Այսօր ոստիկանության կողմից հաղորդագրություն էր տարածվել, թե Վարդենիսի համայնքի ղեկավարի ընտրություններին ընդառաջ Վարդենիսի համայնքի ղեկավարի թեկնածուի անունից նրա համախոհները սննդամթերք են տարել մի ընտանիքի՝ հորդորելով քվեարկել թեկնածուի օգտին: Հասկանալու համար, թե ինչ է կատարվել համայնքում, ArmLur.am-ը զրուցեց Վարդենիս համայնքի ղեկավարի ժամանակավոր պաշտոնակատար Արամ Մելքոնյանի հետ:
-Պարո’ն Մելքոնյան, ոստիկանությունը հաղորդագրություն է տարածել համայնքի ղեկավարի թեկնածուի անունից սննդամթերք բաժանելու մասին: Ի՞նչ է կատարվում համայնքում, ի՞նչ դեպքի մասին է խոսքը:
-Ոչ ոք ոչ մեկի նման բան չի առաջարկել: Ես չունեմ նման տեղեկություն, իրոք չունեմ: Եվ ես այս պահին բնականոն հունով աշխատում եմ:
-Դուք այդպիսի դեպքի մասին տեղյա՞կ չեք:
-Միանշանակ նման բան չի եղել ոչ մեկի կողմից: Ես նման ինֆորմացիայի չեմ տիրապետում: Ես համայնքի ղեկավար եմ եւ նման բանի մասին չեմ լսել: Համայնքում շատ մաքուր, արդար ձեւով մարդիկ գնում են ընտրության: Բոլոր թեկնածուների հետ բարիդրացիական հարաբերություններ են: Երեկ հանդիպել ենք թեկնածուներով եւ որոշել ենք, որ շատ համերաշխ քարոզարշավ ենք իրականացնելու, նույնիսկ կարող է նաեւ քարոզարշավներին հանդիպենք:
-Այդ դեպքում ստացվում է` ոստիկանության հաղորդագրությո՞ւնն է սուտ:
-Երեւի: Քանի որ ես չեմ լսել նման բան, ոստիկանության հետ էլ վերջին ժամանակներս չեմ առնչվել: Ես երեկ հանդիպել եմ բոլոր թեկնածուների հետ, բացառությամբ մեկի, ում անունը չեմ տալիս, նա Երեւանում էր: Բոլորի հետ պայմանավորվել ենք` առանց վիրավորանքների, շատ համերաշխ գնում ենք ընտրությունների, մթնոլորտը հանգիստ պահենք: Դա երեկ է եղել, ուրիշ ինֆորմացիա մեզ մոտ չի քննարկվել, չեմ էլ լսել նման բան:
.gif)
