ԼՈՒՐ ԿԱԴՐ

Լուսանկարն արվել է Երեւանում

Երեւանյան երթուղայիններից մեկում հետաքրքիր եւ հաճելի պահ է արձանագրվել. սեւամորթ երիտասարդը երթեւեկում է՝ առաջին դասարանի այբբենարանը ձեռքին: Ըստ երեւույթին, արտասահմանցի հյուրը որոշել է ուսումնասիրել հայերենը եւ անում է իր առաջին քայլերը:

ՀԱՐՑ. Խնդրում եմ ասել` գյուղատնտեսական ապրանքների վաճառքի դեպքում ՀԴՄ-ների կիրառությունը պարտադի՞ր է, թե՞ ոչ:

Սուսաննա Վարդանյան (53 տարեկան, գյուղատնտես)

ՊԱՏԱՍԽԱՆ. Տեղեկացնում ենք, որ «ՀԴՄ կիրառման մասին» Հայաստանի Հանրապետության օրենքի 4-րդ հոդվածի 2-րդ մասի զ ենթակետի համաձայն` կանխիկ դրամով կամ պլաստիկ քարտերի միջոցով դրամական հաշվարկներ կատարելիս կազմակերպությունների եւ անհատ ձեռնարկատերերի համար հսկիչ-դրամարկղային մեքենաների կիրառումը պարտադիր չէ առեւտրի իրականացման վայրերում (առեւտրի կենտրոններում, սպառողական ապրանքների շուկաներում, գյուղատնտեսական արտադրանքի շուկաներում, տոնավաճառներում եւ ցուցահանդես-վաճառքի անցկացման վայրերում) գտնվող բաց վաճառասեղաններից գյուղատնտեսական արտադրանքի եւ քաղաքացիներին սեփականության իրավունքով պատկանող, գործածության մեջ եղած անձնական օգտագործման իրերի վաճառքի դեպքում:

ՀՀ պետական եկամուտների կոմիտե

«ԺՈՂՈՎՈՒՐԴ». Նշենք, որ ՀՀ-ի տարածքում անհատ ձեռնարկատերերի, նոտարների, փաստաբանական գործունեություն իրականացնողների եւ կազմակերպությունների կողմից առեւտրի օբյեկտների, առեւտրի իրականացման վայրերում վաճառատեղերի միջոցով մանրածախ վաճառք իրականացնելիս կամ բնակչությանը ծառայություններ մատուցելիս կանխիկ դրամով կամ պլաստիկ քարտերի միջոցով իրականացվող դրամական հաշվարկների բոլոր դեպքերում հսկիչ-դրամարկղային մեքենաների կիրառումը պարտադիր է:

ՀԱՐՑ. Ես ուզում եմ հստակ իմանալ, թե ում է անվճար տրամադրվում լսողական սարք: Ի՞նչ է կոնկրետ անհրաժեշտ լսողական սարք անվճար ձեռք բերելու համար: Եվ խնդրում եմ ներկայացնել հաշմանդամի վերականգնողական ծրագիրը:

Սարիբեկ Հակոբյան (75 տարեկան, 3-րդ կարգի հաշմանդամ)

ՊԱՏԱՍԽԱՆ. Ս. Հակոբյանի հարցին ի պատասխան` հայտնում ենք, որ լսողական սարք անվճար տրամադրվում է.
-հաշմանդամներին` վերականգնողական անհատական ծրագրի եւ սուրդոլոգի եզրակացության հիման վրա
-տարիքային կենսաթոշակի իրավունք ունեցող անձանց` սուրդոլոգի եզրակացության հիման վրա
-մինչեւ 18 տարեկան երեխաներին` սուրդոլոգի եզրակացության հիման վրա:
Միաժամանակ հայտնում ենք, որ վերականգնողական անհատական ծրագիրը (ՎԱԾ) կազմվում է բժշկասոցիալական փորձաքննական հանձնաժողովի կողմից անձին հաշմանդամ ճանաչելու նույն օրը: Վերականգնողական անհատական ծրագրում սահմանվում են վերականգնողական միջոցառումների ծավալները, տեսակները եւ ժամկետները, սոցիալական oգնության տեսակները, աշխատանքային անհրաժեշտ պայմանները, ինչպես նաեւ գործունեության սահմանափակվածությամբ պայմանավորված հատուկ տեխնիկական միջոցների եւ ծառայությունների տեսակները:
ՎԱԾ-ն ունի երաշխավորական բնույթ: Հաշմանդամն իրավունք ունի հրաժարվելու վերականգնողական անհատական ծրագրով նախատեuված վերականգնողական միջոցառման տեuակից, ձեւից եւ ծավալից, ինչպեu նաեւ ամբողջ ծրագրի իրականացումից:

Կենսաթոշակային համակարգի իրազեկման կենտրոն

«ԺՈՂՈՎՈՒՐԴ». Նշենք, որ առաջին խմբի հաշմանդամներին եւ մինչեւ 18 տարեկան հաշմանդամ երեխաներին, վերականգնողական անհատական ծրագրին համապատասխան, տրամադրվում է սայլակ: Հաշմանդամին սայլակը տրամադրվում է 3 տարի ժամկետով: