ՏԵՍԱՆՅՈՒԹ. Աղմկահարույց որ գործով հայտնի դատավորը կքննի վարչապետի եղբորորդու մեքենայի թալանի գործը

ԱԺ «Իմ քայլը» խմբակցության պատգամավոր, ՀՀ վարչապետ Նիկոլ Փաշինյանի եղբորորդի Սիփան Փաշինյանի ավտոմեքենայից գողություն կատարելու առիթով հարուցված քրգործը մտավ դատարան:

«Ժողովուրդ» օրաթերթը տեղեկացավ, որ Հունան Ավետիսյանին մեղադրանք է առաջադրվել այն բանի համար, որ նա 2019 թվականի հունիսի 04-ին` ժամը 11:00-ին, կոտրել է պահեստարան հանդիսացող Երեւան քաղաքի Սիրահարների այգու դիմաց կայանված Սիփան Փաշինյանին պատկանող «Lexus RX 350» մակնիշի 35 UR 882 հաշվառման համարանիշի ավտոմեքենայի հետեւի աջ դռան ապակին, մուտք է գործել ավտոմեքենայի սրահ, հափշտակել է 1 հատ 150 000 ՀՀ դրամ արժողությամբ HP ապրանքանիշի «Elitebook» տեսակի դյուրակիր համակարգիչ, 1 հատ 26.000 ՀՀ դրամ արժողությամբ ապրանքանիշի WiFi սարք. 1 հատ 2.500 ՀՀ դրամ արժողությամբ «GOLLA» ապրանքանիշի համակարգչային պայուսակ եւ 1 հատ 25.000 ՀՀ դրամ արժողությամբ, 20 տարվա հնեցմամբ «Արարատ» տեսակի կոնյակ:

Այսինքն` ընդհանուր առմամբ պատգամավոր Սիփան Փաշինյանին պատճառվել էր 203 հազար դրամի վնաս: Նշենք, որ այս գործով նախաքննությունն ավարտվել է, եւ այն ուղարկվել է Երեւան քաղաքի ընդհանուր իրավասության դատարան, իսկ գործը մակագրվել է դատավոր Վաչե Մարգարյանին: Գործով մեղադրյալ Հունան Ավետիսյանի նկատմամբ խափանման միջոց է ընտրվել ստորագրությամբ երկրից չհեռանալը:

Ի դեպ, Վաչե Մարգարյանն այն նույն դատավորն է, որի անունը շրջանառվեց 2018 սեպտեմբերի 11-ին:

Մասնավորապես, հրապարակվեց ուժային կառույցների ձայնագրություն, որտեղ ԱԱԾ տնօրեն Արթուր Վանեցյանը եւ ՀՔԾ պետ Սասուն Խաչատրյանը խոսում են երկրորդ նախագահ Ռոբերտ Քոչրայանի գործը քննող դատավորի մասին եւ դատավորի անուն տալիս: Ավելի ուշ հայտնի դարձավ, որ խոսքը դատավոր Վաչե Մարգարյանի մասին էր, սակայն դատավորը հերքել էր՝ հայտնելով, որ ինքը երբեւէ ԱԱԾ տնօրենի հետ չի խոսել:

Մանրամասները` ArmLur.am-ի տեսանյութում:

Քնար Մանուկյան