Ազգային ժողովում քննարկվեց «2008 թվականի մարտի 1-ից 2-ը Երևան քաղաքում տեղի ունեցած իրադարձությունների ժամանակ տուժած անձանց աջակցության մասին» օրենքի նախագիծը: «Ժողովուրդ»-ը զրուցել է ԱԺ «Իմ քայլը» խմբակցության պատգամավոր, ԱԺ պետական-իրավական հարցերի մշտական հանձնաժողովի անդամ Նազելի Բաղդասարյանի հետ օրենքի նախագծի հետ կապված:
-Տիկին Բաղդասարյան, «2008 թվականի մարտի 1-ից 2-ը Երևան քաղաքում տեղի ունեցած իրադարձությունների ժամանակ տուժած անձանց աջակցության մասին» օրենքի նախագիծը շատերի համար անհասկանալի է մնում, քանի որ տարակուսելի է, թե ի՞նչ է այն տալու մարտի 1-ի ժամանակ տուժած անձանց հարազատներին:
-Կարեւոր է այստեղ մեկ հստակեցում` այս օրինագծով փորձ չի արվում փոխհատուցել մարտի 1-ի զոհերին, որովհետեւ օրենքը հստակ սահմանում է, որ փոխհատուցում կարելի էր տալ միայն այն դեպքում, եթե դատական կարգով արդեն հստակեցված է` ովքեր են տուժողները, ովքեր են մեղավորները, ու մեղավորների գործողությունների արդյունքում տուժողներն ինչպես են տուժել, այսինքն` այդ փաստացիորեն կապը:
Եւ քանի որ օրենքի տեսանկյուից փոխհատուցում չենք կարող տալ, այս կերպ մարտի 1-ի օրենքի նախագծում սահմանում ենք աջակցման եղանակ, այսինքն` այս փուլում մենք աջակցություն ենք տալիս այն մարդկանց, ովքեր տուժել են մարտի մեկի գործողություններից, սակայն սա ոչ մի կերպ չի սահմանափակում, եւ հետագայում դատական պրոցեսների արդյունքում, երբ հստակ տուժողների, մեղավորների շրջանակը հստակեցվի, մարդիկ կարող են փոխհատուցում ստանալ:
Ես ուզում եմ սա հստակեցնել, որ աջակցությունը եւ փոխհատուցումը չեն նույնականացվում եւ մեկը մյուսին չի բացառում: Սա ընդամենը աջակցություն է, սա ընդամենը փորձ է տասը տարի հետո որոշակի լուծում առաջարկել այս փուլում: Եւ կարելի է ասել, որ սա հենց անցումային արդարադատության այն մեխանիզմներից է, որը խորհրդարանը բանեցնում է, եւ ես լիահույս եմ, որ խորհրդարանը միաձայն կընդունի այս նախագիծը` հնարավորություն տալով այդ աջակցության շրջանակներում որոշակի, մասնակի լուծում տալ, մինչեւ արդեն վերջնական դատական կարգով կառավարությունը համապատասխան որոշում կընդունի երեքամսյա ժամկետում, որտեղ կարծում եմ` արդեն հստակեցված կլինեն նաեւ ժամկետները, թե այդ աջակցությունը ինչ եղանակով, որքան ժամանակով, ինչ ժամկետում է տրամադրվելու, արդյոք դա լինելու է միանվագ, թե որոշակի, մասնակի մի քանի փուլով է տրվելու: Կարծում եմ` այդ ամենը հստակեցված կլինի կամ կառավարության որոշման մեջ, կամ առաջինից երկրորդ ընթերցմամբ:
-Բայց ընդդիմադիրները համարում են, որ այս աջակցությամբ չեն լուծվելու մարտի մեկից տուժածների հարցերը, քանի որ այդ օրերին տուժածները շատ են եղել, որոնց մասին տեղեկատվությունը շատ քիչ է կամ ոչ լիարժեք. ինչպե՞ս եք պատկերացնում այդ հարցի լուծումը:
-Հիմա մարտի մեկի գործի հետ կապված նախաքննական փուլն է: Գիտեք բավականին աղմկահարույց դեպքեր են քննվում, նաեւ գործը քննվում է Եվրոպական դատարանում, խորհրդարանի որեւէ այլ քաղաքական գնահատականը կարող էր դիտարկվել որպես ճնշում գործընթացի վրա՝ օրենսդիր մարմնի կողմից: Ու սա էր պատճառը, որ անցումային արդարադատության մեխանիզմով մենք այս փուլում այս լուծումն ենք գտնում:
ՍՈՆԱ ԳՐԻԳՈՐՅԱՆ
.gif)
