Երեկ Ազգային Ժողովի նիստը շատ թեժ մեկնարկեց, քանի որ ԱԺ ԲՀԿ խմբակցությունը ցանկանում էր օրակարգում ներառել «Զինվորական ծառայության եւ զինծառայողի կարգավիճակի մասին» օրենքում լրացումներ կատարելու մասին օրինագիծը: ԱԺ փոխխոսնակ Վահե Էնֆիաջյանը հայտարարեց, որ տվյալ փոփոխությունները թույլ կտան բազմաթիվ մարդկային կյանքեր պահպանել: Ինչպես նշեց Էնֆիաջյանը, իրենք առաջարկում են, որ երիտասարդները մարտական հերթապահության անցնեն համապատասխան բազմակողմանի մարտական նախապատրաստվածությունն անցնելուց առնվազն մեկ տարի անց:
Սակայն առաջարկությունը բուռն քննադատության արժանացավ «Իմ քայլը» խմբակցության պատգամավորների կողմից, որից հետո պատգամավորները դեմ քվեարկեցին օրինագիծը ԱԺ օրակարգում ներառելու հարցին:
Երեկ «Ժողովուրդ» օրաթերթը այս առիթով զրուցել է ԱԺ պաշտպանության եւ անվտանգության հարցերի մշտական հանձնաժողովի անդամ Սիփան Փաշինյանի հետ` պարզելու համար, թե ինչու նման կերպ արձագանքեցին նշված օրինագծին:
-Պարո՛ն Փաշինյան, Աժ ԲՀԿ խմբակցությունը ներկայացրել էր մի օրինագծի փոփոխություն, որով առաջարկվում էր զինվորներին բանակ զորակոչելուց մեկ տարի հետո նոր տանել առաջնագիծ: Ինչո՞ւ Ձեր խմբակցությունն այդքան կտրուկ արտահայտվեց, ավելին` դեմ քվեարկեց այն օրակարգում ներառելու համար:
-Պարոն Էնֆիաջյանի բերած հիմնավորումը զոհերի հետ որեւէ կապ չունի, քանի որ, օրինակ, պարզ տրամաբանական հարց է ծագում. մենք ստանում ենք բանակից ցավալի լուրեր, օրինակ` երբ ՊՆ ավտոմեքենան կողաշրջվում է կամ վթարի է ենթարկվում, այդտեղ լինում են զոհեր, իսկ կա՞ մարդ, որ կարող է բացատրել ուսուցման ժամկետի եւ այդ ավտովթարի հետեւանքով զոհված մեր զինվորների կորուստը: Այսինքն` եթե, օրինակ, ավտոմեքենան կողաշրջվում է, տվյալ դժբախտ պատահարի հետեւանքով զինվոր է մահանում, ու այդ զինվորը 5 ամիս է ուսուցման ժամկետը անցած լինում, որը հիմա նախատեսված է օրենքով, ի՞նչ կապ ունի, թե մեկ տարի էր անցել, դա ի՞նչ էական է: Հիմա դա իրենք բերում են` որպես հիմնավորում, դա կետերից մեկն է: Կամ, օրինակ, հրադադարի խախտման դեպքում զոհված զինվորների մասին են խոսում ու տարբեր օրինակներով փորձում է զոհերի թիվը ներկայացնել, որը, ըստ տրամաբանության, որեւէ կապ չունեն ուսուցման ժամկետի հետ: Ու քանի որ սա պաշտպանությանն ու անվտանգությանն է վերաբերում, այս հարցին բազմաթիվ հակափաստարկներ կան, որոնք, բնականաբար, մենք հանրային ամբիոններից չենք կարող հնչեցնել, որովհետեւ այս ելույթները նայում են ոչ միայն ՀՀ-ի սահմաններում, այլ նաեւ սահմաններից դուրս:
-Ընդդիմադիր ԲՀԿ խմբակցության պատգամավորները մեզ հետ զրույցում նշում էին, որ Ձեր խմբակցությունը որեւէ հակափաստարկ չի կարող բերել, թե ինչու է դեմ օրինագծի փոփոխությանը: Նշեցին նաեւ, որ հրավիրել են բանավեճերի, քննարկումների, սակայն իշխանության ներկայացուցիչները մերժել են: Ինչո՞ւ:
-Ես օրինակ բերեցի. մեզ նայում են մեր հայրենակիցները, մեզ նայում են ամբողջ աշխարհում, ու հիմա, երբ ասում են` մենք ունենք 18 տարեկան ոչ պատրաստված զինվորներ առաջնագիծ գնալու համար, ու տեսեք, թե ինչ զոհեր են լինելու, որտեղ նշվում է դժբախտ պատահարներ, ավտովթարներ, ինքնասպանություններ, որոնք ուսուցման հետ կապ չունի: Չեմ ուզում մանիպուլյացիա ասել, բայց մանիպուլյատիվ հայտարարություններ են անում: Մենք տարբեր նախագծեր, որոնք բերել է ընդդիմությունը, եւ քննարկել ենք, եւ դրանց կողմ ենք քվեարկել, այսինքն` այստեղ ոչ թե ընդդիմություն, իշխանություն հարաբերություններն են, թե որ իրենք են բերել, մենք պետք է չքննարկենք կամ դեմ լինենք, այլ դա ըստ հարցի հայեցողությանն է վերաբերում: Իսկ ես, իմ խղճի ու համոզմունքներից ելնելով, քվեարկել եմ դեմ, դա քննարկվել է նաեւ հանձնաժողովի նիստում, բերվել են տարբեր հիմնավորումներ, թե ինչու է տրվում բացասական եզրակացություն:
-Բայց ընդդիմությունը Ձեզ մեղադրում է անփորձության համար` նշելով, որ Ձեր խմբակցությունը չի կարողանում ընկալել հարցի կարեւորությունը, այլ իներցիայով քվեարկում են: Կա՞ իրականում նման բան:
-Ուղղակի չեմ ուզում կրակի վրա յուղ լցնել, բայց եկեք քննարկենք, թե այդ անփորձություն ասվածը ինչի մասին է խոսքը: Կան երեւույթներ, վատ, շատ վատ երեւույթներ, օրինակ` սենյակից սենյակ վազելով, կուլիսներում մեկի հետ պայմանավորվելով, մեկի բիզնես շահերը ապահովելով, որի փորձը մենք չունենք ու, փառք Աստծո, չենք էլ ունենալու, որովհետեւ մեր արժեհամակարգը նման երեւույթների հետ որեւէ առնչություն չունի: Ես ասում եմ, որ շատ ուրախ եմ` սրա կաբինետ, նրա կաբինետ վազելու, կուլիսներում քննարկելու, բիզնես շահեր պաշտպանելու փորձ չունենք, այլ մենք փորձ ունենք արատավոր երեւույթների դեմ պայքարելու գործում: Ու ի պատիվ մեր ժողովրդի` մենք այսօր այստեղ ենք ու համապատասխան օրենքներով ենք հանդես գալիս:
-Ըստ ընդդիմադիրների` նախկին իշխանությունների հետ լեզու գտնել լինում էր, սակայն Ձեր խմբակցությունը միայն համառություն է անում. ինչո՞ւ եք նման վարքագիծ դրսեւորում:
-Մենք լսում ենք, խոսում ենք, ընդառաջում ենք, եւ երբ որ ինչ-որ մեկը փորձում է մեզ նմանեցնել ՀՀԿ-ի հետ, ես կարող եմ վստահ ասել, որ իրենք երեւի չեն համակերպվում այն մտքի հետո, որ այլեւս այդ արժեհամակարգը չկա:
ՊԱՅՔԱՐՆ ՈՒՆԵՑԱՎ ԱՐԴՅՈՒՆՔ. ԹԵԿՆԱԾՈՒՆԵՐԸ «ԿԸՆՏՐՎԵՆ»
Երեկ Ազգային Ժողովի խորհուրդը` ՀՀ ԱԺ նախագահ Արարատ Միրզոյանի նախագահությամբ, արտահերթ նիստ է գումարել: Անակնկալ որոշում է կայացվել օրակարգի նախագծերում ընդգրկել Տնտեսական մրցակցության պաշտպանության պետական հանձնաժողովի նախագահի նշանակման հարցը:
Արդեն պարզ է, որ ՏՄՊՊՀ նախագահ Արտակ Շաբոյանն արդեն անցյալում է, ու նոր իշխանությունները որոշել են այդ պաշտոնում «ընտրել» գյուղատնտեսության նախարարի պաշտոնը կատարող Գեղամ Գեւորգյանին:
Հիշեցնենք, որ փոխվարչապետ Տիգրան Ավինյանը մեծ ցանկություն ուներ Գեղամ Գեւորգյանին նշանակելու ՀԾԿՀ նախագահի պաշտոնում եւ նա ամեն բան անում էր դրա համար: Բայց ՀԾԿՀ նախագահի պաշտոնի համար միաժամանակ պայքարում էր նաեւ Գարեգին Բաղրամյանը: Վերջինիս այդ հարցում օգնում էր ԱԱԾ տնօրեն Արթուր Վանեցյանը: Այս պայքարում հաղթեց Արթուր Վանեցյանը. ՀՀ վարչապետ Նիկոլ Փաշինյանը ՀԾԿՀ նախագահի պաշտոնում առաջադրեց Գարեգին Բաղրամյանի թեկնածությունը:
Բայց, կարծես թե, Տիգրան Ավինյանին որեւէ բան չի կանգնեցրել, եւ նա ամեն գնով իր համար ցանկալի թեկնածու Գեղամ Գեւորգյանին տեղավորել է այլ` ավելի «յուղոտ» պաշտոնի: Արդեն խորհրդարանում տեղի են ունենալու այդ երկու պաշտոնների ընտրությունները, ու դրանց ճակատագիրն արդեն պարզ է, քանի որ իշխանություններն ունեն իրենց համար ցանկալի թեկնածուներ:
Նյութերը՝ ՍՈՆԱ ԳՐԻԳՈՐՅԱՆԻ
ԼՍՈՒՄՆԵՐ
ՀՀ տարածքային կառավարման եւ զարգացման նախարարությունը որոշել է «Տեղական ինքնակառավարման մասին» օրենքում փոփոխություններ կատարելու նախագիծը մշակել լայն օրակարգով քննարկումներից հետո։ Մասնավորապես, «Ժողովուրդ» օրաթերթը տեղեկացավ, որ այդ նպատակով նախարարությունը դիմել է Ազգային ժողովի տեղական ինքնակառավարման, տարածքային կառավարման, գյուղատնտեսության եւ բնապահպանության մշտական հանձնաժողովին, որպեսզի նրանց օգնությամբ քննարկումներ կազմակերպի շահագրգիռ կազմակերպությունների, փորձագետների եւ ՏԻՄ-երի ներկայացուցիչների հետ։ «Ժողովուրդ» օրաթերթը տեղեկացավ, որ այդ ամենի համար երկշաբաթյա ժամկետ է սահմանված, որից հետո նախարարությունն ու հանձնաժողովը կկազմակերպեն համատեղ լսումներ ու քննարկումներ, եւ միայն այսքանից հետո կկազմվի օրենքը։ Ինչպես հայտնի է, նոր իշխանությունները նպատակ ունեն հիմնովին փոփոխել օրենքը, ՏԻՄ-երի տրամաբանությունը։
Ի ՎԻՃԱԿԻ ՉԵՆ
Լեփսիուսի փողոցում նախօրեին հնչած կրակոցների հետեւանքով մահացել էր 23-ամյա Մուշեղ Ղեւոնդյանը, որը «Արարատ 2» ֆուտբոլային ակումբի դարպասապահն էր: Իսկ երկու այլ երիտասարդներ, որոնք եւս վնասվածքներ էին ստացել, տեղափոխվել էին «Միքայելյան վիրաբուժության ինստիտուտ»: «Ժողովուրդ» օրաթերթին երեկ տեղեկություններ հասան, որ մարմնական վնասվածք ստացած անձինք ի վիճակի չեն եղել ցուցմունք տալու, չեն պատմել դեպքի մանրամասները: Սակայն մինչ այդ իրավապահները քննությամբ պարզել են դարպասապահի եւ եւս երկու անձի վրա կրակողի ինքնությունը, որը համաներմամբ ազատ արձակվածներից է եղել: Դեպքի առթիվ Քննչական կոմիտեում հարուցվել է քրեական գործ` ՀՀ քրեական օրենսգրքի 34-104-րդ հոդվածի 2-րդ մասի 1-ին կետով, 104-րդ հոդվածի 1-ին մասի, 235-րդ հոդվածի 1-ին մասի եւ 258-րդ հոդվածի 4-րդ մասի հատկանիշներով:
ԲԱՆԱՆԸ ԹԱՆԿԱՆՈՒՄ Է
Երեւանի սուպերմարկետներում բանանի գինը դարձյալ բարձրացել է. մեկ կիլոգրամի գինը որոշ սուպերմարկետներում հասել է 730-740 դրամի: Մի շարք խանութներում էլ այդ գինը տատանվում է 750 դրամի սահմաններում, մինչդեռ օրեր առաջ այն արժեր 620-660 դրամ: Նկատենք, որ թավշյա հեղափոխությունից հետո, երբ վարչապետ Նիկոլ Փաշինյանը մենաշնորհները վերացնելու պահանջ դրեց, բանանը կարճ ժամանակում կտրուկ էժանացավ, ապա ներքին շուկայում ակտիվացան վրացական ընկերությունները, որոնք սկսեցին մեծ քանակությամբ բանան ներկրել, արդյունքում բանանի 1 կիլոգրամի գինը դարձավ 400 դրամ: Բայց սա կարճ տեւեց, եւ որոշ ժամանակ անց բանանի գինը սկսեց բարձրանալ: Ներկրողները պնդում էին՝ սա պայմանավորված է համաշխարհային շուկայում թանկացումների հետ: Այսօր էլ բանանի գնի բարձրացումը պայմանավորված է արտաքին շուկայում առկա հնարավոր գնային բարձրացումների հետ:
.gif)
