Շատ դժգոհ եմ քարոզարշավից. փոխանակ ապագայի ծրագրերից խոսեն, իրար վրա ցեխ շպրտելով են զբաղված. Վահագ Ռաշ

«Ժողովուրդ» օրաթերթը նախընտրական քարոզարշավի, առաջիկա խորհրդարանական ընտրությունների, քաղաքական ուժերի պոտենցիալի, գործելաոճի, ընդդիմության ձեւավորման անհրաժեշտության եւ այլ թեմաների շուրջ զրուցել է երգիչ, երգահան Վահագ Ռաշի հետ:

Նա նշել է, որ անցկացվող քարոզարշավն իրեն ամենեւին դուր չի գալիս, որ քաղաքական ուժերը ջանք չեն խնայում միմյանց վրա ցեխ շպրտել, սակայն իրենց հետագա պլանների մասին հազվադեպ են խոսում: Վահագը տեսակետ է հայտնել, որ քաղաքական դաշտը բաժին է ընկել երկու ուժի՝ «Իմ քայլը» դաշինքին եւ «Հանրապետական» կուսակցությանը, իսկ մյուս ուժերը կարծես մնացել են ստվերում:

-Վահագ, ի՞նչ տպավորություններ ունեք նախընտրական քարոզարշավի վերաբերյալ: Քաղաքական ուժերին հաջողվո՞ւմ է երկխոսության մեջ մտնել իրենց ընտրազանգվածի հետ, ճիշտ գործիքակազմ կիրառել:

-Ճիշտն ասած՝ շատ դժգոհ եմ, քանի որ ոչ մի ուժ ռեալ ոչինչ չի առաջարկում: Փոխանակ երկրի ապագայի մասին խոսեն, իրենց հետագա պլաններին անդրադառնան, ամբողջ օրը կռիվների մեջ են, իրար վրա ցեխ շպրտելով են զբաղված: Սա տարօրինակ երեւույթ է ինձ համար: Ի դեպ, ասեմ, որ ի հեճուկս ուժերի ղեկավարների, հայտնի, երեւացող դեմքերի` պատգամավորների թեկնածուների մի զգալի հատված շատ ավելի արդյունավետ քարոզարշավ է անցկացնում:

-Ի՞նչ եք կարծում, հանրապետականները խորհրդարան կանցնե՞ն: Նրանք «մաքրագործվելու» շանսեր ունե՞ն:

-Հանրապետականների վիճակը շատ վատ է: Եթե այս տեմպերով շարունակեն գործել, հնարավոր է՝ անցողիկի շեմն էլ չհաղթահարեն: Ուրիշ բան, եթե այդ կուսակցությունը ռեբրենդինգի ենթարկվեր, իր միջի կարող ուժերին ներկայացներ, բայց տարիներ շարունակ երկիրը թալանելուց հետո հիմա ի՞նչ են ուզում անել: Անձամբ ես ձայնս տալու եմ «Իմ քայլ»-ին: Երկար տարիներ անց եզակի հնարավորություն է ընձեռվում, եւ մեր քվեն կարող է տեղ հասնել:

-Այսօր ո՞ր ուժը կարող է ռեալ ընդդիմություն լինել, ի՞նչ է հարկավոր, որպեսզի ընդդիմադիրների գործելու համար բարենպաստ դաշտ ստեղծվի:

-«Սասնա ծռերը», օրինակ, կարող է լինել ընդդիմություն: Դե ԲՀԿ-ն, բնական է, կունենա իր կայուն ընտրազանգվածը, ավելին չեմ կարող ասել, ՀՀԿ-ն պետք է ավելի բովանդակային խոսի, ոչ թե քննադատի մակերեսային երեւույթներ: ՀՀԿ-ն կարծես «Իմ քայլ»-ին ասում է. «Մենք վատն էինք, բայց դուք մեզնից վատն եք», սա նրանց կարգախոսն է դարձել (ծիծաղում է): Բայց այդպիսի մոտեցումներով խորհրդարան չեն մտնում: Եվ հետո, զուտ արտաքին գործոնների մասին եթե խոսենք, ինձ դուր չեն գալիս նախընտրական քարոզարշավի նրանց պաստառները, այդ սեւ ֆոնը…Չգիտեմ՝ ում մտահղացումն է, բայց լավը չէ:

-Նիկոլ Փաշինյանը դրանք անվանել է «գիշերվա սատանա» սեւ պաստառներ:

-Դե այդ կուսակցությունը վաղուց է մահացել, այնինչ այնտեղից կարող էին որոշ մարդիկ առանձնանալ, խոսել իրենց սխալների եւ ապագայի տեսլականի մասին, նրանք կարող էին հանդես գալ որպես առողջ ընդդիմություն: Բայց այդպես չեղավ: Նորից նույն դեմքերին ենք տեսնում, որոնք առաջնորդվում են նախկին սկզբունքներով:

-Համաձա՞յն եք, որ նախընտրական քարոզարշավի շրջանակում քաղաքական դաշտը բաժանվել է երկու ուժերի՝ «Իմ քայլը» դաշինքի եւ «Հանրապետական» կուսակցության միջեւ, իսկ մյուս ուժերը կարծես մնացել են ստվերում, հանրությունն էլ այս երկուսի փոխադարձ «մարտերին» է հետեւում, եւ մյուս ուժերի նկատմամբ հետաքրքրությունը, կարծես, քիչ է:

-Համաձայն եմ եւ կցանկանայի մեկ այլ դիտարկում էլ անել: Կան ուժեր, որոնք հայտնվում են ընտրությունից ընտրություն: Երբ գործընթացն ավարտվում է, անմիջապես կորչում են դաշտից: Այդպիսի միտում նկատել եմ, օրինակ, «Ազատ դեմոկրատների» պարագայում, որն այս անգամ հանդես է գալիս դաշինքի կազմում: Կցանկանայի, որ ամբողջ տարին, տեւական ժամանակ ժողովուրդը տեսներ այդ ուժերի գործունեությունը, ծանոթանար նրանց գաղափարներին, որպեսզի դաշտը հնարավորինս բազմաբեւեռ լիներ:

Աննա Բաբաջանյան