«ՔԱՂԱՔԱԿԱՆ ԴԱՇՏՆ ԱՅՆՊԵՍ Է ԽԱՌՆՎԵԼ, ՈՐ ՈՉ ՈՔԻ ԷԼ ՉԵՄ ՀԱՄԱԿՐՈՒՄ»

«Ժողովուրդ» օրաթերթի հարցերին պատասխանել է ժողովրդական երգիչ Արսեն Գրիգորյանը՝ Ասոն: Մենք բացահայտել ենք նրա բնավորության՝ քչերին հայտնի գծեր, խոսել ենք երգչի նախասիրությունների մասին: Ասոն պատմել է, թե ինչպես է իր կյանքը փոխվել հայտնի դառնալուց հետո, եւ ինչ հարցերում է ստիպված եղել իրեն սահմանափակել: Նա խոստովանել է, որ իր կյանքի դժվարին փուլը կապված է ֆինանսականի հետ. Ասոն չի կարողանում ոչ ասել, եւ այնպես է ստացվում, որ տասը անգամ երգում է, մեկ անգամ՝ գումար վաստակում:

-Մանկության ամենավառ հուշերը ինչի՞ հետ են կապված:
-Մանկության ամեն մի հուշ կապված է պապիկիս եւ տատիկիս հետ, մեր գյուղի հետ: Խոսքն Արա գյուղի մասին է:
-Եղե՞լ է, որ բեմի մարդ լինելու համար զղջաք: Այն ի՞նչ անհարմություններ կարող է պատճառել:
-Բեմը բերում է ճանաչման, իսկ ճանաչված մարդուն երբ սխալ են հասկանում, մի ամբողջ բանակ է հավաքվում նրա դեմ: Պարզ է, որ եթե տվյալ անձը ճանաչված չլինի, նրա ամեն մի խոսք այդքան մեծ արձագանք չի գտնի:
-Երբ ոչինչ այլեւս Ձեզ չի մխիթարում, անպայման օգնության է հասնում…
-Օգնության են հասնում իմ ընկերները եւ սեփական ինքնակառավարումս: Ինձ մխիթարում է նաեւ երեխաներիս հանդեպ իմ ունեցած մեծ սերը: Դա ամեն ինչի դարմանն է:
-Ո՞րն է կյանքի տված լավագույն դասը Ձեզ:
-Նեղությունը կարող է լավ ուսուցիչ լինել, բայց միայն խելացիների համար, թե չէ անխելքը ոչ մի բանից էլ դաս չի քաղում:
-Լիարժեք հանգստանալու համար Ձեզ ի՞նչ է հարկավոր:
-Լինել մեր տանը, այգում, ընտանիքիս հետ: Տանը լինելը հանգստանալու միակ եւ լավագույն ձեւն է:
-Ինչի՞ց կամ ումի՞ց կախվածություն ունեք:
-Մորիցս եւ Աստծուց:
-Շարունակե՛ք միտքը՝ հիմար մարդը նա է, ով…
-Իր սխալներից է սովորում: Չէ՞ որ խելացին սովորում է ուրիշների սխալներից:
-Ինչպե՞ս եք վարվում Ձեր ներքին հակասությունների հետ:
-Իմ մեջ անընդհատ կռիվ եմ տալիս դրանց հետ եւ գտնում լավագույն լուծումը, դրանով էլ մխիթարվում եմ:
-Ո՞վ կարող է դառնալ Ձեր ընկերը:
-Յուրաքանչյուր ազնիվ մարդ:
-Քաղաքական գործիչներից ու՞մ եք համակրում:
-Հիմա քաղաքական դաշտն այնպես է խառնվել, որ ոչ ոքի էլ չեմ համակրում:
-Հայտնի դառնալը ինչո՞վ է օգնում եւ ինչո՞վ է վնասում մարդուն:
-Մինչ հայտնի դառնալը երազում էի այդ մասին, բայց հետո հասկացա, որ այն շատ խնդիրներ է իր հետ բերում: Հիշում եմ՝ երբ տարիներ առաջ Թումանյան փողոցով քայլում էի Աշոտ Ղազարյանի հետ, բոլորը մոտենում էին նրան, բարեւում էին եւ ջերմ խոսքեր ասում: Ես էլ մտածում էի. «Երանի~ Աշոտին, տեսնես կգա՞ մի օր, երբ ինձ էլ կճանաչեն»: Բայց, հավատացե՛ք, երբ եկավ այդ օրը, ես հասկացա, որ հայտնի լինելը բեռ է. չես կարողանում ապրել այնպես, ինչպես կցանկանայիր: Ես էլ հումորով, ջրիկ մարդ եմ, եւ հայտնի լինելը շատ է սահմանափակում ինձ:
-Ըստ Ձեզ՝ ո՞ր դեպքում է ճշմարտությունն ասելն արդյունավետ:
-Ինչպես ասում են, սուտ կա՝ տուն է սարքում, ճիշտ կա՝ տուն է քանդում: Պետք է միշտ հաշվի առնել ճշմարտությունն ասելու հետեւանքները:
-Տարիքի հետ ընկերներ կորցնո՞ւմ եք, թե՞ ձեռք բերում:
-Երկուսն էլ. շատերը մաղվում են, շատերն էլ գալիս են իմ կյանք: Առհասարակ, ընկերոջ կորուստը ծանր եմ տանում, բայց, իհարկե, կան դեպքեր, երբ ուրախանում եմ, որ տվյալ մարդուն բացահայտում եմ եւ հասկանում, որ նա չի կարող իմ ընկերը լինել:
-Ձեր կյանքի դժվարին փուլն ինչի՞ հետ է կապված եղել:
-Օրինակ՝ հիմա այն կապված է նյութական դժվարությունների հետ: Բանն այն է, որ չեմ կարողանում մարդկանց ոչ ասել, արդյունքում երգում եմ տասը երգ, բայց մեկի համար եմ վճարվում: Գիտեմ, որ հաճախ չարաշահում են մեծահոգությունս, բայց իմ բնավորության հետ ոչինչ չեմ կարող անել:
-Ո՞րն է կին-տղամարդ հարաբերությունների կայունության հիմքը:
-Փոխադարձ սերն ու հարգանքը:
-Եվ վերջում՝ իմ հարցերից ո՞րը Ձեզ դուր եկավ:
-Անկեղծ ասած՝ բոլորը:

Զրուցեց ԱՆԻ ԱՆՏՈՆՅԱՆԸ

«ՉԵՄ ՀԻԱՍԹԱՓՎԵԼ Ո՛Չ ՓԱՇԻՆՅԱՆԻՑ, Ո՛Չ ԷԼ ԿԱՌԱՎԱՐՈՒԹՅՈՒՆԻՑ»

«Ես սկզբունքային մարդ եմ, եւ ինչպես հեղափոխության ժամանակ, այնպես էլ հիմա վստահում եմ Նիկոլ Փաշինյանին, նաեւ կառավարության անդամներին, ԱԺ պատգամավորներին: Չեմ հիասթափվել ո՛չ Փաշինյանից, ո՛չ էլ կառավարությունից, ավելին՝ օր օրի ավելի եմ հավատում նրան»,-«Ժողովուրդ» օրաթերթի հետ զրույցում նշեց երգչուհի Արմինե Գրիգորյանը՝ անդրադառնալով մեր այն հարցին, թե արդյոք հեղափոխությունից հետո ապրել է հիասթափության շրջան:

Մենք հետաքրքրվեցինք՝ ինչպես է վերաբերվում վերջին շրջանում մարզպետների աղմկահարույց պարգեւատրումներին. «Ամենակարեւորն այն է, որ ամեն բան եղել է օրենքի շրջանակում: Փաշինյանն ինքը շեշտեց դա: Կարծում եմ՝ այսօր հատկապես օնլայն տիրույթում չկա ֆեյքերի եւ սադրիչների պակաս, որոնք փորձում են ամեն կերպ սեւացնել հեղափոխությունն ու տեղի-անտեղի ցեխ շպրտել ներկայիս կառավարության վրա: Նրանց տարբերում են անգամ քաղաքականությունից շատ հեռու մարդիկ»,- պատասխանեց երգչուհին:
Դիտարկմանը, թե անընդմեջ քննադատվում է Փաշինյանի վարած կադրային քաղաքականությունը, Արմինե Գրիգորյանը հակադարձեց. «Իսկ ո՞վ է ասել, որ միանգամից վարպետներ են գալու: Բնական է, որ երիտասարդները պետք է որոշակի պրակտիկա անցնեն, փորձ ձեռք բերեն, այդ ճանապարհին պետք է սխալվեն: Հուսով եմ՝ նրանք չեն կրկնի նախորդ իշխանության սխալներն ու գռփել չեն սովորի: Ի դեպ, ինչ վերաբերում է կադրերին, ուզում եմ առանձնացնել առողջապահության նախարար Արսեն Թորոսյանին, որն արդեն այս մի քանի ամսվա ընթացքում հանդես է եկել մի շարք գովելի նախաձեռնություններով: Օրինակ՝ չարորակ հիվանդությունների վիրահատական բուժման գումարը պետության կողմից փոխհատուցելու վերաբերյալ որոշումը, կարծում եմ, արժանի է գովեստի: Ինչու՞ լավին չասենք լավ»:
Մենք մի փոքր էլ զրուցեցինք Արմինե Գրիգորյանի ստեղծագործական կյանքի մասին: Երգչուհին տեղեկացրեց, որ այդ առումով բան չի փոխվել, ինքը եւ իր ընտանիքը շարունակում են վարձակալել բեմ, որտեղ էլ երգչուհին հանդես է գալիս կորպորատիվների շրջանակում: Ինչ վերաբերում է շոու-բիզնեսում առկա մի շարք խնդիրների լուծմանը, երգչուհին նկատեց. «Հասկանալի է, որ կառավարությունը հիմա ավելի հրատապ խնդիրներ ունի լուծելու: Բայց հուսով եմ, որ մի օր հերթը մեզ էլ կհասնի»:

ԱՆՆԱ ԲԱԲԱՋԱՆՅԱՆ