Մանրամասներ ստեղծվելիք Սփյուռքի հանձնակատարի գրասենյակից

Գործադիրի կողմից հավանության արժանացավ Կառավարության կառուցվածքի մասին նախագիծը: Արդյունքում կառավարությունը կունենա երկու փոխվարչապետ եւ 12 նախարարություն`

1) աշխատանքի և սոցիալական հարցերի նախարարությունը,

2) առողջապահության նախարարությունը,

3) արդարադատության նախարարությունը,

4) արտակարգ իրավիճակների նախարարությունը,

5) արտաքին գործերի նախարարությունը,

6) կրթության, գիտության, մշակույթի և սպորտի նախարարությունը,

7) շրջակա միջավայրի նախարարությունը,

8) պաշտպանության նախարարությունը,

9) տարածքային կառավարման և ենթակառուցվածքների նախարարությունը,

10) բարձր տեխնոլոգիաների արդյունաբերության նախարարությունը,

11) Էկոնոմիկայի նախարարությունը,

12) ֆինանսների նախարարությունը»:

Նշենք, որ նախագիծը երկար ժամանակ հրապարակված էր նախագծերի միասնական կայքում եւ մինչ օրս քաղաքացիների կողմից ստացված է եղել 49 առաջարկ, որոնց մեծ մասում դժգոհություն է եղել Մշակույթի նախարարությունն այլ գերատեսչությանը միացնելը: Այնուամենայնիվ, կառավարությունը փորձել է հիմնավորել այս եւ մյուս գերատեսչությունների միացման պատճառները:

Նախագծում հետաքրքիր կետերի հանդիպեցինք. ինչպես հայտնի է` Էներգետիկ ենթակառուցվածքների եւ բնական պաշարների նախարարությունն ու Տարածքային կառավարման եւ զարգացման նախարարությանը միաձուլվելու է` ստեղծելով Տարածքային կառավարման եւ ենթակառուցվածքների նախարարություն: Օրենքների նախագծերի փաթեթի ընդունումից հետո նախատեսվում է Կառավարության որոշմամբ այս նախարարության ենթակայությանը հանձնել ոչ միայն միավորման արդյունքում համատեղ ենթակայությանը փոխանցված Ջրային կոմիտեն և Քաղաքացիական ավիացիայի կոմիտեն, այլեւ Պետական գույքի կառավարման կոմիտեն:

Նախագծից տեղեկանում ենք, որ վարչապետի որոշմամբ ոչ միայն Կառավարության նիստի մի մասը, այլեւ նիստն ամբողջությամբ կարող է անցկացվել դռնբաց: Նախագծում մանրամասներ են առկա Սփյուռքի գլխավոր հանձնակատարի գրասենյակի շուրջ: Մասնավորապես, հետագա մի քանի ամսվա ընթացքում ակնկալվում է սփյուռքի նախարարության հաստիքների քանակը կրճատել եւ վարչապետի աշխատակազմում ստեղծվող Սփյուռքի գործերի գլխավոր հանձնակատարի գրասենյակի համար սահմանել օպտիմալ 20-25 հաստիք:

Նաիրա Հովհաննիսյան