Թույլ չենք տալու` կրկնվի այնպիսի իրավիճակ, որ Հայաստանի քաղաքացիները ստիպված լինեն իշխանությունների դեմ զենք բարձրացնել. Գևորգ Սաֆարյան

«Ժողովուրդ» օրաթերթը զրուցել է «Սասնա Ծռեր» կուսակցության պատգամավորի թեկնածու Գեւորգ Սաֆարյանի հետ:

-Պարոն Սաֆարյան, այնպես է ստացվել, որ քաղաքական բոլոր ուժերը բացի «Իմ քայլը» դաշինքից պայքարում են երկրորդ տեղի համար: «Սասնա Ծռեր» կուսակցությունը ի՞նչ շանսեր ունի խորհրդարանում հայտնվելու: Ո՞ր տեղում կլինեք:

-Կարծում եմ` մեր շանսերը շատ բարձր են: Ակնհայտ է , որ հասարակության մոտ կա հետաքրքրություն դեպի մեզ: Մարդկանց հետ շփվելով նկատում ենք դա, ինչն էլ հույս է տալիս մտածելու, որ բավականին մեծ ներկայացվածություն կունենանք ԱԺ-ում: Ես չեմ տեսել, որ որեւէ կուսակցություն ասի, որ սահմանադրությունը պետք է փոխվի: Մենք գալիս ենք բերելու նոր սահմանադրություն, նոր ընտրական օրենսգիրք, տնտեսության ոլորտում նոր մոտեցումներ, պաշտպանության ոլորտում բացարձակ նոր մոտեցումներ: Եթե դուք նայեք մեր ծրագիրը, կտեսնեք, որ գրեթե բոլոր կետերը նորամուծություն են բերելու: Պարզ է, որ հեղափոխությունից հետո հեղափոխության առաջնորդի առաջնորդած ուժը շատ մեծ ձայներ է հավաքելու: Սա է պատճառը, որ կուսակցությունները խոսում են երկրորդ տեղի մասին:

-Հնարավո՞ր է, որ ինչ-որ իրավիճակ ստեղծվի, որը «Սասնա Ծռեր» կուսակցությունը կրկին կփորձի լուծել զենքի ճանապարհով:

-Մենք համոզված ենք, որ այլեւս երբեք թույլ չենք տալ կրկնվի այնպիսի իրավիճակ, որ Հայաստանի քաղաքացիները ստիպված լինեն իշխանությունների դեմ զենք բարձրացնել: Մենք թույլ չենք տա, որ Հայաստանում վերաձեւակերպվի բռնատիրություն:

-Ժիրայր Սեֆիլյանը հայտարարում է, որ Արցախում եւս պետք է հեղափոխություն լինի: Դիտարկմանը, որ մեկ տարի հետո Արցախում ընտրություններ են լինելու, Սեֆիլյանը ասել է`չպետք է մեկ տարի սպասել: Ի՞նչ եք պատրաստվում անել Արցախում:

-Ժիրայր Սեֆիլյանը ասել է, որ մենք պատրաստ ենք բանակցել տեղի իշխանույունների հետ նրանց հեռացման հարցի շուրջ: Չեմ կարծում, որ սա հեղափոխական գործընթաց է: Անհրաժեշտության դեպքում կարող է հեղափոխական գործընթաց էլ լինել. խնդիր չկա: Ինչու է պետք մեկ տարի սպասել: Որն է նպատակը, որ այնտեղի իշխանությունները այդ մի տարին էլ են կառչած իշխանությունից: Կարո՞ղ եմ ես դրանից ենթադրել, որ նրանք նաեւ այդ ժամանակ չեն պատրաստվում հեռանալ:

-Բայց այս առումով Հայաստանն ու Արցախը նույնը չեն: Մտավախություն չկա՞, որ այն, ինչ եղել է Հայաստանում, եթե կրկնվի Արցախում դա ճակատագրական կլինի Արցախի համար:

-Ոչ մի նման մտավախություն չկա: Ամեն բան նորմալ կընթանա: Բայց կարծում եմ` Արցախի իշխանությունները պիտի խոհեմ գտնվեն եւ շատ ավելի շուտ հեռանան պաշտոններից, որ անհրաժեշտություն չլինի նրանց հարկադրելու: Եթե խնդիր լինի, կլինի այն, ինչ տեղի ունեցավ Հայաստանում: Որեւիցե վտանգ չգա: Իսկ եթե դուք վախենում եք, որ Ադրբեջանը կարող է ինչ-որ արձագանք ունենալ, մեկընդմիշտ պետք է հասկանալ` Ադրբեջանը կհարձակվի այն ժամանակ, երբ կհամարի` կարող է հարձակվել:Ապրիլին ի՞նչ էր եղել: Ոչինչ: Ադրբեջանը պայմանավորվեց ՀՀ իշխանության հետ այն մասով, որ իշխանությունը պետք է հողեր զիջի եւ հարձակվեց: Արցախը Հայաստանի մի մասն է: Արցախի տնտեսությունը առաձնացվա՞ծ է Հայաստանի տնտեսությունից: Իհարկե, Արցախը Հայաստանն է: Հայաստանում տեղի ունեցող որեւէ պրոցես ամբողջությամբ պիտի պրոեկտվի Արցախի վրա:

-Սասնա ծռեր կուսակցությունը, անդրադառնալով խորհրդանական ընտրություններին եւ ապագա ԱԺ-ին, նշեց, որ խորհրդարանը 2 տարուց ավել չի մնալու: Ինչո՞վ է սա պայմանավորված:

-Մենք գնում ենք ընտրությունների սերժիկական սահմանադրությամբ ու օրենսգրքով, որը բոլորս ուզում ենք փոխել: Ինչո՞ւ չկարողացանք այս ամենը փոխել: Քանի որ ԱԺ-ում նստած էր հանրապետականը եւ մեկ-երկու կուսակցություն, նրանք տապալեցին ԸՕ փոփոխությունները: Վաղը, երբ մենք կմաքրենք ԱԺ-ն այդ ուժերից, խորհրդարան կմտնեն հեղափոխական ուժերը, եւ այդ ուժերը պիտի ձեռք առնեն գործողություններ, որպեսզի փոխվի եւ սահմանադրությունը, եւ ԸՕ-ն եւ դրանից հետո պարզ է` պիտի լինեն նոր ընտրություններ:

-Վարչապետի պաշտոնակատար Նիկոլ Փաշինյանը, խոսելով Ձեր կուսակցության հայտատարության մասին, ասաց, որ թող չփորձեն շշկռվել: Ինչո՞ւ նման սուր ընթացք ստացավ:

-Հարցը պետք է ուղղել հասցեատիրոջը: Բայց ես սուր ընթացք չեմ տեսնում: Կատաստրոֆիկ որեւէ բան չի եղել: Ուղղակի որոշ անձինք կամ որոշ ուղղորդված լրատվամիջոցներ փորձում են սկանդալներ ստեղծել: Մենք հայտարարություն ենք տարածել եւ դրանից հետո ,կարծում եմ` ամեն ինչ ընկել է իր տեղը: Որոշ ուժեր անընդհատ փորձում են սեպ խրել մեր եւ «Իմ քայլը» դաշինքի մեջ: Բայց ինչպես տեսնում եք, ոչ մի սեպ չկա:

-Ըստ Ձեզ քարոզարշավի ժամանակ հավասար պայմաններ ստեղծվա՞ծ են բոլոր ուժերի համար:

-Առ այսօր չենք նկատել որեւիցե անհավասար մոտեցում:

-Սեւի եւ սպիտակի տարանջատում նկատո՞ւմ եք:

-Այս պահին դեռ չեմ ֆիքսել այդ հասարակության սեւերի եւ սպիտակների բաժանումը:

-Կարծես այդ բաժանումը ոչ թե հասարակության, այլ քաղաքական ուժերի մասով է:

-Կարծում եմ` այդ տարանջատումը նշանակում է, որ նման տարանջատում է կատարվում նրանց աջակիցների եւ անդամների միջեւ: Կան ուժեր, որոնց մոտեցումների շատ հարցերի մասին չեն փոխվել: Այսինքն` նրանց համար կա ժողովուրդ եւ կան իրենք: Քաղաքական ուժերը ժողովրդի մի մասն են:

-ՀՀԿ-ի մասնակցությունը ընտրություններին խաղաքարտեր կփոխի՞:

-ՀՀԿ-ն կուսակցություն չէ: ՀՀԿ-ն հանցավոր խումբ է, որը տարիներ շարունակ կեղեքել ու թալանել է ժողովրդին, ներսից քանդել է պետությունը, տարածքներ է նվիրել: ՀՀԿ-ի հետ խոսակցությունը միայն պետք է լինի քրեաիրավական դաշտում: Մարտիմեկյան կոալիցիոն քաղաքական ուժերը չպիտի լինեն դաշտում, քանի դեռ նրանք չեն ապացուցել, որ իրենք մեղավոր չեն եղել մարտիմեկյան գործողությունների մեջ:

Լուսինե Մինասյան