Երեւան քաղաքի ընդհանուր իրավասության դատարանում կրքերը չեն հանդարտվում: Բանն այն է, որ դատավոր Դավիթ Գրիգորյանի նախագահությամբ քննվում է «Մարտի 1»-ի գործով մեղադրյալ ՀՀ երկրորդ նախագահ Ռոբերտ Քոչարյանի խափանման միջոցի միջնորդության հարցը: Եւ դատարանի մոտ, դատարանի դահլիճում են հավաքվել ինչպես Քոչարյանի կողմնակիցները, այնպես էլ նրա հակառակորդները, որոնք պահանջում են ազատազրկման դատապարտել սահմանադրական կարգը տապալելու համար մեղադրվող նախկին նախագահին: Դատարանի մոտ սեղծված իրավիճակի շուրջ «Ժողովուրդ» օրաթերթը զրուցեց Երեւան քաղաքի ընդհանուր իրավասության դատարանի նախագահ Ռուբեն Վարդազարյանի հետ:
-Պարո՛ն Վարդազարյան, արդեն մի քանի օր է, ինչ Երեւան քաղաքի ընդհանուր իրավասության դատարանի Ավանի նստավայրում կրքերը չեն հանդարտվում: Բանն այն է, որ դատավոր Դավիթ Գրիգորյանի նախագահությամբ քննվում է «Մարտի 1»-ի գործով մեղադրյալ ՀՀ երկրորդ նախագահ Ռոբերտ Քոչարյանի խափանման միջոցի միջնորդության հարցը: Մինչ դատարանը քննում է հարցը, դատարանի դահլիճում եւ դրսում կրքերը գնալով թեժանում են. դատարան են եկել մի խումբ քաղաքացիներ, որոնք պահանջում են ազատ արձակել Ռոբերտ Քոչարյանին, իսկ դատարանի բակում հավաքված մյուս խումբն էլ պահանջում է ցմահ ազատազրկման դատապարտել նրան: Արդյոք այս ամենը ճնշում չէ՞ դատարանի վրա, եւ այն չի՞ ազդի դատավորի որոշման վրա:
-Դժվար է մեկնաբանել, բայց փորձեմ. ունենք այն, ինչ ունենք: Ունենք այդ մեկ դահլիճը այդ նստավայրում. զրահապատ ապակիով առանձնացված են դատավարության մասնակիցները եւ դիտորդները: Դռնբաց դատական նիստ է տեղի ունենում, դռնբացության սկզբունքը պահպանվում է, եւ բոլոր ցանկացողները իրավունք ունեն ներկա գտնվել, այլ հարց է, որ տեղերը չեն հերիքում: Բայց ունենք դահլիճ, որտեղ 80 դիտորդի տեղ կա, 80-ը ապահովվում է, իսկ մնացածը կանգնում են միջանցքներում կամ դատարանի հարակից տարածքներում: Տեղի սակավ լինելն է ստիպում, որպեսզի այդ մարդիկ ոչ թե դահլիճում նստեն, այլ փորձեն միտինգ անել դատարանի առջեւ:
-Լուրջ պաշտոնատար անձանց մասնակցությամբ դատական նիստեր էին լինելու. չէի՞ք կանխատեսում նորմալ պայմաններ ստեղծել, մեծ դահլիճ ապահովել, որ լրագրողները եւս նորմալ հետեւեին դատական նիստի ընթացքին:
-Ավելի լավ պայմաններ ստեղծելու համար պետք է ավելի լավ պայմաններ ունենալ: Ի՞նչ է նշանակում ավելի լավ պայմաններ: Հարցը ինձ համար անհասկանալի է:
-Նորմալ դահլիճ, որտեղ կարող էին մեծ թվով մարդիկ ներկա լինել եւ լսել դատավարության կողմերին. այլ դահլիճ նախատեսեիք:
-Շենգավիթի նստավայրում ավելի հարմարավետ դահլիճ ունենք, որտեղ դիտորդների նստատեղերն են քիչ, ավելի լավ պայմաններ են, բայց գործը մակագրվել է դատավոր Դավիթ Գրիգորյանին, որ նստում է Ավանի նստավայրում, եւ այն քննվում է Ավանի նստավայրում. շատ նորմալ է, շատ տրամաբանական է, այդպես էլ պետք է լինի: Կանխատեսում անելը շատ դժվար է: Մենք կանխատեսում էինք, որ այս նիստով էլ շատ մարդ կլինի` դիտորդ, լրագրող, գեներալ Մանվել Գրիգորյանի գործով էլ կլինի, բայց, արի ու տես, որ հիմնական մասսան գնացել է Ավանի նստավայր, եւ Մանվել Գրիգորյանի առաջին դատական նիստին դահլիճը լցվեց, եւ դրսում մարդ չմնաց: Իսկ փորձը ցույց է տվել, որ 4-5 դատական նիստից հետո այդ ամենը հանդարտվում է, եւ դատավորները իրենց հունով գործը քննում են:
-Ձեր կարծիքով` արդյոք այս ամենը ճնշում չէ՞ դատարանի վրա, եւ այն չի՞ ազդի դատավորի որոշման վրա:
-Դավիթ Գրիգորյանը շատ լավ իրավաբան է, փորձառու դատավոր, եւ պարոն Գրիգորյանին նման եղանակով ճնշել գրեթե անհնար է: Որոշ անհանգստություն, իհարկե, կպատճառվի, երբ երեկոյան գնա տուն, հեռուստատեսութունը միացնի եւ տեսնի, թե ինչ է կատարվում, կզարմանա: Ինքը դահլիճում այդ ամենը չի տեսնում, այդ ամենը իրեն անհասանելի է, եւ վստահ եմ, որ Հայաստանում միտինգային արդարադատություն հնարավոր չի լինի, այսինքն` դա արհեստական փորձում են քաղաքականացնել կամ դա ընդամենը փորձ է դատարանի վրա ճնշում կիրառելու: Իսկ որ դա չի հաջողվի, եւս վստահ եմ 100 տոկոսով:
-Դուք` որպես Երեւան քաղաքի ընդհանուր իրավասության դատարանի նախագահ, ի՞նչ ելք եք կանխատեսում այս իրավիճակում: Դատարանին միջնորդությամբ են դիմել Արցախի Հանրապետության նախագահ Բակո Սահակյանը եւ նախկին նախագահ Արկադի Ղուկասյանը:
-Ամենավտանգավոր, ամենաանշնորհակալ եւ օրենքով արգելված գործողությունը դա կանխատեսում անելն է դատական նիստով արդյունքի վերաբերյալ: Գործը քննում է դատավոր Դավիթ Գրիգորյանը, որը իրավական դիրքորոշումը հստակ դատական ակտով կհրապարակի: Ասել, կանխատեսել` արդյոք Արցախի ներկա նախկին նախագահների միջնորդությունը կարող է ազդել դատարանի վրա, թե ոչ, հնարավոր չէ այդ հարցին պատասխանել: Իհարկե, միջնորդությունը քննության առարկա կդառնա, իհարկե, դատարանը հաշվի կառնի, որ ներկա եւ նախկին նախգահները միջնորդություն են ներկայացրել, իսկ նման բանի ամեն օր չենք հանդիպում, ամեն օր չենք Հայաստանի Հանրապետության երկրորդ նախագահի կալանքի հարց քննարկում, ինքը տեղից արտառոց երեւույթ է, բայց կանխատեսում այս պահին ոչ թե չեմ ուզում, այլ չեմ կարող անել, նույնիսկ փորձ չեմ անի:
-Մենք նախկինում փորձ ունեցանք հայտնի գաղտնալսման վերաբերյալ դատավորին զանգելու, նրանց վախերի մասին: Դուք տեղեկություններ ունե՞ք, կամ միգուցե Ձեզ հետ կիսվել է դատավորը իր վախերի մասին, կամ իրեն զանգել են, թե ոչ:
-Դավիթ Գրիգորյանը շատ երկարամյա փորձ ունի ե՛ւ դատախազի, ե՛ւ դատավորի, նրան վախեցնել կամ անհանգստություն պատճառել հնարավոր չէ: Վստահ եմ` զանգ չի եղել եւ չի էլ կարող լինել այս իրավիճակում: Բայց մեկ բան պետք է ասեմ. կոչ եմ անում այն բոլոր մարդկանց, ովքեր հավաքվում են դատարանի առջեւ եւ իրենց կարծիքով փորձում են ճնշում գործադրել գործը նախագահող դատավորի վրա, դա անշնորհակալ, անհեռատես գործ է, հնարավոր չէ դատավորի վրա ճնշում գործադրել` դատարանի առջեւ կազմակերպելով նման միջոցառումներ: Դատավորը, առաջինը, դա չի լսում, երկրորդը` եթե նույնիսկ լսի` ինչ են խոսում, ինչ են վանկարկում, չկա Հայաստանում որեւէ դատավոր, որը կղեկավարվի այդ փողոցային կամ միտինգային արդարադատությամբ: Մեկ անգամ ասել եմ` չեմ հարգի այն դատավորին, որ դատարանի առջեւ կանգնած ժողովրդից կվախենա եւ իր որոշումը կկայացնի` ելնելով ժողովրդի քանակից կամ այն վանկարկումներից` «Ազատություն Քոչարյանին» կամ «Ցմահ Քոչարյանին» եւ այլն:
Զրուցեց ՔՆԱՐ ՄԱՆՈՒԿՅԱՆԸ
ՆԱԽԱՐԱՐԸ ԴԻՄԵԼ Է ԴԱՏԱԽԱԶՈՒԹՅՈՒՆ
«Ժողովուրդ» օրաթերթի հետ զրույցում ՀՀ աշխատանքի եւ սոցիալական հարցերի նախարար Զարուհի Բաթոյանը հայտնեց, որ դիմել է ՀՀ գլխավոր դատախազություն:
-Տիկի՛ն Բաթոյան, նախկին նախարար Մանե Թանդիլյանը դիմել էր ԱԱԾ նախարարության նախկին պաշտոնատար անձանց գործունեության մասով, իսկ Դուք անձամբ Ձեր գործունեության ընթացքում նախկին պաշտոնատար անձանց մասով խախտումներ, կոռուպցիոն դրսեւորումներ հայտնաբերե՞լ եք եւ, առհասարակ, դիմե՞լ եք իրավապահներին:
-Մենք իրավապահներին, կոռուպցիոն ռիսկերի հետ կապված, չենք դիմել: Եթե չեմ սխալվում, հաշմանդամություն ունեցող ազատամարտիկների գործով ենք դիմել դատախազություն:
-Կմանրամասնե՞ք, թե կոնկրետ ինչի մասին է խոսքը:
-Այստեղ հաշմանդամության խմբի վերանայման հարց կար, որը նախկինում եղել էր, եւ որոշակի խմբի անձանց հաշմանդամության խմբից պարզապես զրկել էին, եւ մենք դիմել են դատախազություն, որպեսզի ճշտենք, թե որքանով է եղել օրինաչափ այդ գործընթացը:
-Այսինքն` մարդիկ պետք է ստանային, բայց նրանց անօրինական կերպով կտրե՞լ են:
-Խոսքը որոշակի թվով զինծառայողների մասին է, որոնց գործերը վերանայվել են, եւ վերանայման արդյունքում նրանցից մի քանիսը ուղղակի զրկվել են հաշմանդամութունից, իսկ մի մասի հաշմանդամության խումբը իջեցվել է: Եւ սա քանի որ կապված է եղել բնակարանների տրամադրման եւ հերթագրման հետ, մենք խնդրել ենք, դիմել ենք դատախազությանը, որպեսզի պարզի, թե արդյոք այս գործընթացը իրավաչափ էր, եւ, առհասարակ, այդ խմբերի վերանայումը իրավաչափ է իրականացվել:
-Աշխատանքի եւ սոցիալական հարցերի նախարարությունում տեղեկություններ կան տարածված այն մասին, որ նախարար Զարուհի Բաթոյանը չի հասցնում, իր գործը բավականին ծանրաբեռնված է, ուստի չի բացառվում, որ այս իրավիճակը հաշվի առնելով` նրան ազատեն նախարարի պաշտոնից: Ի՞նչ կասեք այս մասին:
-Ես կարծում եմ, որ ծանրաբեռնվածությունը լավ է այն իմաստով, որ մեր նախարարությունը, մեր ոլորտը այնպիսին է, որ պետք է նախարարը ծանրաբեռնված լինի:
-Նաեւ չեք հասցնում. դա են համարում Ձեր` նախարարի պաշտոնը լքելու պատճառներից մեկը:
-Չհասցնելու հետ կապված եթե Դուք ինձ ասեք` ինչ ժամկետների մասին է խոսքը, եւ ինչ ժամկետներ չեն պահվել կամ ինչպիսի ակնկալիքներ չեն արդարացվել, այստեղ ես, իհարկե, կպատասխանեմ, կունենամ ասելիք, բայց այն, թե որ նախարարը, որ անձը որ գերատեսչությունը կղեկավարի, կարծում եմ, որ բոլորս գիտենք, որ դա վարչապետն է որոշում, նշանակում եւ, իհարկե, դա կախված է քաղաքացիների կարծիքներից, իրենց գոհունակությունից: Ես մի քանի օր առաջ եմ ամփոփել իմ 100 օրը, եւ եթե 100 օրվա ընթացքում որեւէ ակնկալիք կար, որ ես չեմ արդարացրել, կարծում եմ, որ ինչ-որ մեկը կարող էր խոսել այդ մասին: Կարծիքները կարող են տարբեր լինեն, բայց այդ տարածված լուրերը, որ ՔՊ-ում է այդ քննարկումը արվում իմ եւ Արայիկ Հարությունյանի մասին, ասեմ, որ նման բան չկա. եւ այդ տարածված տեղեկությունը չի համապատասխանում իրականությանը:
Զրուցեց ՔՆԱՐ ՄԱՆՈՒԿՅԱՆԸ
ՔՐԳՈՐԾ Է ՀԱՐՈՒՑՎԵԼ
ՀՀ ԱԺ «Իմ քայլը» խմբակցության պատգամավոր Հրաչյա Հակոբյանը սոցցանի իր էջում գրել է. «Խոսեցի ոստիկանության բարձրաստիճան պաշտոնյայի հետ, նա ինձ փոխանցեց, որ Վարդգես Գասպարիի միջադեպի հետ կապված արդեն հարուցվել է քրեական գործ, եւ գործն ուղարկվել է քննչական կոմիտե»: Հիշեցնենք, որ Ռոբերտ Քոչարյանի խափանման միջոցի գործով նիստի ընթացքում Վարդգես Գասպարին բողոքի ակցիա էր իրականացնում, սակայն Քոչարյանի աջակիցները նրա ձեռքից վերցրել եւ պատռել էին պաստառը, ապա ջրով լի շշով հարվածել էին նրա դեմքին:
ՄԵՐԺԵԼ Է
Հատուկ քննչական ծառայության քննիչի որոշմամբ` Գագիկ Ծառուկյանի կողմից անձամբ ձեռնարկատիրական գործունեությամբ զբաղվելու վերաբերյալ «Քաղաքացու որոշում» կուսակցության դիմումի հիման վրա նախապատրաստված նյութերով քրեական գործի հարուցումը մերժվել է: Քրեական գործի հարուցումը մերժվել է հանցակազմի բացակայության հիմքով: Հիշեցնենք, որ «Քաղաքացու որոշում» (ՔՈ) կուսակցությունը դիմել էր դատախազություն եւ ԱԺ նախագահին` հորդորելով բարձրացնել «Բարգավաճ Հայաստան» խմբակցության ղեկավար Գագիկ Ծառուկյանի պատգամավորական լիազորությունները դադարեցնելու հարցը: Ավելի ուշ «Իմ քայլը» խմբակցության ղեկավար Լիլիթ Մակունցը հայտարարել էր, որ ԱԺ նախագահն այդ հարցով հանդես կգա հայտարարությամբ: ԱԺ նախագահ Արարատ Միրզոյանն էլ իր հայտարարության մեջ կոչ էր արել Գագիկ Ծառուկյանին սպառիչ պատասխան տալ:
.gif)
