Երևանի 3/23 ընտրատեղամասում ժամը 12:00-ին իր քաղաքացիական պարտքը կատարեց ՀՅԴ ցուցակով պատգամավորի թեկնածու Արմեն Ռուստամյանը: «Արմենպրես»-ի հաղորդմամբ՝ նա լրագրողների հետ զրույցում նշեց, որ քվեարկել է հանուն հայի ու հողի:
«Մեր ժողովուրդը շատ մեծ ակնկալիքներ ունի այս ընտրություններից, ես քվեարկել եմ հանուն նրա, որ իրենց ակնկալիքներն արդարանան, հասարակությունը չհիասթափվի, և տեսնի իր երազած Հայաստանը»,-ասաց Արմեն Ռուստամյանը:
Խոսելով քարոզարշավի մասին՝ Արմեն Ռուստամյանը նշեց, որ ժամանակը շատ քիչ էր, իսկ ասելիքը շատ էր, սակայն այս անգամ հնարավորինս լայն ճակատով կարողացան տեղ հասցնել իրենց հիմնական անելիքը: Նա ընդգծեց, որ բանավեճերն աննախադեպ էին, սակայն այս ընտրություններով չեն կարող ասել, որ երկիրն իր ժողովրդավարական ավանդույթներով առաջ է գնում:
«Առայժմ ընտրության ընթացքը գնահատում եմ դրական, աղաղակող խախտումների արձանագրումներ չենք ունեցել: Եղել են հատուկենտ հայտարարություններ տարբեր հարցերի հետ կապված, անգամ ընտրակաշառքի մասին, սակայն հույս ունենք, որ իրավապահ մարմինները կհետևեն պրոցեսին այնպես, որ այս մեծ հույս արթնացնող ընտրություններն իրենց որակով լինեն աննախադեպ»,-ասաց Արմեն Ռուստամյանը: Նա նկատեց, որ բոլոր ժամանակներում իշխանությունները միշտ ընտրությունները կեղծելու կասկածանքի տակ են եղել, սակայն այս անգամ գործող իշխանությունը դրա կարիքը չունի:
Անդրադառնալով սոցիոլոգիական հարցումներին՝ Արմեն Ռուստամյանը նշեց, որ սովորաբար Դաշնակցության վերաբերյալ ոչ ճիշտ թվեր են հրապարակում:
«Միշտ էլ ասվել է, որ Դաշնակցությունը խորհրդարան չի անցնելու, սակայն արդյունքներն այլ բանի մասին էին խոսում: Այնպես որ ծիծաղելի թվեր են ներկայացնում մեր կուսակցության մասին: Բայց ես ուզում եմ ընդգծել, որ մեր Դաշնակցության գոյությունը կապված չէ որևէ ընտրության հետ: Դաշնակցությունը որ տեղում էլ լինի, շարունակելու է իրականացնել իր ծրագրերը»,-ասաց Արմեն Ռուստամյանը: Լրագրողների հարցին, թե կոալիցիա կազմելու հավանականությունն ինչպիսին է, Արմեն Ռուստամյանը նշեց, որ երբեք մաս չեն կազմի կոալիցիայի:
«Եթե մենք չենք ունենա վճռական խոսք, ապա անիմաստ է կոալցիայի մաս կազմելը: Նախկին փորձը ցույց տվեց, որ մեր ծրագրերը որդեգրում էին, սակայն կիսատ թողնում»,-հավելեց նա:
.gif)
