ԱԺ «Իմ քայլը» խմբակցության պատգամավոր, ԱԺ արտաքին հարցերի մշտական հանձնաժողովի անդամ Շիրակ Թորոսյանը «Ժողովուրդ» օրաթերթի հետ զրույցում ասաց, որ Ռուսաստանի եւ Հայաստանի միջեւ գոյություն ունի փոխշահավետ համագործակցություն, որը պետք է պահվի նաեւ առաջիկայում` ելնելով երկու պետությունների երկրների շահերից:
-Պարո՛ն Թորոսյան, առաջիկայում նախատեսված է Ռուսաստանի Դաշնության վարչապետի, այնուհետեւ նախագահի այցը Հայաստան: Ի՞նչ ակնկալիք պետք է ունենալ այդ հանդիպումներից ու այցերից, քանի որ նշվում է, թե նման այցերը անհետեւանք չեն լինում, ավելին` երբեմն պետության համար կարեւորագույն խնդիրների հետ կապված որոշումներ են կայացվում:
-Ընդհանրապես միջպետական հարաբերությունների դրսեւորման ձեւերից են բարձրաստիճան պաշտոնյանների այցելությունները, իսկ դա միջպետական պայմանավորվածությունների ընթացքի իրացման եւ նոր պայմանավորվածությունների ձեռքբերման մասին է խոսում, ռազմավարական գործընկերների, դաշնակիցների հարաբերությունների բարձր մակարդակի մասին է խոսում: Դրանք սովորաբար պայմանավորված չեն լինում մեկ կամ երկու խնդիրներով, դրանք պայմանավորված են լինում երկկողմ հարաբերությունների ամբողջական ձեւաչափով, այդ թվում նաեւ գազի գին եւ ռազմավարական համագործակցության այլ ուղղություններով, որոնք կան հայ-ռուսական հարաբերություններում: Իրականում խնդիրը ավելի շատ կառուցողական, ավելի շատ այլ դաշտում է, քան իրականում քննարկվում է:
-Նոր իշխանությունների ձեւավորումից հետո մշտապես նշվել է, որ լարված են հայ-ռուսական հարաբերությունները, քանի որ հեղափոխությունից հետո իշխանությունները տարբեր հարցերի հետ կապված անհամաձայնություններ են ունեցել:
-Հայաստանի եւ Ռուսաստանի հարաբերությունները ձեւավորվել են տարիների ընթացքում` ԽՍՀՄ փլուզումից եւ անկախությունների հաստատումից հետո, եւ ամրագրվել են միջպետական բազմաթիվ դաշնակցային պայմանագրերով, ընդ որում` երկարաժամկետ պայմանագրերով եւ տարածաշրջանային կազմակերպությունների հիմնադրումներով, անդամակցումներով, ինչպիսիք են ԵԱՏՄ-ն, ՀԱՊԿ-ը, ԱՊՀ-ն, ինչպես նաեւ միջազգային հարթակներում համագործակցությամբ: Նոր իշխանությունները արդեն հայտարարել են, որ չկա արտաքին քաղաքականության կուրսի որեւէ կտրուկ փոփոխություն, առավել եւս չկա այդ փոփոխությունը հայ-ռուսական հարաբերություններում: Կա՞ն հայ-ռուսական հարաբերություններում դժվարություններ, խոչընդոտներ. իհարկե կան: Դրանց մասին միշտ բարձրաձայնվել են` կապված Ադրբեջանին զենք վաճառելու հետ ու այլ հարցեր: Բայց ավելի գլոբալ առումով կա սերտ ռազմավարական համագործակցություն. դա ԵԱՏՄ-ի շրջանակներում է, ՀԱՊԿ-ի շրջանակներում է, ԱՊՀ, եւ մենք պետք է գնահատենք, ըստ էության, այն, ինչ ունենք, խորացնենք ռազմավարական հարաբերությունները ՌԴ-ի հետ: Իսկ այդ հարաբերությունները նախ եւ առաջ բխում են մեր ազգային անվտանգության շահերից եւ, մյուս կողմից, բխում են Ռուսաստանի տարածաշրջանային անվտանգության ռազմավարական շահերից, այսինքն` փոխշահավետ համագործակցություն է սա, եւ քանի դեռ այդ համագործակցությունը փոխշահավետության տիրույթում է, ուրեմն մենք միանշանակ այն պետք է պահպանենք ու խորացնենք:
-Իսկ այդ փոխշահավետ հարաբերություններից ելնելով` Ռուսաստանը զիջումների կգնա՞` չթանկացնելով Հայաստանում գազի գինը:
