ԲԱՑԱՌՈՒՄ Է, ՈՐ ՃԱՆԱՊԱՐՀ ԱՆՑՆԵՆ ԱՅՍ ԻՇԽԱՆՈՒԹՅԱՆ ՀԵՏ

«Ժողովուրդ» օրաթերթը զրուցել է ՀՅԴ ԳՄ նորընտիր ներկայացուցիչ Իշխան Սաղաթելյանի հետ:

-«Դաշնակցությունը» վերջին շրջանում բավականին ակտիվություն է ցուցաբերում: Օրեր առաջ Արծվիկ Մինասյանը ասուլիսում ներկայիս իշխանությունների քաղաքականության հետ կապված հարցերի անդրադարձավ: Դուք բավականին ակտիվ եք. ՀՅԴ-ն հայտարարություններ է անում` քննադատելով իշխանությունների գործելաոճը: Սա ինչո՞վ է պայմանավորված: Մտավախություններ ունե՞ք` ներկայիս իշխանությունների հետ կապված:
-Մենք օրակարգ ունենք, ասելիք եւ անելիք ունենք, եւ ակտիվությունը դրանով է պայմանավորված: Մենք հատուկ ջանք չենք գործադրում, որ այդ իշխանությունը տապալվի, բայց ձեռքներս էլ ծալած չենք նստում: Մենք մեր ամենօրյա աշխատանքով, մեր կեցվածքով, մեր փաստարկված, հիմնավորված քննադատությամբ իշխանության ուշադրությունն ենք հրավիրում երկրում կուտակված այն բազմաթիվ հարցերի վրա, որոնք կան, եւ կոչ ենք անում լուծում:
-Վերջին շրջանում շատ քննարկվեց Սահմանադրական դատարանի որոշումը` կապված հոկտեմբերի 2-ին ընդունված «ԱԺ կանոնակարգ» օրենքի փոփոխությունների հետ: Դուք բազմիցս ասել եք, որ ճիշտ եք այս հարցի հետ կապված: Բավարարվելո՞ւ եք նման հայտարարություններով: Ի՞նչ հետեւանքներ կլինեն, ի՞նչ քայլեր եք իրականացնելու:
-Իշխանությունը ստեղծեց այդ կեղծ օրակարգը` հեղափոխականների եւ հակահեղափոխականների, ու այդ ճանապարհով գնաց իր խնդիրների լուծմանը, այսինքն` դեկտեմբերին իրականացրեց ընտրություններ, որն այն ժամանակ էլ ասել ենք , հիմա էլ կրկնում ենք` սխալ էր: Մենք այն ժամանակ էլ ասել ենք, որ ընտրությունները պետք է տեղի ունենան սահմանադրական ճանապարհով, խորհրդարանը պետք է լուծարվի ոչ թե ուժի իրավունքով, այլ օրենքի ուժով: ՍԴ-ի որոշումն էլ եւս մեկ անգամ փաստեց, որ այն ժամանակ մենք ճիշտ էինք ասում: Այս պահին մենք այլ պրոցես սկսելու մտադրություն չունենք: Այն, որ տարածում են, թե «Դաշնակցությունը» խնդիր է դրել իշխանության անվստահության կամ դատարան մտնելու, մենք այս պահին մեր օրակարգում նման հարց չունենք:
-Հնարավո՞ր է` լինի:
-Իհարկե, հնարավոր է: Կյանքն ու ժամանակը ցույց կտան: Այս պահին մենք նման օրակարգ չունենք: Մենք դրա հնարավորությունն էլ չունենք խորքի մեջ, որովհետեւ դա պետք անեն խորհրդարանական կուսակցությունները:
-Գուցե իրենց հետ համագործակցելո՞ւ միջոցով նման բանի գնաք:
-Մենք որեւէ մեկի հետ նման քննարկում չենք ունեցել: Մեր ժողովներում նման քննարկում չի եղել:
-Մամուլում շրջանառվում է, որ սպասում եք` մեկ տարին անցնի, որ անվստահություն հայտնեք:
-Չկա նման բան: Այս երկրում էնպիսի իրավիճակ է, որ ասենք` մի տարի հետո ինչ կանենք, չենք կարող:
-Եթե «Դաշնակցությունը» ԱԺ-ում ներկայացված լիներ, էլի նույն կարծիքը կունենա՞ր աղմուկ հանած օրենքի վերաբեյալ:
-Մենք որեւէ կաշկանդում չունենք: Լինենք խորհրդարանում, խորհրդարանից դուրս, իշխանության մեջ, իշխանությունից դուրս, եթե ունենք տեսակետ, դրա մասին հստակ հայտարարում ենք:
-Ձեր նախկին ժողովին վարչապետը իր ողջույնի ուղերձում պատրաստակամություն հայտնեց համագործակցել կուսակցության հետ: Նախ` ի՞նչ է նշանակում համագործակցել, եւ հիմա արդյոք երկուստեք քայլեր արվո՞ւմ են դրա համար:
-«Դաշնակցությունը» համահայկական ներուժ եւ ռեսուրս ունեցող կազմակերպություն է: Ե՛ւ ընդհանուր ժողովին, ե՛ւ գերագույն ժողովում հայտարարել ենք, որ այդ ներուժը ծառայեցնելու ենք մեր պետությանն ու ժողովրդին: Եթե կլինեն հարցեր, որտեղ մեր կուսակցությունը իր հնարավորություններով պետությանը օգտակար կարող է լինել, դա անելու ենք: Համագործակցությունը սրանով սահմանափակվում է: Այսինքն` իշխանության մաս կազմել, իշխանություն վերցնել եւ այլն, այս համագործակցության արդյունքում դա պարզապես բացառվում է, որովհետեւ գնալով այդ ժամանակահատվածում շատ հստակ ընդգծվեց, որ մենք իշխանության հետ, բացառված է, կարողանանք ճանապարհ անցնել: Այն ժամանակ մենք մտանք իշխանության մեջ, որպեսզի օգնեինք` ժողովրդի սպասումները իրականանան, բայց կարճ ժամանակ հետո իշխանությունները սկսեցին սեւ-սպիտակ եւ այլն, եւ այլն:
-Մամուլում ամիսներ առաջ էլ շրջանառվում էր, որ Նիկոլ Փաշինյանը պատրաստվում է, որպես փորձառու քաղաքական գործչի, պաշտոն առաջարկել Արծվիկ Մինասյանին: Դուք բացառո՞ւմ եք, որ «Դաշնակցությունից» երբեւէ կընդունեն նման առաջարկներ:
-Բացառվում է: Նման բան չի կարող լինել:
-Բոլորի անունի՞ց եք ասում:
-Այո՛:

Զրուցեց ԼՈՒՍԻՆԵ ՄԻՆԱՍՅԱՆԸ

ՑՈՒՐՏ ԵՂԱՆԱԿԸ` ՔԻՉ ԳԾԱՆՇՈՒՄՆԵՐԻ ՊԱՏՃԱՌ

Երեկ ՀՀ ճանապարհային ոստիկանության պետ Եգոր Կարապետյանն ամփոփեց այս տարվա առաջին եռամսյակի գործունեության արդյունքները: Պարզվում է` նշված ժամանակահատվածում ճանապարհատրանսպորտային պատահարների թիվն ավելացել է: Ըստ ՃՈ պետ Եգոր Կարապետյանի` այս տարվա առաջին եռամսյակում գրանցվել է 937 ՃՏՊ նախորդ տարվա 768-ի փոխարեն: Բացի այս, նշված ժամանակահատվածում զոհերի թիվը նվազել է 12-ով. 2018թ.-ին գրանցվել է 75, իսկ 2019թ.-ին` 63 զոհ, փոխարենը 276-ով աճել է վիրավորների թիվը: Նկատենք, որ ստեղծված իրավիճակը պատահական չէ եւ պայմանավորված է ճանապարհային երթեւեկության կանոնները խախտելու դեպքում պատիժների մեղմացմամբ, այսինքն՝ ոմանք չարաշահում են իշխանությունների վերաբերմունքը:

Երեկ ՃՈ պետը հայտարարեց նաեւ, որ մայիսի 5-ից ճանապարհային երթեւեկության փոփոխություններ են սպասվում. վաֆլենման գծանշումներ կլինեն այլ խաչմերուկներում, եւ վարորդն այն խախտելու դեպքում կտուգանվի 5000 դրամով: Նաեւ ՃՈ-ի կողմից 2018թ.-ի առաջին եռամսյակում գրանցվել եւ հաշվարկվել է 36 հազար 600 տրանսպորտային միջոց. իսկ 2019-ին` 44 հազար 579: ՃՈ պետի խոսքերով` 2018 թվականի ապրիլի 29-ի դրությամբ Հայաստան մուտք է գործել 18 հազար 596 տրանսպորտային միջոց, իսկ 2019 թվականի նույն ժամանակահատվածում` 32 հազար 119:
ՃՈ պետի հետ հանդիպմանը «Ժողովուրդ» օրաթերթը բարձրաձայնեց նաեւ Մաշտոցի 5ա հասցեի («Ռոբերտո» հագուստի խանութից մինչեւ Փակ շուկա ձգվող հատվածի մասին է խոսքը) ճանապարհահատվածի մոտ կայանող տաքսիների խնդիրը: Բանն այն է, որ նրանք, մեղմ ասած, այդ հատվածը «գրավել են», եւ կողմնակի անձը եթե փորձի կայանել այդ հատվածում, մեծ աղմուկ են բարձրացնում` կոպտելով, վիճելով. անգամ հայհոյում են: Ընդ որում, թեեւ մենք օրինակ բերեցինք Մաշտոցի պողոտան, բայց նման վիճակ է մայրաքաղաքի գրեթե բոլոր փողոցներում, որտեղ տաքսու կայանատեղիներ կան:
Մեր հարցին ի պատասխան` Կարապետյանն արձագանքեց. «Արդեն երկուսուկես տարի է` ՃՈ-ն Երեւանի քաղաքապետարանի հետ աշխատանքներ է կատարում` տաքսիների կայանատեղիների հետ կապված, երբ իրենք հարց էին բարձրացնում, որ տեղ չունեն կայանելու: Հարգելինե՛րս, դրա համար այս բալային համակարգն ենք օր առաջ փորձում կյանքի կոչել, որ իրենք հասկանան, որ վարորդական իրավունքից կզրկվեն, եթե հաճախակի կատարեն նման խախտումներ: Այնտեղ մենք իրենց համար նախատեսել ենք տաքսու կայանատեղի, եւ կարծում եմ` այդ խնդիրը պետք է վերացած լիներ: Ամեն դեպքում, ես ցուցում կտամ համապատասխան ծառայությանը մեկ անգամ եւս այդ հատվածում ուժեղացնել հսկողությունը»,- խոստացավ ՃՈ պետը:
Բացի այս, նկատենք, որ Երեւանում կան գծանշումներ, որոնց ներկն արդեն ջնջվել է, կան նաեւ գծանշումներ, որոնց վրա նորն է ներկվել: Այդ կիսատ-պռատ գծանշումները շատ հաճախ խցանումների եւ վթարների պատճառ են դառնում, բայց ՃՈ պետը «Ժողովուրդ» օրաթերթին փոխանցեց, որ ավելի քան մեկ շաբաթ է` սկսվել են գծանշումների աշխատանքները: «Նախորդ տարի այս ժամանակահատվածում շատ գծանշումներ էր իրականացվել, քան այս տարի, որովհետեւ եղանակային պայմանները` ցուրտը, անձրեւները, թույլ չէին տալիս, որպեսզի գծանշողները կարողանային գծանշել: Չէ՞ որ ասֆալտը պետք է ունենա համապատասխան ջերմություն, որ հնարավոր լինի ներկել: Գծանշող կազմակերպությունը ձեռք է բերել սարք, եւ եթե երթեւեկության կազմակերպման փոփոխություն լինի գծանշումների մասով, ապա հին գծանշումները այդ սարքով կքերվեն եւ այլեւս չեն երեւա ու շփոթության մեջ չեն գցի վարորդին: Մենք արդեն 2 տարի է` հայտարարում ենք` այն վարորդները, եթե գծերի պատճառով խախտումներ են արել եւ տուգանվել են, վարչական արձանագրություն կլինի` թե՛ տեսախցիկով, թե՛ ավտոտրանսպորտային տեսուչի գրած ակտով, ապա ՃՈ-ն կանցկացնի վարույթ եւ կբեկանի»,- հայտարարեց ՃՈ պետ Եգոր Կարապետյանը:

ՍՅՈՒՆԷ ՀԱՄԲԱՐՁՈՒՄՅԱՆ

ԽՏՐԱԿԱՆՈՒԹՅՈ՞ՒՆ
Ազգությամբ եզդի արմավիրցի Իշխան Միրզոյանը անչափահաս դստեր՝ 6-ամյա Ալբինայի հետ երեկ բողոքի ակցիա էր կազմակերպել ՄԱԿ-ի հայաստանյան գրասենյակի դիմաց: Երկու հոգուց կազմված ընտանիքը գտնվում է սոցիալապես անապահով վիճակում: Թե՛ Իշխան Միրզոյանը, թե՛ դուստրը առողջական խնդիրներ ունեն` վիրահատության անհրաժեշտությամբ: Իշխան Միրզոյանը պատմում է, որ դիմել է մարզպետարան, բայց այս տարի որեւէ օժանդակություն չեն տվել, մինչդեռ, իր խոսքով, շատերն են ստացել: Միրզոյանը վստահ է՝ ենթարկվում է խտրականության՝ ազգային պատկանելիությամբ պայմանավորված: Ասում է՝ Եզդիների ազգային միության նախագահ Ազիզ Թամոյանը եւս վստահ է, որ խտրականություն կա, ու պատճառն իրենց եզդի լինելն է: Իր խոսքով՝ իրեն մեղադրում են, թե հանրապետական է եւ անհիմն ցույցեր է անում: Իշխան Միրզոյանի խոսքով՝ պատրաստվում է դստեր հետ այցելել Հայաստանում գործող բոլոր եվրոպական հաստատություններ ու ներկայացնել, որ Հայաստանում ենթարկվում է խտրականության:
«Ժողովուրդ» օրաթերթն այս հարցի մասին խոսեց մանկական ակնաբուժության գծով խորհրդատու Ինգա Սարգսյանի հետ: «Մեկ տարի առաջ աղջիկը ստուգվել է: Վիրահատությունը լիարժեք կատարվել է, եթե չեմ սխալվում, հենց շուրջ մեկ տարի առաջ: Կոպը այս պահին այն դիրքում է, որը որ գնահատվում է որպես այդ խնդրից հետո իդեալական: Այս պահին վիրահատական միջամտության կամ այլ տեսակի բուժման կարիք, բացի արհեստական արցունքի օգտագործումից, ինքը չունի: Ես դրա մասին գրավոր եզրակացություն ունեմ Առողջապահության նախարարությունում: Ի՞նչ օգնություն տրամադրելու մասին է խոսքը, եթե օգնության կարիք չկա: Ինքը ինձ մոտ եղել է: Հետազոտել եմ երեխային, ես իրեն բացատրել եմ ամեն ինչ: Ինքը ինձ ցույց տվեց, որ խնդիրը ամբողջությամբ հասկացել է, շատ շնորհակալ էր: Ինքը անգամ ինձ ասաց, որ իրեն այդքան ժամանակ ոչ մեկը այդպես մանրամասն չէր բացատրել: Եւ ինքն ասաց, որ այդ խնդիրը այլեւս չի բարձրացնի, եւ դրանից հետո արդեն երրորդ, չորրորդ անգամ նորից նույն հարցը բարձրացնում են: Անկեղծ ասած, չեմ հասկանում` ինչու եւ ինչ նպատակով»,-մեզ հետ զրույցում ասաց բժշկուհին:

ԼՈՒՍԻՆԵ ՄԻՆԱՍՅԱՆ

ԱՐՏԱԿԱՐԳ ԴԵՊՔ ԾԵՐԱՆՈՑՈՒՄ
Նախօրեին Վանաձորի ծերատանը արտակարգ դեպք է տեղի ունեցել. ծերատան 68-ամյա պապիկին տեղափոխել են Վանաձորի բկ: Սանհանգույցում լոգանք ընդունելիս վատացել է ծերատան 68-ամյա բնակիչ Սամվել Ստեփանյանի վիճակը. նա, կորցնելով ինքնակառավարումը, ընկել է լոգարանում` ձեռքով բռնելով տաք ջրի ծորակը: Արդյունքում պապիկը մարմնի ջերմային այրվածքներ է ստացել: Վանաձորի ծերատան տնօրեն Մանուշ Օհանյանի խոսքով` պապիկին լոգարանում ընկած հայտնաբերել են աշխատակիցները. նա բողոքել է մեջքի ու փորի ցավերից: Անհրաժեշտ բժշկական միջամտություններ են արվել: