ԻՇԽԱՆՈՒԹՅՈՒՆՆԵՐԻ ՇՈԿԱՅԻՆ ԹԵՐԱՊԻԱՆ ԿԻՆՈ ՉԷՐ

ԱԺ «Իմ քայլը» խմբակցության պատգամավոր Էդգար Առաքելյանը «Ժողովուրդ» օրաթերթի հետ զրույցում ասաց, որ ՀՅԴ-ի` իշխանություններին ուղղված լրջանալու կոչը տեղին չէ, քանի որ իրենք շատ լավ գիտեն իրենց աշխատանքը, այն գործունեությունը, որը պետք է իրականացնեն հանուն երկրի զարգացման: Ըստ Առաքելյանի` ընտրություններում 5 տոկոս ձայն հավաքած կուսակցությունը չպետք է լրջության կոչ անի 70 տոկոս քվե ունեցող ուժին:

-Պարո՛ն Առաքելյան, նախօրեին Ազատության հրապարակում կայացած հանրահավաքի ժամանակ ՀՅԴ-ն իշխանություններին կոչ էր արել լրջանալ: Մինչեւ այս իշխանություններն անլո՞ւրջ էին, որ արտախորհրդարանական ուժը հորդորում է լրջանալ ու զբաղվել աշխատանքով:
-Ով որ հայտարարությունն արել է, ինձ թվում է, որ պետք է այդ հարցը ուղղել հենց իրենց: Մենք մեր տեղում աշխատում ենք, մեր լրջությունն էլ գիտենք, մեր սթափությունն էլ գիտենք: Սթափվելու ու լրջանալու կոչերը միշտ տեղին են եւ չեն խանգարում որեւէ իշխանության. ուղղակի հարց է, թե ով է այդ կոչը հնչեցնում: Դա հնչեցնում է մի քանի ամիս առաջ 5 տոկոսի շեմը չհաղթահարած կուսակցությունը 70 տոկոսից ավել հավաքած քաղաքական ուժի հասցեին:
-Իշխանություններին մեղադրում են այն բանի համար, որ Դուք ճնշում եք գործադրում դատական իշխանությունների վրա, որի իրավունքը չունեք, այսինքն` անօրինական քայլեր եք ձեռնարկում: Ինչո՞ւ ընտրեցիք ճնշելու տարբերակը եւ որոշեցիք նման կերպ լուծում տալ արդարադատության համակարգում կատարվող խնդիրներին:
-Կա հանրային շատ մեծ պահանջ ու քաղաքական դերակատարների կողմից կոնսենսուս, որ մեր դատական համակարգը այնպիսին չէ, ինչպիսին որ ակնկալվում է, այսինքն` այնտեղ արմատական փոփոխությունների անհրաժեշտություն կա թե՛ կոռուպցիայի առումով, թե՛ որոշակի կապերի, ճնշումների ենթարկելու ոչ, իհարկե, մեր իշխանությունների կողմից, հիմնականում նախկիննների կողմից: Այստեղ նաեւ նախկին ապօրինի վճիռների հետ անհրաժեշտություն կա այդ համակարգը հիմնովին վերափոխելու: Կարծեմ՝ «Դաշնակցությունը» եւս չի հերքում, որ այդպիսի անհրաժեշտություն կա, եւ այդպիսի պահանջ կա հանրային: Մենք ընդամենը փորձում ենք այդ գործընթացները արագացնել եւ այդ գործընթացները արագացնում ենք բացառապես օրինական ճանապարհով:
-Համակարծի՞ք եք, որ պետք է դատաիրավական համակարգը «վիրահատական» միջամտության ենթարկել, բայց, ընդդիմության կարծիքով, դա պետք էր անել օրինական ճանապարով, ոչ թե դատարանների շենքերի մուտքերն ու ելքերը փակելով: Ընդդիմությունը հենց սկզբում առաջարկեց վեթթինգի տարբերակ. ինչո՞ւ ականջալուր չեղաք այդ հորդորներին:
-Ցանկացած պարագայում, ես կարծում եմ, որ այդ գործողությունները պետք է ընկալել պարզապես մի քանի ժամանոց ակցիա, որով փորձ արվեց առավելագույն ուշադրություն հրավիրել խնդրի վրա, այսպես ասենք, շոկային թերապիա անել` այս բարեփոխումների անհրաժեշտության հետ կապված, քաղաքացիական գիտակցության եւ այլնի մոբիլիզացիայի հետ կապված: Ես առաջարկում եմ այդ համատեքստում գնահատել բոլոր մեր գործընկերներին, դրանից այդպես կինո չսարքել, մանավանդ որ վերջին ժամերին, վերջին օրերին հնչում էին տարբեր ապոկալիպտիկ կանխատեսումներ, որ այ հիմա, տեսեք, հեսա մեր միջազգային գործընկերներն ինչ հայտարարություններ են անելու, ինչ վատ արձագանքներ են լինելու` այդ ամենի հետ կապված: Հիշում եք, թե ինչ գնահատականներ եղան, ու դրանք` մեկը մյուսին հերթ չտալով: Հիմա մեր միջազգային գործընկերները արձագանքում են շատ դրական, աջակցող հայտարարություններ են, պատրաստակամություն են հայտնում թե՛ ֆինանսապես օգնելու, թե՛ փորձագիտական մակարդակով օգնելու, աջակցելու: Կարծում եմ, որ արդեն կա ընդհանուր ընկալում, որ պրոցեսներն ընթանում են ճիշտ հունով, Սահմանադրական հունով, եւ ես այստեղ որեւէ խնդիր չեմ տեսնում:
-Բայց ընդդիմությունը համարում է, որ իշխանությունների ճնշմամբ է, որ հրաժարական ներկայացրեց Բարձրագույն դատական խորհրդի նախագահ Գագիկ Հարությունյանը: Իշխանությունների ճնշմա՞մբ է Գ. Հարությունյանը նման որոշում կայացրել:
-Ես բացարձակ տեղյակ չեմ, թե առավոտյան ինչ կերավ Գագիկ Հարությունյանը, ինչպես այդպես որոշեց հանկարծակի: Դուք իսկապես մտածում եք, որ պատգամավորները այդքան ինֆորմացված մարդի՞կ են: Ես ուզում եմ ձեզ հիասթափեցնել. դա այդպես չէ, ես լուրի մասին տեղեկացել եմ ճիշտ այնպես, ինչպես Դուք եք տեղեկացել: Ու կարծում եմ, որ եթե անգամ ճնշում էլ եղել է պարոն Հարությունյանի վրա, ապա դա եղել է հանրային ճնշման հիման վրա, ու ես ողջունում եմ նրա որոշումը, եթե նման նկատառումներից ելնելով` մարդը խոհեմ որոշում է կայացրել:

ԸՆԴԴԻՄՈՒԹՅԱՆ ԳՈՐԾՆ ԱՎԵԼԻ ԼՈՒՐՋ Է

ԱԺ նախկին պատգամավոր, ՀԱԿ փոխնախագահ Լեւոն Զուրաբյանը «Ժողովուրդ» օրաթերթի հետ զրույցում հայտարարեց, որ «Դաշնակցությունը» պետք է լրջանա, ոչ թե պետք է իշխանություններին հորդորի լրջանալ: Ըստ Զուրաբյանի` ինքը միշտ էլ քննադատել է ՀՅԴ-ին ու շարունակելու է քննադատել նրանց վարած քաղաքականությունը:

-Պարո՛ն Զուրաբյան, ինչպե՞ս եք գնահատում այսօրվա իշխանությունների աշխատանքը, որովհետեւ խորհրդարանական ընդդիմությունը կարծում է, որ իշխանությունների վարած քաղաքականությունը սխալ է, ու, կարելի է ասել, հանրության սպասելիքները չեն արդարացրել:
-Ես համաձայն չեմ, իսկ դուք որոշել եք, թե ովքեր են այդ ընդդիմադիրները:
-Խորհրդարանում ներկայացված երկու ուժերը` «Լուսավոր Հայաստան» եւ ԲՀԿ խմբակցությունները, քննադատում են իշխանությունների վարած քաղաքականությունը:
-Լավ իրենք ի՞նչ ընդդիմություն:
-Ընդդիմություն չե՞ն:
-Դե լավ, ես չեմ ընդունում:
-Այսինքն` ԱԺ երկու ընդդիմադիր ուժերին լուրջ չե՞ք վերաբերվում ու ընդդիմադիր ուժ չե՞ք համարում:
-Դե հիմա… ես կարծում եմ, որ ընդդիմության գործը շատ ավելի լուրջ է, ու շատ ավելի ճիշտ ուղղություններով կարելի է քննադատել:
-ՀՅԴ-ին ընդդիմություն համարո՞ւմ եք. իրենք էլ իրենց հրավիրած հանրահավաքին հայտարարեցին, թե իշխանությունները պետք է լրջանան ու կոնկրետ քայլեր անեն հանրության համար կարեւոր հարցերին լուծում տալու համար: Համամի՞տ եք, որ իշխանություններն անլուրջ են:
-Կներեք, ես «Դաշնակցության» քննադատությունը չեմ մեկնաբանում, «Դաշնակցության» գաղափարները քննադատել եմ ու քննադատելու եմ: Լրջությունը ոչ մեկին չի խանգարի, բայց ասողը «Դաշնակցությունը» չէ, որ պետք է լինի, այ հենց իրենց պետք է լրջանալ:

Նյութերը` ՍՈՆԱ ԳՐԻԳՈՐՅԱՆԻ

ՎԵՐՋԱՊԵՍ
Առաջիկա ԱԺ քառօրյայի օրակարգ է ընդգրկվելու Հարկային օրենսգրքում փոփոխություններ կատարելու մասին նախագիծը, որը մինչ այս լայնորեն քննարկվել է: Այն երեկ վերջապես դրական եզրակացություն է ստացել ԱԺ տնտեսական հարցերի մշտական հանձնաժողովում: Մասնավորապես, «Ժողովուրդ» օրաթերթը տեղեկացավ, որ այսպես առաջարկվում է բանկերի գործունեության համար տարեկան տուրքը սահմանել բազային տուրքի 7000-ապատիկի չափով: Բանկի յուրաքանչյուր մասնաճյուղի գործունեության համար՝ տարեկան բազային տուրքի 350-ապատիկի չափով: Նախատեսվում է առաջիկայում կես տոկոսով նվազեցնել տրամադրվող վարկերի տոկոսադրույքը: Շուրջ 15 տարի գրավատնային ոլորտն օրենսդրական որեւէ փոփոխության չի ենթարկվել: Առաջարկվում է գործող տարեկան բազային 60 հազար դրամ տուրքի փոխարեն սահմանել 6 մլն դրամ, փոխանակման կետերի համար տարեկան բազային տուրքը՝ 3 մլն դրամ: Նկատենք, որ Հարկային օրենսգրքի փոփոխությունների նախագծի քննարկումներն ԱԺ-ում խոստանում են բավականին թեժ լինել. ի վերջո, այս թեմայով շատ-շատերն են շահագրգիռ:

ԱՆՍՊԱՍԵԼԻ
Ինչպես հայտնի դարձավ, երեկ հրաժարական էր տվել ԲԴԽ նախագահ Գագիկ Հարությունյանը: Վերջինիս հրաժարականի դիմում ներկայացնելուց 2 ժամ հետո մեզ լուրեր հասան, որ հրաժարականի դիմում է ներկայացրել նաեւ նրա եղբայրը ՀՀ ԱԱԾ տնօրենի տեղակալ, գեներալ-լեյտենանտ Արզուման Հարությունյանը: Ավելի ուշ եղավ նաեւ ՀՀ նախագահի հրամանագիրը՝ ԱԱԾ տնօրենի տեղակալի պաշտոնանկության մասին: «Ժողովուրդ» օրաթերթին երեկ լուրեր հասան, որ Արզուման Հարությունյանին որեւէ մեկը չի ստիպել դուրս գալ համակարգից, այլ վերջինս բավականին անսպասելի կերպով եղբոր հրաժարականից հետո անձամբ է հրաժարականի դիմում գրել եւ այն ներկայացրել ղեկավարներին:

ՏՈՒՅԺԻ ՉԱՓԸ ԿՄԵԾԱՆԱ
Բնական գազ սպառող բաժանորդների համար այս տարվա հուլիսի 1-ից նոր փոփոխույթուններ կլինեն: «Ժողովուրդ» օրաթերթը տեղեկացավ, որ ՀՀ հանրային ծառայությունները կարգավորող հանձնաժողովը որոշում է ընդունել, որով փոփոխություններ են կատարվում բնական գազի մատակարարման եւ օգտագործման կանոններում: Այսինքն` ավելացվելու են մատակարարի կողմից բաժանորդին վճարվող տույժերը: Այսպես, բնական գազի մատակարարման եւ օգտագործման կանոններով սահմանված պահանջների խախտման դեպքում բաժանորդին կվճարվի տույժ վերջինիս ծախսած բնական գազի միջին արժեքի 30 տոկոսի չափով` ներկայիս 20 տոկոսի փոխարեն: Այսինքն` ոչ ավելի քան 2500 դրամ` ներկայիս 2000 դրամի փոխարեն: