուշի մարզի սահմանամերձ 27 բնակավայրերի հողագործներին ցանած ցորենի ամեն հեկտարի համար պետբյուջեից 60 հազար դրամ օգնություն է տրվելու: Դա տրվելու է ցանելուց հետո, երբ համայնքների ղեկավարները տվյալներ ներկայացնեն իրենց համայնքներում ցանված ցորենի մասին: 2 տարի է, ինչ պետությունը հողագործներին զեղչված գնով հացահատիկի սերմացու, դիզելային վառելանյութ, պարարտանյութեր չի տրամադրում:
ԾԱՌՈՒԿՅԱՆԸ ԿՈՐՈՇԻ
ԲՀԿ Իջեւանի տարածքային խորհրդի նախագահ Ժիրայր Մելիքսեթյանը դեռ չգիտի` իրենց կուսակցությունից վարկանիշային համակարգով ովքեր են առաջադրվելու Տավուշի մարզում: «Ժողովուրդ» օրաթերթին փոխանցեց, որ Նոյեմբերյանի, Դիլիջանի, Բերդի եւ Իջեւանի տարածաշրջաններից 3-ական թեկնածու է ներկայացվել Գագիկ Ծառուկյանին, վերջինս պետք է որոշի, թե այդ 12 թեկնածուներից ովքեր են լինելու այն 7-ը, ովքեր կլինեն ԲՀԿ-ի` Տավուշի մարզում վարկանիշային ընտրակարգով թեկնածուներ:
ՈՍԿԱՆ ՍԱՐԳՍՅԱՆ
Տավուշ
ՏԵՂԵՐ ԳՅՈՒՂՈՒՄ 4 ՏԱՐԻ ԱՌԱՋ Է ԵՐԵԽԱ ԾՆՎԵԼ
ՀՀ Արագածոտնի մարզի Տեղեր գյուղում ո՛չ դպրոց կա, ո՛չ էլ աշակերտ: Տեղերի ՀՀԿ-ական գյուղապետ Գառնիկ Հովհաննիսյանը «Ժողովուրդ» օրաթերթի հետ զրույցում ասաց, որ գյուղում ապրում է ընդամենը 40 բնակիչ: Տեղերի բնակիչների եկամտի միակ աղբյուրը խոտ հավաքելն է, որը նրանք վաճառում են որպես անասնակեր:
Մեզ հայտնի դարձավ, որ Տեղերի գյուղապետը նորանշանակ մարզպետ Դավիթ Գեւորգյանին ընդամենը մեկ անգամ է հանդիպել մարզխորհրդի նիստին, բայց դեռ չի հասցրել մարզպետին ծանոթացնել գյուղի խնդիրներին: Իսկ խնդիրները բազմաթիվ են:
Օրինակ՝ գյուղը ոչ միայն դպրոց չունի, այլեւ աշակերտ: Եւ այն ընտանիքները, որոնք դպրոցահասակ երեխաներ ունեն, բնակություն են հաստատել Պռոշյանում, Էջմիածնում կամ Երեւանում: «Ժողովուրդ» օրաթերթը գյուղապետից տեղեկացավ նաեւ, որ Տեղեր գյուղում վերջին անգամ 4 տարի առաջ է երեխա ծնվել: Այժմ գյուղում հիմնականում ապրում են ծերացող ընտանիքներ, երիտասարդներ գրեթե չկան: Բայց չնայած սրան` գյուղի բնակիչները անհամբեր սպասում են արտահերթ խորհրդարանական ընտրություններին: «Ժողովուրդ» օրաթերթը գյուղապետից հետաքրքրվեց` հնարավո՞ր է առաջիկայում անդամակցի ՔՊ-ին:
-Հնարավո՞ր է` դադարեցնեք անդամակցությունը ՀՀԿ-ին:
-Գիտե՞ք, ես կարծում եմ, որ գյուղապետը պարտադիր չէ, որ կուսակցական լինի: Ճիշտ չէ: Պետք չէ, որ կուսակցությանը ենթարկվես, քո ժողովրդի հետ եղի՛ր, իրեն էլ ծառայի՛ր…
-Այսինքն` շարունակելո՞ւ եք մնալ որպես ՀՀԿ-ական:
-Ո՞ւր է, ՀՀԿ-ական կա՞ հիմա (ծիծաղում է-Ս.Հ.): Չգիտեմ, եկեք կուսակցություններին դնենք մի կողմ, եթե կառավարություն ունենք, մենք պետք է իրեն ենթարկվենք:
-Հնարավո՞ր է` ՔՊ-ին անդամակցեք…
-Ըսենց թե ընենց, մենք` գյուղապետներս, իրենց հետ ենք աշխատում… հո «Դաշնակցության» հետ չենք աշխատում: Մեր հարցերը իրենց հետ է լուծվում, մի բանի կարիք ունենք, իրենց ենք դիմում: Ի՞նչ անենք, որ այն ժամանակ էլ ՀՀԿ-ին էինք դիմում: Ես հիմա ՀՀԿ-ական եմ, դուրս չեմ եկել կուսակցությունից: Այսպես էլ մնացել եմ, ոչ էլ զբաղվել եմ այդ հարցով: Բայց մենք ՀՀԿ-ականների հետ ո՛չ հանդիպում ենք, ո՛չ խոսում եւ ո՛չ էլ պահանջ ենք դնում:
-Այնուամենայնիվ, ՀՀԿ-ից դուրս եք գալո՞ւ, թե՞ ոչ…
-Չգիտեմ` դուրս գամ, թե չգամ, դեռ չեմ որոշել: Սպասենք, տեսնենք` ինչ կլինի: Դեկտեմբերյան ընտրություններից հետո պարզ կդառնա ամեն ինչ:
Զրուցեց ՍՅՈՒՆԷ ՀԱՄԲԱՐՁՈՒՄՅԱՆԸ
.gif)
