ԱՅԴ ԱՌՈՒՄՈՎ ՄԵՆՔ ՊԱՐՏՎԵԼ ԵՆՔ ՀՀԿ-ԻՆ

«Ժողովուրդ» օրաթերթը զրուցել է ԱԺ փոխնախագահ Ալեն Սիմոնյանի հետ։

-Պարո՛ն Սիմոնյան, նորընտիր Ազգային ժողովը մի քանի օր է` սկսել է իր աշխատանքները։ Ինչպիսի՞ ԱԺ ունենք, ի՞նչ թերություններ եք նկատել։
-Ես տեսնում եմ, որ Ազգային ժողովը լի է նոր եւ շատ առաջադեմ մարդկանցով, որոնք արհեստավարժ են, շատ մեծ ապագա ունեն։ Վստահեցնում եմ Ձեզ, որ սա Հայաստանի Հանրապետությունում թերեւս ամենահաջողված Ազգային ժողովի կազմերից մեկն է։ Նորընտիր ԱԺ-ն կարելի է համեմատել միայն Ազգային ժողովի առաջին կազմի հետ, որը ոչ պակաս մտավորականներով եւ հանրային մարդկանցով եւ հանրության շրջանում վստահություն վայելող մարդկանցով էր լցված։
-Թերություններ չո՞ւնի այս ԱԺ-ն։
-Թերություններ կան միշտ եւ բոլոր տեղերում. կան խմբագրություններում, հիմնարկներում, ընտանիքներում, բայց կարեւոր հարցը այն է, թե արդյոք այդ թերությունները որոշիչ են եւ արդյոք այդ թերությունները ազդեցություն են ունենալու այդ մարմնի, այդ ընտանիքի աշխատանքի վրա։ Ես համարում եմ, որ եթե ինչ-որ թերություններ էլ կան, դրանք որոշիչ չեն լինելու։ Այս Ազգային ժողովը հպարտության Ազգային ժողով է։
-Ձեր ընդդիմախոսները, խոսելով ներկայիս խորհրդարանի մասին, ասում են, որ ԱԺ ամբիոնից քաղաքական խոսք չեք ասում, քաղաքական միտք չի հնչում։ Ի՞նչ կասեք։
-Ովքե՞ր են մեր ընդդիմախոսները։ Հանրապետականնե՞րը։ Հանրապետականները թող իրենց աչքի գերանը տեսնեին։ Ի՞նչ անենք. հիմա որ մենք տարբեր հեղինակություններ չենք բերել Ազգային ժողով, որոնք որ ձայներ են ապահովում, տարբեր օլիգարխների չենք բերել Ազգային ժողով։ Հիշո՞ւմ եք, որ ասում էին` ցուցակներում օլիգարխներ են լինելու։ Հիմա չենք բերել։ Այո, այդ առումով մենք պարտվել ենք հանրապետականներին, որ չենք կարողացել Ազգային ժողով այնպիսի մարդիկ բերել, որոնցից մեկը, ասենք, ԱԺ-ում ունենա երեք սենյակ` լինելով հասարակ պատգամավոր, միացնելով սենյակը։ Չենք կարողացել հավասարվել այդ չափանիշներով եւ պարտվել ենք։
-ԱԺ-ում երկու ընդդիմադիր խմբակցություններ կան։ Ինչպիսի՞ ընդդիմություն ունենք։ Ներկայիս խորհրդարանական ընդդիմությունը կարո՞ղ է հակակշռել իշխանություններին եւ, ինչու ոչ, շատ տեղերում նույնիսկ զսպել։
-Ես կարծում եմ, որ այո։ Մենք դա շատ հաճախ տեսնելու ենք, եւ կարող եմ ասել, որ արդեն իսկ տեսնում ենք։
-Բայց չէ՞ որ ընդդիմադիր խմբակցությունները ավելի շատ իրար դեմ են խոսում, քան ձեր։
-Չեմ կարող քաղաքական գնահատական տալ։ Դա քաղաքական նորմալ պրոցես է։ Այո, կարող են իրար դեմ էլ խոսել, որովհետեւ վերջ ի վերջո նրանք իրար էլ են չէ՞ ընդդիմադիր։ Եթե իրար ընդդիմադիր չլինեին, մի ֆրակցիայում կլինեին։ 1 տարի կարող է դրան ականատես լինենք, հետո կարող է ականատես լինենք հակառակ մի որեւէ բանի։ Ուստի պետք չէ շտապել եւ այդպիսի գնահատականներ տալ։
-Հայաստանի քաղաքական դաշտում ի՞նչ դեր ունի արտախորհրդարանական ընդդիմությունը։
-Եթե արտախորհրդարանական ընդդիմություն ասելով` նկատի ունեք նախկին իշխանություններին, ապա ես կուզեմ, որ հստակ տարանջատենք։ Ես չեմ կարծում, որ հանրապետականը մեզ ընդդիմություն է եւ կարող է ընդդիմություն լինել, որովհետեւ ՀՀԿ-ն մարդկանց չի ճանաչում եւ մարդկանց հետ երբեւիցե կապ չի ունեցել։ Այո, 5-10 տարի հետո կարող ենք իրենց ընդդիմություն համարել, որովհետեւ իրենք մարդկանց հետ կշփվեն, կունենան փորձ, կլսեն մարդկանց, ուղղակի կլսեն։ Այդ ժամանակ կխոսենք։
-Ձեզ շատ են մեղադրում, որ շատ եք փակ նիստեր անում։ Ո՞րն է դրա պատճառը։
-Ես չեմ եղել։ Չգիտեմ` ինչի է էդպես եղել։ Բայց ես մի բան կարող եմ ասել միանշանակ, որ իմ սկզբունքներից մեկն է, որ լրատվությունը, ԶԼՄ-ները պետք է ազատ լինեն, եւ մաքսիմալ շատ պետք է ԶԼՄ-ների հետ աշխատել եւ ազատություններ տալ։ Այս սկզբունքին ես երբեք չեմ դավաճանել։

ԴԱՇՆԱԿՆԵՐԸ ՀՍԿԵԼՈՒ ԵՆ ԿԱՌԱՎԱՐՈՒԹՅԱՆ ԱՇԽԱՏԱՆՔԸ

«Ժողովուրդ» օրաթերթը զրուցել է ՀՅԴ ԳՄ նորընտիր ներկայացուցիչ Իշխան Սաղաթելյանի հետ։

-Պարո՛ն Սաղաթելյան, «Դաշնակցությունում» սերնդափոխության հարցը իսկապես լրջորեն ծառացե՞լ էր։
-Ծառանալու խնդիր չկա։ «Դաշնակցության» մեջ մշտապես եղել է սերնդափոխություն եւ շարունակվում է։ Սերնդափոխության հատուկ օրակարգ չի եղել, որովհետեւ դա մեզ մոտ բնական պրոցես է, ոչ թե արհեստական։ Բացի այդ, օրինակ. նախկին ներկայացուցիչը` Արսեն Համբարձումյանն էլ էր երիտասարդ։
-«Դաշնակցությունը» չանցավ խորհրդարան։ Եվ շատ է խոսվում այն մասին, որ սա էր գլխավոր շարժառիթը, որ փոխվեց կազմը։ Այդպես է՞։
-Եթե սերնդափոխության մասին է խոսքը, կարող եմ ասել, որ դա մեզ մոտ սկսել է շատ ավելի շուտ` դեռեւս 2016 թվականին, երբ մեր պաշտոնյաները նշանակվեցին մեր երիտասարդ ընկերները։ Արդեն 2 տարի է` մենք այս ընթացքի մեջ էինք, եւ քայլերով գնում ենք առաջ։
-Ի՞նչ փոփոխություններ են լինելու ձեզ մոտ, թե՞ շարունակվելու է «Դաշնակցության» նախկին գործելաոճը։
-«Դաշնակցությունը» շարունակելու է իր քաղաքականությունը։ Ընդամենը մի քանի օր առաջ Ընդհանուր ժողովի հայտարարությունը եղել է։ Մենք մեր գծի մեջ ենք լինելու, իսկ որոշ մարտավարական քայլեր նոր իրավիճակում` հիմա իբրեւ արտախորհրդարանական ընդդիմություն, բնականաբար, մեր գործողություններում նոր թարմություն եւ փոփոխություններ կլինեն, բայց գիծը մեր նույնն է։ Առաջիկայում ավելի պարզ կդառնա դա։
-Դուք` որպես արտախորհրդարանական ընդդիմություն, կարո՞ղ եք հակակշռել իշխանություններին։
-Իհարկե կարող ենք։ Մենք կառավարության ողջ գործունեությունը պահելու ենք մեր խիստ հսկողության ներքո։ Անխնա քննադատելու ենք կառավարությանը իր սխալների համար։ Այդ քննադատությունները լինելու են հիմնավորված, փաստարկված եւ նույնիսկ փաստաթղթավորված։ Այն ոլորտներում, որտեղ կանենք քննադատություններ, կներկայացնենք նաեւ այլընտրանքային առաջատարներ։ Այսինքն` ցույց կտանք, թե ինչպես ենք մենք պատկերացնում այդ խնդիրների լուծումները։ Մենք կառավարության ողջ աշխատանքը պահելու ենք մեր հսկողության տակ, հանդես ենք գալու համապատասխան քննադատություններով, ինչը պետք է անի յուրաքանչյուր նորմալ, սկզբունքային ընդդիմադիր ուժ։
-Նիկոլ Փաշինյանն ասաց, որ պատրաստ է համագործակցել ՀՅԴ-ի հետ։ Հիմա համագործակցության եզրեր տեսնո՞ւմ եք։
-Երկրի արտաքին քաղաքական հարցերում, այն տեղերում, որտեղ պահանջում է մեր երկրի, պետության շահը, մենք համագործակցության խնդիր չունենք։
-Իսկ այն, որ պետք է 5 տարի հետո տուն ուղարկել այս իշխանությանը եւ գալ իշխանության, մնո՞ւմ է հաստատուն։
-Իհարկե այդպես է։ Մենք մեր առաջ խնդիր ենք դրել հաջորդ ընտրություններին իշխանության գալու։
-Պարոն Հրանտ Մարգարյանը հիմա խառնվո՞ւմ է «Դաշնակցության» գործերին։ Ի՞նչ դեր ունի։
-Հրանտ Մարգարյանը մեծ ավանդ ունի «Դաշնակցության» մեջ։ Վերջին 20 տարվա մեջ կուսակցությունում լուրջ դերակատարություն է ունեցել, եւ իր փորձառությունն ու գիտելիքները մեզ մշտապես օգտակար են լինելու։ Ինքը իր կամքով ընդգրկված չէ որեւէ ղեկավար մարմնում, շարունակում է իր բնականոն առօրյա աշխատանքը։

Նյութերը՝ ԼՈՒՍԻՆԵ ՄԻՆԱՍՅԱՆԻ

ՊԱՇՏՈՆՅԱՅԻ ԸՆԿԵՐՈՒԹՅՈՒՆԸ՝ ՍՆԱՆԿ
«Ժողովուրդ» օրաթերթը դեռեւս 2018 թվականի մարտի 24-ին գրել էր, որ ՌԴ-ում ՀՀ ոստիկանության ներկայացուցիչ Գարրի Զախարովի ընտանիքի հետ կապվող «Իդալգո» ՍՊԸ-ն սնանկ էր ճանաչվել եւ աճուրդի հանել խանութում վաճառվող զգեստները: Ընդ որում, «Իդալգո» ՍՊԸ-ն ինքն էր դիմել դատարան իրեն սնանկ ճանաչելու համար: Պատճառը «Դալմա» առեւտրի կենտրոնի եւ ՊԵԿ-ի նկատմամբ կուտակած մոտ 20 մլն դրամի հասնող պարտքն է եղել, որ «Իդալգո» ՍՊԸ-ն չի ցանկացել վճարել` միաժամանակ հրաժարվելով առողջացման ծրագիր ներկայացնել:
Երեկ «Ժողովուրդ» օրաթերթը տեղեկացավ, որ 2019 թվականի հունվարի 8-ին «Իդալգո» ՍՊԸ-ի դիմումը` սեփական սնանկությունը ճանաչելու պահանջի մասին, բավարարվել է: Հիմա ընկերությունը նոր գործընթաց է սկսել: Մասնավորապես, պարզեցինք, որ ընկերությունը հունվարի 25-ին Երեւան քաղաքի ընդհանուր իրավասության դատարանի շենքում աճուրդի է հանել Վան Կլիֆ ապրանքանիշի իրեր` կոստյումներ, տաբատներ եւ այլն: Դրանք բրենդային հագուստներ են, որոնք բավական թանկ արժեն:

ԲՅՈՒՋԵ
Երեւանի քաղաքապետարանը ներկայացրել է Երեւան քաղաքի 2018 թվականի բյուջեով նախատեսված ծախսերի վերլուծությունը` ըստ վարչական շրջանների։ Ուսումնասիրելով տվյալները` «Ժողովուրդ» օրաթերթը հետաքրքիր պատկերի ականատես եղավ. մասնավորապես, բյուջեի նախատեսված ծախսերի իրականացման առումով առաջատարը Մալաթիա-Սեբաստիա վարչական շրջանն է, հաջորդում է Կենտրոնը, ապա Ավանը։ Այս վարչական շրջաններում կատարողականը 92 տոկոսից ավելի է։ 90 տոկոսից ավելի կատարողական են ապահովել Նորք-Մարաշ եւ Շենգավիթ վարչական շրջանները, իսկ ամենաքիչը՝ Էրեբունին։ Հատկանշական է, որ, ընդհանուր առմամբ, Երեւանի բյուջեն եկամուտների մասով թերակատարվել է զգալի չափով: Ըստ փաստաթղթի` 2018թ. բյուջեի փաստացի եկամուտները կազմել են 68,6 մլրդ դրամ ծրագրված (ճշտված) 82,1 մլրդ դրամի դիմաց: Ըստ այդմ, կատարողականը կազմել է 83.6%։ Ինչ վերաբերում է ծախսերին, ապա կատարվել է 62,8 մլրդ դրամի ծախս ծրագրված (ճշտված) 85,5 մլրդ դրամի դիմաց. սա ծրագրվածի 73.4%-ն է։ Երեւան քաղաքի 2018 թվականի բյուջեի ծախսերի ծավալներում գերակշիռ են սոցիալական բնագավառի (կրթություն, առողջապահություն, սոցիալական ապահովություն) ծախսերը, որոնց տեսակարար կշիռը ընդհանուր ծախսերի մեջ կազմում է 46.76%, տրանսպորտի բնագավառին (այդ թվում՝ ճանապարհային տրանսպորտի) վերաբերող ծախսերինը՝ 14.16%, շրջակա միջավայրի պաշտպանությանն ուղղված ծախսերինը՝ 12.47%։