Թավշյա հեղափոխությունից հետո շատ քննարկվեց բանակի ներգրավվածության հարցը 2008-ի մարտի մեկի ողբերգական իրադարձությունների ժամանակ: Պաշտպանության նախկին նախարար Սեյրան Օհանյանը, անդրադառնալով այդ հարցին, ասել է. «Մարտիմեկյան ողբերգության բացահայտումը անհրաժեշտություն է, բայց նրա շրջանակներում իրականությունը խեղաթյուրող յուրաքանչյուր փորձ, որի նպատակը ոչ թե սպանությունների բացահայտումն է, այլ իրենց ցանկալի վարկածի պարտադրումը, այն է` զինված ուժերին մեղսագրել տարբեր հանցագործություններ, դիտարկում եմ որպես միտումնավոր, ակնհայտ ոտնձգություն հայկական զինված ուժերի նկատմամբ»:
Այս խոսքերով պարոն Օհանյանը թերեւս հերքեց այն, որ բանակը ուղիղ ներգրավվածություն է ունեցել մարտիմեկյան իրադարձություններում: «Ժողովուրդ» օրաթերթը մի շարք հարցերի մասին զրուցել է «Իմ քայլը» խմբակցության պատգամավորներից Արամ Խաչատրյանի հետ, որը 2004-2009 թվականներին եղել է գումարտակի շտաբի պետ, մայոր: Վերջինս` որպես զինվորական, անմիջական մասնակցություն է ունեցել մարտիմեկյան իրադարձություններին:
-Պարո՛ն Խաչատրյան, Դուք եղել եք Լոռու փոխմարզպետը, այժմ պատգամավոր եք: Ձեզ ինչպե՞ս եք զգում ԱԺ-ում: Ըստ Ձեզ` ինչպիսի՞ն է նորընտիր Ազգային ժողովը:
-Պրոֆեսիոնալ: Մեկ քառօրյայով կդժվարանամ բնութագրել, թե ինչպիսի Ազգային ժողով ունենք: Նախնական տպավորությունը լավ է: Մարդիկ իրենց գործի գիտակն են, տեսնում եմ ակտիվ, նախաձեռնող մարդկանց: Շատ է խոսվում անփորձության մասին, բայց դա ընդամենը միֆ է, որ տարբեր լրատվամիջոցների կամ ինչ-որ ուժերի կողմից գցել են դաշտ եւ քննարկման առարկա դարձրել: Ես համաձայն չեմ դրա հետ: Համենայնդեպս, մեծամասությունը շատ լավ տիրապետում է իրենց ոլորտներին: Ես նախկին զինվորական եմ եւ նաեւ եղել եմ Վանաձորի ավագանու անդամ, հետո արդեն Լոռու փոխմարզպետ, եւ իմ ողջ գիտելիքներն ու փորձը պատրաստ եմ ներդնել ԱԺ-ում: Ես պաշտպանության եւ անվտանգության հանձաժողովում եմ, ինձ ծանոթ ոլորտ է, խնդիրներին շատ լավ տեղյակ եմ, եւ առաջիկայում մենք հանդես կգանք տարբեր առաջարկություններով, օրենսդրական նախաձեռնություններով:
-Թավշյա հեղափոխությունից հետո 2008 թվականի մարտի 1-ին տեղի ունեցած գործը նոր զարգացումներ եւ ընթացք ստացավ: Դուք 2008 թվականին եղել եք գումարտակի շտաբի պետ, մայորի կոչում եք ունեցել: Որպես այդ տարիներին այդ համակարգում ծառայող մարդ` ի՞նչ ակնկալիքներ կան մարտի 1-ի գործի բացահայտման մասով:
-Այսօր իրավապահ մարմիններին եւ դատական համակարգին ես լիովին վստահում եմ եւ համոզված եմ, որ մարտի մեկը անպայման կբացահայտվի, եւ բոլոր մեղավորները պատասխանատվության կենթարկվեն, կպատժվեն:
-Ըստ Ձեզ` իրավապահ եւ դատական համակարգերը ամբողջովին ազա՞տ են այսօր, որեւէ կաշկանդվածություն չունե՞ն:
-Բոլոր ժամանակներում էլ կարող են ինչ-որ փոքր խնդիրներ լինել կամ անհատներ լինել, որոնք որ կփորձեն չարաշահել իրենց դիրքերը: Բայց, ընդհանուր առմամբ, ես կարծում եմ, որ այսօր կարելի է վստահել այդ համակարգերին:
-Մարտի մեկի գործի շրջանակներում ամենաքննարկված թեման, թերեւս, բանակի ներգրավվածության հարցն է: Դուք այն ժամանակ եղել եք այդ համակարգում, ի՞նչ կասեք այս մասին:
-Այո: Ես պարզ կարող եմ ասել, որ բանակը ներգրավված է եղել եւ իր մասնակցությունն է ունեցել այդ օրերին: Կադրերում էլ ակնհայտ երեւում է, որ բանակը ներգրավված է եղել: Ես ինքս, լինելով զինվորական, կարող եմ ասել, որ այդ օրը` մարտի մեկին, գումարտակը Վանաձորից տեղափոխվել է Երեւան ժամը 3-ին: Այդ օրը` ժամը 3-ին, տագնապ է հնչել, եւ գումարտակը տեխնիկայով, անձնակազմի հետ միասին տեղափոխվել է Երեւան: Բանավոր կերպով տագնապ է տրվել, եւ վերադասի կողմից նշվել է ուղղությունը` որտեղ պիտի գնանք: Մենք գնացել ենք Երեւան` Օրբելի փողոց, եւ այնտեղ կանգ ենք առել: Այնուհետեւ հաջորդ օրվանից մեր գումարտակը տեղակայված է եղել ձկան խանութի խաչմերուկին, եւ այնտեղ ծառայություն է իրականացվել:
-Լուրեր կան այն մասին, որ Դուք այդ օրերին ընդդիմացել եք վերադասներին, փորձել եք այնպես անել, որ հրամանները ամբողջությամբ չկատարվեն: Ի դեպ, սրա հետ է կապվում Ձեր պաշտոնանկությունը: Որքանո՞վ է սա համապատասխանում իրականությանը:
-Իհարկե, մարտի 1-ից հետո ինձ ծառայությունից հեռացրել են, նույնիսկ աստիճանազրկել են: Ես դատական հայցով դիմել եմ վարչական դատարան, ու կոչումս վերականգնել են: Այնուհետեւ բանակից հեռացնելու վճիռը չեմ բողոքարկել, որովհետեւ դա անիմաստ եմ համարել եւ չեմ վստահել մեր դատական համակարգին: Այնուամենայնիվ, իմ պայքարը շարունակել եմ: Մասնակցել եմ բոլոր հանրահավաքներին, քաղաքական ակցիաներին, թավշյա հեղափոխությանն եմ ակտիվ մասնակցություն ունեցել, հարցազրույցներում իմ կարծիքը հայտնել եմ նախորդ իշխանությունների մասին:
-Պաշտոնանկությունը Ձեր կոնկրետ ո՞ր քայլից հետո է եղել:
-Երեւի պետք է հարցնել նախորդ իշխանություններին: Ինչպես արդեն դուք Ձեր հարցի մեջ նշեցիք, փորձել եմ ընդդիմանալ եւ կանխել շատ բաներ: Ես ուզում եմ նաեւ մի բան ասել. իմ գումարտակը այդ օրերին նույնիսկ մեկ փամփուշտ չի կրակել:
Զրուցեց ԼՈՒՍԻՆԵ ՄԻՆԱՍՅԱՆԸ
ԲԴԽ ՆԱԽԱԳԱՀԸ ՀԱԿԱԴՐՎՈՒՄ Է ՎԱՐՉԱՊԵՏԻՆ
ՀՀ իշխանության ներկայացուցիչների հետ Բարձրագույն դատական խորհրդի նախագահ Գագիկ Հարությունյանի հակասությունները գնալով ավելի բացահայտ բնույթ են ստանում:
Երեկ Հարությունյանը, ՀՀ-ում անցումային արդարադատությանը վերաբերող հարցին ի պատասխան, նշել է – «Անցումային արդարադատության վերաբերյալ դուք՝ լրագրողներդ, մեղք չունեք, որ պատկերացում չունեք այդ երեւույթի մասին: Նույնիսկ իրավաբանները պատկերացում չունեն: Ես հիմա չգիտեմ, թե այն, ինչի մասին խոսում են, դա ինչ է: Ես ուսումնասիրել եմ ամբողջ աշխարհի փորձը, գիտեմ դրա հազար տարբեր դրսեւորումներ, բայց թե ինչ է մեզ մոտ նախատեսվում կամ ծրագրվում, կամ այդ ինչ խմբեր են աշխատում, ես տեղեկություն չունեմ»:
Փոխանցելով, որ ԲԴԽ-ն այդ խմբերի աշխատանքին չի մասնակցում` Հարությունյանն ասաց. «Մենք նման մասնակցություն չունենք, բայց ամբողջ արդարադատության լուրջ, հիմնավոր բարեփոխումների վերաբերյալ մենք մշակեցինք արդյունավետ արդարադատության մի հայեցակարգ, մեր կայքում տեղադրված է: Հիմա, դրանից ելնելով, ռազմավարական զարգացման ուղղություններն ենք մշակում: Թե որքան կհամընկնի հնարավոր այդ տարբեր մշակումների հետ, ես դժվարանում եմ ասել»:
Այս խոսքերով Գագիկ Հարությունյանը, ըստ էության, հակադրվում է գործող իշխանություններին` մասնավորապես վարչապետ Փաշինյանին: Նախ՝ անցումային արդարադատության թեզի մասին թավշյա հեղափոխությունից հետո հայտարարեց ե՛ւ վարչապետ Նիկոլ Փաշինյանը, ե՛ւ «Հայ ազգային կոնգրեսն» իր հայտարարության մեջ:
Հիշեցնենք, որ օգոստոսի 17-ին` Հանրապետության հրապարակում կայացած հանրահավաքի ժամանակ, ՀՀ վարչապետ Նիկոլ Փաշինյանը չափազանց կարեւոր համարեց անցումային արդարադատության մարմիններ ստեղծելու վերաբերյալ քննարկումների անհրաժեշտությունը։
Հիմա ԲԴԽ նախագահը ակնարկում է, որ ներկայիս իշխանությունները չեն հասկանում անցումային արդարադատություն ասվածի էությունը։ Գ. Հարությունյանի խոսքից նաեւ ակնհայտ է, որ եթե նույնիսկ ներկայիս իշխանությունները անցումային արդարադատության հետ կապված ինչ-որ քննարկումներ են ծավալում, ապա դա տեղի է ունենում այնպիսի խմբում, որում ԲԴԽ նախագահը չկա։ Կարելի է ենթադրել, որ սա նեղացվածության դրսեւորում է Գագիկ Հարությունյանի կողմից:
Լ. ՄԻՆԱՍՅԱՆ
ՀԵՏ ԿՏԱՆ
Մարզպետների կողմից պարգեւավճարների թեման շարունակում է ակտուալ մնալ: Արարատի մարզպետ Գարիկ Սարգսյանը երեկ «Ժողովուրդ» օրաթերթի հետ զրույցում նշեց, թե իր կողմից օրենքի որեւէ խախտում չի եղել, եւ խնդիրն այն է, որ 100 տոկոսից ավել պարգեւավճարի դեպքում երկու հրաման պետք է լիներ: «Ետգանձում հնարավոր չէ անել, նոր աշխատավարձից պահումներ հնարավոր չէ անել, եւ մենք որոշել ենք մեր 4.5 տոկոսները ամեն անգամ հատկացնենք ինչ-որ ընտանիքների»,- նշեց Սարգսյանը: Նա մեզ հետ զրույցում վստահեցրեց, թե բոլոր աշխատակիցներն այս ընթացքում արտակարգ ռեժիմով են աշխատել, եւ պարգեւավճարներն արդարացված են:
ԽԱԽՏԵԼ Է ՊԱՅՄԱՆՆԵՐԸ
ՀՀ մշակույթի նախարարությունը «Սարգիս եւ Մարիաննա» ընկերության հետ կնքված պայմանագիրը միակողմանի խզել է: «Ժողովուրդ» օրաթերթը տեղեկացավ, որ նախարարության եւ ընկերության միջեւ դեռեւս նախորդ տարվա մայիսի 31-ին է պայմանագիր կնքվել: Ըստ պայմանագրի` «Սարգիս եւ Մարիաննա»-ն պետք է իրականացներ Լոռու մարզի Բերդ համայնքի Լոռի Բերդ ամրոցի բաղնիքի ամրակայման, վերականգման, օգտագործման եւ տարածքի մասնակի բարեկարգման գիտանախագծային ու նախահաշվային փաստաթղթերի մշակման աշխատանքները, սակայն պարզվում է, որ ընկերությունը չի հասցրել իրականացնել այդ աշխատանքները: Չնայած սրան` ընկերության եւ նախարարության միջեւ նախորդ տարվա հոկտեմբերին դարձյալ պայմանագիր է կնքվել, եւ աշխատանքների կատարման ժամկետը երակարաձգվել է, իսկ վերջնաժամկետ սահմանվել նոյեմբերի 19-ը, բայց ընկերությունը դարձյալ չի իրականացրել պայմանագրով նախատեսված պահանջները: Արդյունքում Մշակույթի նախարարությունը դեկտեմբերի 25-ին որոշել է պայմանագիրը խզել ընկերության հետ: «Ժողովուրդ» օրաթերթը տեղեկացավ, որ ընկերությունը տուգանվել է 280 հազար դրամի չափով: Չի բացառվում, որ առաջիկայում Մշակույթի նախարարությունը դիմի Ֆինանսների նախարարություն` ընկերությանը սեւ ցուցակում` գնումների գործընթացին մասնակցելու իրավունք չունեցող մասնակիցների ցանկում ներառելու պահանջով:
ՀԻՆ ԵՎ ՆՈՐ
Երեկ «Դվին» ռեստորանային համալիրում էին հավաքվել ներկա եւ նախկին իշխանական էլիտան: Հայոց բանակի կազմավորման 27-ամյակի առթիվ երեկ այդ ռեստորանային համալիրում միջոցառում էր կազմակերպված, որին հրավիրված էին ներկա եւ նախկին պաշտոնյաներ, հասարակական, մշակութային գործիչներ: Ընդգծենք, որ միջոցառմանը ներկա են եղել նաեւ պաշտպանության նախկին նախարարներ Վիգեն Սարգսյանը, Սեյրան Օհանյանը, ՀԱՊԿ նախկին գլխավոր քարտուղար Յուրի Խաչատուրովը, նախկին պատգամավոր Սամվել Ալեքսանյանը եւ այլք: Միջոցառմանը ներկա էր նաեւ Արցախի ռազմաքաղաքական ղեկավարությունը:
.gif)
