ԼՈՒՐ ԿԱԴՐ

Լուսանկարն արվել է Երեւանում

Ամեն մեկը տարածքը մաքուր պահելու իր տարբերակն ունի: Այս դեպքում, ինչպես ասում են, կարեւորը ցանկությունն է:

ՀԱՐՑ. Խնդրում եմ ասել` ինչ ժամկետում կարելի է բողոքարկել ստուգման ակտը. ուզում եմ ստույգ տեղեկանալ:

Ստելլա Միրաքյան (34 տարեկան, հաշվապահ)

ՊԱՏԱՍԽԱՆ. Ս. Միրաքյանի հարցին ի պատասխան` տեղեկացնում ենք, որ «ՀՀ-ում ստուգումների կազմակերպման եւ անցկացման մասին» Հայաստանի Հանրապետության օրենքի 11-րդ հոդվածով` ստուգումն իրականացնող անձանց գործողությունները, ինչպես նաեւ ստուգման արդյունքում կազմված ակտը երկու ամսվա ընթացքում, եթե օրենքով այլ բան չի նախատեսվում, կարող են բողոքարկվել այն պետական մարմին, որին անմիջականորեն ենթարկվում է (են) ստուգող անձը (անձինք), կամ դատարան:

Հայաստանի Հանրապետության պետական եկամուտների կոմիտե

«ԺՈՂՈՎՈՒՐԴ». Նշենք, որ «ՀՀ-ում ստուգումների կազմակերպման եւ անցկացման մասին» ՀՀ օրենքի համաձայն` համապատասխան տնտեսվարող սուբյեկտի ռիսկայնությունը հրապարակման ենթակա չէ:

ՀԱՐՑ. Ես 3-րդ կարգի հաշմանդամ եմ. ուզում եմ տեղեկանալ, թե երբ կարող եմ անժամկետ հաշմանդամության կարգ ստանալ:

Սամվել Այվազյան (ք. Երեւան, Կոնդ)

ՊԱՏԱՍԽԱՆ. Համաձայն Կառավարության 13.06.2003 թվականի «Բժշկասոցիալական փորձաքննության չափորոշիչները հաստատելու մասին» N780-Ն որոշման 31-րդ կետի` հաշմանդամության խումբը սահմանվում է անժամկետ.
1. օրենքով տարիքային կենսաթոշակի իրավունք տվող տարիքը լրացած անձանց,
2. վերականգնողական միջոցառումների հեռանկարի բացակայության, հաշմանդամի սոցիալական անբավարարության վերացման կամ նվազեցման անհնարինության դեպքերում, որոնք հետեւանք են անատոմիական արատով, անդառնալի կառուցվածքային փոփոխություններով, օրգանիզմի օրգանների կամ օրգան-համակարգերի ֆունկցիաների խանգարումով առողջության խաթարմամբ պայմանավորված կենսագործունեության կայուն սահմանափակման,
3. իրականացված վերականգնողական միջոցառումների անարդյունավետության դեպքում, որը բերում է հաշմանդամի մշտական սոցիալական պաշտպանության անհրաժեշտության (առնվազն 7 տարվա ընթացքում բժշկասոցիալական փորձաքննության ոլորտում իրավասու պետական մարմինների դիտման պայմաններում, իսկ 2 եւ 4 տարի դիտման պայմաններում` համաձայն Հայաստանի Հանրապետության կառավարության 2003 թվականի հունիսի 13-ի N 780-Ն որոշման NN 2 եւ 3 հավելվածների,
4. մեկ ակնագնդի կամ մեկ աչքի տեսողության անվերադարձ բացակայության դեպքում:

ՀՀ աշխատանքի եւ սոցիալական հարցերի նախարարության սոցիալական աջակցության վարչության պետ Ա. Մինասյան

«ԺՈՂՈՎՈՒՐԴ». Ինչպես բոլոր դեպքերում, այս դեպքում եւս օրենքի այնպիսի սահմանափակումներ են սահմանված, որ շատ քչերին է «հաջողվում» ձեռք բերել անժամկետ հաշմանդամության կարգ: Իհարկե, ցավալի է, որ մարդիկ ապրում են այնպիսի պայմաններում, որ ստիպված են լինում կառչել հաշմանդամության համար տրամադրվող թոշակի չնչին գումարից: