Տեխզննման ինստիտուտը տառացիորեն չի գործում. Վաղարշակ Հակոբյան

ԱԺ տարածաշրջանային եւ եվրասիական ինտեգրման հարցերի մշտական հանձնաժողովի անդամ, «Իմ քայլը» խմբակցության պատգամավոր Վաղարշակ Հակոբյանի կարծիքով` անհնարին է իրագործել ՀՀ առողջապահության նախարար Արսեն Թորոսյանի հորդորը, թե պետք է չեղարկել բոլոր վարորդական իրավունքները եւ բոլորից կրկին շատ խիստ քննություն վերցնել: «Ժողովուրդ» օրաթերթի հետ զրույցում պատգամավորն ասաց, որ այս հարցի հետ կապված պետք է շատ գործ անել ու քիչ խոսել:

-Պարո՛ն Հակոբյան, որպես իշխանական պատգամավոր` Ձեր կարծիքով` ովքե՞ր պետք է պատժվեն այն վթարի համար, որը տեղի է ունեցել Արարատի մարզի Զոդի կամրջի վրա: Վարկած կա, որ «Գազել» մակնիշի ավտոմեքենան անսարք է եղել, տեխզննում չի անցել ու չի համապատասխանել այն չափանիշներին, որը թույլ կտա ուղեւոր տեղափոխել: Ո՞վ է այս ամենի պատասխանատուն, ինչո՞ւ իշխանությունները չեն լուծում այդ խնդիրները:

-Իրականում այստեղ իսկապես խնդիր կա ու մեքենաների տեխզննման հետ կապված, իսկապես լիովին չի ապահովվում իրավիճակի օբյեկտիվությունը անվտանգության առումով: Եւ այստեղ պատկան մարմինների գործն է, որ պետք է անեն, ես կարծում եմ, որ գաղտնիք չէ` մեքենա վարողները բոլորն էլ գիտեն, որ տեխզննման ինստիտուտը տառացիորեն չի գործում, ու տեխզննումը ուղղակի ֆինանսական որոշակի մուծումների հետ է ասոցացվում, ինչը բավականաչափ սխալ երեւույթ է: Ես ինքս որոշակի ուսումնասիրություն եմ իրականացրել` որոշ երկրների փորձի հետ կապված, որովհետեւ այն հետաքրքրել է ինձ, եւ այնտեղ հիմքերը բավականին խիստ են դրված տեխզննում ապահովվելու համար: Դու պետք է նախ ունենաս համապատասխան ինֆաստրուկտուրա, այսինքն` մեքենաները, որպեսզի բերվեն պատշաճ մակարդակի, նոր թույլատվություն ստանան վարելու համար, առավել եւս հասարակական տրանսպորտը, դրանք իսկապես ՀՀ-ում լավ չեն գործում, եւ մենք սրա մասին պետք է խոսենք բաց տեքստով, քննադատենք պատկան մարմիններին եւ ավելի զգոնության կոչ անենք: Ես կարծում եմ, որ որոշակի ժամանակահատված պետք է հատկացվի տվյալ կառույցի պատասխանատուներին, եւ եթե այդ իրավիճակը չշտկվի, շատ ավելի կոշտ քայլերի պետք է գնա իշխանությունը, կառավարությունը:

-Խնդրում եմ, կոնկրետ նշեք, թե այս դեպքում ո՞վ է մեղավորը, ո՞ր գերատեսչությունն է կրում ամբողջ պատասխանատվությունը:

-Գիտե՞ք, ես ասեմ` այդ իրավիճակը ժառանգություն է հասել նախորդ կառավարությունից, եւ սա իրողություն է. ես այս պահին կոնկրետ չգիտեմ` ինչ աշխատանքներ են կատարվում, բայց այն, որ խնդիրները բազմազան են, եւ դրանց պետք է լուծում տրվի, դա միանշանակ է: Մենք մեղավոր իրավունք կվերապահենք համարել այն դեպքում, երբ որ համապատասխան ցուցումները տրվի, համապատասխան փոփոխությունները կատարվի, եւ դրանից հետո նույն կերպ չգործի:

-Իսկ եթե տեղյակ եք այդ խնդիրներից, գիտեք, որ նախորդ իշխանություններից վատ ժառանգություն եք ստացել, ինչո՞ւ մինչեւ այժմ որեւէ քայլ չեք ձեռնարկել, թեկուզ հանդես գալ օրենսդրական նախաձեռնությամբ, որտեղ օրենքի բաց կա: Պետք է լինեն նման ողբերգական դեպքե՞ր, որպեսզի իշխանությունը տեղից շարժվի:

-Իրականում այնպես չի, որ պրոցես չի սկսվել, ուղղակի այս ցավալի դեպքերը որոշակիորեն արագացրեցին այդ պրոցեսները:

-Խնդրում եմ, կոնկրետ ասեք` ինչ պրոցեսներ են իրականացվում:

-Կոնկրետ քայլերի հետ կապված` ճիշտ կլինի հարցնեք պատկան մարմիններին, բայց, իմ ունեցած ինֆորմացիայով, որոշակի պրոցես նախաձեռնվել է` այդ շտկումների հետ կապված: Բայց սա ոչ միայն տեխնիկական բնույթի հարց է, սա նաեւ քաղաքական հարց է, այստեղ քաղաքականության մշակման խնդիր կա: Մենք պետք է վերջիվերջո այդ ոլորտը կարգավորենք, որովհետեւ անհայտ ծագմամբ, անհայտ իրավիճակում գտնվող մեքենաները վտանգում են մեր քաղաքացիների կյանքը. սա անթույլատրելի է: Օրենսդրական բաց կա, բայց դու ոչ թե պարտավոր ես միայն օրենքը գրել ներկայացնել, այլ պարտավոր ես այնպիսի օրենք շրջանառության մեջ դնես, որի կիրարկումը հնարավոր կլինի: Կան նախադեպեր, երբ օրենք են ընդունում, ու այդ օրենքը չի լինում կիրառել: Սա շատ սպեցեֆիկ եւ բարդ ոլորտ է, ու կարգավորումները պետք է այնպես իրականացվի, որ այդտեղ էֆեկտիվություն նկատվի. եթե ոչ, ապա դա կդառնա անիմաստ: Այս թեմայով պետք է շատ քիչ խոսել, բայց շատ գործել:

-ՀՀ առողջապահության նախարար Արսեն Թորոսյանը կոչ է արել իր ֆեյսբուքյան էջում չեղարկել բոլոր վարորոդական իրավունքները եւ բոլորից կրկին շատ խիստ քննություն վերցնել: Դուք կո՞ղմ եք նախարարի մոտեցմանը:

-Ես կարծում եմ, որ առողջապահության նախարարի առաջարկը կիրարկման տեսանկյունից չեմ կարող ասել` ինչ էֆեկտիվություն կդրսեւորի, բայց դա անհնար է ամբողջապես իրականացնել, որովհետեւ դրանք հարյուր հազարավոր մարդիկ են: Ես կարծում եմ, որ պետք է այնպիսի եզրահանգման գանք, որ կիրառելի լինի: Գաղափարը, կարող ենք ենթադրել, որ վատը չէ, բայց դա կիրառելը այդքան էլ հնարավոր չէ: Ես կարծում եմ, որ այստեղ ոչ թե վարորդական իրավունքների մեջ է, այլ այստեղ խնդիրը տեխնիկական, շատ պարզ դասակարգման մեջ է, ու որ այդ ամենը ձեւական բնույթ չկրի:

Զրուցեց ՍՈՆԱ ԳՐԻԳՈՐՅԱՆԸ