Սեպտեմբերի 27-ին համացանցում տեղեկատվություն էր տարածվել, որ Երևան քաղաքի առաջին ատյանի ընդհանուր իրավասության դատարանի դատավոր Աննա Դանիբեկյանը հետապնդվել և ենթարկվել է ճնշումների։
Այս առնչությամբ ArmLur.am-ը զրուցել է ԱԺ պետական-իրավական հարցերի մշտական հանձնաժողովի անդամ «Իմ քայլը» խմբակցության պատգամավոր Արթուր Դավթյանի հետ, ով մեզ հետ զրույցում հայտնեց, որ չի կարող չմեղադրել մի մարդու, ով դատավորի նկատմամբ անհարգալից վերաբերմունք է ցուցաբերել:
«Եթե Աննա Դանիբեկյանի հետ նոր են սկսում այս գործի քննությունից հետո նման կերպ վերաբերվել, ապա կարող եմ տեսնել ուղղորդումներ»,-ասաց նա:
Հիշեցնենք, որ փաստի առթիվ ընդունված հաղորդման հիման վրա ոստիկանության Շենգավիթի բաժնում քրեական գործ է հարուցվել ՀՀ քրեական օրենսգրքի 343-րդ հոդվածի (դատարանի նկատմամբ անհարգալից վերաբերմունք ցուցաբերելը) հատկանիշներով։
Ձեռնարկված միջոցառումների շնորհիվ հայտնաբերվել և ոստիկանության Շենգավիթի բաժին բերման է ենթարկվել հիշյալ հանցագործությունը կատարելու մեջ կասկածվող երիտասարդը։ Վերջինս ձերբակալվել է։ Կատարվում է հետաքննություն։
ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժնի պետ Նաիրա Հարությունյանն էլ հայտնել էր.
«ՀՀ Քննչական կոմիտեն քիչ առաջ վարույթ է ընդունել դատավոր Դանիբեկյանի նկատմամբ անհարգալից վերաբերմունք դրսևորելու դեպքի առթիվ հարուցված քրեական գործը: Պարզվում են դեպքին մասնակից մյուս անձի կամ անձանց ինքնությունը: 1993 թվականին ծնված Նարեկ Մութաֆյանը ձերբակալված է»:
Լիդա Եղիազարյան
.gif)
