Երեկ խորհրդարանում կրքերն ավելի թեժացան այն բանից հետո, երբ ԱԺ ԲՀԿ խմբակցության ղեկավար Գագիկ Ծառուկյանը հայտարարեց, թե իրենք չեն մասնակցելու Սահմանադրական դատարանի նախագահ Հրայր Թովմասյանի լիազորությունները դադարեցնելու գործընթացի նախագծին: ԱԺ «Իմ քայլը» խմբակցությունը հայտարարեց, թե ԲՀԿ-ն քաղաքական որոշում է կայացրել, իսկ ԲՀԿ-ն էլ իր հերթին ասաց, թե իշխանությունների կողմից ներկայացված նախագիծը հիմնազուրկ է:
Խորհրդարանում երեկ ամբողջ օրվա ընթացում ԲՀԿ-«Իմ քայլը» խմբակցության միջեւ հեռահար կռիվ էր ընթանում այն բանի համար, որ ընդդիմություն համարվող ԲՀԿ-ն որոշել է իշխանությունների նախագծին «պադդերժկա» չանել, ավելին` հայտարարել է, թե նախագիծը իրավական առումով կաղում է: «Ժողովուրդ» օրաթերթի հետ իմքայլականները մասնավոր զրույցներում հայտարարում էին, թե իրենք վստահ են, որ կլինեն ԲՀԿ-ականներ, ովքեր այդ օրը ինքնակամ կգան, որպեսզի կողմ քվեարկեն նախագծին, որքան էլ որ ԲՀԿ խմբակցությունը հայտարարել է, թե իրենք չեն մասնակցելու քվեարկությանը:
«Ժողովուրդ» օրաթերթը տեղեկացավ, որ ԲՀԿ-ում էլ որոշել են այս օրերին փաստերով խոսել եւ ապացուցել, որ իմքայլականների ներկայացրած հիմքերը իրավական առումով մերկ են: Ու երեկ ԱԺ ԲՀԿ խմբակցության պատգամավորները, միմյանց հերթ չտալով, խոսում էին այդ ամեն մասին: Մեր տեղեկությունների համաձայն` իմքայլականները շատ ծանր են տարել այդ հանգամանքը ու իրենք էլ իրենց հերթին են որոշել ԲՀԿ-ին անխնա քննադատել:
Տեղեկացնենք, որ այսօր արդեն պետք է մեկնարկի ՍԴ նախագահի լիազորությունները դադարեցնելու մասին նախագծի քննարկումը, Ստրասբուրգից էլ կվերադառնա ԵԽԽՎ հայկական պատվիրակության իշխող թեւը այդ քննարկմանը միանալու համար:
ՍՈՆԱ ԳՐԻԳՈՐՅԱՆ
.gif)
