«Ժողովուրդ» օրաթերթի զրուցակիցը ԱԺ «Իմ քայլը» խմբակցության պատգամավոր Սիփան Փաշինյանն է:
-Պարո՛ն Փաշինյան, ԱԺ ԲՀԿ խմբակցությունը հայտարարեց, որ իրենք չեն մասնակցելու ՍԴ նախագահ Հրայր Թովմասյանի լիազորությունները դադարեցնելու մասին նախագծի քվերակությանը: Ի՞նչ էր սա նշանակում, ինչո՞ւ ԲՀԿ-ում որոշեցին որեւէ կերպ չմասնակցել քվեարկությանը:
-Ես կարծում եմ, որ նման կարեւորություն ունեցող հարցը, որը գլոբալ առումով պետականության ու պետության համար շատ կարեւորագույն հարց է, անընդունելի է, որ որեւիցե քաղաքական ուժ չքվեարկի կամ ձեռնպահ մնա: ՀՀ-ի երկրորդ քաղաքական ուժը իսկապես համարում եմ անընդունելի կեցվածք է ընդունել` չմասնակցելով քվեարկությանը, դիրքորոշում չհայտնելով այս հարցի վերաբերյալ:
-Ըստ Ձեզ` ի՞նչը ստիպեց ԲՀԿ ֆրակցիային նման որոշում կայացնել:
-Ես չեմ կարող ասել, դա էլ է իրավունք, ու իրենք օգտվում են իրենց այդ իրավունքից: Ուղղակի հատկանշական է, որ հենց հոկտեմբերի 2-ին ԲՀԿ խմբակցությունը հանդես եկավ նման հայտարարությամբ, երբ նույն օրը նախորդ տարում գիտեք, թե ինչ իրադարձություններ տեղի ունեցան: Մեկ տարի անց ԲՀԿ-ն հայտարարեց, որ չի մասնակցում քվեարկությանը, սա սիմվոլիկ հայտարարություն է, սիմվոլիկ օրում, եւ մնացած գնահատականը մեկ տարի առաջ տվել է ժողովուրդը իր գործողություններով: Հուսանք` սա զուգադիպություն է: Անորոշությունը ամենավտանգավոր երեւույթն է:
-Ըստ Ձեզ` ի՞նչ ելք է ունենալու Հ. Թովմասյանի լիազորությունները դադարեցնելու գործընթացը, արդյոք Ձեզ հաջողվելո՞ւ է ապահովել անհրաժեշտ ձայների քանակը ու հարցն ուղարկել Սահմանադրական դատարան:
-Ձայներ ապահովելու Ձեր հայտարարության հետ համաձայն չեմ: Ես վստահ եմ, որ ունենալու ենք փայլուն քվեարկության արդյունք, ու հարցն ուղարկվելու է ՍԴ: Սա գաղափարական մոտեցում է, եւ հասարակությունը վստահության պակասի խնդիր ունի այդ մարմնի վերաբերյալ, մենք էլ` որպես օրենսդիր մարմին, նրանով գնահատական ենք տալու:
-Պարո՛ն Փաշինյան, նախօրեին ՀՀ-ում կայացավ ԵԱՏՄ գագաթնաժողովը, շատ երկար քննարկվում էր, թե հնարավոր է` այն Երեւանում չկայանա: Ըստ Ձեզ` ի՞նչ տվեց Հայաստանին այս գագաթնաժողովը, ի՞նչ շահեցինք մենք:
-Կարեւոր էր այդ ամենը նաեւ այն առումով, որ իմիջի հարցն էր, միջազգային ամբողջ մամուլը անդրադարձել է այդ իրադարձությանը: Կարեւոր էր Սինգապուրի հետ պայմանագրի վավերացումը, ի վերջո, Իրանի նախագահն էր այստեղ, ու ես կարծում եմ, որ սա շատ կարեւոր իրադարձություն էր Հայաստանի համար: Բնականաբար, տնտեսական առումով նաեւ իր դրական հետեւանքները ունեցավ, ու վստահ եմ, որ դա վերաբերում է բոլոր ոլորտներին:
-ՀՀ վարչապետ Նիկոլ Փաշինյանը եւ ՌԴ նախագահ Վլադիմիր Պուտինը առանձնազրույց են ունեցել. ինչի՞ մասին են նրանք խոսել, արդյոք քննարկվե՞լ է հանրության համար կարեւորագույն թեմաներից մեկը` գազի գնի թանկացման հարցը:
-Բնականաբար տեղյակ չեմ, թե ինչ խոսակցություն է եղել ՌԴ նախագահի եւ ՀՀ վարչապետի միջեւ, բայց Դուք տեսել եք, որ վարչապետը գրառում է կատարել ու հայտնել, թե ինչ փայլուն ու էֆեկտիվ զրույց են ունեցել ՌԴ նախագահի հետ, ու դրական առումով մի քանի որոշում է կայացվել: Ես վստահ եմ, որ առաջիկայում կտեսնենք այդ որոշումների արդյունքները, կծանոթանանք դրանց: Այս պահին որեւէ իմֆորմացիայի չեմ տիրապետում, որ փոխանցեմ: Ես բարձր եմ գնահատում ՀՀ-ՌԴ փոխհարաբերությունները, ու դրանք ամենօրյա ռեժիմով բոլորի աչքի առաջ ավելի ու ավելի ամրապնդվում են, ավելի ու ավելի գործընկերային են դառնում, ու մենք շարունակելու ենք այս գործընթացը` ի շահ մեր պետության:
Ու կարող եմ ասել, որ այն ցեցերը, որոնք պատրաստվում են ստվեր գցել այս գործընթացի վրա, իրենց մոտ ուղղակի չի ստացվել, չի ստացվելու, որովհետեւ մի բան պետք է հաշվի առնենք, որ հնարավոր չէ ուղղակի գումարի դիմաց փչացնել երկու պետությունների փոխհարաբերությունները: Գլոբալ առումով կարեւորը մեր երկիրն է, մեր պետականությունն է եւ, առհասարակ, այն պրոցեսները, այն դրական միտումները, այն փոփոխությունները, որոնք այսօր տեղի են ունենում մեր երկրներում:
-Պարո՛ն Փաշինյան, ըստ շրջանառվող տեղեկությունների` շուտով հզոր ընդդիմադիր ուժ է ձեւավորվելու Հայաստանում, որի առաջնորդը կարող է լինել Ազգային անվտանգության ծառայության նախկին տնօրեն Արթուր Վանեցյանը: Արդյոք նման ընդդիմության լինելու հարցը անհանգստացնո՞ւմ է ներկայիս իշխանություններին, քանի որ, նույն տեղեկությունների համաձայն, իշխանությունները մտահոգված են այդ հանգամանքով:
-Արթուր Վանեցյանը հեղափոխությունից առաջ եղել է ԱԱԾ աշխատակից, հեղափոխությունից հետո Արթուր Վանեցյանը դարձել է ԱԱԾ տնօրեն…
-Ձեր իշխանությունն է Ա. Վանեցյանին ԱԱԾ տնօրեն նշանակել ու շատ հիացական խոսքերով ներկայացրել նրա գործունեությունը…
-Այո, բայց ինչ-որ ժամանակ հետո Արթուր Վանեցյանը հեռացվել է աշխատանքից, ու այս տրամաբանության մեջ մարդիկ հարցադրումներ են անում, ոչ թե այն մասին, թե ինչու ազատվեց աշխատանքից Արթուր Վանեցյանը` սպասելով պատասխանին, թե արդյոք նա ինչ-որ բան ճիշտ չէր արել, կամ ազատումը սուբյեկտիվ է եղել, այլ բոլորը հարցնում են, թե որ մեկի հետ ինչ կապ ուներ, որ դուրս է եկել: Եկեք մի բան ֆիքսենք. ուժեղ ընդդիմությունը ուժեղ է ժողովրդով…
Ներողություն եմ խնդրում, բայց ես այսօր չեմ տեսնում… Ոչ մեկը քրեաօլիգարխիկ, որեւիցե ներկայացուցչի հետ չի կարող ընդդիմություն ձեւավորել: Ես չեմ խոսում կոնկրետ դեպքի մասին, ես խոսում եմ առհասարակ. ՀՀ-ում օլիգարխներ չկան, իսկ այն մարդիկ, ովքեր իրենց համարում են կամ չեն կարողանում դուրս գալ այն կարգավիճակից, ինչ ունեցել են նախկինում, մենք իրենց կհանենք այդ կարգավիճակից շատ հանգիստ ու շատ ինքնավստահ ու հաստատուն քայլերով:
Չքննարկելով Արթուր Վանեցյանի մարդկային որակները, դիտարկելով որպես ԱԱԾ նախկին տնօրեն` պետք է ասեմ` մեղմ ասած, չի բավարարել այն գաղափարները, որը կրում է այսօրվա իշխանությունները: Մենք ասել ու ասելու ենք, որ բոլոր կոռուպցիոներները դատվելու են, բոլորը վերադարձնելու են իրենց գողացվածը, եւ չի լինելու որեւէ մեկը, որ իրենց հովանավորյալ լինի կամ փորձի իշխանության քթի տակ խաղեր տալ: Բոլոր նրանք, ովքեր խաղեր կտան, կգնան:
Զրուցեց ՍՈՆԱ ԳՐԻԳՈՐՅԱՆԸ
.gif)
