ՀՅԴ ԳՄ անդամ, գյուղատնտեսության նախկին նախարար Արթուր Խաչատրյանը «Ժողովուրդ» օրաթերթի հետ զրույցում ասաց, որ իրենք շարունակում են այս օրերին ակտիվ հանդիպումներ ունենալ տարբեր քաղաքական ու արտախորհրդարանական ուժերի հետ: Ըստ նախկին նախարարի` իրենց նպատակը կուսակցությունների դիրքորոշման մասին տեղեկություն ունենալն է տարբեր քաղաքական ու տնտեսական հարցերի վերաբերյալ:
-Պարո՛ն Խաչատրյան, ՀՅԴ-ն ստվերային կառավարություն է ստեղծել, որպեսզի իշխանությունների վարած քաղաքականությունը բուռն քննադատության ենթարկեն: Ի՞նչ փուլում են հիմա Ձեր աշխատանքները, ուսումնասիրո՞ւմ եք հայրենի իշխանությունների գործունեությունը, Ձեզ դո՞ւր է գալիս նրանց աշխատանքը:
-Դա մասնագիտական ոլորտային հանձնախմբերն են, որոնցից յուրաքանչյուրը պատասխանատու է մի ոլորտում ուսումնասիրության, կուսակցության քաղաքականության մշակման համար: Եթե, օրինակ, ասում ենք` գյուղատնտեսության մեջ այս բանը ճիշտ չի, պետք է հիմք ունենանք ասելու համար, թե ինչու ճիշտ չի: Կամ եթե ասում են` սա ճիշտ չի, պետք է առաջարկենք մեր ճիշտ տարբերակը` նույնը Հարկային օրենսդրության հետ կապված, այսպես կոչված, անցումային արդարադատության հետ կապված եւ այլն: Այսինքն` մեր հայտարարությունները մերկապարանոց չլինեն, դա խորը ուսումնասիրության արդյունքում է: Ստվերային կառավարություն ասվածը կուսակցության ժողովում ստեղծված բանաձեւ է, որը ավելի շատ բրիտանական համակարգից եկած բառամթերք է, դա ընդդիմության համապատասխան այն մարդիկ են, ովքեր ոլորտների համար պատասխանատու են: Ստվերային կառավարությունը տասնյակ տարիներ կա, գյուտ չի արվել, դա եղել է տարբեր երկրներում:
-Բայց այժմ ի՞նչ փուլում է գտնվում Ձեր կուսակցական կառավարությունը, ի՞նչ եք ուսումնասիրում, որը վերաբերում է հայրենի կառավարությանը:
-Սովորական ամենօրյա աշխատանք է, սեփական մոտեցումներն են մշակվում, եւ ինչ-որ մի պահի ավելի լայն փաստաթղթով հանդես կգանք:
-Տեղեկություններ կան, որ ՀՅԴ-ն ավելի ակտիվ գործունեություն է սկսելու աշնանը. որքանո՞վ են ճիշտ այդ տեղեկությունները:
-Կուսակցությունն աշխատում է իր բնականոն կյանքով, քննադատությունը սեզոնային բնույթ չունի: Եթե իշխանությունները վաղը մի հատ ինչ-որ փաստաթուղթ հրապարակ բերեն, որը քննադատության ենթակա է, մենք կքննադատենք. չենք սպասելու սեպտեմբերին: Ուղղակի սեպտեմբերը, ինչպես բոլոր երկրներում, կյանքը ավելի ակտիվանում է, ամառն ավելի պասիվ շրջան է: Բայց դա չի նշանակում, որ եթե կա քննադատության ենթակա հարց, լինի, ու մենք չքննադատենք, չկա նման բան: Մենք մարզերում եւս ակտիվ գործունեություն ենք իրականացնում: Գերագույն մարմնի անդամները ու այդ ոլորտային հանձնախմբերի անդամները պարբերաբար մարզեր են այցելում, նորմալ աշխատանքներ ենք իրականացնում, նորմալ կուսակցական կյանք է: Քանի որ մեր կուսակցությունը, ի տարբերություն շատերի, մարզային կառույցներ ունի, այնտեղ եւս շատ ինտենսիվ աշխատում ենք:
-ՀՅԴ ԳՄ-ն վերջին ժամանակներս հանդիպումներ է ունենում տարբեր կուսակցությունների ղեկավարների հետ: Ո՞րն է այդ հանդիպումների նպատակը. գուցե ներքին կոալիցիաներ եք պատրաստվում ստեղծել այդ կուսակցությունների հետ:
-Մենք հանդիպել ենք ԲՀԿ-ի հետ, հանդիպել ենք «Մեկ Հայաստան» կուսակցության հետ, հանդիպում ենք ունեցել Հրանտ Բագրատյանի «Ազատություն» կուսակցության հետ, Դեմոկրատական կուսակցության հետ, Ռամկավար-ազատական կուսակցության հետ, իհարկե շարունակվում են քաղաքական կոնսուլտացիաները: Հանդիպումների նպատակը կուսակցությունների դիրքորոշումների ճշտումներն են տարբեր հարցերի վերաբերյալ` տնտեսական, արտաքին քաղաքականության վերաբերյալ, անցումային արդարադատության վերաբերյալ: Մեզ մոտ ամեն ինչ շատ թափանցիկ է: «Դաշնակցությունը» փորձում է հասկանալ տարբեր կուսակցությունների մոտեցումը հարցերի լայն սպեկտորի շուրջ ու անհրաժեշտության դեպքում նաեւ ջանքերը միավորել: Եթե լինի օրակարգ, որը բոլորի համար ընդունելի է, ապա կհասկանանք մեր անելիքները:
-Իսկ ի՞նչ դիրքորոշում ունի ՀՅԴ-ն վեթինգ իրականացնելու ու անցումային արդարադատության հետ կապված: Արդյոք իշխանություններին հաջողվելո՞ւ է այդ երկու գործընթացները պատվով իրականացնել:
-Նախ պետք է հասկանալ, թե այդ վեթինգն իրենից ինչ է ներկայացնում, ինչ է նշանակում վեթինգ, այդ վեթինգի մեխանիզմը, լիազորությունները ԲԴԽ-ն ունի: Օրենքը հնարավորություններ չի՞ ընձեռնում, որ գնում են օրենքով չնախատեսված քայլերի ու օրենքի խախտմամբ, մասնավորապես` դատարանների մուտքերը փակելը: ԲԴԽ-ն դրա համար է ստեղծված. այն դատավորները, որոնք չեն բավարարում պահանջներին, այդ դատավորների նկատմամբ սանկցիա է կիրառվում: Հանրության համար անհասկանալի բառ մեջբերելով` ինչի՞ ենք ուզում հասնել, ես չեմ հասկանում: Մեզ համար ընդունելի չի վեթինգն է՛լ, անցումային արդարադատությունն է՛լ: Անցումային արդարադատություն տեղի է ունենում այն երկրներում, որտեղ եղել է քաղաքացիական պատերազմ, ու այդ երկիրն անցել է այդ պատերազմով: Այսինքն` ինչ-որ մի պահ օրենքները երկրում չի գործել, ու դա հասարակության համախմբման մեխանիզմ է: Հայաստանն այդ ճանապարհը չի անցել, ՀՀ-ում միշտ օրենքները գործել են, լավն են եղել, վատն են եղել, այլ խնդիր է, բայց դրանք գործել են: Այս իշխանությունը ձեւավորվել է այս օրենսդրությամբ` ընտրվել է վարչապետ, ձեւավորվել է կառավարություն, ընտրվել է նոր խորհրդարան, ու դա արվել է գործող օրենսդրությամբ: Այսինքն` մենք չենք ունեցել օրենսդրական վակուում, որպեսզի վակուումի ժամանակ տեղի ունեցած դեպքերը դատվեն անցումային արդարադատության միջոցով: Անցումային արդարադատությունը կարող է հասարակության մեջ պառակտում մտցնել:
Զրուցեց ՍՈՆԱ ԳՐԻԳՈՐՅԱՆԸ
ԱՂՄԿԱՀԱՐՈՒՅՑ ՆԱԽԱԳԻԾԸ ՀԱՆՐՈՒԹՅԱՆ ՀԵՏ ԿՔՆՆԱՐԿՎԻ
«Ժողովուրդ» օրաթերթի տեղեկությունների համաձայն` ՀՀ ԱԺ «Իմ քայլը» խմբակցության պատգամավոր Արմեն Խաչատրյանի աղմկահարույց նախագիծն առաջիկայում դրվելու է հանրային քննարկումների: Ըստ մեր տեղեկությունների` խմբակցությունում որոշվել է տարբեր շրջանակների հետ օրինագծի նախագիծը քննարկել, որպեսզի հետագայում խնդիրներ չառաջանան:
Հիշեցնենք, որ դեռեւս հունիսին ԱԺ «Իմ քայլը» խմբակցության պատգամավոր Արմեն Խաչատրյանը շրջանառության մեջ էր դրել «Հայաստանի Հանրապետության քրեական օրենսգրքում լրացում կատարելու մասին» նախագիծը առանց հանրային սեկտորի եւ առավել եւս իր խմբակցության հետ քննարկելու: Խմբակցության ղեկավարությունը, անակնկալի գալով իրավիճակից, պատգամավորին հորդորել էր շրջանառությունից հանել նախագիծը, քանի որ տարբեր «ուղղություններով» իշխանությանը սկսեցին քննադատել:
Նշենք, որ նախագծով առաջարկվում էր քրեականացնել իշխանության ներկայացուցչի ծառայողական պարտականությունների կատարմանը խոչընդոտելու նպատակով գործողություններ կատարելը, ինչպես նաեւ իշխանության ներկայացուցչին հրապարակայնորեն վիրավորելը` կապված նրա ծառայողական պարտականությունների կատարման հետ: Ըստ առաջարկի` իրավական ապահովության երաշխիքներ պետք է սահմանել ոչ միայն ոստիկանության ծառայողների, այլեւ իշխանության բոլոր ներկայացուցիչների համար:
«Ժողովուրդ» օրաթերթի տեղեկությունների համաձայն` այժմ պլանավորված է հանդիպումներին հրավիրել նաեւ Աժ տարբեր խմբակցությունների պատգամավորների, որպեսզի կարողանան վերջնական լուծում տալ հարցին: Բայց, ըստ շրջանառվող տեղեկությունների, «Իմ քայլը» խմբակցության պատգամավորը նպատակ ունի ամեն կերպ «անցկացնել» նախագիծը` պահպանելով նախագծի բոլոր կետերը, որն ի սկզբանե շրջանառության մեջ էր դրվել:
Երեկ «Ժողովուրդ» օրաթերթը փորձեց այս հարցերի շուրջ զրուցել ԱԺ «Իմ քայլը» խմբակցության պատգամավոր Արմեն Խաչատրյանի հետ: Պատգամավորն ասաց, որ առաջիկայում ամեն ինչ պարզ կլինի, իրենք կներկայացնեն մանրամասներ` նախագծի ու քննարկումների հետ կապված:
Ս. ԳՐԻԳՈՐՅԱՆ
ԿՐԿԻՆ ԱՐՏԱՀԵՐԹ
«Ժողովուրդ» օրաթերթի տեղեկություններով` նախատեսվում է հուլիսի 9-ին Ազգային Ժողովի արտահերթ նիստ հրավիրել: Մեր տեղեկություններով` հայրենի կառավարությունը առաջիկայում խորհրդարան է ուղարկելու նախագծերի փաթեթ, որն էլ պետք է քննարկվի արտահերթ նիստում: Ազգային ժողովի արտահերթ նիստը գումարելու մասին հարցը կքննարկվի կառավարության այսօրվա նիստում, որի ժամանակ էլ կհաստատվի այն օրակարգը, որի համար հրավիրվում է նիստը: Ամեն դեպքում, «Ժողովուրդ» օրաթերթը տեղեկացավ, որ պարտադիր քննարկման ենթակա նախագծերի թվին է պատկանում նաեւ նվազագույն աշխատավարձի բարձրացման մասին ԱԺ «Իմ քայլը» խմբակցության պատգամավորներ Բաբկեն Թունյանի եւ Վարազդատ Կարապետյանի օրենսդրական նախաձեռնությունը, որը, սակայն, կառավարության ցանկությամբ մի փոքր ձեւափոխվել էր, եւ առաջարկում են նվազագույն աշխատավարձը դարձնել ոչ թե 63 հազար, ինչպես օրենսդիրների նախագծում էր, այլ 68 հազար դրամ: Եվ, ահա, այս հարցն այն հրատապ նախագծերի թվում է, որոնք պետք է քննարկվեն հուլիսի 9-ին մեկնարկող արտահերթ նիստի շրջանակում: Բացի այդ, «Ժողովուրդ» օրաթերթը տեղեկացավ, որ գուցե այս արտահերթ նիստից հետո կրկին կառավարությունը նիստ հրավիրի, քանի որ շատ օրինագծեր կան, որոնք պետք է մինչ ամառվա վերջ ընդունվեն:
ՆԵՂԱՑԵԼ Է
«Ժառանգություն» կուսակցության վարչության նախագահ Անդրանիկ Գրիգորյանի համար անսպասելի է եղել «Քաղաքացիական պայմանագիր» կուսակցության վարչության անդամ Արայիկ Հարությունյանի հայտարարությունը: Ինչպես հայտնի է, ՀՀ վարչապետ Նիկոլ Փաշինյանը հունիսի 16-ին կայացած «Քաղաքացիական պայմանագիր» կուսակցության համաժողովի ժամանակ հայտարարել էր, որ կուսակցությունը կհամագործակցի բոլոր այն քաղաքական ուժերի հետ, որոնք նախկինում պայքարել են նախորդ ռեժիմի դեմ: Իսկ արդեն օրեր անց «Ժողովուրդ» օրաթերթի հետ զրույցում ՔՊ նորընտիր վարչության անդամ Արայիկ Հարությունյանը կոնկրետ անուններ էր տվել, թե որոնք կարող են լինել այդ կուսակցությունները` Ստեփան Դեմիրճյանի ղեկավարած Ժողովրդական կուսակցության, Հովհաննես Հովհաննիսյանի ղեկավարած «Լիբերալ» կուսակցության հետ, Հայ Ազգային կոնգրեսի, սակայն «Ժառանգություն» կուսակցության անունը չէր տվել, եւ հենց այդ հանգամանքն է զարմանալի եղել կուսակցության նախագահի համար: Մասնավորապես, նա «Ժողովուրդ» օրաթերթի հետ զրույցում նշեց. «Ցավոք սրտի, Արայիկ Հարությունյանի հայտարարության մեջ չկար մեր անունը: Մեզ համար դա զարմանալի է: Մենք ողջունում ենք վարչապետի մոտեցումը եւ հույս ունենք, որ այդ փաստը պատահականություն է: Սակայն հետեւելով իշխող քաղաքական ուժի որոշ անդամների գործունեությանը` միգուցե այդտեղ միտում կար»:
.gif)
