ՄՏԱԾՈՒՄ ԵՆՔ ՔԱՂԱՔԱԿԱՆ ՀԱՄԱԿԱՐԳԻ ԱՌՈՂՋԱՑՄԱՆ ՄԱՍԻՆ

«Ժողովուրդ» օրաթերթը զրուցել է «Լուսավոր Հայաստան» խմբակցության պատգամավոր Տարոն Սիմոնյանի հետ:

-Պարո՛ն Սիմոնյան, «Լուսավոր Հայաստան» խմբակցությունը ԱԺ-ում ընդդիմություն է, խիստ քննադատության է ենթարկում իշխանություններին: Ի՞նչ եք կարծում, կկարողանա՞ք ինչ-որ ազդեցություն ունենալ:
-Նախ եւ առաջ պետք է հասկանալ, որ մենք ընդդիմություն ենք ոչ թե ընդդիմություն լինելու համար, այլ որովհետեւ կան որոշակի հարցեր, որոնց հետ կապված մենք ունենք այլ դիրքորոշումներ, եւ, հետեւաբար, մեր ձայնը պետք է բարձրաձայնենք: Որեւէ բան ինքնանպատակ չի արվում: Մենք դեմ էինք ծրագրին, որովհետեւ գտնում ենք, որ այդ ծրագիրը այն խնդիրները չի լուծում, որոնք որ այսօր մեր պետականության առջեւ դրված են: Այս բեկումնային փուլում անհրաժեշտ էր ավելի թիրախային խնդիրներ վերցնել եւ այդ թիրախային խնդիրների լուծման ճիշտ մեխանիզմներ գտնել: Ինչ վերաբերում է այն հարցին, որ քանակապես շատ են «Իմ քայլ»-ի պատգամավորները, ապա ասեմ, որ մենք հույսներս չենք կորցնում այն իմաստով, որ ոչ բոլոր նախագծերի հետ կապված պետք է 88 պատգամավորները միաձայն քվեարկեն, բոլոր հարցերում միակարծիք լինեն: Ես գիտեմ, որ այդ պատգամավորների մեջ կան շատ ինքնուրույն մարդիկ, որոնք ունեն սեփական դիրքորոշում, եւ եթե այդ դիրքորոշումը չհամընկնի քաղաքական ուժի դիրքորոշման հետ, ենթադրում եմ, որ նրանք անկախ վարքագիծ կդրսեւորեն: Պետք չէ հուսահատվել եւ մտածել, որ քանակապես քիչ ենք եւ ոչինչ չենք կարող անել:
-Այդ դեպքում ինչո՞ւ է ԼՀԿ-ն հաճախ «Իմ քայլ»-ին համեմատում ՀՀԿ-ի հետ:
-Մենք չենք ասել, որ նման են ՀՀԿ-ին, պարզապես առանձին գործողություններ կան, որոնք եթե շարունակվեն նույն ձեւով, ապա դա կնմանվի ՀՀԿ-ին: Մենք որեւէ միտում չունենք մի քաղաքական ուժին նույնացնել մեկ այլ քաղաքական ուժի հետ: Հակառակը, մենք տեսել ենք եւ շարունակում ենք տեսնել, որ քաղաքական ուժերը տարբեր են, բայց պետք է ասել, որ, օրինակ, հենց կառավարության ծրագրի հետ կապված դժվար թե այդ 88 հոգին միակարծիք լինեին, որ կառավարության ծրագիրը այդպես մաքուր է: Մենք պարզապես ուշադրությունը հրավիրում ենք այն փաստին, որ սա ճիշտ քաղաքական մշակույթի եւ ճիշտ սահմանադրական մշակույթի դրսեւորում չէ, ընդգծում ենք, որ պետք է փոխվի այս մշակույթը: Հիմա էլ լավ պահ է. պետականաշինության այս բեկումնային փուլում այդ հնարավորությունը կա: Պետք է օգտվենք այդ հնարավորությունից եւ փոխենք այն, ինչ որ կար նախկինում:
-Պարոն Գորգիսյանը իր ելույթում նշեց, որ ԼՀԿ-ն քաղաքական հալածանքների է ենթարկվում: Ի՞նչ հալածանքների մասին է խոսքը:
-Չեմ հիշում, թե ինչ կոնտեքստով է օգտագործվել այդ արտահայտությունը, բայց այն, որ «Լուսավոր Հայաստանը» մեկ-երկու քննադատական խոսք է հնչեցնում, եւ դրանից հետո սկսում են կեղծ օգտատերերի, առանձին լրատվամիջոցների կողմից հարձակումները, սա միանշանակ քննադատության է արժանի, որովհետեւ այդ կերպ մենք չեն նպաստում քաղաքական համակարգի առողջացմանը կամ քաղաքական համակարգի ընդհանրապես զարգացմանը:
-Բայց իշխող խմբակցությունը այդ մասով ի՞նչ կարող է անել:
-Կարծում եմ` եթե քաղաքական կամք լինի, որեւէ մեկը ինքնագլուխ դա չի իրականացնի: Ես չեմ տանում այն ուղղությամբ, որ ուղղորդվում է այս ամենը, չեմ էլ ուզում հավատալ, որ մարդիկ կարող են նման կեղտոտ քաղաքական մանիպուլյացիաների դիմել, բայց ես հույս ունեմ, որ մեր քաղաքական իշխանությունը իրենից կախված ամեն ինչ պետք է անի, որ այդ սխալ քաղաքական մշակույթը, այդ կեղծ օգտատերերի միջոցով կամ տեղեկատվական հարթակներում այլ անձանց միջոցով անձանց վարկաբեկելու, անունի հետ խաղալու քաղաքականությունը մերժվի եւ մեզանից դուրս գա: Մեզ դա չի սազում: Մենք պետք է հեռու մնանք այդ ցածրորակ քայլերից:
-ՀՀԿ-ի ժամանակ ի՞նչ ճնշումներ են եղել ԼՀԿ-ի վրա:
-Ես այդ ժամանակ կուսակցության անդամ չեմ եղել, հիմա էլ չեմ: Ես եղել եմ կուսակցության ակունքներում եւ բավականին աջակցություն ցուցաբերել եմ` մասնակցելով հիմնադրման աշխատանքներին, գաղափարախոսության մշակմանը եւ այլն, բայց այդպես ակտիվ քաղաքականության մեջ չեմ եղել, որ զգամ այդ ճնշումները: Այդ մասին ավելի լավ կասեն նրանք, որոնք նախկին գումարման ԱԺ-ում եղել են եւ եղել են ակտիվ քաղաքականության մեջ: Գիտեմ, որ էլի անիմաստ տեղեկատվական հարձակում էր կատարվում ԼՀԿ-ի նկատմամբ, ԼՀԿ-ն կապվում էր ինչ-որ անձերի հետ, որն էլ անընդհատ հերքվում էր, հերքվում է: Եվ, փաստորեն, նախորդ իշխանությունները այդ կերպ էին փորձում կուսակցության հեղինակության վրա ազդել, բայց փորձը ցույց տվեց, որ այդ հեղինակությունը, հակառակը, բարձրացավ` ի հեճուկս այդ նույն նախկին իշխանությունների:
-Ամեն դեպքում, կառավարության ծրագիրը ընդունվեց: ԼՀԿ-ն հիմա ի՞նչ քայլերի է դիմելու:
-Կառավարության ծրագրի համատեքստում Դուք գիտեք, որ կառավարությունը ամենամյա ռազմավարություն պետք է ներկայացնի, հետո` ամենամյա հաշվետվությունների փաթեթ: Մենք պետք է այդ փաստաթղթերը մշտադիտարկենք ողջ տարվա ընթացքում եւ համեմատենք կառավարության ծրագրի այն դրույթների հետ, որոնց հիման վրա դրանք ընդունվում են: Ինչ վերաբերում է ընդհանուր վերահսկողությանը, ապա ԱԺ պատգամավորներին եւ խմբակցությանը տրված հնարավորության եւ իրավասության շրջանակներում մեր պատգամավորները պետք է իրենց բոլոր ռեսուրսները օգտագործեն, որպեսզի պառլամենտական վերահսկողությունը բարձր մակարդակի լինի կառավարության բոլոր գործողությունների նկատմամբ` դա կլինի բյուջետային կատարողականների հետ կապված, դա կլինի ամեն նստաշրջաններում առկա հարցուպատասխանի միջոցով քաղաքականության ուղղությունները որոշակիացնելու ուղղությամբ եւ հնարավոր այլ լծակներում: Սա էլ մենք անելու ենք ոչ թե ինքնանպատակ, այլ հեռահար նպատակ ունենք, որ այդ քայլերով ընդդիմությունը փաստորեն ուղղակիորեն մտածում է քաղաքական համակարգի առողջացման մասին: Եթե չունենանք նորմալ քաղաքական համակարգ Հայաստանում, ապա ոչ մի փոփոխություն արդյունք չի տա, եւ այս հեղափոխական շարժումը, որը բավականին մեծ հույսեր արթնացրեց բոլորիս մոտ, կլինի անարդյունավետ:

Զրուցեց ԼՈՒՍԻՆԵ ՄԻՆԱՍՅԱՆԸ

ՕՐԵՆՍԴՐԱԿԱՆ ԲԱՑԻ ՀԵՏԵՎԱՆՔՆԵՐԸ

Երեկ ԱԺ տարածքային կառավարման, տեղական ինքնակառավարման, գյուղատնտեսության եւ բնապահպանության հարցերի հանձնաժողովի նիստին ներկա էր ՍԱՏՄ պետ Գեորգի Ավետիսյանը: Նիստի ժամանակ հանձնաժողովի անդամների կողմից բարձրաձայնվեցին մի շարք խնդիրներ, հնչեցին շատ հարցեր:

Նշենք, որ Գեորգի Ավետիսյանը նիստի ժամանակ մատնանշեց մի քանի խնդիրներ, որոնք բացատրում էր հիմնականում օրենսդրական բացթողումներով: Օրինակ` խնդիրներից մեկն էլ այն է, որ ՍԱՏՄ-ն իրավասություն չունի տեղում ինչ-որ խնդիր լուծել: Խնդիրը տեսնելուց հետո պետք է դիմում գրել, մի քանի օր սպասել: ՍԱՏՄ պետը դժգոհեց` ասենք, ՍԱՏՄ-ն ստուգում է կաթի մի խմբաքանակ եւ խնդիրներ է նկատում, իհարկե, հետ է կանչում այդ խմբաքանակը, բայց տվյալ խմբաքանակի արտադրման պատասխանատուն տուգանվում է ամենաշատը 300 հազար դրամով, ինչպես նշված է օրենքում: Պարոն Ավետիսյանը հիշեցրեց նաեւ մի քանի երկրների փորձը. մի շարք երկրներում նման խախտման համար դատապարտվում են 20 տարուց մինչեւ ցմահ ազատազրկման:
Նկատենք, որ օրենսդրական բացի այս խնդիրները միայն այս հիմնարկին չէ, որ հատուկ են: Նախկինում էլ պարբերաբար երբ խոսք էր գնում մենաշնորհների դեմ պայքարի մասին, եւ տնտեսական մրցակցության պաշտպանության հանձնաժողովին մեղադրում էին համարժեք քայլեր չանելու համար, գերատեսչության ղեկավար Արտակ Շաբոյանը մատնանշում էր օրենսդրական կարգավորումներն ու բացթողումները՝ պնդելով, որ իրենք չունեն այն լիազորությունները: Նման իրավիճակ է վերահսկող այլ մարմինների դեպքում եւս:
Փաստորեն, նախկին իշխանություններն օրենսդրական այնպիսի մեխանիզմներ են ստեղծել, որ բոլոր վերահսկող կառույցների գոյությունը լինի ձեւական, առանց համապատասխան լիազորությունների: Նշենք, որ ԱԺ այս հանձնաժողովի հետ հանդիպումը, ըստ էության, քայլ է օրենսդրական մակարդակում կարագավորումներ մտցնելու: Մնում է՝ դրանից հետո իսկապես «գույքագրվեն» խնդիրներն, ու խորհրդարանը ձեռնամուխ լինի համապատասխան լուծումների:

Լ. ՄԻՆԱՍՅԱՆ

ՉԱՓԸ ՉԿԱ
Ազգային ժողովի փոխնախագահներ Լենա Նազարյանի եւ Ալեն Սիմոնյանի կողմից շրջանառության մեջ է դրվել մի նախագիծ, որը վերաբերում է 2008 թվականի մարտի 1-2-ի դեպքերին: Խոսքը «2008 թվականի մարտի 1-ից 2-ը Երեւան քաղաքում տեղի ունեցած իրադարձությունների ժամանակ անձանց կյանքին կամ առողջությանը պատճառված վնասի հատուցման մասին» Հայաստանի Հանրապետության օրենքի նախագծի մասին է: Ըստ նախագծի` անձի կյանքին պատճառված վնաս է համարվում անձի մահանալը, իսկ անձի առողջությանը պատճառված վնաս է համարվում ստացված վնասվածքի կամ խեղման հետեւանքով անձի ստացած միջին, ծանր եւ առանձնապես ծանր վնասվածքը: Սակայն հետաքրքիր է, որ, նախագծի համաձայն, օրենքով նախատեսված հատուցման չափը, կարգն ու պայմանները սահմանվում են Հայաստանի Հանրապետության կառավարության որոշմամբ։ Այսինքն, ստացվում է, որ Ազգային ժողովի պատգամավորները նախագիծ են ներկայացրել` ամրագրելով հիմնական սկզբունքները, սակայն փոխհատուցման չափ, որպես այդպիսին, չեն կարողացել որոշել, ուստի այդ հարցը թողել են գործադիրի հայեցողությանը: Մինչ այդ նկատենք, որ 2008թ. սկսած` ընդդիմադիր ուժերը, մասնավորապես` Հայ ազգային կոնգրեսը, պարբերաբար պահանջել են մարտի 1-ի զոհերի հարազատներին փոխհատուցում տրամադրել, սակայն նախկին իշխանությունները մերժում էին: Ու ստացվում է՝ ՀՀ-ում մարտի 1-ի բացահայտման, նաեւ այդ իրադարձությունների հետեւանքով տուժածներին փոխհատուցում տրամադրելու համար հարկավոր էր իշխանափոխություն:

ՆԵՐԿՐԵԼՈՎ
ՀՀ գյուղատնտեսության նախարարությունը առաջիկայում մասնակի կսուբսիդավորի ներկրվող խոշոր եղջերավոր տոհմային կենդանիների գնման արժեքը: «Ժողովուրդ» օրաթերթը տեղեկացավ, որ ՀՀ կառավարությունը առաջիկայում կհաստատի ՀՀ-ում 2019-2024 թվականների տավարաբուծության զարգացման ծրագիրը. այն արդեն ներկայացվել է քննարկման: Արդյունքում ֆերմերները կկարողանան հանրապետություն ներկրել եւ ավելացնել կաթի եւ մսի արտադրության ծավալները: Մեզ հայտնի դարձավ, որ ծրագրի ընդհանուր բյուջեն 2019-2024 թվականների համար կազմում է շուրջ 1.02 մլրդ դրամ: Ըստ ծրագրի` 6 տարիների ընթացքում 30 տոկոսով կսուբսիդավորվի հանրապետություն ներկրվող առնվազն 3000 գլուխ խոշոր եղջերավոր տոհմային կենդանիների գնման արժեքը` չհաշված կենդանիների տեղափոխման եւ պահպանման ծախսերը: ՀՀ գյուղատնտեսության նախարարության՝ տոհմային կովերի կամ երինջների ներկրման դեպքում հավելյալ կարտադրվի ավելի քան 4.5 մլրդ դրամ արժողությամբ տավարի միս եւ կաթ: