Շատ դժվար է լավ բան ստեղծել ոչ մի բանից. «Իմ քայլը» խմբակցության պատգամավոր

«Ժողովուրդ» օրաթերթը զրուցել է «Իմ քայլը» խմբակցության պատգամավոր Գոռ Գեւորգյանի հետ:

-Պարո՛ն Գեւորգյան, «Իմ քայլը» խմբակցությունը պարբերաբար հանդիպումներ է ունենում նախարարների հետ: Եթե այս պահին ամփոփենք տեղի ունեցած հանդիպումները, ի՞նչ արդյունքների եք հասել:

-Նախարարների հետ քննարկումների արդյունքում արդեն իսկ ուրվագծվել են այն կարեւոր հարթակները, որտեղ կարվեն քայլեր: Թե՛ առողջապահության նախարարությունը, թե՛ մնացած բոլոր նախարարությունները, որոնց հետ առիթ ենք ունեցել քննարկումներ անցկացնելու, գույքագրել ենք հստակ խնդիրներ առաջնահերթության պահանջով, որոնք հետզհետե կդառնան հանրության լայն իրազեկմանը ենթական տեղեկատվություն: Այն, ինչ որ մամուլը հրապարակում է որպես գործադիրի կողմից արված քայլեր, որոնց վերաբերյալ մենք տվել ենք մեր համաձայնությունը, բնականաբար, այդ ամենը իր մեջ ենթադրում է նաեւ Ազգային ժողովի լուման:

– «Իմ քայլը» խմբակցությունը ունի 88 պատգամավոր: Երկու ընդդիմադիր խմբակցությունները որոշումների վրա, ըստ էության, չեն կարող ազդեցություն ունենալ: Մտավախություն չկա՞, որ լճացում տեղի կունենա, եւ նաեւ հնչում են կարծիքներ, որ զսպող ընդդիմությունը խորհրդարանից դուրս է: Ի՞նչ կասեք այս մասին:

-Ես Ձեզ հորդորում եմ բոլոր նիստերը եւս մեկ անգամ նայել, եւ կտեսնեք, որ իշխող խմբակցությունը շատ ավելի հարցեր է տալիս գործադիրին, ընդ որում շատ թիրախավորված հարցեր, հարցեր, որոնք ուրիշ մեկը, կողքից լսելով, կենթադրի` մեկ թիմ ներկայացնող այս երկու բանախոսների մեջ երեւի թե ինչ-որ տարաձայնություն կա: Իրականում դրանք տարաձայնություններ չեն: Դա այն առողջ հարթակն է, որտեղ որ բախվում են գաղափարներ, եւ ոչ թե անձեր:

Սա եւս մեկ անգամ ընդգծում է, որ «Իմ քայլի» գործունեությունը միտված է առողջ եւ հստակ կառուցողական դաշտ ձեւավորելուն: Եւ այն, որ մյուս ուժերը` օրենսդիրում ներկայացված, հավանաբար չեն կարողանում ծանրակշիռ ձայների մեծամասնություն հավաքելով հարց լուծել, դա դեռ չի նշանակում, որ նրանց ոչ մի գործունեություն չեն կարող ծավալել: Առաջին երկու օրենքի նախագծերը, որոնք մտել են ԱԺ, դրանք հենց ընդդիմության կողմից ներկայացրած նախագծերն են եղել:

Եթե իրավիճակը փոխված չլիներ, բնակաբար, շատ հնարավոր էր, որ այդ երկու նախագիծն էլ չլինեին, անգամ եթե դրանք ունեին հստակ թիրախավորված բարի եւ դրական բովանդակություն: Ինձ համար զսպող ընդդիմությունը դրսում առաջին հերթին ժողովուրդն է եւ ժողովրդի կարծիքը: Այն որ ունենք որակական նոր հատկանիշներով ԱԺ, դրա միակ երաշխավորողը եղել է ՀՀ-ի հաղթանակած ժողովուրդը: Ժողովուրդն է որոշում եւ գնատական տալիս, թե դու ինչպես ես աշխատում, իսկ կուսակցությունները, բնականաբար, ունեն իրենց ուրույն տեղը:

-Վարչապետը խոսում էր տնտեսական թռիչքաձեւ աճի մասին: Կառավարության ծրագիրը ներկայացնելիս խոսեց նաեւ կախարդական փայտիկի կիրառման մասին: Հիմա տեսնո՞ւմ եք կախարդական փայտիկի կիրառման փորձեր:

-Եկեք պաթոսներից մի կողմ կանգնենք, ավելի ռեալ, շոշափելի հարթակի վրա քայլենք:

-Վարչապետի խոսքերն են:

-Ես վարաչապետին շատ հարգում եմ: Վարչապետի կատարած աշխատանքը համապետական նշանակության ինքս շատ վառ եմ պահում: Դա բոլորիս ձեռքբերումն է: Ով հիմա չի հասկանում դա, կհասկանա տարիների ընթացքում, երբ իր երեխաներն ու թոռները կապրեն ավելի որակյալ Հայաստանի Հանրապետությունում, քան ապրել են իրենց ծնողներն ու տատերը եւ պապերը:

Այդ ամեն ինչը շատ իրատեսական է, եւ այստեղ որեւէ պոպուլիստական ձեւակերպում չկա, եւ հիմված է այն տեսական եւ գաղափարական հենքի վրա, որը դրված է եղել հեղափոխական գործընթացների կենտրոնում. դա մարդու ներառական ուժն ու ազդեցությունն է: Սա այն բացատրությունն է բոլոր հարցերի, որոնք որ պայմանավորել են պետության տնտեսական զարգացումը:

Մենք չունենք տնտեսական մեծ ռեսուրսներ, բայց մենք ունենք մարդու տեսակի, հայի տեսակի հանճարեղ արարչական գործունեության կարողություն: Հայը ինչքա~ն մեծ եւ օգտակար գործունեություն է ծավալում շատ երկրներում: Դա գալիս է նրանից, որ մենք առհասարակ աշխատասեր ժողովուրդ ենք, եւ դա կօգնի հաղթահարել շատ բաներ: Մնացած ամեն ինչը սկսում է կրթությունից, սկսում է տնտեսական ներդրումներից, որոնք որ ասյօր մեր պետությունը փորձում է առաջ տանել` առաջին հերթին հիմք դնելով բարձր կրթական, որակական հարթակներ կառուցելուն, նոր տեխնոլոգիաների զարգացման եւ գիտության ներառական լինելուն տնտեսության մեջ: Կանցնի ժամանակ, ես կարծում եմ, որ մենք անպայման պետք է հաղթանակենք հենց այս տնտեսական բարեփոխումների մեկնարկած գործընթացում:

-Որքա՞ն ժամանակ հետո մենք հստակ փոփոխություններ կտեսնենք:

-Որեւէ մի բանի մասով ժամանակահատված նշելը անշնորհակալ եւ անհեռատես մոտեցում է, դրա համար ես հիմա չեմ շտապի: Ես հիմա կարող եմ փաստել, որ տարվում է աշխատանք: Այդ աշխատանքը շատ բարդ է: Կարելի է ստեղծել ինչ-որ բան ինչ-որ բանից, բայց շատ դժվար է ստեղծել լավ բան ոչ մի բանից:

Պատկերացրե՛ք ամբողջությամբ ավերված եւ ջլատված մի պետություն, որի հիմքի վրա փորձ է արվում կառուցել որակական հատկանիշներով պետություն: ՀՀ-ում չկա մի ոլորտ, որտեղ չկան այն ավերիչ գլոբալ խնդիրները, որոնք պետությունը հասցրել են ծանր վիճակի: Այն, ինչ արվում է, ամբողջությամբ պարուրված է ազնվության, անաչառության եւ միանշանակ անբասիր գործունեությամբ:

Չկա մի մարդ, որն ունի պետական կառավարման բարձրագույն լծակ օգտագործելու հնարավարություն, եւ ներգրավված լինի որեւէ տեսակի կոռուպցիոն համակարգի մեջ, որովհետեւ կոռուպցիոն համակարգը առհասարակ փլուզվել է:

Լուսինե Մինասյան