-Գազը, իհարկե, ռազմավարական կարեւոր խնդիր է ու այդ հարաբերություններից, օղակներից մեկն է: Տեղյակ եք, որ վարչապետ Նիկոլ Փաշինյանը առաջ է քաշել ԵԱՏՄ տարածքում էներգակիրների միասնական գների սահմանման օրակարգ, որը, կարծում եմ, շատ օբյեկտիվ է, անհրաժեշտ, հատկապես եթե մենք այս տնտեսական տիրույթում, միասնական տնտեսական կանոններ ենք սահմանում, եւ երբեմն այդ կանոնները նաեւ ի վնաս անդամ երկրների են լինում, ապա այս դեպքում ավելի արդարացի է, երբ որ էներգակիրների միասնական գնային համակարգ է ներդրվում, որովհետեւ եթե մենք նույն դաշտում ենք, բայց անհավասար պայմաններում, ապա մրցակցային խնդիրներ են առաջանում: Ահա այս հարցերը պետք է առաջ մղվեն. կարծում եմ` դա երկրում հայ-ռուսական հարաբերությունների կարեւորագույն հարցերից մեկն է, որոնք պետք է լուծումներ ստանան: Իսկ, ընդհանրապես, նմանատիպ հանդիպումները միշտ ցանկալի են, ոչ միայն սպասելի են, որովհետեւ այդ հանդիպումները միմիայն դրական էֆեկտներ են ունենալու, որովհետեւ լինում են հարցեր, կուտակվում են հարցեր, որոնց պատասխանները այդ հանդիպումների ժամանակ են տրվում: Դուք մի՛ կարծեք, որ այդ հանդիպումները տեղի են ունենում ինքնանպատակ, եւ, այսպես ասած, պտիչկա դնելու համար կազմակերպվում են հանդիպումներ. ոչ մի երկրի ղեկավար պարապ չէ, հետեւաբար օրակարգեր են ձեւակերպվում, ու այդ հարցերը կարեւոր են ու հրատապ լուծումներ են պահանջում:
ԻՇԽԱՆՈՒԹՅՈՒՆԸ ՆՈՒՅՆ «ԿՈՍՏՅՈՒՄԸ» ՉԻ ՀԱԳՆՈՒՄ
«Ժողովուրդ» օրաթերթը ԱԺ «Իմ քայլը» խմբակցության պատգամավոր Հրաչյա Հակոբյանի հետ զրուցել է վերջին ժամանակահատվածում ընդդիմության կողմից քննարկվող սուպերվարչապետության հարցի շուրջ:
-Պարո՛ն Հակոբյան, ընդդիմությունը հայտարարում է, որ Դուք որեւէ քայլ չեք անում փոխելու նախկին իշխանությունների կողմից ստեղծված սուպերվարչապետական համակարգը: «Լուսավոր Հայաստան» խմբակցության ղեկավար Էդմոն Մարուքյանն էլ հայտարարեց, որ Սերժ Սարգսյանի «հագով կարած կոստյումը» նոր իշխանությունը չի ուզում հանել իր վրայից: Ի՞նչն է խնդիրը, ինչո՞ւ որեւէ փոփոխություն չեք անում:
-Դրա մասին բավականին շատ է խոսվել. եթե մեր ընդդիմախոսները չեն տեսնում այն փոփոխությունները, որոնք արվում են, դա իրենց խնդիրն է, քանի որ իրականում բավականին շատ փոփոխություններ են արվում: Ինչ վերաբերում է Սերժ Սարգսյանի հագով կարած կոստյումին, ճիշտ է, Էդմոն Մարուքյանը նախորդ անգամ հանեց իր կոստյումը, կոճակները ցույց տվեց եւ վերջում հենց ինքն էլ հագավ այդ կոստյումը, բայց մենք թերեւս նույն կոստյումը չենք հագնում: Մենք չենք ասում, որ կառավարության վերջին արդյունքը սա է, միգուցե փոփոխության ենթարկվի իրենց կողմից ասված ԱԺ-ն, Ոստիկանությունը առընթեր մարմիններից դուրս գան, ուղղակի այս պահին մենք գտնում ենք, որ իրենք չպետք է քաղաքական մարմին լինեն: Ինձ համար անհասկանալի է, թե ինչու է ընդդիմությունը նման կերպ արտահայտվում` որակելով այսօրվա կառավարությանը սուպերվարչապետություն ունեցող կառավարություն: Ես չեմ բացառում, որ քննարկումների արդյունքում, այնուամենայնիվ, որոշում կայացվի, որ իրավապահ մարմինները պետք է լինեն նախարարություններ ու հաշվետու լինեն խորհրդարանին: Իրավիճակը լրիվ այլ է. մենք այսօր բաց ենք քննարկման համար, իսկ մենք այսօր կառուցողական քննարկման մեջ ենք հենց նույն այդ հարցի շրջանակներում:
-Այսինքն` Դուք նախորդ իշխանությունների վարած քաղաքականությունը առաջ չե՞ք տանելու:
-Իհարկե ոչ, չկա նման բան. մենք երբեք նման գիծ առաջ չենք տանելու: Պարոն Փաշինյանը բազմիցս ասել է` գոյություն ունի խորհրդարան, երբ որ տարբեր հարցեր խորհրդարանի դահլիճում էլ կարող են լուծվել, քանի որ ԱԺ-ն ունի բոլոր լծակները այդ հարցերը լուծելու համար: Այո, դա այդպես է, մենք ունենք լծակներ, մենք պետք է լուծենք, ոչ թե այդ ամենն ուղղենք կառավարությանը, այլ մենք մեր իրավասության շրջանակներում բոլոր հարցերին տանք լուծումներ:
Նյութերը` ՍՈՆԱ ԳՐԻԳՈՐՅԱՆԻ
ԴԺՎԱՐԱՑԱՎ ՊԱՏԱՍԽԱՆԵԼ
ՏՄՊՊՀ նախագահի թեկնածու Գեղամ Գեւորգյանն ԱԺ երեկվա նիստում, երբ քննարկվում էր իր ընտրության հարցը, դժվարացավ ԱԺ «Իմ քայլը» խմբակցության պատգամավոր Թագուհի Թովմասյանի հարցին հստակ պատասխան տալ: Թովմասյանին հետաքրքրում էր կարեւոր մեկ խնդիր. «Կան երեւույթներ, որոնք առերեւույթ օրինախախտման երանգներ ունեն, բայց դրանց վերացման կամ լուծման բանալին մինչ օրս չի գտնվել: Մասնավորեցնեմ. կան ընկերություններ, որոնք ունեն ցածր վարկանիշ եւ զբաղվել են մենաշնորհային գործունեությամբ կամ զբաղվում են գուցե, եւ իրենք որոշ ընթացք հետո սնանկանում են, բացում են այլ ընկերություն` ուրիշ անունով, ուրիշ հանդերձանքով, բայց նույն սեփականատիրոջ կողմից, եւ զբաղվում են, ըստ էության, նույն գործունեությամբ: Ավելի մասնավորեցնեմ. խոսքը այսօր հետախուզման մեջ գտնվող Միհրան Պողոսյանի ընտանիքին պատկանող «Քեթրին գրուպ» ընկերության մասին է, որը սնանկացավ, բայց բացվել է «Բանանեկ» ընկերությունը, որը զբաղվում է, ըստ էության, նույն գործունեությամբ: Ինձ հետաքրքիր է` ինչպես եք պատկերացնում այս խնդրի լուծումը, եւ ինչպես եք պայքարելու դրա դեմ»,- հարցրեց պատգամավորը:
Միայն թե Գեղամ Գեւորգյանն այդպես էլ հստակ պատասխան չտվեց. «Եթե ես չեմ սխալվում, կա հարկադիր սնանկության գնալու վերաբերյալ Քրեական օրենսգրքում համապատասխան դրույթներ: Հիմա կդժվարանամ ասել` սա մեր ոլորտի խնդիր է, թե մյուս գործընկերների, քրեական հետապնդումներ իրականացնող մարմինների գործառույթն է, որովհետեւ այստեղ Ձեր ասած տնտեսվարող սուբյեկտի` «Քեթրին» կամ «Բանանեկ» ընկերությունների գործառույթներին, անկեղծ, ծանոթ չեմ»: Նա ասաց, որ իրենք պետք է ուսումնասիրեն` հասկանալու համար` արդյոք սա հակամրցակցային գործողություն է, թե մարդը հարկադիր սնանկության է գնում պարտքերից, հարկերից, պատասխանատվությունից ազատվելու համար: Գ. Գեւորգյանը նաեւ ասաց, որ հաճախ նման դեպքերում խնդիրն օրենսդրության կիրառումն է: «Եթե նայում ենք օրենսդրությանը, հարցերի մեծ մասի պատասխանը, գոնե իմ պատկերացմամբ, տրված է: Իսկ եթե այն հարցերն են, որոնք չկան, կարելի է, բնականաբար, օրենսդրական փոփոխությամբ լուծել, բայց իրականութունը, ինչպես բոլորս գիտենք, մի փոքր այլ է»: Թեկնածուի պատասխանին արձագանքեց պատգամավորը` նշելով, որ նման օրինակները շատ են:
ԽՈՂՈՎԱԿՆԵՐԻ ՀԱՄԱՐ
Արծվանիստ համայնքի ղեկավար Սամվել Օհանյանի դեմ վերջերս քրեական գործ է հարուցվել: Նրան մեղադրանք է առաջադրվել ՀՀ գյուղնախարարության ԾԻԳ-ի ապամոնտաժած ու իրեն վստահված մետաղական խողովակներն իր առանձնատան բակում պահելու, մնացած խողովակները համայնքի բնակիչներին անհատույց բաժանելու համար: Օհանյանի նկատմամբ խափանման միջոց է ընտրվել ստորագրությամբ երկրից չհեռանալը:
.gif)
