«ՓԱՇԻՆՅԱՆԻ ՇՐՋԱՊԱՏԸ ԴԵՌ ՊԱՌԱԿՏՎԵԼՈՒ Է»

«Ժողովուրդ» օրաթերթը հայաստանյան ներքաղաքական կյանքի, նոր զարգացումների, կառավարության գործելաոճի, հետհեղափոխական միտումների մասին զրուցել է «Անտարես» հրատարակչության տնօրեն Արմեն Մարտիրոսյանի հետ:

-Պարո՛ն Մարտիրոսյան, ԱԺ ընդդիմադիր փոխխոսնակի պաշտոնի համար ԲՀԿ-ն առաջադրել էր Վահե Էնֆիաջյանի թեկնածությունը, իսկ «Լուսավոր Հայաստանը»՝ Մանե Թանդիլյանի: Իշխող «Իմ քայլը» խմբակցությունը որոշեց, որ քվեարկելու է ԲՀԿ թեկնածուի օգտին, քանի որ ԲՀԿ-ն ավելի մեծ խմբակցություն ունի: Տեսակետ հնչեց, որ այդպիսով «Իմ քայլը» չեզոքացրեց իրական ընդդիմությանը: Ի՞նչ կասեք:
-Բոլոր ընդդիմություններն էլ իրական են՝ թե՛ ԲՀԿ-ն, թե՛ «Լուսավոր Հայաստանը», քանի որ նրանց ժողովուրդն է ընտրել: Իշխող ուժը առաջնորդվել է այն մտայնությամբ, որ փոխխոսնակի պաշտոնում ներկայացված լինի ավելի մեծ ուժ, որին մեծ թվով մարդ է վստահել: Դա նորմալ է: Շուտով շատ մանր բաներ դուրս կգան ջրի երես, եւ այն խաբկանքը, թե խորհրդարանում այլ կարծիքներ չեն լինելու, առավել ակնհայտ կերեւա:
-Այս կառավարության գործելաոճում կա՞ն միտումներ, որոնք Ձեզ դուր չեն գալիս, որոնք անթույլատրելի են:
-Այսպես թե այնպես, բոլորս գնացել ու ընտրել ենք Նիկոլ Փաշինյան անձին: Ու քանի որ մենք մեր քվեն տվել ենք նրան, նրան էլ պետք է պահանջներ ներկայացնենք: Մինչ այսօր նրա վարած քաղաքականության մեջ ինձ դուր չի եկել երկու բան՝ ասֆալտին փռելու մասին հայտարարություններն ու այն, որ նրա օրոք պետական մրցանակներ տրվեցին մտավորականությանը: Մնացած հարցերում նրա հետ համակարծիք եմ:
-Հայտնի արտահայտությունը՝ «Հեղափոխությունը խժռում է իր զավակներին», որը պատկանում է Ֆրանսիական հեղափոխության առաջնորդներից Դանտոնին, կարո՞ղ է թավշյա հեղափոխության դեպքում էլ կիրառելի լինել: Հնարավո՞ր է, որ հենց Փաշինյանի թիմակիցները «խժռեն» իրեն:
-Ո՞ր հեղափոխությունը չի խժռել իր զավակներին: Փաշինյանի շրջապատը դեռ պառակտվելու է, մի քանի ուժեր են ձեւավորվելու… Ի վերջո, ՀՀՇ-ի օրինակն ունենք աչքներիս առաջ: Եթե այդ ամենը տեղի ունենա դեմոկրատական տարբերակով, ապա ՀՀՇ-ի ճանապարհով կգնան, եթե ոչ դեմոկրատական ճանապարհով՝ ՀՀԿ-ի: Մենք երկուսն էլ տեսել ենք: Կտեսնենք նաեւ, թե ինչպես են խորհրդարանում չներկայացված ուժերը հանրության դժգոհ զանգվածին իրենց թեւի տակ քաշում ու առաջնորդում: Այդ ամենն անխուսափելի է: Մարդիկ, որոնք քսան տարի շարունակ խաբված են եղել, կրկին հուսահատություն են ապրելու, որովհետեւ արագ փոփոխություն են ուզում, իսկ քանի որ դա հնարավոր չէ, տեւական գործընթաց է, իրենց խաբված են զգալու:
-Նիկոլ Փաշինյանը ֆեյսբուքյան իր էջում օրեր առաջ նշել էր, որ 2018-ին Երեւանի գրախանութներում Երրորդ հանրապետության պատմության համար ռեկորդային թվով գիրք է վաճառվել. «Քիչ առաջ լուրերի թողարկումից իմացա, որ 2018-ին Երեւանի գրախանութներում Երրորդ հանրապետության պատմության համար ռեկորդային թվով գիրք է վաճառվել։ Սա է Նոր Հայաստանը»,-գրել էր նա: Ի՞նչ եք կարծում, թավշյա հեղափոխությունը Հայաստանում ընթերցանության մակարդակի բարձրացման արդյո՞ւնք է, թե՞ պատճառ:
-Այդ հայտարարությունից հետո առիթ եմ ունեցել հանդիպելու, շփվելու Նիկոլ Փաշինյանի հետ. պարզվեց՝ այդ առումով եւս համակարծիք ենք: Ռեկորդային ասելով՝ նա ներկայիս արդյունքը համեմատել էր չորս-հինգ տարի առաջվա արդյունքների հետ: Մենք այն համոզման ենք, որ ընթերցանությունը մարդկանց գիտակցության զարգացման է բերում: Պարոն Փաշինյանը առաջարկեց ժողով անել եւ հասկանալ՝ ինչպես կարելի է բարձրացնել ընթերցանության մակարդակը: Ուզում եմ շեշտել, որ առաջարկը մենք չարեցինք, այլ հենց ինքը: Ես կարծում եմ, որ հեղափոխությունը նաեւ ընթերցանության մակարդակի բարձրացման արդյունք է, որը իր հերթին սպիրալաձեւ արդյունքի է բերում: Հեղափոխությունը նաեւ կատալիզատոր էր, որը նպաստեց ավելի շատ ընթերցելուն կամ գոնե չընթերցելը չխրախուսելուն: Ինչ-ինչ, բայց չեմ կարծում, որ Նիկոլ Փաշինյանի սեղանին նույն գիրքը երկու տարի կմնա:

