ԳՈՐԾԱԴԻՐ ԻՇԽԱՆՈՒԹՅԱՆ ԱՐԱԳՈՒԹՅՈՒՆԸ ԹՈՒՅԼ Է

«Ժողովուրդ» օրաթերթը զրուցել է ՀՀ տնտեսական զարգացման ու ներդրումների նախկին նախարար դաշնակցական Արծվիկ Մինասյանի հետ:

-Պարո՛ն Մինասյան, օրեր առաջ Ազատության հրապարկում իրականացվեց «Ոչ մի թիզ հող» ակցիան: Ինքներդ ինչպե՞ս եք վերաբերվում այդ ակցիային, եթե իշխանությունից որեւէ մեկը չէր հայտարարել հող տալու մասին:
-Որպես ոչ թե կուսակցության պաշտոնական ներկայացուցիչ, որովհետեւ ես կուսակցությունը չեմ ներկայացնում, ես համոզված եմ, որ յուրաքանչյուր դաշնակցական ոչ միայն կողմ է այդ ակցիային, այլ նաեւ հիմնական նպատակն ու թիրախը ժողովրդի դիմադրողականության բարձրացումն է, իշխանություններին հնարավորություն տալ, որ մեզ մոտ չկա պարտվողական տեսակետ, զիջման տեսակետ, եւ որ Արցախի Հանրապետությունը հստակ ամրագրել է այն իրավական հիմքը, որով Արցախի Հանրապետությունը անկախ պետություն է, եւ որտեղ չկա որեւէ զիջման հնարավորություն առնվազն այնքան ժամանակ, քանի դեռ չի վերականգնվել իր տարածքային ամբողջականությունը: Սա շատ հստակ ուղերձ է: Լավ կլինի, որ թե՛ իշխանությունները, թե՛ քաղաքական դաշտի այլ խաղացողներ հստակ այս ուղեգիծը պաշտպանեն:
-Մեզ հետ մասնավոր զրույցների ժամանակ մի շարք քաղաքացիներ ասացին, որ ՀՅԴ հորդորով են մասնակցում «Ոչ մի թիզ հող» ակցիային: Դուք հիմա իսկապես տեսնո՞ւմ եք նման վտանգ, որ մասնակցում եք նման ակցիաների:
-Վտանգ միշտ կա, որովհետեւ վտանգ եւ սպառնալիքը կախված չէ միայն երկրի ներսում եղած իրավիճակից: Վտանգը կախված է նաեւ արտաքին ուժերի ազդեցությունից, հետեւաբար այնպիսի ժամանակ չկա, որ մտածենք` շատ լավ է, ոչ մի բանի մասին պետք չէ մտածել: Մենք դրական ենք գնահատում եւ չափազանց կարեւորել ենք վարչապետի խոսքը, որ չկա օրակարգում նման հարց` կարգավիճակի կամ տարածքների դիմաց որեւէ զիջման բանաձեւ, եւ սա գնահատելի է: Սակայն չպետք է մոռանանք, որ իրավիճակը այնքան փոփոխական է, որ ցանկացած պահի կարող են առաջանալ որոշակի սպառնալիքներ, այդ թվում նաեւ ապրիլյան պատերազմից հետո այն պայմանավորվածությունների, ըստ էության, չեղարկումը, որը ձեռք էր բերվել Վիեննայում եւ Սանկտ-Պետերբուրգում, որի շրջանակում Ադրբեջանը իսկապես շատ լուրջ պարտավորությունների տակ էր: Չափազանց կարեւոր է, որ մենք` իբրեւ պետություն, իբրեւ ժողովուրդ, կարողանանք բոլոր այն դրական ձեռքբերումները, որ ժամանակի ընթացքում ունեցել ենք, սրանք ոչ միայն պաշտպանենք, այլ անկախ իշխանափոխությունից, անկախ անձից, թե ով է իշխանության եկել` որպես պետականություն կարողանանք այդ դրականը զարգացնենք, է՛լ ավելի ուժեղացնենք: Սա որեւէ ձեւով չի նշականում, որ մենք ինչ-որ հստակ ինֆորմացիա ունենք, որ այդպիսի իրավիճակ կարող է առաջանալ, բայց նաեւ հասարակության մեջ մենք հաճախ տեսնում ենք զիջողական տրամաբանությունը, որ տարբեր անձանց, այդ թվում նաեւ նախկինում մերժված անձանց կողմից փորձ է արվում ներկայացնել, հրապարակ բերել:
