«Լուսավոր Հայաստան» խմբակցության ղեկավար Էդմոն Մարուքյանն իր ելույթում անդրադարձավ Արայիկ Հարությունյանի հայտարարությանը. «Ագրարային համալսարանի ռեկտոր եք նշանակել ձեր մտերմին, ով օպտիմալացում է սկսել այդ համալսարանում և ինքն իրեն 850 հազար դրամ աշխատավարձ է նշանակել՝ նախկին 554 հազարի փոխարեն: Նոր բաժին է ստեղծել, որը մեկ աշխատող ունի, բայց պետ էլ ունի: Մինչդեռ գիտությունների դոկտորը 172 հազար դրամ է ստանում: Հիմա սա ի՞նչ ա, որ կոռուպցիա չի»:
Կրթության նախարար Արայիկ Հարությունյանը Մարուքյանին պատասխանել է սոցցանցի իր էջում: Մեջբերում ենք Արայիկ Հարությունյանի խոսքերը.
«Քիչ առաջ դեժավյու էր մոտս՝ Ազգային ժողովում մի ելույթ լսելիս: Անմիջապես սա հիշեցի, ու կրկին տարակուսեցի՝ ճի՞շտ էինք, որ ժամանակին մեծահոգաբար խիստ գնահատականներ չենք տվել այդ պահվածքին ու զորակցում էինք նրանց ու նրանց թիմակիցներին՝ տապալվածներին։ Բայց ճիշտ էինք, մեծահոգությունը մեր առաքինություններից է:
Հ․Գ․ Ագրարայինի մասին։ Պարոն Մարուքյանն իրեն բնորոշ ոճով կեղծում է, որովհետև Ուռուտյանի հետ ծանոթացել եմ խորհրդի կողմից ռեկտոր ընտրվելուց օրեր առաջ, այսքան ժամանակ առավելագույնը մոտ մեկ ժամ, ժամ ու կես զրուցած լինեմ հետը։ Իսկ Ուռուտյանը Հայաստանի լավագույն մասնագետներից է, ու Ագրարայինն այսօր նրա ընտրությամբ ստացել է ամենաառաջադեմ և զարգացող բուհերից մեկի համբավ։ Ու ռեֆորմատոր ռեկտորին կոռուպցիոներ անվանելը խոսում է նրա մասին, որ Ձեզ փոփոխություններ պետք չեն, Ձեզ իմիտացիա է պետք, որ լողաք։
Դուխով, պարոն Մարուքյան, չնայած այս բառից այսահարվում էիք Հեղափոխության ժամանակ, ու վերջին օրերին միայն սկսեցիք վանկարկել՝ վախենալով վերջնականապես դուրս մղվել քաղաքական դաշտից։ Այստեղ եմ գրում, որովհետև կանոնակարգով ԱԺ-ում ելույթի հնարավորություն նախարարներին տրված չէ»։
.gif)