Զրուցեց ԱՆՆԱ ԲԱԲԱՋԱՆՅԱՆԸ

ՌԻՓՓԻՆ ԿՎԵՐԱԴԱՌՆԱ ԵՐԳԱՐՎԵՍՏ
Երգչուհի Ռիփփին, որը տեւական ժամանակ էր, ինչ հանդես էր գալիս միայն որպես դերասանուհի՝ նկարահանվելով սիթքոմներում, հիմա արդեն վերադառնում է երգարվեստ: Նա «Ժողովուրդ» օրաթերթին տեղեկացրեց, որ արդեն աշխատում է նոր տեսահոլովակի վրա, երգը պատրաստ է, հիմա աշխատում են հագուստների դիզայնի եւ պարերի վրա: Հարցին, թե արդյոք կկարողանա՞ համատեղել երգչուհու եւ դերասանուհու կարիերան, վերջինս պատասխանեց. «Անպայման համատեղելու եմ, ի դեպ, մասնագիտությամբ դերասանուհի եմ, արդեն նկարահանվել եմ 25 մասանոց ֆիլմում, առաջիկայում այն կլինի եթերում: Բայց, այնուամենայնիվ, մոտակա նորությունները մեծ մասամբ երգարվեստին են առնչվելու»:
Մենք հետաքրքրվեցինք՝ ինչու երգչուհին չի մտածում դուետներով հանդես գալու մասին. «Դա պետք է պրոդյուսերիս հարցնեք: Ամեն դեպքում, կարծում եմ՝ առաջիկայում կունենամ նաեւ զուգերգեր»,-նշեց Ռիփփին:
Քանի որ շոու-բիզնեսի ներկայացուցիչներից շատերը պնդում են՝ Հայաստանում պրոդյուսերական դպրոցը զարգացած չէ, եւ այդ ոլորտում լավ մասնագետների հազվադեպ կարելի է հանդիպել, Ռիփփիին հարցրինք՝ որքանո՞վ է արդյունավետ հայ աստղի համար պրոդյուսերի հետ համագործակցությունը. «Իսկապես լավ պրոդյուսեր ամեն քայլափոխի չես հանդիպի, ես այս պահին աշխատում եմ լավագույններից մեկի հետ: Իմ բախտը բերել է: Հայաստանում պրոդյուսերները մեծ մասամբ չգիտեն՝ ինչ պետք է անեն: Արտիստի հետ աշխատանքը հեշտ բան չէ»,-մեկնաբանեց երգչուհին:
Նրա խոսքով՝ առաջիկայում երկրպագուները իրենից կարող են սպասել նաեւ ոճային, ժանրային փոփոխություններ. «Արտիստն անընդհատ աճում է, առաջ է գնում, անընդհատ փոխվում են մոտեցումները, առանց փոփոխությունների հնարավոր չէ, եթե դրանք չլինեն, կնշանակի՝ դեգրադացվել ես»,-ասաց Ռիփփին:
Քանի որ արտիստուհին ժամանակին Մոսկվայում էր ծավալում իր գործունեությունը, հարցրինք՝ Ռուսաստանի Դաշնություն վերադառնալու նպատակներ ունի՞, թե՞ մտադիր է մնալ Հայաստանում. «Հայաստանում եմ մնալու, հայրենիքիս հետ կապող շատ բաներ կան այս պահին, աշխատանքային մեծ պլաններ կան, այնպես որ գնալու մասին չեմ մտածում»,-եզրափակեց Ռիփփին:

ԱՆԻ ԱՆՏՈՆՅԱՆ