-Իսկ ինչո՞ւ նման ակցիաներ նախկինում չէին անցկացվում` հաշվի առնելով, օրինակ, այն, որ երրորդ նախագահ Սերժ Սարգսյանը խոսում էր ցավոտ լուծումների մասին, յոթ տարածք հանձնելու պատրաստակամության մասին:
-Մենք մասնակցել ենք մեր անդամների աստիճանով, այո, նաեւ մեր շատ ընկերներ քարոզել են, որ մասնակցությունը կարեւոր է, որովհետեւ մեր նպատակը ուժեղ ժողովուրդ եւ դիմադրողականություն ունենալն է: Միշտ եղել են նման ակցիաներ: Ովքեր ասում են` չեն եղել, պարզապես լավ չեն հիշում կամ պարզապես իրավիճակից ելնելով են փորձում էդպիսի բան ասել: Միշտ է եղել: Ավելին ասեմ. երբ մենք կոալիցիոն հարաբերության մեջ էինք, ընդ որում` 2016 թվականից, երբ սահմանադրական փոփոխությունները տեղի ունեցան, միշտ եղել են նաեւ այս քննարկումները իշխանության ներսում, որ մենք իրավունք չունենք որեւէ ձեւով որեւէ անգամ հասարակությանը պատրաստել այդպիսի իրավիճակի: Դիվանագիտական հնարքները երբեք չեն խանգարել մեզ, որ մեր կոշտ դիրքորոշումը ներկայացվի: Ուզում եմ հիշեցնել Սերժ Սարգսյանի հայտնի ելույթը, որ մենք առաջիկա տարիների համար պետք է իմանանք, որ ունենք Ադրբեջան` թշնամի պետություն, ունենք Թուրքիա` փակ սահմաններով, եւ այս սահամանափակումների պայմաններում մենք պետք է զարգացման հայեցակարգ ունենանք: Բոլորի համար պարզ է, որ Ադրբերջանը բացի տարածքները նվաճելու ձգտումից, ընդ որում` «առանց հայի» բանաձեւով, ուրիշ նպատակ չունի: Եւ ինքը անընդհատ սերմանել է իր սերունդների մեջ այս քարոզչությունն ու քաղաքականությունը: Այսքանից հետո ո՞նց կարելի է մտածել, որ մենք ինչ-որ ձեւով պետք է քարոզենք զիջման քաղաքականություն:
-Հաշվի առնելով այն, որ նախկինում կուալիցիա եք կազմել ՀՀԿ-ի հետ, հիմա տեսնո՞ւմ եք համագործակցություն այդ կուսակցության հետ:
-Անընդհատ շահարկվում է այդ փաստը: 2008-ից մինչեւ 2018 թվականը մենք եղել ենք ընդամենը 2 տարի, եւ այդ երկու տարվա ընթացքում փորձել ենք առավելագույնս անել, որպեսզի մեր պատկերացումները տեղ գտնեն իշխող ուժի մոտեցումներում, եւ, ինչպես նշեցի, մի քանի ուղղություններով մեզ հաջողվել է դա: Մենք ցանկացած ուժի հետ պատրաստ ենք համագործակցության: Մենք բազմիցս ենք նշել, որ չկա վերադարձ անցյալին, բայց մենք ունենք մարտահրավերներ մեր երկրի առջեւ ծառացած:
-Խոսվում է այն մասին, որ տնտեսություն եւ հեղափոխություն բառերը իրար կողքի չպետք է դնել: Ի՞նչ կասեք այս մասին: Հիմա հետեւո՞ւմ եք տնտեսական զարգացման եւ ներդրումների նախարարության գործունեությանը, տնտեսական կյանքին:
-Իհարկե հետեւում ենք: Հեղափոխություն ասված արտահայտությունը ոչ միայն այս դեպքում հարիր չէ, այլ նաեւ բացատրված էլ չէ, թե դա իրենից ինչ է ներկայացնում: Առավել եւս 5 տոկոս տնտեսական աճի դեպքում, առավել եւս երբ մենք խոսում ենք նպատակադրումների մասին, բայց այդ նպատակադրումների մեխանիզմները չենք ասում: Դա վստահաբար միայն մարդկային ուղեղներում փոփոխելու կոչերը չեն: Նախեւառաջ համապատասխան համակարգերի եւ ենթահամակարգերի ստեղծումն է, երբ գյուղացին դուրս է գալիս իր հողը մշակելու, նրան չես կարող ասել` դու մտածի՛ր, ուղեղումդ փոփոխություն արա՛, միանգամից հարստացի՛ր. չի կարող այդ մարդը, որովհետեւ այնքան բեռի տակ է` սկսած վարկային բեռից, ավարտած բնակլիմայական պայմաններով պայմանավորված հնարավոր կորուստների սպառնալիքի ազդեցությունը, որ էդ մարդը չի կարող այդպիսի բան մտածել: Այսօր բեռի տակ ճկռած է մեր գյուղացին, ուստի անհրաժեշտ է, որ այս համակարգերը հիմնարար վերանայվեն: Նույնը վերաբերում է ներդրումային քաղաքականությանը: Եթե մենք խոսում ենք ներդրումների մասին, ո՞նց կարելի է անընդհատ հայտարարել, թե մենք լավ երկիր ենք, եկե՛ք, ներդրում արե՛ք: Ես շատ վատ եւ թույլ եմ գնահատում այսօրվա գործադիր իշխանության արագությունը, չափազանց դանդաղ է, չափազանց սպասողական:
Հարցազրույցն ամբողջությամբ`
Armlur.am կայքում

Զրուցեց ԼՈՒՍԻՆԵ ՄԻՆԱՍՅԱՆԸ

ԱՆԼՈՒԾԵԼԻ ՀԱՆԵԼՈՒԿ
Երեկ «Իմ քայլը» խմբակցության պատգամավոր Թագուհի Թովմասյանը կառավարությանը առաջարկեց լուծել մի հանելուկ. ինչպե՞ս է ստացվում, որ խոշոր գործարարները զբաղվում են գյուղատնտեսությամբ, հարստանում են, իսկ գյուղացիները աղքատանում են եւ վարկերի տակ կքում: Հանելուկը փորձեց լուծել գյուղատնտեսության նախարարի առաջին տեղակալ Գեղամ Գեւորգյանը, բայց այդպես էլ իրականում հարցին կոնկրետ պատասխան չտվեց: «Եթե հողերի կտրտվածության պարագայում գյուղացիական տնտեսությունը փոքր հողակտորի վրա իրականացնում է մշակում, ե՛ւ ագրոտեխնիկական միջոցառումներն են բավականին թանկ լինում, ե՛ւ արդյունավետ չի լինում, այս դեպքում ստացվում է` մարդը ամբողջ տարի տանջվում է եւ ստանում է քիչ շահույթ: Իսկ մենք ասում ենք` կոպերացվե՛ք, կոնսոլիդացվե՛ք եւ համատեղ աշխատանք վարե՛ք»,- ասաց նա: Թագուհի Թովմասյանը նաեւ հարցրեց, թե ինչ է ձեռնարկում նախարարությունը ցանքատարածությունների տարեցտարի նվազման դինամիկան կանգնեցնելու համար, որքան ցանքատարածություն են այս տարի պլանավորել մշակել, որպեսզի փոխվի ցանքատարածությունների կրճատման բացասական ցուցանիշը: Բայց այս հարցին եւս կոնկրետ պատասխան չհնչեց: Գեղամ Գեւորգյանն էլ հայտարարեց, որ բազմաթիվ անգամ խոսվել է ռեգիստրի համակարգի ներդրման անհրաժեշտության մասին, որպեսզի թվերը նաեւ օբյեկտիվ եւ պարզ լինեն բոլորիս համար: Այսինքն՝ փոխնախարարն այդպես էլ հստակ չմատնանշեց, թե այս տարի ինչքան ցանքատարածություն են պլանավորել մշակել:
ԱԺ նիստի ավարտից հետո «Ժողովուրդ» օրաթերթը պատգամավորին հարցրեց՝ իսկ ինքը գիտեր արդյոք իր հանելուկի պատասխանը: «Ես իմ ընտրողներին խոստացել եմ, որ պետք է հարցը բարձրացնելով` ստանալ այդ հանելուկի պատասխանը: Հանելուկ, որի պատասխանն այդպես էլ որեւէ մեկը չգիտի»,- ասաց նա:

ԻՆՔՆԱԲԵՐԱԲԱՐ ԳՐԱՆՑՎԵԼ ԵՆ
Երեկ ԱԺ-կառավարություն հարցուպատասխանի ժամանակ հետաքրքիր պատկեր գրանցվեց: Միանգամից 56 պատգամավոր գրանցվեց կառավարությանը հարց տալու համար։ Խորհրդարանի պատմության մեջ թերեւս նման դեպք չէր գրանցվել։ Սակայն «Ժողովուրդ» օրաթերթի տեղեկություններով` պատճառն այն չի եղել, որ գրացված բոլոր պատգամավորներն էլ ուզել են հարց տալ: Պատգամավորներից շատերը, քանի որ դեռ անփորձ են, կարծել են՝ սա հերթական գրանցումն է իրենց ներկայությունը հաստատելու համար։ Հենց դա էր պատճառը, որ շատերը ընթացքում հանում էին իրենց հարցը: Պարզվում է, մյուսն էլ եղել է տեխնիկական։ Օրինակ` հարց տալու իրավունքն առաջինը «Լուսավոր Հայաստան» խմբակցության պատգամավոր Գեւորգ Գորգիսյանինն էր, այնինչ նա այդ պահին դահլիճում չէր եւ հետեւաբար դահլիճում չի եղել նաեւ գրանցվելիս։ ԱԺ նախագահ Արարատ Միրզոյանն էլ կատակեց, թե նոր խորհրդարանում չեն ձերբազատվել նախորդի վատ սովորույթներից՝ բացակա գործընկերների փոխարեն էին քվեարկում: Գորգիսյանը ԱԺ դահլիճ մտավ միայն նիստը սկսվելուց տասը րոպե անց եւ արդեն զրկվեց հարց տալու իրավունքից։ «Ժողովուրդ» օրաթերթի աղբյուրները պնդում են` խնդիրը տեխնիկական է եղել, նրա փոխարեն ինքնաբերաբար է գրանցում եղել, եւ շատ պատգամավորներ չեն էլ գրանցվել, սակայն նրանց էլ ցույց է տվել գրանցված։

ՀԵՐԹԱԿԱՆԸ` ՍԵՎ ՑՈՒՑԱԿՈՒՄ
ՀՀ մշակույթի նախարարությունը միակողմանի խզել է անցած տարի մայիսի 31-ին «ԴանՄԵրի» ընկերության հետ կնքած պայմանագիրը: «Ժողովուրդ» օրաթերթը տեղեկացավ, որ ընկերությունը պայմանագրով սահմանված աշխատանքները չի իրականացրել: Բանն այն է` «ԴանՄերի»-ն պետք է Կոտայքի մարզի Նուռնուս գյուղի 13-րդ դարի եկեղեցու ամրակայման, վերականգման եւ տարածքի մասնակի բարեկարգման գիտանախագծային ու նախահաշիվային փաստաթղթերի մշակման աշխատանքները իրականացներ: Ավելին` դրանք պետք է ավարտվեր նախորդ տարվա նոյեմբերի 19-ին, սակայն պարզվում է` ընկերությունն իր աշխատանքը թերի է կատարել, եւ դրանց մի մասի կատարման հանձնման-ընդունման արձանագրությունները չեն ընդունվել եւ մերժվել են նախարարության կողմից: Արդյունքում «ԴանՄերի» ընկերությունը պետք է պետական բյուջե վճարի 11 հազար 500 դրամի տուգանք եւ 34 հազար 500 դրամի տույժ: Ավելին, չի բացառվում, որ Մշակույթի նախարարությունը դիմի գնումների բողոքարկման խորհուրդ` ընկերությանը սեւ ցուցակ ներառելու պահանջով: «Ժողովուրդ» օրաթերթը պարզեց, որ «ԴանՄերի» ընկերության հիմնադիրը ճարտարապետ Մերի Դանիելյանն է: