ԼՈՒՐ ԿԱԴՐ

Լուսանկարն արվել է մայրաքաղաքում

Տատիկը մեծ ոգեւորությամբ մասնակցում է խորհրդարանական ընտրությունների քարոզարշավին։ Համաձայնեք, որ եթե կա ցանկություն, ապա ոչինչ չի կարող խանգարել մասնակցությանը։

ՀԱՐՑ. Տուգանվել եմ 40.000 դրամով` վարչական խախտում կատարելով (տեսախցիկների նկարահանող սարք): Հիմա մեքենաս ՀՀ ԱՆ ԴԱՀԿ-ն կալանքի տակ է վերցրել: Ուզում եմ իմանալ` կարո՞ղ եմ ՃՈ-ում որեւէ դիմում կամ համաձայնագիր գրել, որպեսզի կարողանամ մաս-մաս վճարել մեքենայիս կալանքի գումարը:

Սամվել Գրիգորյան (55 տարեկան)

ՊԱՏԱՍԽԱՆ. Հայտնում ենք, որ «Վարչարարության հիմունքների եւ վարչական վարույթի մասին» ՀՀ օրենքի 88-րդ հոդվածի 1-ին մասի համաձայն` դրամական պահանջները ենթակա են կատարման անբողոքարկելի վարչական ակտերի հիման վրա` «Դատական ակտերի հարկադիր կատարման մասին» Հայաստանի Հանրապետության օրենքով սահմանված կարգով:
Այսինքն` վարչական ակտն անբողոքարկելի դառնալուց հետո Ճանապարհային ոստիկանությունն ուղարկում է հարկադիր կատարման ծառայություն, որից հետո վարչական ակտով սահմանված տուգանքի գանձման հետ կապված բոլոր իրավահարաբերությունները կարգավորվում են «Դատական ակտերի հարկադիր կատարման մասին» Հայաստանի Հանրապետության օրենքով եւ կատարվում հարկադիր կատարման ծառայության կողմից:

ՀՀ ոստիկանության հասարակայնության հետ կապի եւ լրատվության վարչություն

«ԺՈՂՈՎՈՒՐԴ». Ամեն դեպքում, խորհուրդ ենք տալիս վարորդներին գործը չհասցնել ԴԱՀԿ. կարելի է մինչ այդ դիմում գրել եւ մաս-մաս վճարել նման անելանելի իրավիճակներում չհայտնվելու համար:

ՀԱՐՑ. Ես դիմել եմ մեր տարածքային սոցիալական բաժին, որպեսզի լինեմ իմ 1-ին կարգի հաշմանդամ տղայի խնամակալը, սակայն ինձ տեղեկացրին, որ չեմ կարող: Ուզում եմ իմանալ` ինչու: Մինչեւ նրա 18 տարեկան դառնալը հայրն է եղել խնամակալը, հետո կտրեցին խնամակալությունից: Նորից դիմել եմ, սակայն մերժում են: Ինչո՞ւ:

Սվետլաննա Չախմախչյան (ք. Սպիտակ)

ՊԱՏԱՍԽԱՆ. Տեղեկացնում ենք, որ Հայաստանի Հանրապետության քաղաքացիական օրենսգրքի (այսուհետ` Օրենսգիրք) 37-րդ հոդվածի 1-ին մասի համաձայն` խնամակալ կամ հոգաբարձու նշանակում է խնամակալության եւ հոգաբարձության կարիք ունեցող անձի բնակության վայրի (թաղապետարանի) խնամակալության եւ հոգաբարձության մարմինը մեկ ամսվա ընթացքում` սկսած այն օրվանից, երբ նշված մարմնին հայտնի է դարձել քաղաքացու նկատմամբ խնամակալություն կամ հոգաբարձություն սահմանելու անհրաժեշտությունը:
Օրենսգրքի 34-րդ հոդվածի համաձայն` խնամակալություն սահմանվում է 14 տարին չլրացած անչափահասների, ինչպես նաեւ հոգեկան խանգարման հետեւանքով դատարանով անգործունակ ճանաչված քաղաքացիների նկատմամբ: Հետեւաբար, հաշմանդամություն ունեցող անձի նկատմամբ խնամակալ նշանակվել չի կարող, եթե նա դատարանի կողմից անգործունակ չի ճանաչվել:

ՀՀ աշխատանքի եւ սոցիալական հարցերի նախարարության հասարակայնության հետ կապերի վարչություն

«ԺՈՂՈՎՈՒՐԴ». Խնամակալը կամ հոգաբարձուն նշանակվում է իր համաձայնությամբ: Ընդ որում, պետք է հաշվի առնվեն նրա բարոյական եւ անձնական այլ հատկանիշները, խնամակալի կամ հոգաբարձուի պարտականություններ կատարելու ունակությունը, նրա ու խնամակալության կամ հոգաբարձության կարիք ունեցող անձի միջեւ եղած հարաբերությունները, իսկ հնարավորության դեպքում` նաեւ խնամարկյալի ցանկությունը: